﻿Te Israel Tobolu Bidi Dabe.
11.
Jepta te Gileat bidi, aga te hwįbo bomai bidi me deli dao. Aga te penani we me deligo ogwa, tama Gileat te aga aya dao. 
Tama Gileat aga sali we mugo me te wai ogwa meba ame nani. Tama te wai dabe augwali genuai ebo sogode, augwaligo te Jepta sela sąyu ela gudulali. Tama augwaligo agabolo te po wali, “Nago te dago ayago doado bage deli munu me selamuo,” wali. “Nage gasa wego wai dao.” 
Tama tibaso, Jepta aga wi peyu, tama aga ama dede taga palio. Tama aga pelama, te Topgo tǫba bidigi pai. Agai te dwai sę ebo bidi meba haliga bega sabo po obaso tama augwali aga wali asai. Tama augwali te bulu dabeba tedela pelama, tama te bidi dabe elibo sę elama, tama augwaligo doado bage dobabo sę yali. 
Tama nosali te Amon dabego te Israel dabe dali hwįgi pai. 
Augwaligo tama tibaso, teda te Gileat bulu genuai bidi dabe te Topba pelama, te Jepta sigi pali. 
Tama augwaligo agabolo te tama po wali, “Nage aselama, te nage dago polalubo bidi bidagasao, tama dago te Amon dabe dali hwįbo dao,” te po wali. 
Tiali goli, Jeptago te genuai bidi dabebolo te tiwai po wali, “Dagego ena homu dene eyu godolo me isiąma, tama eno ayago bede te dagego ena sela sąwani. Tama magi baso dage ena bidibo madigi megi asaliwe? Dage sęgę sobaso, tama dage ena bidibo madi asali dawe?” 
Tama te Gileatdu asali genuai bidi dabego te po wali, “Te tama dao. Dago te nage sagasiyu asalio, te nage da dali pelama, te Amon dabe dali hwįaibao. Dago homugo nage te da Gileat we bidi tigidaligo polalubo bidi bidimainu homu ebao,” wali. 
Tialima, Jeptago te Gileat genuai bidi dabebolo te po wali, “Te dagego ena ma odasa pelama, tama eno te Amon dabe dali hwįbo si da, tama Genuai Bidigo ena tau selama, tama eno te Amon dabe aiyaba elalubaso da, teda ena dagego polalubo bidi mu bidaibao,” wali. 
Tama te genuai bidi dabego te tama po wali, “Te dago nago te wabo po gilama tiwaibao. Genuai Bidigo te tama tiabo koneani,” wali. 
Tama tibaso, Jepta te Gileat genuai bidi dabe dali palio, tama te we bidi dabego aga te augwaligo te augwa tigidali sęde te polalubo bidi nigilali. Tialima, Jeptago aga te sęde wali po tigidali te Genuai Bidi gedude te Mispa bulude te po wai. 
Nosali Jeptago te Amon tuni bidi king bidibo digi te bidi meba tagala palama, tama augwaligo agabolo hanalugi pai, “Nago magi naide homu sębę ebaso, tama nago da dali hwįagasaliwe?” 
Te Amon king bidigo te Jeptago tagala palali bidi dabebolo te po wei ponani. Agai te po wai, “Polobadu te Israel dabego te Isip tǫ taga soyu, tama augwali aselama, tama eno tǫ te wę Arnon pedai badu tǫ sagasali, te pali te wę Jabok me te wę Jordan dąį igi pali. Eno tede naga te eno haliga sębę yali. Megi da, eno homugo dagego te tǫ enabolo ma momainu homu ebao. Tiyu, da hwįdalio,” wali. 
Tama Jeptago te Amon king bidiba te bidi dabe meba ma tagala palali. 
Tama augwaligo agai po wei ponama te po wali, “Jeptago te po walio, ‘Te Israel dabego te Moapgo tǫ me te Amon dabego tǫ me te me sabeo,’ wali. 
‘Polobadu te Israel dabego te Isip tǫ taga soyu asali sogo, augwali te masigi elalubo bulu wa pai tǫdu naga sosolayu, tama augwali te nosai elalubo tamu ąį teba sabolali. Tama augwali te Kadesba sabolai dao. 
Tama te Israel dabego te bidi meba tagala palu, te Idom king bidibolo te tiwai po hanalugi pali, “Te da nago tǫ tomodu soao po wabo usu da po waibawe?” Tiali goli, te king bidigo hagela homu yai. Tama augwaligo te Moap king bidiba hanalugi pabo bidi tagala palali. Tiali goli, te agai me te hagela homu yai. Tama tibaso, te Israel dabe augwali te Kades bulude naga bidaluai dao.’ Jeptago te po wai dao,” te Jeptago tagala palali bidi dabego te po wai. 
“‘Te nosali augwali te bidi meni yai te tǫ wa pai madi te buluba pali. Tama augwaligo te Idomgo tǫ me, te Moap dabego tǫ me, te edelama pali. Augwali te giliga pedalubo te Moap dabego tǫ pedai badu soai, te wę Arnon pedai badu dao. Augwali bidabo pesage tede nigali, tiali goli augwaligo te ąį Arnon nogesiąwai, magi baso meni, te ąį te Moap dabego tǫ dąį yagasali madi dao.’” 
“‘Tama te Israel dabego te Sihon, te Amor dabego king bidi, te Hesbonde bidibo madi teba te bidi meba tagala palali. Te augwaligo agabolo hanaluyu, “Te da nago tǫ tomodu soabo usu yaibawe?” po wali. “Da te dena tǫba soabo homu eyu obao,” wali. 
Tiali goli, te king bidi Sihongo hagela homu yai dao. Tama agai aga ami bidi tigidali selama asiyu, tama te Jahasde te bidabo pesage nigilama, tama augwaligo te Israel dabe dali hwįai dao. 
Tiali goli, God, te Israel dabe augwa Genuai Bidigo, te Israel dabe tau selama, tama augwaligo te king bidi Sihon aga ami bidi dabe dali tigidali aiyaba elaluai. Tama tialima, te Israel dabe augwaligo te Amor dabego tede elaluali tǫ tigidali sai dao. 
Tama augwaligo te Amor dabego tǫ tigidali sali, te Arnon te tǫ saut badu gagalali, pelama, te Jabok te tǫ not te badu, tama te giliga pedalubo badu te bidi meni yai tǫ wa pai madiba sabolali, tama te pelama, giliga dega sigi pabo badu te Jordan ąį teba dąį igi pai.’” 
“‘Te God, te Israel dabego Genuai Bidi, aga digi te Amor dabe sela sąyu gudulama, tama augwaligo tǫ te aga hani bage te Israel dabebolo mani. Tama nago te tǫ ma sabo homu ebaso, oba agawe? 
Naga god Kemosgo nagebolo mani te doado bage tigidali te naga sao,’ wali. ‘Tiali goli, te tigidali doado bage te dena Godigo dabolo mani, te dago doado bage mu tama dao. 
Tama nago magi homu ebowe? Nago homugo nage te polobadu bidai bidi Balak aiyaba elalubo homu eyu, te Siporgo ogwa, te Moap king bidi da, te homu ebawe? Nago homugo te agai da Israel dabe dali po konila yali, ma agai da dali hwįani homu ebawe? Menio! 
Te Israel dabego te e tama tǫ sali, te Hesbon me Aroer tama augwaligo dwasianu bulu me, tama te wę Arnon sesegede elaluali tigidali hanu selama, tama te hanu dabede bidada pali te kibu be umabo te 300 bidali. Magi baso dagego te sogo te bulu dabe ma sai meniwe? 
Tama tialima, eno dwai kolesaga me deli nage dali me ebeo. Nago digi te nago dwai kolesaga ena dali elama, tama nago ena dali hwįani. God te aga tigidali bidigo kolesaga dagalubo bidi da, tama megi da, te agai dago kolesaga dali, te dagego kolesaga dali osayu dagalaibao.’ Jeptago te po wali,” te agai tagala palali bidigo te Amon king bidibolo wali. 
Tiali goli Amon king bidigo te Jeptago ola tolali po me odisiąwai. 
Tialima, te Genuai Bidigo Mobo Bidi te Jeptaba bomonama bidagaselama, tama aga hogodama palima, te Gileat me Manase te badu te Mispa buluba pelama, tama aga te Amon dabe bidalubo madiba palio. 
Jeptago te Genuai Bidibolo te tiwai bomai po me deli dąų walali, “Te nago ena tau selama, tama eno te Amon dabe augwali aiyaba elalubaso da, 
teda eno te hwįgi pali silama, te ena eno beba ma asobo sogo, tama eno be taga soyu te sunumiba te ena tiąba asobo bidi da, teda eno aga te nagebolo mawaibao, te ofa me deli te tigidali siaba ulumainu ebo gilama yaibao,” wai. 
Tialima, Jepta te wę nogelama, tama te Amon dabe dali hwįainu teba sabolali. Tama Genuai Bidigo aga tau selama, tama te Amon dabe aiyaba elaluai dao. 
Agai augwali te bulu Aroerde elibo gagali pelama, tama te bulu Minit te badu pedaiba sabolali, te tigidali bidi sese te 20 hanu da. Tama agai te boi hwį hwį pali te ąį Keramim dąį igi pai. Te hwįani madi te bidi umabo mu isalio. Tama te Israel dabego te Amon dabe augwali mu ela silai dao. 
Tama te Jepta aga bulu te Mispa teba ma begasa asobadi, te aga wegi te bede bidali taga soyu, te aga tiąba asai. Agai homu te wiegi yai pemene elama, tama dwasianu habidi elala asobo sę yai. Tama Jeptago wegi te deli naga tama bidai. Te agai gasa wai me mu meni yai dao. 
Tialima, aga te wegi asobo subo si, te aga dwai noma selama, midigi siyu, tama aga ugwa pisąyu tama po wai, “Hobede ya! Eno wegio! Megi nago eno hobolu du togalubao!” wai. “Magi baso te nage asama, tama nago enaba genuai sęgę mobawe? Eno bomai po mu te Genuai Bidiba dąų walobo po wali te po eno me tagalogobeo!” Jeptago te po wai. 
Tama te wegigo te po wai, “Ayao, te nago Genuai Bidiba bomai po dąų waibaso da, te nago po dau wali gilama te tiwai sę enade yagameo, magi baso meni, te Genuai Bidigo nage tau selama, tama nago te boi bidi Amon dabe aiyaba elaluali, te augwali nago boi bidi dabe dao.” Wegigo te po wai. 
Tiali goli, te wegigo aga ayabolo te tiwai po wali, “Eno homugo te nago enade sę yabo po me deli omainu te homu ebao. Eno homugo te nago ena te polua si ena gogolama bidimainu homu ebao. Tama ena te ena abagi dabe dali pelama, tama bulu dude bilaluyu, tama ena te bidigo sisąbadi te isaiba olama, te homu dene ebo gela ola bilainu yaibao,” wali. 
Tama aga ayago te po wali, “Te usu dao. Nage pao.” Tama Jeptago aga tagala palama, te aga polua si bilali. Tialima, aga dali, te aga abagi dede dali, augwali te bulu duba pelama, tede te aga abagi dabe dali pilala bilama, tama aga te bidigo sisąbadi isaiba wabo homu dene ebo gela wai. 
Te polua si silama, tama aga aya bidiboba ma asali, tama ayago te Genuai Bidi dali bomai po dąų wali gilama tama tialio. Tama te wegi te bidi me deli dali me pagela pisąwai wegi. Te Israel dabede elalubo kolesaga page tama telalubo dao. 
Augwaligo te tama tiwai kolesaga ebo dao: te Israel wegi ogwa we dabe te augwa pesage taga solama, tama te Jeptago wegi isaide te gela wagisu diligi pabo dao, te Gileat bidi, te tigidali kibu be usu nama, te tomode te me si me si tama sogo te tiwai sę ebo dao. 
