﻿1 Samuel.
17.
Nosali te Filistia ami dabe te Sokoba sisinagasali, te Juda dabego taun me deli dao. Tama augwali osogo bidabo pesage te Efesdamimde nigali, te Soko taun de Aseka taun si tomode, tama augwaligo te Israel dabe dali hwįainu sisi elaluali. 
Tama Sol dali, te aga ami bidi Israel dabe dali pelama, te Ela bulu odogoba sisinama, tama bidabo pesage nigai. Augwali te bulude bidalu, tama augwa te Filistia dabe dali hwįainu sisi elama bidali. 
Tama te Filistia dabe te bulu du me deli u badu bidalu, tama te Israel dabe te bulu du me deli e badu bidalu yali, tama te ami hani sigo hwįbo pesage te tomo bulu odogo malu tǫde elaluali. 
Te sogo te hwįbo bomai bidi me deli, augwa te Goliat nogi yali, te Get taun bidi, aga te Filistia ami dabe bidibo pesage taga soyu aselama, te pepeli diliba hania dolagaselama, tama te Israel dabego aga suali. Te aga bobage usu te 3 mita pąde tama. 
Tama aga te hwįbo madi me, bulubo ugwa me, te augwaligo te brasgo nigai te muani, tama te hwįbo ugwa dabe sęgę te 50 kilogram elaluai. 
Tama aga sągą te bras dagego haluai. Tama agai te brasgo nigai sesemone te aga nagede tolasa bilali. 
Te sesemone te genuai mu, te ugwa hobolobo masin moni ba ain dili tiwai. Tama poai yali te enego gąų te augwa aingo nigai. Tama te aingo sęgę te 7 kilogram tama elaluai. Tama ami bidi me deligo te Goliatgo hwįbo sabele tolama, tama aga asobodu polasa pai. 
Tialima, te Goliat dolagaselama, tama te Israel dabeba genuai po dagą weyu, te tiwai po wai, “Magi baso dage te tama tiwai wasialubawe? Dagego hwįainogo, ebawe? Dage te Solgo olo sę ebo bidi naga da, tama ena deli da, te Filistia ami bidi dao. Ae, dagego te bidi me deli nigilama, te ena dali hwįagasao. 
Te agai bomo ugwaba igulama, tama ena ela mubaso da, teda da te dagego olo sę ebo bidi pedelaibao. Tiali goli, eno aga aiyaba elaluama, tama aga ela mubaso da, teda dage te dago olo sę ebo bage pedelagameo,” te po wai. 
Tama Goliatgo po mu ma weyu, te tiwai po wali, “Odiąo, megi eno dage Israel ami dabe usu saibao. Dagego te ena dali hwįabo bidi me deli nigilao,” wali. 
Sol me aga ami dabe daligo te po odama, tama augwali wi dwai mu yai. 
Te Devitgo hani sibi te tiwai dao. Devit te Jesigo ogwa dao. Tama Jesi te Efrata bulu bidi, tama te Betlehem bulu te Juda hanigo tǫde bidai. Jesigo ogwa te a naga olama, meba sela elalubo sogo te Sol king pedelali, Jesi te monu dabe yai mu bidai. 
Te Jesigo gomunai ogwa me, tomo ogwa me, te tudi badu ogwa me, te boi hwįgi paboba Sol dali pali. Te gomunai ogwa nogi Eliap, tama te tomo ogwa nogi Abinadap, tama te ogwa me Sama. Tama Devit aga te Jesigo sabi ogwa mu dao. 
Tama me sogo side Devit pelama, te Solba sę igi peyu, tama me sogo side agai te Sol taga soyu, te Betlehemba ma solama, te aga ayago sipsip dabe tonalugi peyu yai dao. 
Te bidi sese si te 40 sogo usu nama, te kigamu me pio te Goliat aselama, te pepeli diliba dolagaselama, tama te Israelba i weyu, te aga dali hwįabo bidi me deli te tagala palao po wai. 
Te me sogo deli Jesigo te Devitbolo te tiwai po wali, “Te e nogo si bret selama, tama te sęgę nogo si yai te augwaligo te siade ulubo wit me selama, tama augwa te bidalubo pesageba polo selasa pelama, tama naga ama dede genuai bagebolo te nai magi pao,” te po wai. 
“Tama te nogo si sis me sela pelama, tama te ami hani dabe augwa polalubo ofisa bidi magi pao. Tama nago naga ama dede dabeba hanalu, te augwali bugagia bidibawe, ma meniwe, te po hanalu wao. Tama nago nai me deli selasa ma asobaso da, teda eno koneama, te nago augwali suali da waibao. 
Te king Sol dali, naga ama dede me, te gasa ami bidi dabe dali, te Filistia dabe dali te Ela odogo bulude hwįbo sę ebao,” Jesigo Devitbolo te po wai. 
Tialima, te sogo nosali Devit te kigamu mu hogodama peyu, tama gasa bidibolo te sipsip dabe tonaluao po wali. Tama agai te nai dabe selama, te Jesigo agabolo wali gilama te bage bidalubo pesageba pali. Tama te Israel dabe te hwįbo pesageba pobadi, te aga augwali bidibo pesageba pedelali. Te ami dabego i weyu, genuai po dagą dali pelawali. 
Tama te Filistia ami me, te Israel ami me, te nani u badu me e badu me wasilama, tama augwa hwįainu sisi elaluali. 
Devitgo te nai dabe te walu tonalubo ofisa bidi dabeba menama, tama aga te ami dabe bidibo madiba udulama, tama aga ama dede dali po miani. 
Te agai augwali dali po midubadi, Goliatgo te Filistia hani taga soyu, tama te pepeli diliba dolagaselama, tama te Israel dabeba te polobadu wali po tiwai wali, tama Devitgo agai te wabo po odali. 
Te Israel dabe augwaligo te Goliat sulama, te augwali wi dwai mu ebaso, tama augwali wi pai. 
Tama te Israel dabe augwa hasi digi po miyu, te tiwai po wai, “Te bidi suao, te agai i wabo po odao. Agai te wąbi hwįainu da dianobao. Tiali goli, kingo te po wali, te Filistia elibo bidibolo te agai mone umabo hauwa mawaibao wali, tama te bidibolo te agai wegi somainu yaibao wai. Tama kingo te bidi aga hanide te takis mone me sisąma, tama augwali haniba te kingo sę tobage yagasomainu i me wagobeo,” wali. 
Devitgo te po bugagia odisąbaso, tama agai te aga pąde bidalubo bidi dabeba hanalu, te tiwai wali, “Te kingo mena sę te Filistia elibo bidibolo elama, tama da Israel dabeba te genuai hale pedalubo sę tagalaibawe? Te Filistia bidi te Godigo po odisiąwai bidi naga te dao. Agai hagoma mu eyu, tama te Sesemane Sogo Bidibo Godigo amiba te posobo po wali dao,” te po wai. 
Tama augwaligo agabolo te tigidali sę te Goliat elali bidibolo te kingo yabo sę po wali. 
Eliap, te Devitgo ama gomunai bidigo, te agai te bidi dabe dali po mibo odai. Tama aga haliga sębę elama, tama Devitbolo te tiwai po wai, “Magi baso nage eba asai dawe? Tama dego nago te dwai sipsip dabe te buside tonalubawe? Eno koneani, nage te hagoma ebo bidi, tama nage te hagoma kolesaga ebo bidi da. Nage te hwįbo naga suainogo asali dao,” wali. 
Tama Devitgo aga amabolo te tiwai po wai, “Menio. Eno te nai me deli koneainogo, tama tiyu, eno te bidi dabeba hanalu wali. Te dwai da, agawe?” wali. 
Tialima, aga begelama, palima, tama gasa bidi dabeba hanalugi peyu, te mena sę kingo te Godigo amiba te posobo po wali Filistia bidi elibo bidibolo yabo po wai. Tama augwaligo agabolo te sę yabo po dabe walio. 
Te bidi mebago Devitgo po odama, tama augwaligo te Solba wagi pali. Tama tibaso, agai te Devit aga asomainu i wali. 
Devit sabolama, tama agai Solba te tiwai po wali, “King, odao. Da Israel te Filistiade wi me elamuo. Te ena digi eno aga dali hwįgi paibao,” wali. 
Tiali goli, Solgo te po wali, “Mu menio. Nage usu me egobeo. Te nago mena tama aga dali hwįaibawe? Nage olo ogomani da, tama aga te ami bidi te ogwa bidide sogo bidali te e sogo megiba usu nagasobao,” wali. 
Tiali goli, Devitgo Solba te tiwai po wei ponani, “King o, eno te ena ayago sipsip tonaluali. Tama meba sogo te dwai uni hasa laion me bea dabe aselama, tama te sipsip dabe selasa pali. 
Tialima, eno te laion me bea te pobeasa pelama, tama elama, tama te sipsip ma dobola siyu yai. Tama te laion me bea te begelama, ena elainu ebaso da, teda eno te mage pedu nisi tola selama, tama aga ela muyu yai dao. 
King o, eno te laion dabe me te bea me eliyu yai, tama eno te tobage tama tiwai kolesaga te Genuai Bidigo po odisiąbo Filistia bidide tiaibao, magi baso meni, agai te Sesemane Sogo Bidada Pabo Godigo amibolo te posobo po walio. 
Genuai Bidigo ena tau sobaso, tama tiyu te laion me beago te ena me dolobeo. Tama megi me, agai ena tau siyu, tama te Filistia bidigo ena me ela mugobeo,” wali. Tialima, Solgo agabolo te po wai, “Wiegi yai da, nage pagameo. Tama eno homugo Genuai Bidi nage dali bidimainao,” wali. 
Tama Solgo te brasgo nigai madi te Devit toboluba muani, tama te brasgo nigali holobo ugwa agaba menama, te aga tigi halua somainu yali. Te hwįbo doado bage te Solgo nai dabe mani. 
Devitgo te Solgo bainat hwą te brasgo nigai te holobo ugwade walama, tama pabo usu sela suali. Tiali goli, te usu meni yani, magi baso meni, agai te tobage nai te aga tigide polobadu musiąwai. Tama tiyu, te Solbolo agai te po wali, “Eno nago e hwįbo doado bage munama tama hwįgi pogobeo. Eno te doado bage tigide musiąwai,” wali. Tama agai te tigidali peda sąwai. 
Nosali aga te tolasa bilibo dono selama, tama te dwasianu wę me deli elalubo madi pelama, tama te dwasianu dudu du masigi a naga selama, tama aga dwasianu waba bulali. Tama agai te masigi sąyabo kibu wali tolasa peyu, tama pelama, te Goliat dali hwįgi palio. 
Tama Goliatgo Devit suali, tama aga asu, te agaba gesabidi deli ununama asali. Tama te Goliatgo hwįbo sabele tolasa bilibo bidi, aga te polasa asali. Tialima, Goliat asu, te Devit pąba aselama, 
tama agai Devit suali, te gesi bidi mu, tama aga gesabidi te wiegi yai mu yai, tama agai hwįabo usu meni yai. Tama tiyu, agai homugo Devit te olo nai naga homu yali. 
Tama tiyu, aga dolagaselama, tama Devitbolo te po wali, “Magi baso nago te bilibo dono sela asaliwe? Nago homugo ena te yowi da weyu, elainu asali, agawe?” Tialima, agai te aga tibo god dabe i olama, te Devit dolomainu yali. 
Tama agai Devitbolo te tiwai po wali, “Nage asao, te eno nage ela munama, tama nago tigi te ba dabebolo me te uni hasa dabeba me menama, tama augwaligo tumainu yaibao,” wali. 
Tama Devitgo po wei ponoyu, te po wai, “Nago te bainat me sesemone dabe tolasa asu, ena dali hwįagasainu ebao. Tiali goli, eno nageba hwįagasainu ebo te Tigidali Bomo Elalubo Genuai Bidi, te da Israel ami dabe tonalubo Godigo nogide, te eno nage dali hwįagasobao. Te God agaba nago hagoma elama, tama agabolo te dwai posobo po wali dao. 
Odao. Megi e sogode naga te Genuai Bidigo nage eno nogoba mawaibao. Tama eno nage ela munama, tama nago tobolu togwaibao. Tama dago te dage Filistia ami dabe ela munama, tama augwaligo tigi dabe te ba dabeba, me te uni hasa dabeba menama, augwaligo tueibao. Te eno tama tiwai sę ebo sogo, te tigidali tǫ pedaide bidalubo we bidi augwaligo te tiwai eyu koneaibao, te da Israel dabego God, te God mu da waibao. 
Tama ede bidibo tigidali bidigo te tiwai ebo suyu, te Genuai Bidigo aga we bidi dabe te aga bomogo digi ma dobola sabo sueibao. Agai te hwįbo sesemone me bainat tolasa asobo bidigo bomogo te da ma dobola sogobeo. Mu menio. Genuai Bidigo digi te hwįbo aiyaba elaluama, tama agai dage tigidali te dago nogoba mawaibao,” te po wali. 
Devitgo po ola silama, tialima Goliat ma peyu, te Devit pąba asali, tama polo tama Devitgo te Goliat dali hwįainu udada peyu pai. 
Tialima, Devitgo nogo te aga waba munama, tama masigi me deli selama, tama te masigi sąyabo naiba munama, tama Goliatba enani. Te masigigo te Goliat gesabidide dolo dolama, tama aga gebo tomoba bula sigi pelama, tama aga gesabidi tǫba ilama degasa dulali. 
Tama tialima, Devitgo ugwaba ela holama, tama Goliat te masigi sąyabo nai dali masigi sigo naga ela muai dao. Aga te hwą bainat meni yai. 
Goliat te tǫde pigulai munalubadi, tama Devit udada pelama, aga pąba doligi pelama, tama Goliatgo bainat hwą dią selama, tama aga mage toga sąnama, tama aga ela muani. Te Filistia dabego augwa te polaluali ami bidi ela mubo sogo suyu, tialima tigidali wi tedela palio. 
Tialima, te Israel bidi dabe me, te Juda dabe me, te i weyu genuai po dagą olama, tama augwali pobeasa pelama, tama augwali ela muani. Tama te Filistia dabe dolama, tama te sunumide degasa peyu ela pali, te Saraim tagalama pali, te Getba usu nigi pelama, te Ekron taun sunumi obo elalubo madiba sabaligi palio. 
Te Israel dabego augwali pobeasa pelama, tama augwali te Filistia dabe bidali pesageba ma geasa aselama, tama te Filistia dabego taga pali tigidali doado bage te sali. 
Tama Devitgo te Goliatgo tobolu sela peyu, te Jerusalemba pelama, te agai Goliat aiyaba elaluali po te augwaliba ola magi peyu waseligi palio. Tiali goli, hasia bolo te aga ugwa beba digi pelama, tama te tigidali hwįbo nai te Goliatde sali nai mugi palio. 
Devit pelama, te Goliatba hwįgi pabo Solgo sulama, tama agai te ami dabe augwa polalubo ofisa bidi, Apnerbolo te tiwai po hanalu wai, “Te ogwa te dego wai dawe?” Tama Apnergo agabolo wali, “King o, eno mu po nagebolo obao, eno konebeo,” wali. 
Tama Solgo te po agabolo wai, “Tialima, nago te bidi dabeba hanalua biligi pelama, tama nago enabolo wagasao,” wai. 
Nosali badu Devitgo te Goliat ela munama, te aga bidali pesageba ma asobode tama Apnergo aga selama, te Solba pali. Devitgo te Goliat tobolu tolalubadi, tama te Apner dali pelama, te Sol sugi pali. 
Tama Solgo agaba hanalu wali, “Te ogwa bidio, nage te dego ogwa dawe?” Tama Devitgo agabolo te po wali, “King o, ena te Jesigo ogwa da, te Betlehem bidi me deli dao, aga te nago dologode bidibo bidi dao,” Devitgo te po wai. 
