﻿1 Samuel.
19.
Te Solgo te Devit ela muabo homu elama, tama agai te po aga ogwa Jonatanbolo walali, tama aga ofisa dabebolo me wali. Tiali goli, Jonatango te Devit godolo homu mu yai, 
tama tibaso aga pelama, Devit sugi pelama, agabolo te po wai, “Eno ayago nage ela muainu ebao. Tama teyu, do kigamu nago naga digi te bugagia tonaluao. Nage te giba pelama, geme duala sigi pao. 
Tialima, te aya da si te pedai te pą badu te nage geme dualalubo badu soyu, tama ena te aya dali dolalu, te nagede po miaibao. Tama agai magi sę nage dali yainu ebo te eno gegelama subaso da, teda eno nagebolo waibao,” wali. 
Tialima, kigamu Jonatan de Sol si peyu, tama po miani, tama Jonatango te Devit nogi ugwaba siyu tama Solbolo te tiwai po wai, “Ayao, te eno magi nai po me deli nageba wabo usu egowe? Te e tiwai dao. Nago dwai kolesaga te naga sę bidi Devitba munu me elamuo. Magi baso meni, te agai dwai sę me deli nage dali me ebeo, menio. Te tigidali sę agai yali, te nage tau siyu naga yali. 
Te agai Goliat elali sogo, te aga isabo me, te aga bugagia bidabo, te me agai tǫba eyu godolo me ebeo. Tama tialima, te Devitgo nogode, Genuai Bidigo da Israel tau sabo te geninama mu elalu, tama te boi bidi aiyaba mu elalualio. Tama naga digi sulama, tama nage wiegi yai homu pemene mu yai. Agai te dwai sę me eyu, tama magi nai me delide dwai sę yali me elalubeo. Tama tialima, magi baso nago aga olo dali ela muainu ebawe? Te nago tama tiyu da, teda nago dwai sę yali elalueibao,” te po wali. 
Solgo Jonatango te wali po odama, teda tialima agai bomai po me dąų walu, te po wai, “Eno mu po te Sesemane Sogo Bidibo Genuai Bidigo nogide obao, eno Devit munu me ela mugobeo,” wali. 
Solgo po ola silama da, teda aga palio, tama nosali Jonatango Devit i olama asali, tama agabolo te aga ayago wali po pusali. Nosali agai Devit selama, te Sol pageba pali, tama Devit aga te kingde polobadu yali sę tiwai ma yalio. 
Me sogo nosali, te Filistia dabe me Israel dabe dali ma hwįani. Tialima, Devit te ami dabe dali pelama, te Filistia dabeba hwįbo te bomo mu igi pelama, tama augwali aiyaba mu elalubaso, tama te Filistia dabe wi tedela palio. 
Te tudi badu nosali, Genuai Bidigo te dwai haubo mobo me deli te Solba ma tagala palama, tama aga tolalugi pali. Te sogo Sol te aga be tomode dugulalu, tama te sesemone ene nogode tolaluai. Tama Devit aga dali bidiyu, tama aga te gita elibo sę iduai. 
Tialima, Solgo sesemone ene te Devitba sąnama, tama aga ela mumainu yai. Tiali goli, Devitgo te enani ene geda muani, tama te enego te be paiali dagade naga dolali. Tama Devit aga wi palio. 
Tama te sogo hulide Solgo te sę bidi meba tagala palama, te Devit te bede tonalumainu, te tiwai ebaso te Devit wi pisiąbadi, tama Solgo aga te kigamu te beba aselama, te bede ela muainu tialio. Tiali goli, Mikal, te Devitgo wego, te Devitbolo te tiwai po walali, “Megi e sogo hulide naga nage wi pao. Te meni yani da, te do augwaligo nage ela muaibao,” wali. 
Tama te Mikalgo te baklain bono me deli selama, tama te be windode gebelama, tama Devitgo te baklain bonodu te tǫba dulama, tama aga wi palio. 
Devit pai madi, teda Mikalgo te agai tibo god me deli augwaligo te nigo nigai selama, tama te god te Devitgo betba pilali. Tama agai te dwasianu tobolo ni pilo me deli augwa te meme nisigo nigai te selama, tama te tibo godigo tobolu dologo badu muani. Tama nosali agai te tibo god te bobage ugwa pedai me deligo halualio. 
Tialima, te Solgo sę bidi dabe aselama, te Devit sagasainu asobo sogo, Mikalgo augwaliba te tama po wai, “Devit te gasi elalubao,” wai. 
Tialima, augwali te Solba ma pelama, tama agabolo wagi pali. Tiali goli, agai augwaliba te po wali, “Dage ma geasa pelama, tama te be tomoba pelama, tama Devit suao. Tama dage aga te betde selama, tama aga odasa aselama, tama eno aga ela muaibao.” 
Tialima, augwali geasa ma pelama, tama be tomoba pelama, tama augwaligo te tibo god betde te pilo tobolo ni tobolu dologode aiyadu munama pila mubo te suali. 
Augwaligo sula selama, tama Solba wagi pali. Tama nosali Solgo Mikalba te tama po hanalu wali, “Magi baso nago ena usu sabo sę yaliwe? Magi baso nago eno boi bidi wi pomainu ilaliwe?” Te po wai. Tialima, Mikalgo te tiwai po agaba wei ponani, “Devitgo enabolo weyu, te aga wi pomainu eno aga tau sisąbaso da, te agai ena ela muaibao po wali. Tama tibaso, eno aga tau sai dao,” te po wai. 
Te Devit wi pali sogo, aga pelama, Samuel te Rama taunba sugi pali. Tama Devitgo agabolo te Solgo te tigidali sę yali po pusali. Nosali Devit dali Samuel si te Naiotba pelama, bidigi pai. 
Tama bidi mebago Solba te tama tiwai po wai, “Devit te Naiot bulude bidibao, te taun Rama pąde dao,” wali. 
Tama tialima, Solgo te bidi meba tagala palama, te Devit pageabi igi pomainu yali. Tama augwali teba sabalubo sogo, augwaligo te profet hani me deli te tęąbi weyu, tama te profet hanigo ebo kolesaga tiwai eyu, te sasa mano pabo sę ebo sualio. Tama augwaligo suali, Samuel te profet dabego tobolu bidi bidali. Tialima, Genuai Bidigo Mobo te Solgo tagala palali bidi dabeba bomo elama pedaliyu, tama augwaligo me te tęąbi weyu, sasa mano pali. 
Nosali Solgo te tama sę ebo po odama, tama agai gasa bidi dabe tagala palali, tama augwali me te profet dabego ebo kolesaga tiwai yali. Tialima, Solgo me tama tiwai ebo odali, te agai geninama bidi meba mu tagala pali, tiali goli augwali me te profet dabego ebo kolesaga tiwai yalio. 
Tama nosali Sol digi aga te Ramaba pali, tama pidubadi genama, te genuai ulu wę pedalubo madi te bulu Sekuba sabolali. Tialima, agai te Seku bidi dabeba hanalu wali, “Samuel me Devit menade bidibowe?” Tama augwaligo te po wali, “Augwali si te Rama pąde, te Naiot bulude bidibao,” wali. 
Tialima, aga te sunumidu pidubadi, tama Godigo Mobo agaba bomo elama pedaliyu, tama aga me te tęąbi eyu, tama te sunumidu sasa mano peyu, aga te Naiot buluba sabolalio. 
Tama agai te aga ugwa dabe peda sąnama, te gasa bidi dabego ebo tiwai elama, tama aga me te profet dabego ebo kolesaga tiwai yali, te Samuel pąde tiali. Tama te giligade me, hulide me, aga te dwasianu ugwa name bea selama, tama pila mudali. Te sę te Solba pedelali, te po me deli page te bidi dabego pusali po elaluai. Te pogo te tiwai po wai, “Magi yaliwe? Te Sol me te profet pedalubo, agawe?” te po page te tama po wabo dao. 
