﻿Josua.
13.
Megi da, Josua monu dabe mu yai. Tama Genuai Bidigo agabolo te po wai, “Nage monu dabe yalio. Tiali goli, te bulu hauwa te Israel dabego me sisąbadi elalubao. 
Te elalubo bulu dabe te e dao: te tigidali Filistia dabego bulu me, te Gesur dabego bulu tigidali badi, 
te tǫ te dwasianu wę Sihor te Isip tǫ sesede elalubo, tedu gagalasa, te palio olama, te Eklon tǫ bogo baduba dąį igi pelama, hasia bolo te Kenan dabe bidaluai madi. Te Filistia dabe tonalubo bidi dabe te bulu Gasade me, te Asdot, me te Askelon, me Gat, me Eklon, me tama te Av dabego moni tǫ te giliga dega sabo bogo badu elalubao. 
Te tigidali Kenan, me Meara dabego tigidali elalubo tǫ, te Saidon dabego tǫde augwali bidibao, te tǫ pali te Afekba usu nama, te Amor dabe bidibo sesegeba dąį igi pai. 
Te Gebal bulu bidi hani dabego tǫ, te tigidali Lebanon tedu pelama, te sia ge pedalubo badu dąį igi pali, te Balgat sesegede te Hermon bulu du pąde, tedu te bulu du baguali madiba pelama, usu nigi pali, te bulu augwaligo Hamat nogi yai,” wali. 
“Tigidali Saidon bage, te augwali te Lebanon, me te Misrefot Maim te bulu du dabe elalubo tomo bulude bidalubo, tigidali te moni pedai hanu tomode bidibao. Te Israel dabe augwali asidubadi, tama eno digi te Saidon bage augwali gudulama, sela sąwaibao. Tama tialima, nago te tǫ usu selama, tama te Israel dabe augwalibolo menama, te augwa tǫ mu gagalama bidaibao. Nago te sę eno nagebolo wabo po tiwai gilama yao. 
Tialima, megi da, te tǫ te Israel hani a naga me si me si dabebolo, me te Manasego hani me badubolo me, te tǫ dobolama, teda augwaligo te augwa tǫ mu tiwai selama, bidimainogo obao,” Genuai Bidigo te Josuabolo te po wai. 
Te Ruben hanigo, me Gat, me Manasego hani me badugo te Jordan wę te sia ge pedalubo badu te tǫ polobadu sai. Te Moses, Genuai Bidigo sę bidigo, te tǫ augwalibolo mawai dao. 
Te augwaligo sali tǫ te Arnon odogo tǫ sesegede elalubo bulu nogi Aroer, tedu gagalama, tama te odogo tomode elalubo hanu ela soayu, tama te Medeba dabego dolo elalubo tǫdu pelama, te Dibon tǫba usu nigi palio. 
Tama augwaligo te Sihongo hanu tigidali sali, te Amor dabe tuni bidigo hanu sai. Polobadu te Sihon aga digi te Hesbonde bidiyu, tama agai te hanu dabe tolaluali te Amor dabe bidalubo sesege dąį igi pai. 
Augwaligo te Gileat dabego tǫ me sali, tama te Gesur, me Maka dabego tǫ me, tama te Hermon bulu du pedai tigidali me, tama te Basandu te Saleka teba usu nigi pelama, 
tama te Okgo tonalubo tǫ tigidali sobadi, te aga tuni bidi te Astarot me Edreide bidali sogo. Ok aga te Refaim bage me deli, tama aga te augwaligo sabi siminani dao. Mosesgo te boi hwįnama, te Refaim dabe augwali aiyaba elaluama, tama augwali ela gudulali. 
Tiali goli, te Israel dabe augwaligo te Gesur dabe, me te Maka dabe dali te augwali ela gudulube. Augwali te Israel dabe dali hodobo bidada peyu, tama megi e po asębo sogoba usu nagasai. 
Tiali goli, Mosesgo te Livai hani te tǫ me masiąwai. Magi baso meni, te Israel we bidi dabego Genuai Bidiba ofa ilabo nai dabe sela asobo si da, te Livai dabego meba sabo dao. Te Genuai Bidigo Mosesbolo wali po gilama yali. 
Mosesgo te tǫ pedai me badu deli te Rubengo hani sibi dabe deli delibolo menama, tama te augwa tǫ mu pedelali. 
Te augwaligo hanu tǫ pedai te Arnon odogo tǫ sesegede elalubo bulu nogi Aroer tede gagalama, tama te odogo tomode elalubo hanu ela soayu, tama te Medeba dabego dolo elalubo tǫ tigidali tedu pelama, 
tama pelama, te Hesbonba sabolama, te tǫ malu dolo tǫde te tigidali hanu elaluali: Dibon, me Bamotbal, me Bet Balmeon, 
me Jahas, me Kedemot, Mefat, 
me Kiriataim, me Sipma, me Seretsahar, te tama bulu te malu tǫ te dwasianu bulu du ugwadu bagede elaluali, 
tama te Betpeor, tama te Pisga bulu du pedai badu me, te Bet Jesimot, 
me te gasa tigidali hanu me te tǫ malude elaluali. Tama te Amor dabe tigidali hanu dabe te tuni bidi Sihon deligo tonaluali. Aga te Hesbonde te gavman tuni bidi bidali. Mosesgo te boide hwįnama, tama aga aiyaba elalubadi, tama te Midian dabe tobolu bidi dabe me aiyaba elalubadi yali. Augwali da, te Evi, me Rekem, me Sur, me Hur, me Reba. Tigidali te hanude bidalubadi, tama te gavman tuni bidi Sihongo te augwa bidibo madi tonalumainu sę mani. 
Tama Balam, te Beorgo ogwa, tama te bidigo te nosali pedelabo sę po wabo koneai bidi, te Israel dabego aga me ela muani. 
Te wę Jordan te Rubengo hani bidibo sesegede elaluali. Tama te hanu me te bulu dabe te Rubengo hani sibi deli deligo te augwa tǫ da olama, sesa pali. 
Tama Mosesgo te tǫ te Gatgo hani sibi tigidali deli delibolo doba yali, tama augwa tǫ gagalama bidali. 
Jasago tǫ me te Gileat tigidali hanu, tama te Amon dabego tǫ pedai te Aroer teba usu nama, te Amon dabego tǫ tomode elaluali, te giliga ge pedalubo madi, te Raba tǫ pąde elaluali. 
Te tǫ te Hesbonde gagalasa, pelama, te Ramatmispe, me Betonim, me te Mahanaim, te pelama, te Lodebar te sesegeba usu nigi pali. 
Te Jordan wę tǫ malude elaluali bulu te Betharam, me Betnimra, me Sukot, me Safon, te gavman tuni bidi Sihongo tonaluali tǫ pedai badu, te Hesbon tǫ pedai badu, te Jordan wę te badu gagalasa, te giliga pedalu badu sabolama, tama te sigi ąį Galili tǫ badu dąį igi pelama sai. 
Tama te hanu dabe me te bulu dabe, te Gatgo hani sibi te bagego te augwa tǫ da olama, sali. 
Tama Mosesgo te Manasego hani sibi dabe deli delibolo te tǫ me badu te augwali bidimainu mani. 
Augwaligo sali tǫ te Mahanaimde gagalasa, pelama, tama te Basan pedai tigidali badu sali, te gavman tuni bidi Ok tego polobadu tonaluali hanu Basan da. Tama augwaligo te Jairgo tonaluali hanu te bidi sese sela 60 hanu te Basande tomode elaluali tǫ tigidali sali. 
Te tǫ sali te Gileat te badu me sali, tama te Astarot, me Edrei me sigi pali, te gavman bidi Okgo polobadu tonaluali hanu dabe da. Tama Mosesgo te tǫ dabe te Makirgo hani sibi dabe deli delibolo mani, te Manasego ogwa dao. 
Te tiwai naga Mosesgo te giliga pedalubo badu tǫ, te Jeriko me Jordan tǫ, te sa muani, te aga Moap dabego te tǫ malude bidibo sogo tiali. 
Tiali goli, Mosesgo te Livaigo hanibolo te tǫ me masiąwai. Agai augwalibolo te po wali, “God, te da Israel dabego Genuai Bidi, agade te dagego sę yaibao, tama tibaso te tǫ me badu dagego me sogobeo,” wali. 
