﻿1 Samuel.
14.
Me sogo side nosali, Jonatango te aga gesi ogwa bidi ami bidi te hwįbo sesemone tolasa bilibo bidibolo te po wai, “Da si te Filistia dabe bidibo pesage, te pedai badu pinao,” wali. Tiali goli, Jonatango te aga aya Solbolo weyu, te aga paiba po me wabeo. 
Te sogo Solgo ugwa be te ni pomigranet dologode sę yani, te Mikron bulu, te Gibea tǫ pąde, tama te ami bidi dabe te 600 te aga dali te Mikronde bidai. 
Pris Ahiya te prisgo bebo ugwa gudama, te augwali dali bidai. Ahiya te Ahitupgo ogwa. Tama Ahitup te Ikabotgo ama, te Finiasgo ogwa si. Tama Finias te Eligo ogwa dao, te Genuai Bidigo pris polobadu te pris bidi te Silo bulude bidai. Tialima, Jonatan pai, tiali goli, te Solgo ami bidi dabego te Jonatan pali konebeo. 
Jonatan dali, te aga hwįbo nai tolasa bilibo bidi dali, augwali si te Filistia dabego bidalubo pesageba pabo sunumi wali pali, tama augwali si te bulu du sau pado te tomodu pabo sunumi teba pedelali. Te pedai badu te moni masigi dolalubo pesage elaluali, me me badu elalu, me me badu elalu yali. Me masigi elalubo pesage nogi augwaligo te Boses nogi yali, tama gasa me masigi elalubo pesage augwaligo te Sene nogi yai. 
Te masigi elalubo pesage me deli te not pedai badu te Mikmas sunumi elalubo badu, tama gasa masigi me te Geba tǫ pedai badu elaluali. 
Tialima, Jonatan te masigi elalubo pesageba sabolama, tama aga te aga dali hodobo asali bidibolo te tiwai po wali, “Ae, da u badu pedai badu pelama, tama da te Genuai Bidigo po odisiąbo bage, te Filistia dabe bidalubo pesageba paibao. Te Genuai Bidigo da tau siyu, te dago augwali aiyaba elaluabo homu ebao. Te Genuai Bidigo te hwįabo bidi hauwa selama, te boi bidi dabe augwali aiyaba elalumainu me egobeo. Menio. Te dwasianu hani naga te usu dao,” wali. 
Tama aga hwįbo nai tolasa bilibo bidigo te po wai, “Te usu dao. Nago mena sę yainogo ebaso da, teda eno deli haliga nage dali yaibao,” wai. 
Tama Jonatango agabolo te po wali, “Wiegi yai mu dao. Megi da, da si te uba pedai badu pelama, tama te Filistia dabego da sumainu yaibao. 
Tama augwaligo dabolo weyu, te augwali daba asainu tonalua po obaso da, teda da tede tonalu dolalueibao. Te da augwali pageba me pogobeo. 
Tiali goli, te augwaligo po weyu, ‘Dage si asao,’ po obaso da, teda da augwali pageba paibao, magi baso meni, te tiwai ebaso, te dago koneabo sę ebao, te Genuai Bidigo da tau sobaso, te dago augwali aiyaba elalueibao,” wali. 
Tialima, augwali si pelama, te pepeli diliba doligi pelama, tama te Filistia dabego augwali si suali. Tama te Filistia dabego te po wai, “Suao! Te Hibru bidi meba te augwa geme dualaluali dedagedu teda asai dao.” 
Tama te Filistia ami bidi dabego te Jonatan dali aga hwįbo nai tolasa bilibo bidi dali augwali siba te tiwai i wali, “Ae! Dage si edaba holao,” wali. “Dago magi nai me deli dage siba ola mawaibao,” wali. Jonatango te po odama, tama agai te aga hwįbo nai tolasa bilibo bidibolo wali, “Nage ena wali asu, tama da pinao. Megi dago koneani, te Genuai Bidigo da Israel dabego augwali aiyaba elalumainu yaibao,” wali. 
Tialima, Jonatan te bulu pado dwai madi nogo de sągą sigo gigi holali, tama aga tau sabo bidi me te aga wali holali. Tama augwali si te Filistia dabe bidibo madi sabolali. Tama Jonatango augwali elama, tama augwali te tǫba tulalubadi, tama aga tau sabo bidigo augwali te bainat hwągo ela muyu yai dao. 
Jonatan te aga tau sabo bidi dali sigo te wąbi te Filistia dabe dali hwįnama, tama augwali sigo te bidi sese deli bidi ela muai. Te wąbi hwįani te dwasianu tǫ dage pedaide hwįai dao. 
Tama te Filistia ami dabe te bidibo pesagede bidali, tama te bulude biliyu hwįbo ami bidi dabe, tama te tigidali gasa Filistia dabego me te hwįani po sabilibo odama, tama augwali wi dwai mu yali. Tama tǫ mali yai. Tama Godigo te Filistia dabe homu kolesaga dolama, tama augwali wi tedela pai dao. 
Tama Solgo te Gibea hanu tonalumainu nigilali ami bidi dabego te Filistia dabe bidibo pesageba tononobadi, tama suali, augwali udayu, te iba soyu, eda asu eyu, te esela pabo bidi dabe tiwai bilalubo suai. 
Tialima, augwali pelama, Solba wagi pali, tama Solgo homugo te agai ami bidi meba pelama, te Filistia dabe dali hwįgi pali da homu yai. Tama tiyu, Solgo aga ami bidi dabeba te tama po wali, “Te ami dabe nedama, tama niwai bidi dabe te bidisiąbaso da, te dago koneaibao,” wali. Tialima, augwa te tiwai elama, tama Jonatan dali te aga hwįbo sesemone sabilibo bidi dali, te augwali si bidisiąwai. 
Te sogo te Godigo Dąų Wali Bomai Po Munalubo Halobage te Gibeade munaluai. Tama tiyu, Solgo te pris Ahiyabolo olama, te halobage sesao po olama, te augwa Genuai Bidigo homu kolesaga hanalu wainu yai. 
Solgo te prisde po midubadi, tama te Filistia dabego i wabo sę mu idubadi genama, tama udayu, te augwa bidibo pesage tomoba pelama, te augwali esela pabo bidi dabe tiwai mu yali. Tialima, Solgo augwaligo te tebo odama, tama agai te prisbolo walali, “Te halobage tagalao. Da hwįgi pobao,” wai. 
Tama Sol aga ami dabe dali i hae olama, tama udulama, te Filistia dabe dali hwįgi pali. Tama augwaligo te Filistia dabe te esela mu pabo tiwai sulama, tama augwa abagi hasi hwįyu yali. 
Tama te Hibru bage meba te Filistia dabego ami dabe bidibo pesage tomode bidali. Tama megi da, augwaligo te Filistia dabe tagalu, tama Sol de Jonatan si dali deliba muna sigi pelama, tama augwa abagi dede, te Israel dabe, te hwįbo tau salio. 
Tama te meba Israel dabe te Efraimgo bage bulu dude geme dulaluali bage, augwaligo te tiwai po odali, te Filistia dabe wi palio wai. Tama augwali aselama, te Sol de Jonatan si tau selama, te Filistia dabe pobeasa pali. 
Tama augwaligo te Filistia dabe pobelama, tama hwį hwį pedubadi, te Betaven edelama, tama mu hwį hwį palio. Tama tiyu, te sogode Genuai Bidigo te Israel dabe tau selama, tama augwali aiyaba elaluali. 
Te hwįani sogode Solgo bomai po te Israel dabeba wali. Agai te tiwai po wai, “Megi naga eno te boi bidi dabeba te dwai sę yali wei ponama, tama augwaliba dene mu mawainu ebao. Tama tiyu, dage tigidali bidi te nai me deli tusiąma, te giliga dega sigiluboba usu nao. Te bidi mego nai tuali da, teda eno homugo te Godigo aga dolomainu yaibao,” wali. Tama tibaso, te bidi mego nai me tusiąma, tama te Israel dabe tigidali te nasi dwai mu elama, tama bomo mu meni yani. 
Tama augwali te busi me deliba sabolama, tama suali, te kiabi bunu hauwa te tǫde elalubo suali. 
Augwaligo te kiabi bunu suali, tiali goli bidigo me tusiąwai, augwali te Solgo bomai po walide te wi ebaso tiali. 
Tiali goli, Jonatango aga ayago te ami bidi dabe dali wali po te agai odisiąwai. Tama agai te tolasa bilibo dono sesegede te kiabi bunu meba elalubo selama, tama agai tuali. Agai tula silibo si, tama polo aga bomo ma sai. 
Tama bidi me deligo Jonatanbolo te po wai, “Da tigidali nasi eyu, bomo meni ebo, magi baso meni, te nago ayago da te nai tugio olama, habu seliyu, tama dabolo po bomonama te tiwai po wai, te bidi me deligo e boi hwįbo sogo bubugade te nai me tubaso da, teda Godigo aga dolaibao po wai dao,” wali. 
Tialima, Jonatango agabolo te po wai, “Eno ayago te wali pogo te da tigidali dolalio. Dagego ena suao. Eno te dwasianu hanamu naga tuali goli, te ena bomo ma salio. 
Te dago te boi bidi dabede sali nai te dago tubaso da, teda dago bomo sabo usu yaibao. Dago te Filistia dabe hauwa elali, tiali goli dago te tiwai bomo sigi sogo da, teda dago te Filistia dabe umabo mu elegi dao,” wali. 
Te sogode te Israel dabego te Filistia dabe dali hwįani, te Mikmas bulude gagalama, tama pelama, te taun Aijalonba usu nigi pali. Tama tiyu, te Israel dabe nasi mu dwai eyu, tama bomo meni yai. 
Giliga degasa dulai madi, teda augwali udulama, te sipsip me bulmakau dabe te boi bidi dabego nai dabe sali, te nai dabe sigi pali. Tama augwaligo ulama, tama te mi kaneme elalubadi tuali. 
Tialima, bidi meba pelama, Solbolo wagi pali, “Odao. Te ami bidi dabego te kibu mi kaneme elalubadi tubo sę yai! Augwaligo te Genuai Bidiba sęgę sabo sę yalio,” te po wai. Solgo te po odama, teda agai te tiwai i wai, “Tegobao, augwaligo te God tudiba muani dao.” Tama agabolo te po sesali bidi dabebolo te tiwai po wai, “Dagego te genuai masigi me deli sigi pelama, tama hogogobele aselama, ena pageba sabolao. 
Tama nosali dage te ami bidi dabe tomoba tedela pelama, tama augwalibolo te bulmakau me sipsip dabe sesao po wagi pagameo. Tama augwaligo te masigi ugwadu daide ela munama, tama ulama tede tuagameo. Tiyu, augwaligo te kibu mi kaneme elalubadi tulama, te Genuai Bidigo gedude dwai sę idalio,” wali. Tama tialima, te sogo hulide digi te ami bidi dabego bulmakau sela asobaso, tama te pesagede elali. 
Tama Solgo te masigi te Genuai Bidigo alta tiwai ilama dąį ilali, te hasia sogo naga agai te alta nigibo sę yai. 
Nosali, Solgo aga bidi dabebolo te tiwai po wali, “Ae, da aiyaba dulama, tama te Filistia dabe hulide pobeasa pelama, tama augwali dali wąbi hwįdubadi, te giliga pedalumainu yaibao. Tama dago te bidi dabe tigidali elama, tama augwaligo doado bage saibao,” wali. Tama augwa te po wai, “Te usu dao, dago tama tiwai yaibao.” Tiali goli, prisgo te po wai, “Te Godiba dago hanalu bolo ebo dao,” wai. 
Tialima, Solgo te tiwai po Godiba hanalu wali, “Te dago te Filistia dabeba hwįgi pogowe, ma meni egowe? Tama te usu yali da, teda nago da tau sobaso, te augwali aiyaba elalugowe?” Tiali goli, megi te sogo Godigo agai po wei me ponobeo. 
Tama Solgo te Israel dabe tobolu bidibolo te po wai, “Dage asiąo,” wali. “Te e megi bubugade dego te dwai sęgę yali te gegelama hanilaibao, tama tialigo te Genuai Bidigo dabolo te po wei ponobeo. 
Genuai Bidi te sesemane sogo bidada pidu, tama da Israel dabe tau sabo, tama aga nogide eno te tiwai bomai po dąų wali, te dwai sę yali bidi aga isimainao, te mena bidi yaibaso me te tagalao, te isimainu yaibao. Tama te dwai sę Jonatango me yaibaso da, te eno wai tama digi tagalao, aga te isimainu yaibao.” Solgo te po wai. Tiali goli, te niwai bidi me deligo te po wei me ponobeo, mu menio. 
Tialima, Solgo te tama po te tigidali Israel dabebolo wali, “Dage tigidali u badu pedai badu dolaluiąo, tama Jonatan da si te e pedai badu dolalueibao.” Tama augwaligo te po wali, “Te usu da, dago te tama tiaibao,” wai. 
Tialima, Solgo Godiba hanalu wali, te Israel dabego Genuai Bidiba hanalu, te tiwai wali, “Genuai Bidio, magi baso nago eno po wei ponobewe? God, te Israel dabe dago Genuai Bidi, te eno ma te eno ogwa Jonatango te dwai sę yaibaso da, teda nago te prisgo te polalubo masigi somainu dąį ilao. Tiali goli, te gasa Israel we bidigo te dwai sę yaibaso da, teda nago te prisgo te namba 2 masigi somainu ilao,” wali. Tialima, Godigo odama, tama prisgo te Jonatan dali Sol si naga dąį ilibo masigi sali, tama te olo we bidi dabe menio. 
Tama megi da, Solgo tama po wali, “Te dego dwai sę yaliwe naga gegebo sę ebo tobage kolesaga eyu, ena ma Jonatan da si yaliwe, te sueibao.” Tialima, augwaligo tama tiali, tama te masigigo te Jonatan dąį ilali. 
Tama tialima, Solgo Jonatanba hanalu wali, “Nago magi sę yaliwe?” Tama Jonatango te po wai, “Eno te tolasa bilibo donode te dwasianu kiabi bunu ge naga te sela tuali. Tiali goli, tagalao, ena isimainu yaibao,” wali. 
Tialima, Solgo agabolo te po wai, “Awe, nage isimainao. Dago te nage elisąbaso da, teda eno dwai sę te Genuai Bidi gedude elalubaso, tama Godigo ena ela muaibao,” wali. 
Tiali goli, te we bidi dabego te po Solbolo wai, “Odiąo. Jonatango da Israel dabe tau selama, tama agai te genuai wąbi hwįagasali bage te augwali aiyaba elaluai. Te aga elimainu obawe? Mu menio! Dago te sesemane sogo bidada pabo Genuai Bidigo nogide mu po obao, nago dwai sę me deli agaba munu me elamuo. Magi baso meni, Godigo e sogo side aga tau selama, tama agai te sę yai,” wali. Tama tibaso, te we bidigo te Jonatan ma dobola sali, tama Solgo aga me ela mubeo. 
Tialima, te sogo nosali, Solgo te Filistia dabe ma pobeasa me pabeo. Tama te Filistia dabe te augwa tǫ pedaiba ma geasa pai. 
Te Sol Israel dabego king mu pedelali sogo, aga dali, te aga ami bidi dabe dali, te Israel dabego boi bidi te tigidali tǫ pedaide bidalubo bage dali hwįani. Augwaligo te Moap dabe me, Amon dabe me, Idom dabe dali, me te Filistia dali, me te Soba king dabe dali hwįani. Tama te hwįani te augwaligo te boi bidi dabe tigidali aiyaba elaluama, tama te boi bidi dabeba dene mayu yai dao. 
Tama Solgo te ami bidi dabe haliga hodolama, hwįmainu elama, tama augwaligo hwįbo bomo mu elama, tama te Amalek dabe me aiyaba elaluali. Tama tibaso, te boi bidi dabe te Israel dabe dali hwįagasu munu me asobeo. 
Te Solgo ogwa dabe te e tiwai, Jonatan, me Isvi, me Malkisua. Tama agai wegi si nogi te e tiwai, gomunai wegi te Merap, te tomo wegi Mikal. 
Te Solgo we nogi te Ahinoam, te Ahimasgo wegi da. Tama Solgo ami polalubo tobolu bidi te Apner, te Nergo ogwa, tama Ner te Solgo aya sabi bidi dao. 
Te Sol aga aya Kis, tama Kis me Ner, augwali si te Abielgo ogwa si dao. 
Te Sol king bidali sogo, agai ami bidi dabego te Filistia dabe dali hwįbo bomo mu yali. Tama agai te hwįbode wi isiąwai bomai bidi dabe te olo bidibo subo si da, teda agai augwali selama, tama augwali te aga ami bidi dabe pedalumainu sai dao. 
