﻿Mosesgo Godigo Bomai Po Ma Pusali.
29.
Te Genuai Bidigo Israel dabe dali te kantri Moapde dąų wali po page dabe te e dao. Agai te Israel dabe dali kontrak po dąų wali po wadolama, ma wali, te Sainai bulu dude polobadu wali po. 
Mosesgo tigidali Israel dabe i olama, sisinama, agai augwalibolo te tama po wali, “Dagego te Genuai Bidigo te Isip king tuni bidi dali yali sę dagego polo suai dao, te aga ofisa dabe dali, me agai bulu tigidali tomode yali sę. 
Tama dagego gedugo digi te augwali tigide te dwai gasi sali hauwa mu sualio, me te haniani boma pai sę ebo me, te Genuai Bidigo te genuai sę dabe ebo te suali dao. 
Tiali goli, Genuai Bidigo dagego te sę dabe yali page konemainu sula tagalobeo, tama agai dagego gedugo tonomainu ebeo, tama me dagego ologo te sę yali page odomainogo me tagalobeo. Tama dage tama bida bida asidu gagali, megiba te usu naga sobao. 
Tama Genuai Bidigo te po wali, ‘Te kibu be bidi sese si 40 eno dage kemi sane buludu odasa pai dao. Tama dagego ugwa dabe me, su dabe me, togwa pai menio. Mu menio. 
Dagego bret, me wain, me bia me meni yai dao. Tiali goli, eno dage bugagia tonaluai, te dagego bugagia konemai hagede, te ena da Genuai Bidi dao, dagego God dao omainogo,’ wali.” 
Tama Mosesgo po geninama weyu, te po wali, “Te da te buluba sabolagasali sogo da, te Hesbon tuni bidi king Sihon, me Basan tuni bidi king Ok, augwali si aselama, da dali hwįagasai dao. Tiali goli, dago augwali aiyaba elaluai dao. 
Tama dago augwaligo tǫ selama, dago Ruben hani de Gat hani, me te Manase hani bugai, augwalibolo dobawai dao,” wali. 
Tama Mosesgo te po me wali, “Tigidali sogo dagego te dąų wali po wali pao. Tama eyu da, dagego tigidali ebo sę dabe wiegi yai pedalaibao. 
Megi dage Genuai Bidi dago Godigo gedude dolalubao, dage me, te tobolu bidi dabe me, haniani ofisa dabe me, 
te we dabe sibi me, wai puluba me, te gasa bulu bidi dabe dage tomode bidibo me, te augwali dage dali bidiyu, dagego isi bagala mayu, me wę tula mayu eyu bidibo. 
Dage megi ede bidibao, te Genuai Bidi dago Godigo gesi noma kontrak o dąų walobo po sainogo te bidibao, te dage dali dąų walobo po. Tama dagego te po wali paibao po olama, tama te po dąų walao. 
Tama tiyu da, Genuai Bidigo dage aga we bidi pedalomainu elama, tama aga dagego God bidaibao. Te agai dagebolo dąų waliyu, me duga wąį dabebolo dąų waliyu yali gilama, te Abraham, me Aisak, me Jekopbolo wali gilama. 
Godigo te kontrak o dąų wabo po da, megi aga gedude megi e dolalubo we bidi dabe da dali naga dąų walobeo. Menio. Agai dago wąį nosali pedalabo wai dabe dali me te ebao. Tama da tigidaligo wali paibao olama dąų wao,” Mosesgo te po wai. 
“Dagego ma kone palao, dage mena tama te Isip bulude bidai dawe koneiąo. Tama dagego dage te gasa bidi hanigo tǫdu asiyu suali, te nai dabe me kone paliąo. 
Dagego te mu dwai tibo god dabe augwaligo nigo nigali, me masigigo nigali, me golgo nigali, me silvago nigali, te suali dao. Te tibo god dabe te dwai nai mu dao. 
Dagego bugagia mu tonaluiąo, te dage megi ede dolalubo we dabego, o bidi dabego, o bidigo we wai puluba deligo me, o bidi wąį ede dolalubo bage, dagego Genuai Bidi dago God agaba tudi me ola maidali weyu, tama te haniani dwai godiba lotu me waidali weyu, te gasa kantri bidi dabego god dabeba. Tialima, dagego te tobage kolesaga eyu da, teda te ni mego bono te ha ebo bono tiwai dao. Nosali agai honu genuai elama, genuai mu igi pabode da, te agai bidi hauwa mu dolaibao. 
Dage tigidaligo bugagia mu tonaluiąo, te bidi me eno megi ede pusali te bomai po odali bidigo, te bidi me deligo te po sela sąnama, tama aga bugagia bidaibao homu yaibao. Tiali te bidi mego te po sela sąyani da, teda te tialigo dage sese tama dolomainu yaibao. Te wiegi yai bidi dabe me, te dwai bidi dabe dali si tama dolaibao. 
Godigo te tama bidi dabego sęgę munu me sela sągobeo. Tiali goli, God sębę mu elama, tama isi delama, posolo genuai mu ebo tiwai mu yaibao. Tama te dwai sę dabe te bukude wali te dwai sę dabe te bidi tigide pedalaibao, te sę tama ela ela pidubadi, te Genuai Bidigo aga dolama, silibo siba usu nigi paibao. 
Tama Genuai Bidigo te bidi deli naga dįą selama, dene menama, tama aga mu doloba usu naibao. Te Genuai Bidigo te tigidali dwai sę aga tigide yaibao, tama aga mu tama dolaibao, te agai e bukude wali gilama, te bomai po bukude wali gilama, agai te kontrak dąų walali po wali pisąma yali bidide te sę yaibao,” wali. 
“Nosali duga wai nosali pedalobo, me gasa bulu bidi hani augwaligo te dwai sę yali dabe, me te sęgę dabe te Godigo dagego kantride yali suaibao. 
Te gi dabe dola silama, dwai olo elaluaibao. Tama te tamu me dwai pauda nai salfa, te ni me nosai isilibo nai si te gide pągąna paibao, tama dagego nai me bulabo usu me egobeo. Tama te nosai dabe me te tǫde me hologobeo. Tama tialima, dagego bulu te Sodom de Gomora si tiwai tama yaibao, te Atma de Seboim hanu si tiwai me. Te hanu dabe Genuai Bidigo polobadu dolai dao, te agai wado elama, tama agai sębę dwai mu yali sogo. 
Tama te tigidali bulu tǫ we bidi dabego hanalua paibao, ‘Magi baso Godigo te Israel dabe augwaligo bulude te tama tialiwe?’ te po weyu, ‘Magi baso agai augwali dali sębę dwai mu yaliwe?’ te po waibao. 
Tama augwaligo augwa digi po ma wei ponoyu, te po waibao, ‘Magi baso menio, te we bidigo te augwa wąįgo God augwali Isip bulude bidibadi augwali te odasa asali, te Godigo dąų walali po sela sąwai baso da. 
Te Israel dabe augwaligo tibo godiba lotu wali. Te god dabe augwaligo polobadu lotu po me wai menio. Te Genuai Bidigo augwali te nai dabeba lotu waidali weyu, habu selai dao. 
Te tama tibaso, Genuai Bidigo aga we bidi dabe dali sębę elama, tama agai e bukude elalubo dwai nai dabe te augwaligo bulude pedalama elalubao. 
Genuai Bidi moni sębę elama, wado po dwai mu yali. Tama tibaso, agai augwali augwa tǫde sela sąnama, tama augwali gasa buluba dabe tagala palali. Tama megi me augwali te tama bidibao,’ te bagego nosali te po waibao,” Mosesgo te po wali. 
Tama Mosesgo po geninama ma weyu, te po wali, “Te Genuai Bidi dago God agai dabolo hanilisąma geme duali po meba te elalubao. Awe, te usu dao, te agai sę dao. Tiali goli, agai bomai po dabolo hanilama pusa mani, tama dago nosali ame nabo wąį dabego me, dago me, te bomai po wali tigidali sogo pomainogo yali,” Mosesgo te po wali. 
