﻿Rut.
2.
Bidi me deli aga nogi Boas bidai. Aga te genuai bidi, tama aga te Elimelekgo hani bidi, te bidi polobadu Naomigo bidi isai dao. 
Tialima, megi da, Rut te Moap tǫ we agai Naomibolo te po wai, “Ena te gi dabe meba teba pelama, tama te bidi dabego togolama tagalai elalubo bali te sisinigi paio. Tama te gide sę ebo bidi dabego te po usu da obaso da, teda ena augwali wali pelama, te nai ge bali sisinigi paibao,” wali. Tama Naomigo po wei ponoyu, te po wai, “Te usu da, auwa. Nage pagameo.” 
Naomigo po ola silama, tama Rut te gi me deliba pelama, tama aga te gide sę ebo bidi dabe augwali wali pelama, tama te olo tulaluai munalubo bali dabe sisinibo sę yai. Aga te mena bidigo giba pali te agai me konebeo. Tiali goli, aga te Boasgo giba dolo pai, te bidi hani me deli te Elimelekgo hani dao. 
Tama nosali gana, Boas agaduba digi aga te Betlehem hanude bidali tagalama, aga sę ebo bidi dabe augwali pageba sabolama, tama siade da weyu, te po wai, “Eno homugo te Genuai Bidi dage dali bidimainao,” wali. Tama augwaligo po wei ponoyu, te po wai, “Genuai Bidigo wiegi yai sę nagebolo ilimainao.” 
Tama Boasgo te sę ebo tonalubo bidibolo hanaluyu, te po wai, “Te e gesi wegi we te mena hani dawe?” wali. 
Te sę ebo bidi dabe tonalubo bidigo po wei ponoyu, te po wai, “Te e we gasa hani, tama Naomi dali asai. Augwali sigo te Moap tǫ tagalama, eba ma asai dao. 
Agai enabolo te sę ebo bidi dabe wali pelama, te bali sisinigi paio po hanalu wai. Tama agai sę kigamu digi yali, megi tama usu nagasali, tama megi aga toma dwasianu tuyu, te dwasianu bede bidibao,” wali. 
Agai po siminama, tama Boas pelama, Rutbolo te po wai, “Gesi wegi we, nago eno po odao. Nago te gasa bidigo giba pelama, te bali munu me sisinigi pigio. Menio! Te nago bali te e gide naga selama, sisinao. Nage e gide bidiyu, eno gide sę ebo we dabe dali sę eyu, bidao. 
Tama augwali sę ebo badu bugagia dąį elama, tama nage augwali dali bidao. Eno po te ena sę ebo bidi dabebolo walio, te augwaligo dwai sę munu me nage dali igio, te po wai. Tama me, nage ąį nogone ebaso da, teda nage pelama, eno sę ebo bidi dabego tuai wę te botolde munalubo wę tugi pao,” te po wai. 
Agai po silibo si, tama Rut aga tobolu tǫba mu aiyaba pǫgųlali, te tiwai agai te Boas aga digi aga homu pemene wiegi yai mu emainu te agabolo ola mani. Tama agai Boasbolo te po wali, “Ena gasa bulu we dao. Magi baso nago homugo ena koneama, tama nago wiegi yai sę enabolo bugagia ilibawe?” 
Boasgo po wei ponoyu, te po wai, “Eno odali, nago tigidali sę nago naga bidigo ida dali te naga bidi isali sogo yali po odalio. Tama eno koneani, nago naga aya ida me naga bulu taga solama, tama nage te polobadu nago konesiąwai we bidi augwali dali eba bidagasalio. Nago tama tiali po eno odama, tama eno homugo nage tau sainogo ebao. 
Nage te God, te da Israel hanigo Genuai Bidiba asalio, te agai nage bugagia tonalumainu yaibao. Agai te nago wiegi yai kolesaga tigidali ebo suali, tama eno homugo agai te wiegi yai kolesaga nagebolo wei ponemainu ebao, tama agai te kolesaga me mu nagebolo wei ponono pidubadi gemainu yaibao,” agai te po wai. 
Tama Rutgo po wei ponoyu, Boas dali te po wai, “Nago wiegi yai kolesaga mu enabolo ilibao! Ena te nago sę ebo we dabe tiwai wiegi yai meni, tiali goli, nago po dua digi mu enabolo wabo, tama tebo pogo ena homu dąų walobao,” wali. 
Tama nosali te nai tubo sogo, Boasgo Rutbolo te po wai, “Nage eba da dali aselama, tama e nai bret dabe meba selama, tama te gasa tubo nai dali munama, tama meba selama, tama naga tuagameo.” Agai te tiwai po obaso, tama Rut aga te sę ebo bidi dabe augwali dali dulaluali. Tama te bali meba augwaligo te siade ulali, te Boasgo Rutbolo mani. Rut agai te nai tuali, aga tabi usu elama pągąbaso, tama te nai dabe meba munalualio. 
Tama te nai tula silama, tama Rut aga ma hodaluama, te bali dabe ma sisinanio. Tama Boasgo aga sę ebo bidi dabebolo po weyu, te po wai, “Dagego te duna muani nai pąde te bali dabe meba te Rutgo sisinimainogo emainao. Dagego agai ede me te bali sobadi, aga dali wado po me olamuo. 
Dagego kęanama muani bali te pisigina pai elalubo te agai meba sisinimainao. Dagego aga guduligio,” Boasgo te po wai. 
Tama Rut agai te bali sisini pidubadi, tama be pio elama, sia ge iba dulai. Agai te bali dabe sisina silama, tama te bali dabe aga dono wąbigo elama, tama te nai aga ge naga sai. Te naigo sęgę te nogo si, te 10 kilo tiwai dao. 
Tama Rutgo te nai bali ge selama, aga te hanuba pelama, aga bidigo ida Naomibolo te nai waseligi palio. Tama aga nai habu me badu te siade tusiąwani, agai te nai me sela pelama, agabolo magi pai. 
Tama Naomigo Rutbolo e tiwai po hanalu wali, “Megi nago e bali menade saiwe? Nage mena bidigo bali gide sę yaiwe? Eno homugo Genuai Bidigo te nage sulama, te nage homu yali bidi dali te agai wiegi yai sę emainogo homu ebao,” wali. Rutgo te po wai, “Eno megi te bidi me deligo gide sę yali, te bidi nogi Boas dao.” 
Tama Naomigo te po wai, “Eno homugo te bidide Genuai Bidigo wiegi yai sę emainao. Genuai Bidigo po te bidibo ula elalubo bidi dabe dali, me te isali bidi dabe dali, dąų wali po te munu me tagalogobeo.” Tama Naomigo te tiwai po oduai, “Te bidi aga te da deli hani, te da tomode augwaligo te da dali te Elimelekgo tǫ dabe dali tonalubo bidi me deli dao,” wali. 
Tama tialima, Rutgo te po wai, “Boasgo po me deli enabolo ma wai. Te ena agai sę ebo we dabe dali naga sę yao, te sę silibo sogo usu nagasaibao, te po walio.” 
Naomigo te po wali, “Te mu dao, auwa. Ma, nage gasa bidi dabego giba sę igi pali da, teda te gi page bidigo sę ebo bidi dabego dwai kolesaga nagebolo yaibao. Ma, nage te Boasgo sę ebo we dabe dali naga sę eyu da, teda nage bugagia bidiyu, magi sę me egobeo,” wali. 
Tama tibaso, Rut te Boasgo sę ebo we dabe dali sę idubadi, te bali togobo sę me te wit sę dali silalio. Tama Rut aga auwa we dali bidaluai. 
