﻿Te Israel Tobolu Bidi Dabe.
12.
Te Efraim hani bidi dabe sisinama, tama te hwįbo doado bage selama, tama augwali te wę Jordan nogelama, tama te Safonba pali. Augwali pelama, Jeptabolo te tiwai po wagi pali, “Magi baso dage te ąį nogelama, tama dagego te Amon dabe dali hwįgi peyu, tama dagego da i olama, tama dage dali pomainogo yai meniwe? Odiąo! Megi te dago nage me te naga be dali domainu sia ulaibao,” wali. 
Tiali goli, Jeptago augwalibolo te po wali, “Ena dali, te eno hani bage dali, dago te haliga sębę genuai te Amon dabe dali yali. Tama eno dage i wali goli, te dagego ena tau me sagasobeo. 
Te sogo dagego ena tau sabo homu ąǫ isąbaso, teda eno te tiwai homu eyu te ‘Tagala,’ homu yali, ‘te ena isimainu yaibao,’ wali, ‘tiali goli eno te Amon dabe dali hwįgi paibao,’ wali. Tama eno te wę nogelama, te boi hwįani. Tama Genuai Bidigo ena tau selama te hani bidi aiyaba elaluai. Magi baso megi dagego ena dali hwįainu ebawe?” Jeptago te po wali. 
Tialima, Jeptago te Gileat bidi dabe tigidali sisinama, tama augwaligo te Efraimgo hani dabe dali hwįnama, tama augwali aiyaba elaluali, magi baso meni, te Efraimgo hani bidigo te Gileat hani bidi dabebolo te tama tiwai po wali, “Dage Gileat dabe te Efraim dabego bulude me te Manase dabego bulude me bidaluyu, te dage te boi bidi asama hwįagasobo side, te dage wi soyu tama da taga soali!” 
Tama te Gileat bidi dabego te bidi dabe te Jordan ąį nogebo pesage tigidali badu usu selama, no bidada pela silali, te wę pedai me badu, te wę ge bo kuna disąwai elaluali. Augwaligo tama tiwai yali, te Efraim dabe augwali te ąį Jordan munu me nogeidali homu yali. Te Efraim dabe dali hwįbo sogo augwali wi painu soyu, augwali aselama, tama augwaligo te po wali, “Da te ąį nogeainu ebao,” wali. Tialima, te Gileat dabego te augwali deli delibolo hanalua pali, “Nage te Efraimgo hani bage dawe?” Te agai te po weyu, “Menio,” po obaso da, teda augwaligo agabolo te po wai, 
“Teda nago tama po wao,” obaso, “Sihibolet,” wali. Tama agai te “Sibolet” po obaso da, te augwaligo aga pageabi elama, tama ela muani, magi baso meni, agai te po dolo nogi isąbaso tiali. Tama augwaligo te tiwai ela pelama, tama te bidi umabo 42,000 te Efraim hani bidi dabe te wę nogebo madi no munama ela silali. 
Jepta te Gileat bidi, te Israel dabego tobolu bidi nigilama bidibadi, te kibu be nogo a naga olama, me deli bidama tama aga isai. Tama augwaligo aga hanude digi pubulai dao. 
Jepta isibaso, tama Ipsan te Betlehem bulu bidi te Israel dabego polalubo tobolu bidi bidai. 
Agai ogwa dabe te 30 elaluali, te agai wegi dabe te me te 30 elaluali. Tama agai te wegi dabe gasa hani bidigo somainu mani. Tama agai te gasa hani bagego wegi te 30 wegi dabe selama, tama augwali te agai ogwa dabego sali. Ipsan te Israel dabego tobolu bidi bidali te kibu be a naga olama, me badu si bidai. 
Tama aga isibaso, augwaligo aga te bulu Betlehemde pubulai dao. 
Te Ipsan isibaso, tama Elon te Sebulun hani bidi te Israel dabego tobolu bidi bidibadi, te kibu be nogo si bidai. 
Tama aga isibaso, te augwaligo aga te Aijalonde pubulali, te Sebulun hanigo hanu tǫde dao. 
Te tobolu bidi Elon isai madi tama Apdon, te Hilelgo ogwa, te Piraton bulu bidi, aga te Israel dabego tobolu bidi dao. 
Agai ogwa dabe te bidi sese si te 40 elaluali, tama te ogwago wai dabe te 30 elaluai. Tama augwali te donki dabe te 70 donkide dualasa bilali. Apdon te Israel dabego tobolu bidi bidibadi, te kibu be 8 bidai dao. 
Tama aga isibo si, te augwaligo aga te Piraton bulude pubulali, te Efraim dabego hanu tǫde pubulalio. Te bulu te Amalek dabego te bulu du bagede elalualio. 
