﻿Josua.
4.
Te tigidali Israel dabego te wę Jordan nogola silali sogo, Genuai Bidigo te tiwai po Josuabolo wai, 
“Te Israel hani deli delide, te nago bidi deli deli siyu, tama nogo si olama, sągą badu si bidi nigilao,” po wai. 
“Tama augwalibolo te po mao, ‘Dagego te pris dabe dolalubo badu te Jordan wę tomode te masigi nogo si olama, sągągo si sao. Tama te masigi dabe dagego te megi hulide bidabo pesage nigibo digi te tolasa asama, muao,’” wai. 
Tama po obaso, Josuago te bidi nogo si olama, sągągo si bidi nigilama, tama agai augwali i olama, asobode tama augwalibolo te po wai, 
“Dage te Jordan ąįba dulama, tama te dago Genuai Bidi Godigo te dąų wali po muani halobage tolali bidi pris dabe augwali edelao. Dagego te genuai masigi dabe siąo, te Israel hani nogo si olama, sągą badu si usu nama sao. Tama dagego te deli deli masigi te duga nagede munama, tama tolasa asao. 
Te masigi dabede te Genuai Bidigo yali sę dabede te we bidi augwaligo homude konealuabo sę dąį tama ilaibao. Tama nosali nosali sogo te duga wąį te nosali ame nabo wai dabego dagebolo te masigi dabe tede magi baso munalubawe po hanalu obaso da, 
teda dagego augwalibolo te po waiąo, te Genuai Bidigo dąų wali po muani halobagego te wę Jordan nogali sogo te wę sula sai elalubadi, te masigi dabe sai dao po wainogo tama tiwai. Tama te masigi dabego te Israel dabego homu te sesemane bidada pabo sogo hogodomainogo tama tiao,” wali. 
Tialima, te bidi dabego te Josuago po wali gilama tama tiali. Augwali te Jordan wę tomoba pelama, tama te masigi nogo si olama, sągągo si sai, te Genuai Bidigo Josuabolo wali po gilama tiwai. Tama augwaligo te masigi dabe te sogo bidabo pesageba tolasa aselama, muagasai. 
Tama Josuago te gasa masigi dabe te nogo si olama, sągą badu si masigi te pris dabego te dąų wali po muani halobage tolaluyu dolaluali madi, te Jordan ąį tomode te sesege badu te masigi dabe dodolai. Tama te masigi dabe me elalubo dao. 
Te pris dabe te Jordan ąį tomode me dolaludubadi, te bidi dabego te tigidali sę te Genuai Bidigo me, te Mosesgo me, te Josuabolo po wali sę tigidali ela siligi peyu, usu nigi pai. Te we bidi augwali polo mu te wę u badu sabolai. 
Tama nosali augwali sabola silaide, te Genuai Bidigo dąų wali po munalubo halobage tolali pris bidi dabe, augwali me te augwali pela saboligi pelama, tama nosali augwali tudiba ilama, augwali ma poligi pai dao. 
Te Rubengo bidi hani dabe me, te Gatgo hani me, te Manasego hani me badu badi, augwaligo te hwįainogo sisi elama, tama augwali polasa peyu, te gasa we bidi dabe augwali tudiba togolama, te Mosesgo augwalibolo wali po tiwai gilama yai. 
Te hani selago hwįabo sisi yali bidi hani te bidi sese umabo, 40,000 bidigo te hwįainu sisi yai, tama Genuai Bidigo gedude augwali te doloba pai tǫ odogo malu me deli te hanu Jeriko pąba sabolai. 
Te Israel dabego te sogode te Genuai Bidigo augwalibolo yali sę dabe sulama, tama augwaligo te Josua nogi ugwaba sali, augwaligo te Mosesbolo te tigidali sogo te aga nogi ugwaba sidubadi, te aga isiboba usu nagasali tiwai gilama yai dao. 
Genuai Bidigo Josuabolo te po wali, 
“Te pris dabebolo te dąų wali po tolali bage augwaligo te wę Jordan tagalama, edaba holao po wao,” wali, 
tama Josuago te tiwai po augwalibolo wai. 
Tama te dąų wali po muani halobage tolali bage te pris dabe te sesegeba sabolai digi, te wę dąų olaluali te gelama, tama aga soali pesagede dolo ma soai dao, genuai mu eyu tama yali. 
Te we bidi augwaligo te Jordan wę nogali, te polua delide, te dei nogo si, te sogo te wę nogali, tama augwali bidali pesage te Gilgal, tede te Jeriko hanu pąde te giliga pedalubo badu te pesage nigai dao. 
Te Gilgalde Josuago te masigi nogo si olama, sągą badu si masigi te Jordan ąįde te bidi dabego sali masigi tede ugwaba dodolai. 
Tama Josuago Israel dabebolo te tiwai po wai, “Nosali, te ame nabo wai dabego te augwa aya dabebolo te tobage po hanalu obaso, te e masigi dabe magi baso ede munalubawe po obaso da, 
teda augwaligo augwalibolo te po waiąo, ‘Te Israel dabego te Jordan wę te wę sula sai digi nogali te dąį ilali te dao,’ te po wao. 
Magi baso meni, te dago Genuai Bidi Godigo te wę Jordan wai ilali, te dage asobadi polasa soyu tama tiwai, te dage gasa badu sabolomainu usu ilai, te agai te Nosai Elalubo Tamu Ąį wai ilali madi te da nogali tiwai yai dao. 
Genuai Bidigo te sę yaligo da, te tigidali tǫ badu bidibo tigidali bidigo te agai bomo konemainu elama, tama dagego duga Genuai Bidi Godibolo sesemane sogo te lotu po omainogo yai dao,” Josuago te po wali. 
