﻿1 Samuel.
4.
Tama Samuelgo te Israel dabebolo te tigidali e sę ebo po obaso, augwaligo agai poba olo bugagia muani. Te sogo te Filistia dabego te Israel dabe dali boi hwįagasu asobaso, tama te Israel dabe hogodama, augwali dali te boi hwįgi pai. Tama te Israel dabe bidabo pesage te bulu Ebeneser te pąde nigilama bidali, tama te Filistia dabe bidabo pesage te hanu Afek pąde nigilama bidai. 
Tama nosali te Filistia dabego augwa ami bidi dabe wasilama, tama te Israel dabe dali boi hwįani. Te boi genuai mu hodolama, tama te Filistia dabego te Israel dabe aiyaba elaluama, tama te bidi umabo, te bidi sese hauwa, te 4,000 bidi ela muai. 
Tama te Israel ami bidi dabe te bidibo pesageba ma asobode, te polalubo bidi hetman dabego te po wai, “Magi baso Genuai Bidigo te da Filistia dabego aiyaba elalumainu ilaliwe? Tegoba, polo tama, dago bidi meba te Siloba tagala palama, te Genuai Bidigo Dąų Wali Bomai Po Munalubo Halobage te selasa asomainao. Tama da pelama, hwįgi pabo sogo, te Genuai Bidi da dali pelama, te da tau sobaso, te boi bidi dabego da aiyaba me elalugobeo,” wali. 
Te polalubo bidi te hetman dabego te po wali silibo side, teda te ami bidi dabego te bidi meba Siloba tagala palama, tama augwaligo te Dąų Wali Bomai Po Munalubo Halobage te Genuai Bidigo Tigidali Bomo Elalubo, te halobage sigi pomainu tagala palai. Te halobagede te ensel bidi noma nigali elalubo, te ugwadu daide elaluai, tama te Genuai Bidi king duabo sia sai tiwai elaluai. Tama augwaligo te halobage sela asobo sogo da, teda te Eligo ogwa si, Hopni me Finias sigo te Dąų Wali Bomai Po Munalubo Halobage sela asobo tonalua asu, te bidi dabe dali asai dao. 
Augwali te bidibo pesageba sabolama, tama te Israel dabe augwaligo te Dąų Wali Bomai Po Munalubo Halobage sela asobo sulama, tama augwa wiegi yai homu pemene eyu, tama po dagą bomonama wali, tama posolu wabo genuai mu pedelali. 
Te Filistia dabego te Israel dabego te tiwai i wabo odama, tama augwa te po wai, “Te i wabo te Hibru dabe bidibo pesagede wabo odali. Magi baso te tiwai i dwai wabowe?” Nosali te Filistia dabego te tiwai po odali, te Genuai Bidigo Dąų Wali Bomai Po Munalubo Halobage te augwa bidibo pesageba sela asali po wai, 
tama teyu, augwali wi elama, te po wai, “Te god meba augwali bidibo pesage tomoba asalio. Tegoba! Megi da, te da mu dolaibao. Polobadu te boi bidi me deligo te tiwai kolesaga da dali me yai menio. 
Megi da, da mu hagala silaibao. Dego da tau selama, tama te bomai god dabego da dolidali da wabo usu egowe? Te god dabego naga te haniani dwai sę te Isip dabeba tagala palama, tama augwali te wa pai bulude ela muai dao. 
Tiali goli, tagalao. Da bomo elama dolalu, tama bidi mugo hwįbo tiwai yao. Te tama tisąyu da, teda da te Hibru dabe olo sę ebo bidi pedelaibao, te augwali te da dologode polobadu bidali tiwai gilama yaibao. Tama tidali weyu, dago bomo elama hwįnao!” Te Filistia dabego augwa hasi te po wai. 
Tialima, te Filistia dabego wąbi bomo elama, mu hwįnama, tama te Israel dabe aiyaba elalubaso, tama Israel dabe augwa buluba wi pepela walio. Te wąbi hwįani side te Filistia dabego te bidi umabo hauwa mu elalio, te e tama, 30,000 bidi tigidali elai dao. 
Tama augwaligo te Eligo ogwa si me elibadi, tama augwaligo te Dąų Wali Bomai Po Muani Genuai Bidigo Halobage, te me sobadi yai. 
Te Benjamin hanide ami bidi me deli te hwįani pesage taga soyu, te Siloba udulama, tama te sogo naga te buluba sabolali. Te hwįani sę pedelali sęde te aga haliga sęgę mu ebaso, tama aga gudubo ugwa pisilama, tama tobolude tǫ pialio. 
Eli te Silode bidu, tama duabo sia saide te sunumi sesegede dulaludai. Aga te Genuai Bidigo Dąų Wali Bomai Po Muani Halobagede homu hauwa elama, homu kone palu bididuai. Tialima, te ami bidi te Siloba sabolama, tama te Israel we bidi te boide aiyaba elaluama, hagawali po pusali. Tama tigidali we bidi wi elama, tama dwai i wabo hwa walio. 
Te sogo te Eligo kibu be 98 yali elaluali, tama aga gedu tigidali mu halua sai. Tialima, Eligo te we bidigo i hai wabo odama, augwalibolo hanalu wali, “Magi baso dagego tama tiwai i hai obawe?” Tialima, te ami bidi te Eli pageba udulama, tama agabolo te tiwai po wali, 
“Megi e sogo naga ena te wąbi hwįbo pesagede wi asu, asali.” Tama Eligo agabolo hanalu wali, “Ogwa, magi yaliwe?” 
Tama te bidigo po wei ponoyu, te tiwai po wai, “Te Filistia dabego da aiyaba elaluama, tama ami bidi dabe hauwa mu elali. Tama da augwalide wi soali. Tama me augwaligo nago ogwa si me elali, Hopni me Finias. Tama augwaligo te Genuai Bidigo Dąų Wali Bomai Po Munalubo Halobage me dobola sai dao,” wali. 
Eligo te Dąų Wali Bomai Po Muani Halobage te sali po odama, teda aga te dualaluali sia sai tudi badu te Godigo be sunumi pąde tulaluali. Aga monu dabe eyu, te tigi nisai bidai, tama aga te sia tudiba degasa dulu, te aga dogoni mage toga peyu, tama isalio. Agai te Israel dabe tonalubo sę idubadi, te kibu be bidi sese si, 40 kibu be bidai dao. 
Te sogo Eli aga ogwago we, te Finiasgo we, aga haliga elaluai, tama aga wai ame nabo te pąde yagasali. Tialima, agai te tiwai po odali, te Filistia dabego te Godigo Dąų Wali Bomai Po Muani Halobage sela pali po wali, tama aga wąį monu me aga bidi me, augwali si isali po odai. Tama polo tama, te wai ame nabo dene agaba pedelama, agai te wai ame nani. 
Te pąde aga isainu, te aga tau sabo we dabego agabolo te tiwai po wali, “Nage wi me igio. Odao, nago ogwa ame nai dao,” wali. Tiali goli, wai aga idago te po odisiąma, tama te wego wali po wei ponobeo. 
Tiali goli, agai te tiwai po wali, “Te Godigo ula yai bomogo da Israel dabe tagalalio.” Tama isiyu, agai te wai nogi Ikabot poali. Agai homugo te boi bidi dabego te Dąų Wali Bomai Po Muani Halobage sali, me te aga wąį monu, me aga bidi isali, te homu kone palama, tama te tiwai po wai. 
Tama teyu, agai te po wai, “Te Godigo bomogo da Israel tagalali, magi baso meni, te boi bidi dabego te Godigo Dąų Wali Bomai Po Muani Halobage te salio,” wali. 
