﻿Te Israel Tobolu Bidi Dabe.
15.
Te nosali dwasianu gana, te wit togobo sogo, Samson pelama, aga we sugi pali. Agai te ogwa bidi meme me deli aga webolo mawainu sela pali. Tama agai te we aga ayabolo te po walali, “Ena te ena we bidibo be habu tomoba paio,” wali. Tiali goli we aga ayago hagela yai. 
Agai Samsonbolo te po wali, “Mu tamao, eno homugo nago aga godolo homu mu isiąwai. Tama tibaso, eno aga te nai uluyu te sogo nage dali hai namu olama bidali bidibolo te we manio. Tiali goli, te aga amanu te sawi gesabi yai mu bidibao. Nago te aga sobaso, te usu yaibao,” wali. 
Tiali goli Samsongo te po wali, “Eno te Filistia dabeba dwai sę ilaibao. Tama eno dwai sę yali po me wagobeo. Te augwa yali kolesagago naga dao!” 
Tama tialima, aga pelama, te 300 uni yowi sigi pali. Agai te si si danu kękę pelama, tama nosali agai te sole me deli te kęnani danu side kęani. 
Tama agai te sole domonama, tama te uni yowi si si tagala palama, tama augwali udada peyu, te Filistia dabego wit gi tomoba pali. Agai te wit dabe te togai elaluali me, te togosiąwai elaluali wit dabe me te siago ulali. Tama te oliv ni dabe me, te wain ąį nigibo du walobo bono dabe me, te siago dai dao. 
Tama te Filistia dabego hanalua biliyu, te tiwai po wali, “Dego te sę yaliwe?” Tama augwaligo po odobadi te po wai, “Samsongo te sę yalio. Magi baso meni, te aga wąį ayago, te Timna bidigo te agai we selama, te aga dali te we sabo sogo nai uluyu te hai namu olama bidali bidi aga abagibolo te we mani,” wali. Tama te Filistia dabe pelama, te we dali aga aya me te aga be dali te siago te augwali dali ulugi pai dao. 
Tialima, Samsongo augwaliba te po walai, “Dagego te tiwai kolesaga yali da, agawe? Tialima, eno te tiwai po dąų walobao, te ena polo toma me nogobeo. Hasia bolo eno dagego te yali kolesaga wei ponoma da, tama nosali te ena toma naibao,” wali. 
Tama Samsongo augwali dolama, subigila mu elama, tama hauwa bidi mu ela muani. Nosali aga te moni dedage elalubo te masigi ola be me deli elalubo te Etam teba bidigi pai. 
Nosali te Filistia dabe aselama, tama te Juda dabego tǫba te bidabo pesage nigagaselama, tama augwaligo te Lehi hanude bidibo bidi dabe dali hwįagasai. 
Tialima, te Juda dabego augwaliba hanalu wali, “Magi baso te dagego da dali hwįagasaliwe?” Augwaligo te tiwai po wei ponani, “Da asali te dago Samson selama, kalabus ilainu, tama dago te agabolo te agai da dali yali deli tigi poai kolesaga te wei ponainogo te tiwai ilaibao,” wai. 
Tialima, te Juda bidi dabe te bidi sese umabo mu, te 3,000 bidi te Etam te ola be masigi bulu duba pelama, tama Samsonbolo waliyu, te po wali, “Ae, tegoba! Te Filistia dabego megi da tonalubo te nago konebewe? Magi baso nago te tiwai dwai sęgę dabolo pedalumainu yaliwe?” Tama agai te po wei ponoyu, te po wai, “Te augwaligo ena dali yali dwai sę te eno augwaliba dolo wei ponoyu yali.” 
Tama augwaligo agabolo wali, “Te dago nago nogo duagasu asali, tama nage te Filistia dabego nogoba muainogo eyu yaibao,” wali. Tama Samsongo te tiwai po augwaliba walali, “Dagego bomai po me deli enaba dąų waliyu, te tiwai waiąo, te dagego digi ena me ela mugobe po waiąo.” 
Tama augwaligo te po wali, “Te usu da, te dago nage me ela mugobeo. Dago te nago nogo duagasu naga asali, tama nage te augwali nogoba odasa paibao,” wali. Tama te Juda dabego aga nogo te gesi bomai bono baklain sigo dunama, tama augwaligo te ola be masigi bulu du tagalama ma palio. 
Augwali te Lehi hanuba sabalubo sogo, te Filistia dabego i weyu, udada asu, tama augwali tiąba asali. Tama Godigo Mobogo te Samsonba genuai bomo menama, tama te gesi baklaingo aga nogo duani, Samsongo te baklain te ugwa hobolobo hobi togobo tiwai te olo nai gagawai togali. 
Tama agai te tamadi isali ogwa bidi donki me deligo penane dili sulama, tama te agai sali. Tama agai te penane diligo te bidi hauwa umabo te 1,000 bidi ela muai. 
Tama tibaso, Samsongo tęąbi po me deli te tiwai wali, “Te donki penanego eno te bidi umabo 1,000 ela muani. Mu tamao, te donkigo penanego eno augwali dolama mu elali.” 
Agai te po ola silama, tama agai te penane dili sąwani. Tama augwaligo te bulu nogi Ramatlehi wali. Te tiwai te penanego ela muani bage te dwasianu bulu du da wali. 
Tama Samsongo dogoni te mu wa pali. Tama tibaso, agai Genuai Bidiba i olama, te tiwai wali, “Nago ena naga sę bidi tau sali, tama tialigo eno te boi bidi dabe dali hwįnama, augwali aiyaba elaluali. Magi eyu ebaso, te nago ena megi tagalali. Te enade ąį meniama, tama tiyu ena isabo ąǫ ebao. Tama tiyu, te Genuai Bidi nago po odisąbo bidi dabego ena dolidalio.” Te po wai. 
Tama Godigo te dedage me deli te Lehi hanude aluama, tama ąį tedu pedelai. Tialima, Samsongo te ąį tulama, tama aga bomo ma sali. Tama tialima, augwaligo te wę nogi Hakore poali. Te nogigo page te tama tiwai, te bidigo i wali ąį dao. Te ulu wę te Lehi bulude me elalubo dao. 
Te Filistia dabego te tǫ tonaluali sogo, Samson te Israel dabego tobolu bidi bididubadi, te kibu be bidi sese deli, te 20 kibu be bidai dao. 
