﻿1 Samuel.
3.
Te gesi ogwa bidi Samuelgo te Genuai Bidigo sę ebadi, te Eligo aga tonaluali. Te kibu be hauwa bidai madi, tama Genuai Bidigo te Israel dabebolo po hauwa sogo me wasiąwai. Te deli deli sogo naga te aga augwaliba te nade pedalubo tiwai elama, te augwaliba po magasali. 
Megi da, Eligo gedu doyu, tama pąde aga gedu halua sainu yali. Tialima, me sogo hulide aga te Godigo be habude pila muani, 
tama Samuel te Godigo Dąų Wali Bomai Po Muani Halobage elalubo madi pila muai. Te pąde be posainu ebadi, tama Godigo bede ula elaluali lam te me ula elaludai, 
tialima, Genuai Bidigo Samuelba i wali. Tama Samuelgo te po wai, “Awe, ena bidibao,” wai. 
Tama aga hodaluama, te Eli bidiboba udada pelama, tama te po wai, “Eno odali, nago ena i wabo, tibaso ena asali,” wali. Tiali goli, Eligo po wei ponoyu, te po wali, “Eno nage i me wabeo. Nage pelama, te naga betba ma pigi pao.” Tialima, Samuel te aga betba ma solama, pigi soali, 
tama nosali Genuai Bidigo aga i ma wali, tama Samuel te Eli pila muboba hodasa pelama, tama te po wai, “Nago ena i obaso, tama ena asalio.” Tiali goli, Eligo te po wali, “Ogwa, eno nage i me wabeo. Nage te naga betba pelama, ma pigi pao.” 
Samuelgo te Genuai Bidi bugagia konebe, magi baso meni, Genuai Bidigo polobadu aga dali po me misąwai dao. 
Tialima, nosali Genuai Bidigo Samuel te sela sogo weyu i wali, tama Samuel Eli bidiboba hogodasa pelama, te po wai, “Nago ena i obaso, ena asalio,” wali. Megi da, Eligo koneani, Genuai Bidigo naga te Samuel i obao walio. 
Tama Eligo agabolo wali, “Nage te betba ma pigi pao, tama agai nage i ma obaso da, teda nago te tiwai po wao, ‘Genuai Bidi, nago enabolo po walao. Ena nago sę bidi, te eno nago poba olo munama, odalubao.’ Nago te po wao,” Eligo te po wai. Tialima, Samuelgo Eligo wali po odama, tama aga te betba ma pigi pali. 
Tama nosali Genuai Bidi ma dolagaselama, tama agaba i weyu, te polobadu wali po tiwai gilama wali, “Samuel! Samuel!” Tama Samuelgo te po wali, “Nago po megi da wao, ena nago sę bidi tama eno nago po waboba olo muai elalubao,” wali. 
Tama Genuai Bidigo agabolo te tiwai po wali, “Bugagia odao. Te pąde eno te magi sę me deli te Israel dabe tomode yaibao, tama augwaligo te sę yabo po odama, te augwali midigi dwai mu saibao. 
Tama te sogo te eno te tigidali dwai sę te Eligo hani sibi dabe dali wali po gilama te sę yaibao. 
Eno homugo nago te tiwai po agabolo walao, te eno agai hani sibi dabede te yaibao wali sę elama, tama augwali mu silaibao, magi baso meni, te agai ogwa sigo dwai po enabolo wali. Tama Eli aga digi augwali sigo te sę ebo kolesaga koneani, tiali goli, agai augwali si te sę ebo hagebeo. 
Tama teyu, eno te Eligo hani sibibolo te tiwai bomai po wai dao, te kibu elebo ofa ma te gasagi yai ofa ebo sę me deligo te augwaligo dwai sę yali, te munu me sela sągobeo. Mu menio,” wali. 
Tialima, Samuelgo te po wabo odama, tama aga te betde pila munama, te be posa pali. Tama kigamude Samuel hodaluama, tama Genuai Bidigo be sunumi dagi pali. Tiali goli, Samuelgo te nade subo tiwai yali sę po te Elibolo wabo te aga wi yali. 
Tiali goli Eligo Samuel i weyu, te tiwai wali, “Samuel, eno ogwa, nage e asao.” Tialima, Samuelgo te po wai, “Awe, ena asobao,” wali. 
Tama Eligo agabolo hanalu wali, “Genuai Bidigo mena po nagebolo waliwe? Nago ena dali po me deli dualigio. Te nago po me deli dualubaso da, teda Godigo nageba dene momainu mu yaibao,” wali. 
Tama tibaso, Samuelgo agabolo te Genuai Bidigo wali po tigidali wali, tama agai po deli te me dualubeo. Mu menio. Eligo odama, tama agai te po wali, “Aga digi te Genuai Bidi dao. Te agai mena sę yainu ebaso da, teda agai te sę ebo dao,” wali. 
Tama bidu, nosali Samuel genuai bidi pedelama, tama God Genuai Bidi aga dali bidai. Tama teyu, Samuelgo te magi nai me deli pedelaibao po obaso da, teda Genuai Bidigo te Samuelgo wali po gilama te sę pedalu yai. 
Tama teyu, te Israel tǫ pedai we bidi tigidaligo te tiwai koneani, Genuai Bidigo Samuel te aga profet bidi mu nigilali. 
Tama te Genuai Bidi te Samuelba te Silo buluba pedelama, tama agabolo te po magasai. 
