﻿Te Israel Tobolu Bidi Dabe.
7.
Tialima Jerubal, te tiwai te Gideon nogi, te aga bidi dabe dali tigidali augwali te kigamu digi mu hodaluama, tama augwaligo augwa osogo bidabo pesage te wę ulu Harot sesegede nigai. Tama te Midian dabego osogo bidibo pesage te Morego bulu du aiyadu pąde elaluali. Te Jerubalgo bidibo pesage pąde elaluai, tama aga hani meba te not badu bidai. 
Tama Genuai Bidigo Gideonbolo te po wai, “Eno dage tau selama, te Midian dabe dali hwįnama, te augwali aiyaba elaluabo homu yali, tiali goli te bidi hauwa mu nage dali bidibao. Te augwaligo homu te tiwai idali, ‘Dago te Midian dabe aiyaba elaluali te dena bomode naga te tiali!’ te homu yaibao. Tama augwaligo homugo te eno augwali tau sali te homu me egobeo. 
Tama nago te bidi dabebolo te po olama, ‘Te mena wi ebo bidi te aga te Gilboa bulu dude bidibo tagalama, tama augwa bidibo buluba ma geasa piąo!’ te po wao,” wali. Tialima, Gideongo te tiwai po olama, tama te bidi sese umabo mu, te 22,000 bidi te augwa buluba ma geasa pali. Tama te me badu nogo si hani bidi hauwa te 10,000 bidi naga bidali. 
Nosali Genuai Bidigo Gideonbolo te po wali, “Te bidi dabe hauwa mu elalubao. Te augwali te ąįba aiyaba sela dulama, tama te bidi dabe dobolama wasilibo sę ebode te nage eno tau saibao. Te eno te tiwai po nagebolo weyu, ‘Te bidi da, te nage dali paiba,’ obaso da, teda aga paibao. Te eno te tiwai po me nagebolo weyu, ‘Te bidi nage dali me pigio,’ po obaso da, teda aga me pogobeo,” wali. 
Tialima, Gideongo te bidi dabe te ąįba aiya selasa dulali. Tama Genuai Bidigo te po agabolo wai, “Nago te tigidali bidi te hani si nigilama wasilao. Te bidi dabego te wę tubadi te wę meba nogogo siyu, tama yowigo hamenago ąį tubo tiwai gilama ebo bidi, te augwali gasa me badu tedali muao. Tama te kidu sugunama, ąį tubo bidi tigidali, te gasaba me muao,” te po wai. 
Tialima, te 300 bidigo naga te yowi hamenago wę tubo tiwai yali, tama gasa me badu bidi dabe tigidaligo te kidu sugunama, wę tuai. 
Tama Genuai Bidigo Gideonbolo te po wali, “Te hamenago ąį tuali te 300 bidi dabego nogode te nage eno tau selama, tama dagego te Midian dabe aiyaba elaluaibao. Tama te gasa bidi dabe tigidali te augwa buluba ma geasa pao po wao.” Genuai Bidigo te po wai. 
Tialima, Gideongo te tigidali Israel bidi te augwa buluba ma geasa pomainu tagala palu, tiali goli hasia agai te augwaligo te tǫgo nigali sospen sene me te augwaligo bu wabo nai biugel te tigidali sali. Tama tialima, te 300 bidi naga bidaluali. Tama te Midian dabe bidali pesage tǫ te tǫ malu aiyadu odogode elaluai. 
Te sogo hulide Genuai Bidigo Gideonbolo te po wali, “Dage hogodama, tama te augwali bidibo pesageba dulama hwįgulao,” po wai. “Te eno dage tau selama, te Midian bidi hani dabe aiyaba elalumainu yaibao. 
Tama nago te boi hwįgulabo wi ebaso da, teda hasia nago te naga sę bidi Pura selama, tama dage si te Midian dabe bidalubo pesageba dulao,” wali. 
“Te nago augwaligo mibo po odama, tama nago augwali dali boi hwįabo bomo te sogode saibao.” Genuai Bidigo te po wai. Tialima, Gideon dali te aga sę ebo bidi Pura te augwali si te boi bidi dabe bidalubo pesage sesege badu pali. 
Te Midian dabe me te Amalek dabe me, tama te kemi tǫ masigi wa pai bulude bidalubo bidi hani me, augwali te tǫ malu bulude te genuai kuli mano hani tiwai te bulu odogode bidada pai. Tama augwali te boi hwįbo tau sabo kibu kamel dabe te hauwa umabo me te ąį sanede ebo masigi kemi tiwai elaluali. 
Te Gideon pedalubo sogo, agai odali, te bidi me deligo te aga abagi me delibolo te aga na yali po pusubo te agai odali. Te bidigo te po wali, “Eno e tiwai na yai. Eno te bret me deli suali, augwaligo te baligo nigai, tama te da bidalubo pesage tomoba bebegeli asama, tama te ugwa beba elagasali. Tama te ugwa be gea palama, tama tǫba degelama, tama tǫde dolo pila muanio,” wali. 
Tialima, aga abagigo po wei ponoyu, te tiwai po wali, “Te gasa sę me ebeo. Menio! Te Gideongo bainat me deli dao! Te tama dao! Godigo te Gideon tau selama, tama agai da Midian dabe me, te dago ami bidi dabe dali, te tigidali aiyaba elaluaibao,” wali. 
Tama Gideongo te na yali po page pusubo odali sogo, aga te kidu sugunama, tama Godiba lotu wali. Tama aga te Israel dabe bidalubo pesageba ma sabolama, tama i wali, “Hodaluao! Da pinao! Megi da, te Genuai Bidigo da tau selama, tama dago te Midian ami bidi dabe aiyaba elaluabo te usu yaibao.” Te po wai. 
Tama Gideongo te 300 bidi dabe te hani sela nigilama wasilali. Tama agai te biugel me, te genagi dagede te ula ilibo ni kaneme elalubo te sospen sene tomode elalubo te selama, tama augwali deli delibolo te nai dabe mena mena pali. 
Tama agai augwalibolo tama po wali, “Dagego tonalu, tama enaba sulama tonao. Te ena te boi bidi dabe bidalubo pesageba sabalubo sogo, te eno mena sę me ebo si da, teda dagego me te sę yao. 
Tama eno te ena hani dali te biugel bu wabo si da, dagego me te boi bidi dabe bidalubo pesage tigidali badu bobegela selama, te biugel bu ola pelayu, tama te tiwai i waiąo, ‘Da te Genuai Bidigo hani dao! Da te Gideongo hani bidi dao,’ te po waiąo,” te po wali. 
Tama Gideon dali, te aga dali pali bidi dabe te bidi sese a naga 100 bidi augwali pelama, te boi bidi dabe bidalubo pesage sesegeba sabolali. Te be mu hulia sai pąde tama te sogo te Midian dabego hulide tonalubo ami bidi dabe te hasegelai digi dao. Tialima, Gideon me te bidi dabe badi augwaligo te augwa te biugel bu ola peyu, tama augwaligo te todolaluali tǫgo nigali sospen sene alulu palio. 
Augwali te sela hanigo te biugel bu ola peyu, tama te tǫgo nigai sospen sene aluali. Tama augwaligo te genagi dagede ula ilibo nai te pobase nogo badu tulama, te biugel te dolo nogo badu tolasa tama augwaligo i weyu, te tiwai wali, “Te Genuai Bidigo bainat me te Gideongo bainat me dao!” 
Tigidali bidi dolugulama, tama te boi bidi Midian dabe bidalubo pesage bobegela sali. Tama te Midian dabego ami bidi dabego te i olala pelama, tama wi palio. 
Tama te 300 bidi dabego te biugel bu wabo te sogo, Genuai Bidigo te Midian dabe esela pabo bidi tiwai ilama, tama augwa abagi dabe ma te bainatgo elali. Tama augwali wi peyu, te Betsita te Serera tǫ pedai badu palio. Tama augwali wi pelama, usu nigi pali bulu te Tabat pąde, te Abel Mehola buluba wi pai. 
Gideon dali, aga ami bidi ofisa dabe dali, augwaligo te Naptali hani, me Aser hani, me te tigidali Manasego hani badi, te augwali aselama, te Midian dabe pobeasa bilagasao po olama i walio. 
Tama Gideongo te bidi dabe augwali tigidali te Efraimgo bulu dude elalubo buluba pomainu tagala palu te po wai, “Dage aiyaba dulama, tama te Midian dabe dali hwįgi pao,” wali. “Dagego te wę Jordan me te dwasianu ąį te Betbara tede elalubo ąį dabe, te bugagia tonaluao. Tiyu, augwali te ąį nogelama u badu pabuo,” wali. Tama te Efraim bidi dabe augwali deliba sisinama, tama Gideongo po wali gilama tama yali. 
Tama augwaligo te Midian dabego tobolu bidi si pageabi elama tuali, te bidi si nogi Orep me Sep. Tama augwaligo te Orep ela muani, te Orep aga nogi elalubo moni masigide elali, tama Sep augwaligo te wain haluama agabo madi te pesagede elama, te nogi augwaligo nogi eyu, te Sepgo wain elalubo pesage dao po wali. Tama augwaligo te Midian dabe pobeasa pabo sę idubadi geanio. Gideon te Jordan pabo pedai badu bidali, tama augwaligo te tobolu bidi si te Orep me Sep, te augwali sigo tobolu selama, tama te Gideon aga bidibo madi sela asai. 
