﻿Te Israel Tobolu Bidi Dabe.
18.
Te sogo te Israelde te king bidi meni yani. Tama te Dango hani dabe meba te augwali bidabo tǫ me deli gegebo sę yali. Magi baso meni, te sogo augwali te Israel dabe tomode te augwa sabo tǫ tigidali me sisąwai. Te augwali olo naga bidaluai. 
Tama tiyu, te Dan dabego te hanu si Sora me Estaol te kolesaga koneai bidi te nogo a naga bomai bidi tagala palu, te augwali te tigidali tǫ pedai susa biligi pomainu tagala palali. Tialima, augwali pelama, te Efraimgo bulu du bageba te Maikago beba sabolama, tama augwali aga dali bidali. 
Augwali te Maikago beba sabolama, tama augwaligo te Livai gesi ogwa bidigo wabo po odama, tama augwaligo koneama, te Juda bidigo dogonide po odobo tiwai yali. Tialima, augwali doligi pelama, tama agabolo te tiwai po hanalu wali, “Nago e bulude magi sę ebawe? Dego nage eba sela asaliwe?” 
Tama agai augwaliba te po wali, “Te Maikago enabolo usu da obaso, tama ena bidibao. Ena agai pris sę tiwai ebaso, tama agai ena abelibo dao,” wali. 
Augwaligo agabolo te po walali, “Dago homugo te nago da e bilagasali sę po te Godiba hanalu omainu obao. Te wiegi yai dawe, ma meniwe?” 
Tama te prisgo te tiwai po augwaliba wei ponani, “Dage te nai me deli homu si me dogia pelamuo. Te Genuai Bidigo te dage bilibo tonaluaibao,” wali. 
Tama tialima, te a naga bidi dabego te bulu tagalama, tama augwali pelama, te hanu Laisba sabolali. Augwali pelama suali, te bidi dabe bugagia bidaluali, te Saidon bidi dabe tiwai bugagia bidali. Augwali te dua digi bugagia mu bidali, tama augwaligo te gasa bidiba wado po me wasiąwai. Tama augwaligo hwįabo homu me isiąwai. Augwali te nai me deli me sǫą pabeo. Tama augwaligo te gasa hani bage dali te bisnis sę me isiąwai. Tama augwali te Saidon dabe pąde me bidibeo. 
Te a naga bidigo te bulu susa bilama, tama augwali te bulu Sora me Estaolba ma geasa pabo si, tama augwa deli hanigo augwaliba hanalu wali, “Dage pelama, te magi nai naga sualiwe?” 
Tama augwaligo te e tama tiwai po wali, “Te dage asesa polo asama, tama dago augwali dali hwįnao. Dago te tǫ wiegi yai mu suali. Dage olo me bidilamuo. Asesa dao! Dago te augwaligo tǫ sigi paibao. 
Te dage pabo sogo da, te augwali bugagia bidiyu, tama augwaligo hwįabo homu me elalubo sugubeo. Te tǫ genuai tama, te augwali magi nai me deli me sǫą pabeo. Odiąo, te Godigo da tau selama, tama dago augwali aiyaba elaluaibao,” wali. 
Tama tialima, te Dango hani bidi dabe te 600 ami bidi te hanu Sora me Estaol tagalama, tama augwali hwįgi painu sisi yai. 
Augwali pelama, tama te bidabo pesage te Kiriat Jearim te Juda tǫ pedai badu nigali. Tama te bulu nogi augwaligo te Dango Nigali Pesage wabo te nogi megi me elalubao. Tama te nigali pesage te giliga degasa dulubo badu te bulu Kiriat Jearimde elaluai. 
Tialima, augwaligo te bulu taga peyu, tama te bidi Maikago beba sabolali, te Efraimgo bulu bage bulude elaluai. 
Tama te a naga bidi te Lais dabego hanu tǫba sa pelama suali bidi dabego te augwa deli hanibolo te tiwai po wali, “Te badu te be me delide te tibo god me deli augwaligo te nigo nigilama, tama augwaligo te silvago haluama elaluali. Dagego te koneaniwe, ma meniwe? Tama te tibo god meba u mabo elalu, te pris dabego holobo ugwa me elalubao. Megi da te dago magi yaibawe?” te a naga bidi dabego te po wai. 
Tialima, augwaligo te sunumi tagalama, tama te Maikago beba pelama, tama augwaligo te Livai gesi ogwa bidi bidibo suali. Augwaligo agabolo te siade da po weyu, te po wali, “Nage bugagia bidibawe?” 
Tama te Dango ami bidi te 600 bidi te hanu bagulali obo te pabo sunumi dolalu, te augwaligo hwįabo sisi elalu bidali. 
Te bulu sa geme pelama sugi pali te a naga bidi dabe augwali te be tomoba pelama, te tibo god dabe sigi pali. Tama te pris te 600 ami bidi dabe dali te hanuba pabo sunumide bidali. 
Te bidi te Maikago be tomoba pelama, tama augwaligo te tibo god dabe sali, tama te prisgo augwaliba hanalu wali, “Dagego magi ebawe?” 
Tama augwaligo agaba po waliyu, “Nago pedauwali pania sao,” wali. “Nago po me olamuo. Tama nage da dali asao, te nage pris bididu, tama nage te dabolo homu konebo kolesaga ola mabo bidi bidagameo. Te nage te Israel hani tigidaligo pris bidi bidibaso, te wiegi yai yaibao. Te deli hani sibigo pris naga bidibo te dwai dao,” wali. 
Pris te pode wiegi yai homu pemene elama, tama agai te tibo god dabe selama, te augwali dali palio. 
Tialima, tigidali bidi ma geasa pali. Tama te wai dabe me, te bulmakau dabe me, te doado bage me, te augwali polasa pali. 
Te Dan dabego te Maikago be taga peyu, te digibulu pai madi, tama Maikago te aga pąde bidali bidi dabeba i waliyu, te augwali wali pobeasa pelama, te augwali dali hwįgi pao wai. Augwaligo te Dango hani dabe pobeasa peyu, wali pelama, te nosali augwaligo augwali suali. 
Tama Maikago hanigo te Dango haniba i olama, hae wai. Tialima, te Dango hani dabe begelama, te Maikabolo wali, “Magi sę yaliwe? Magi baso nage te genuai hani bidi dali asaliwe?” 
Tialima agai te po wai, “Dagego eno pris bidi me te eno nigali tibo god dabe selama, te dage wi soalio. Te eno doado bage deli te me munalubeo. Magi baso te dagego enabolo ‘Magi sę yaliwe?’ po hanalu obawe?” 
Tama te Dango hanigo te po wali, “Te nago po me deli dabolo munu me olamuo. Tiyu, te bidi dabe wado ebo homu elama, te augwaligo dage dali hwįabuo. Tama augwaligo te nage dali, naga hani sibi dali ela muabuo,” wali. 
Te Dan dabego po ola silama, te augwali palio. Tialima, Maikago suali, te bidi dabego bomo ebaso, tama aga augwali dali usu yabo homu isiąbaso, tama aga buluba me geasa palio. 
Te Dan dabego te Maikago nigali nai me, te agai pris bidi me selama, tama augwali te hanu Laisba palio. Tama te Lais hanude bidali we bidi, te augwa bugagia bididu, tama hwįabo homu me isiąma bidali. Tama te Dan dabego te augwali tigidali ela munama, tama augwa hanu me te siago ulali. 
Te augwali tau sabo bidi me meni yai, magi baso meni, te hanu te Saidon bulu digibulu elaluali. Tama augwaligo bisnis sę te gasa hani dabe dali me isiąwai. Te hanu te Betrehop hanu pąde elaluali. Tama te Dan hani dabego te hanu ma nigilama, tama augwa tede bidali. 
Tialima, te hanu nogi augwaligo te Dan nogi poali. Augwaligo te augwa wąįgo nogi sali, Dan te Jekopgo ogwa, tama augwaligo te nogi te hanuba mawai. Polobadu augwaligo te hanu nogi Lais poali. 
Tama te Dan dabego te nigo nigali tibo god dodolama, tama augwaligo teba lotu wai. Jonatan te Gersomgo ogwa, te Mosesgo wąį, agai te Dan dabego pris sę yali. Tama agade koliali wąį dabe me te pris sę ela pali, te augwali te gasaba kalabus igi pali sogoba usu nigi palio. 
Tama te Maikago tibo god dabe tede elalubadi, te Godigo ugwa be te Silo bulude elaluai dao. 
