﻿Josua.
18.
Te Israel dabe augwaligo boi hwįnama, te tigidali bulu bidi dabe aiyaba elaluama, tama augwa hani tigidali te Siloba sisinani. Tede augwaligo te God dali sisinabo lotu be, te ugwa be, te augwaligo dodolama muai. 
Tiali goli, te a naga olama, me badu si hani te augwali tǫ sisąwai. 
Tama tibaso, Josuago te Israel dabe augwalibolo wali, “God, te duga wąįgo Genuai Bidigo, te tǫ dagebolo mawai. Dagego magi nai tonaludu, te dagego sabewe? 
Te tigidali hani deli delide te bidi sela naga nidigili pao. Tama eno augwali te tigidali tǫ pedai usu nama tagala palama, tama augwa digi te augwa hanigo sabo tǫ dąį iligi paibao. Tama elama, tama augwaligo te tǫde po te ripot te asęaibao. Tama nosali augwali ena bidibo digi ma asaibao. 
Augwaligo te tǫ a naga olama, me si te tama pedemainu yaibao. Te Judago hani augwali te saut badu te augwa sali tǫde bidiyu, tama te Josepgo hani augwali te not badu augwaligo sali tǫde bidiyu emainu yaibao. 
Tama dagego te a naga olama, me si te tama tǫ suali po te asęnama, tama enaba selasa asao. Nosali eno te Genuai Bidigo gedude te tǫ sabo po dodolobo sę elama, te mena tǫ mu Godigo dagebolo sa mubowe, te koneaibao. 
Tiali goli, te Livaigo hani da, te Genuai Bidigo pris sę ebo bage bidaibao, tama augwaligo te dagego tǫ sabo tiwai gilama te tǫ me sogobeo. Tama Gatgo hani me, Rubengo hani me, Manasego hani bage me badu me, augwali te wę Jordan te giliga pedalubo u badu te tǫ polobadu sai dao. Moses te Genuai Bidigo sę bidigo te tǫ augwali mani,” Josuago te po wai. 
Josuago te tǫ sugi pelama, te po asęabo bidi dabebolo te e tiwai po wali, “Dage pelama, te tigidali tǫ sulama, tama tǫ po asęnama, tama enaba ma selasa asao. Tama e bulu Silode eno te tǫ sabo po dodolobo sę gagali elama, te mena tǫ te Genuai Bidigo dagego hani deli delibolo mabowe naga koneaibao.” Josuago te po wai. Tialima, te bidi dabego te Josuago po odama, tama augwali pali. 
Tama augwali te tigidali tǫ bilama, tama augwaligo te suali po te buku me delide asęani. Augwaligo te tǫ a naga olama, me badu si togwali, tama te hanu dabe nogi me asęani. Nosali augwali te Josua bidibo madi te Siloba ma pali. 
Tialima, Josuago te tǫ sabo po dodolobo sę elama, te mena tǫ Genuai Bidigo augwalibolo mabowe naga koneainogo yali. Tama nosali agai te tǫ dobolama, te Israel hani deli deli augwaliba te tǫ mani. 
Te Benjamingo hani sibi deli deligo tǫ te Juda hani me Josep hani si tomode te tǫ dąį ilama, sali. 
Te not pedai badu te augwaligo tǫ sabo dąį gagali, te wę Jordande gagalasa pelama, te dwasianu bulu duba holama, te not pedai badu te bulu Jerikoba sabolali. Tama dąį pali, te giliga dega sigi pabo te bulu dude begelalima, te masigi kemi olo tǫ badu te Betaven, teba dąį igi pali. 
Tama te dąį pidubadi geani, te saut pedai badu te dwasianu bulu du me Lus teba dąį igi pali, te augwaligo te nogi Betel wali, tama te Atarot Adar teba aiya dulali, te bulu du me deli Bethoron pąde ugwadu elaluali, te saut pedai badu dao. 
Tama te dąį gasaba poloba begelali. Te saut badu tagalama, te sia ge degegi pabo badu te bulu du a badu, te saut badu te Bethoron teba sabolali. Tama dąį pali, te hanu Kiriat Bal, te nogi augwaligo Kiriat Jearim wabo, teba pedelali. Te hanu te Juda dabego hanu. Te giliga dega sigi pabo te dąį pedai badu elaluali. 
Te saut badu dąį te Kiriat Jearimde gagalasa pelama, te giliga dega sabo badu tugi pelama, te Neptoa dabego ulu wę elalubo madiba sabolali. 
Tama te dulali te bulu du dolalubo sesege badu te Hinomgo ogwago tǫ malu elalubo pąba pedelali. Te bulu du te not badu te Refaim dabego malu tǫ sesege badu elaluali. Tama dąį pali te saut badu te Hinomgo tǫ malu bolama, tama te Jebus dabego dwasianu bulu du togolama, tama palima, te Enrogel te pedai badu dąį igi pali. 
Tama dąį pali, te not badu te Ensemes sabolama, tama pali, te Gelilot dąį igi pelama, te bulu sesege Adumim pedai badu elaluali. Tama te dąį dulali, te Rubengo ogwa Bohango genuai masigi elaluali madiba sabolali. 
Tama te dąį yaligo te dwasianu bulu du dabe bolali, te Betaraba teba sabolama, tama dulalima, te Jordan tǫ maluba sabolali. 
Tama dąį pali, te dwasianu bulu du te not badu te Bethokla teba dąį igi pelama, tama te Isai Tamu Ąį te wę Jordan age siba pedelali. Te saut sesege badu dao. 
Te giliga pedalubo badu te dąį pali, te wę Jordan wali pali. Te dąį yali te tǫ te Benjamin hani sibi dabego sabo tǫ dao. 
Te Benjamingo hanu dabe te e tama elaluali, Jeriko, Bethokla, Emek Kesis, 
Betaraba, Semaraim, Betel, 
Avim, Para, Ofra, 
Kefar Amoni, Opni, Geba, te 12 hanu dabe, te pąde bulu dabe dali elaluali. 
Te e tama hanu me elaluali, Gibeon, Rama, Berot, 
Mispa, Kefira, Mosa, 
Rekem, Irpel, Tarala, 
Sela, Haelep, Jebus, te augwaligo Jerusalem nogi yali, Gibea, Kiriat Jearim, te tama hanu elaluali. Te 14 hanu dabe, te pąde bulu dabe dali elaluali. Te tǫ pedai te Benjamingo hanigo sali tǫ me hanu dali, te dao. 
