﻿Te Israel Tobolu Bidi Dabe.
5.
Te sogo te we Debora, me Barak, te Abinoamgo ogwa, augwali sigo te tama tęąbi po wai: 
“Genuai Bidigo nogi ugwaba sao! Te Israel tobolu bidi dabe augwaligo wąbi hwįabo bomo mu yali. Tigidali bidi wiegi yai homu pemene eyu, hwįabo homu yai!” 
“Odao, dage gavman tuni bidi dabeo! Olo bugagia munama, dage tobolu bidi dabe dao! Te eno tęąbi me deli weyu, tama musik gagali te Genuai Bidiba waibao, te Israel dabe dago God dao!” 
“Genuai Bidi, nago te Seir bulu du dabe taga solama, te Idomgo bulu taga soyu, tama aiyaba dulai, tialima te tǫ mali eyu, tama te tulubage tulali. Mu tama tiali, te wę dagaludu dulalio. 
Te bulu du dabe Godigo gedude te mali yali, te Sainai bulu dugo Genuai Bidi, te Godigo gedude, te da Israel dabego Genuai Bidi dao.” 
“Te Samgar, te Anatgo ogwa bidali sogo me, tama te Jael bidali sogo te bisnis sę ebo bidi dabe te genuai sunumidu me bilibeo. Te iba soyu, obaba soyu ebo bidi dabe, augwali te dwasianu sunumidu naga bilaluali. 
Debora, te Israel dabego augwa hanu tagalama, tama te hanu olo elaludubadi, te nage pedalubo sogoba usu nagasali. Tama nage te augwali tonalubo ida tiwai yali. 
Tama te Israel dabego te gesi god wali pabo sogo, te augwaliba boi hwįbo sę pedelali. Te Israel dabego boi hwįbo ami bidi dabe te bidi sese hauwa mu te 40,000 bidi dabe, tiali goli me deligo te boi hwįabo sabele me sesemone me me sela pabeo. 
Te eno homu kolesaga te Israel dabego ofisago ami bidi dabede elaluali, tama te boi hwįainogo ebo bidi dabe dali elalu yali. Te Genuai Bidigo nogi ugwaba sao!” 
“Dage te tedela yai donki te sadelde duabo genuai bidi dabe, tama dage te sągągo bilibo olo bidi dabe, dagego te nai po page pusao. 
Odiąo! Te wę uluba sisinama, te po hauwa miani we bidi hani augwaligo te Genuai Bidigo nogi ugwanu sali po pusao, augwaligo te Israel bidi dabego ugaba ela holali po pusao wali! Tama te Genuai Bidigo we bidi augwaligo te hanu tagalama, tama augwali aiyaba dulai. 
‘Nage poligi pao, Debora, nage poligi pao! Nage poligi pao! Nago tęąbi po me deli wao! Tama nage poligi pao! Barak te Abinoamgo ogwa, nage hogodama pao! Nago te naga aiyaba elaluali kalabus bidi dabe sela pao!’” 
“Tama te boi hwįani wiegi yai bidi dabe augwali te augwa genuai bidi bidibo madiba sisinagasali. Te Genuai Bidigo bidi dabe agaba aselama, tama augwali te boi hwįabo sisi elama bidali. 
Te Efraim dabe aiyaba dulama, tama te tǫ maluba pali. Augwaligo te Benjamin hani bidi dabe wali pali. Te Makir bidi sibi tobolu bidi dabe te buluba dulali. Tama te Sebulungo hanide ofisa dabe te buluba dulali. 
Te Isakargo genuai tobolu bidi dabe te Debora dali asali. Megi da, te Isakar me, Barak me asobao wai. Augwaligo te augwali wali peyu, te malu tǫba pali. Tiali goli, te Rubengo hani bidi augwaligo homu si elalu, tama augwali asabo homu me ebeo. 
Magi baso dage te sipsip dabe dali bidibawe? Te sipsip tonalubo bidi dabego te sipsip hani dabe i wabo odainogo ebawe? Mu tama, te Rubengo bidi hani te si pedali, tama augwali asabo homu me ebeo. 
Te Gatgo hani bidi te wę Jordan te giliga pedalubo pedai badu bidali. Tiali goli, magi baso te Dango hani te moni geba sipde sę yaliwe? Te Asergo hani te tamu ąį sanede bidai. Augwali te olo tama te augwa te wę sanede bidaluai. 
Tiali goli, te Sebulungo bidi me, te Naptaligo bidi me te pąde augwali te boi hwįbo pesagede dolainu yali.” 
“Te Israel isąwai gavman tuni bidi dabe aselama, te Tanakde hwįani, te Megido wę pąde hwįani. Te Kenan tuni bidi dabego Israel dali hwįagasali, tiali goli augwaligo te silva dabe me sela pabeo. 
Te dagalude hǫ dabego me hwįani. Augwaligo te augwa sunumi ogwade wali biliyu, tama augwaligo Sisera dali hwįani. 
Te wę Kison me aga bomo elama asiyu, te hwįbo bage augwali tolasa pali. Te węgo asobo te bomo mu yali. Te eno dili mobo selama, tama bomo elama paibao! 
Tama te bomo yai hos dabe polo wi udulama, augwaligo te tǫba augwa sągągo elali, te be kulu wabo tiwai yali. 
Te Genuai Bidigo ensel mobo bidigo te po wai, ‘Te Meros hanu dolomainao,’ wali. ‘Tama te hanude bidibo we bidi augwali me dolomainao. Magi basowe, augwaligo te Genuai Bidi tau sainu me asobeo, augwali te Genuai Bidi hwįbode tau sainu asobo ami bidi tiwai me asobeo.’” 
“Jael, te Hebergo we, te Kengo hanide, te wiegi yai homu pemene emainao. Te agai wiegi yai homu pemene ebogo te gasa te ugwa bede bidalubo we dabego ebo homu pemene te aiyaba elalumainao. 
Siserago te wę po agabolo hanalu wali, tiali goli Jaelgo ame pę aga mawai. Agai te wiegi yai ame pę te gasagi yai kap me delide sela asali. 
Agai te ugwa be bobegelainu tǫde bulali ni elalubadi, te selama, me badu nogode tuali, tama dolo nogode te sę bidi dabe hama tola sali. Tama te agai Sisera elalima, tama aga tobolu pedai. Agai te poali ni aga tobolude enanima, tama tigidali peda pali. 
Te Sisera aga sągą kiduba tulaluali, tama pila muani te Jaelgo sągą pąde. Te megi da, aga te tulaluama tama isalio.” 
“Te Sisera aga ida dolugulama, te windodu tonaluali, agai gedu te be genagi dili agebeledu munama tonaluali. Tama agai te po wai, ‘Magi baso te Siserago karis te asobewe?’ wali. ‘Magi baso agai hos dabe me polo asobewe?’ 
Te aga dali bidibo kolesaga koneai we me deligo agabolo te po wei ponai, ‘Te ami bidi dabego te e tama tobage tiwai nai dabe dobadu te gegebo sę idubadi bogo,’ homu yali. ‘Te ami bidi dabego we deli ma me si, ma te Siserago sabo wiegi yai ugwa me, tama te kwin au ilibo wiegi yai beligo te kwingo magede au ilabo nai siyu ebadi bogo,’ te homu yali. Tama Siserago idago me te tiwai homu yai.” 
“Tialima, Genuai Bidi, dago homugo te tama tialigo te nago boi bidi dabe isimainogo yao. Tiali goli, nago abagi dabe da, te ula eyu, tama te giliga nanobo ula tiwai pedalumainu yao,” te Debora dali Barak sigo te tiwai tęąbi po tama wali. Tama te tǫ pedaide te boi munu me hwįsiąbadi, te kibu be bidi sese si 40 yia bidali. 
