﻿Mosesgo Godigo Bomai Po Ma Pusali.
34.
Te Mosesgo te Moap dabego malu bulu tagalama, tama te bulu du Neboba holali, tama te Pisga bulu du boiabiba ugwaba holali, te giliga asobo badu, te Jeriko hanuba dolo si badu. Tama Moses te bulude dolalubadi, Genuai Bidigo agai te Israel dabebolo maiabo tǫ sese tama ola mani. Genuai Bidigo agabolo te Gileat tǫ dage ola menama, tama u badu not badu te Dan hanuba usu nigi pali. 
Tama Naptali hanigo tǫ sese, me Efraim hanigo tǫ sese, me te Manase hanigo tǫ sese ola mena silali, tama Juda hanigo tǫdu pelama, te genuai tamu ąį Mediterenianba usu nigi pali, te giliga dega sabo badu. 
Tama agai Mosesbolo Judago saut badu agai genuai tǫ mu ola mani. Tama me Jerikode elalubo malu tǫ me ola mani, te hanude ni det hauwa mu elaluali, tama pelama, Soar u badu usu nigi pali, te saut badu. 
Te tama tialima, Genuai Bidigo Mosesbolo te po walali, “Eno te tǫ te Abraham, me Aisak, me Jekop, augwalibolo te tǫ te augwa wąį dabebolo mawaiba po eno augwali dali dąų walai dao, polobadu mu. Megi eno nago sumainu sula tagalali dao. Tiali goli, eno nage te tǫ tomoba pomainogo sula tagalogobeo,” wali. 
Tama tialima, Moses, te Genuai Bidigo sę ebo bidi, aga te Moap dabego tǫ dagede tede bidama, tama aga tede isali, te Genuai Bidigo agabolo te hasia polo walali gilama tama tiali. 
Tama Genuai Bidigo Mosesgo tigi te Moap bulude te hanu me te Betpeor hanu dolo si te odogo malu bulude pubulali. Tama megi me te bidi mego te Mosesgo gų page mena bulude odogode elalubawe, bidigo me konebeo. 
Moses agai kibu be 120 kibu be elama, aga isali, tama aga bomo elalubadi, tama agai gedu wiegi yai elaluali. 
Te Moses polo isai digi Israel dabe augwali te Moap dabego te malu bulude bidiyu, augwali gela udubadi, 30 be bubuga usu nani. 
Te tama tilama, nosali da, teda Godigo Nungo ogwa Josuabolo wiegi yai homu kolesaga me kolesaga dabe hauwa mu mani. Magi baso meni, Mosesgo aga hasegelama, bidimainogo sa muai baso. Tama te we bidigo Josuago po odama, tama augwaligo te bomai po dabe Genuai Bidigo Mosesgo nogode mani po wali pali. 
Tama megi tama usu nagasiyu da, Israel dabego profet bidi me te Moses tiwai bidi me menio. Genuai Bidigo Moses dali po te bidi sigo augwa hasi po wabo tiwai tama po weyu yai dao. 
Genuai Bidigo Moses te Isip bulu tuni bidi me te tuni bidi aga ofisa bidi dabe me agai bulu tigidalide haniani bomai sę emainogo tagala palali. Te meba profet dabego te Mosesgo yali te bomai sę yali tiwai usu me egobeo. 
Tama augwaligo genuai sę dabe me te we bidi dabe wi ilainogo yali, te sę tiwai usu me egobeo, te Israel we bidi tomode yali tiwai, te we bidigo gedude yali tiwai. 
