﻿2 Samuel.
3.
Te tudi badu nosali side, te Devitgo hanide Solgo hani si tomode te wąbi hwįani sesabi mu elaluali. Tama Devitgo hani te bomo yai mu pedelama, tama augwaligo te Solgo hanigo bomo tamonobo sę mu yalio. 
Te Devit te Hebronde bidali sogo, agai te ogwa a naga olama, me badu kibisa nogo deli tede ame nani. Augwa nogi dabe te tiwai, te gomunai ogwa aga te Amnon. Te Amnongo ida te Ahinoam, te Jesril bulu we dao. 
Te tomo ogwa te Kileap. Te Kileapgo ida te Abigel, te Karmel bulu we. Polobadu Abigel te Nabalgo we da, tiali goli te Nabal isibaso, tama Devitgo aga sali. Te sela wali ogwa te Apsalom. Te Apsalomgo ida te Maka, te king Talmai te Gesur bulu bidigo wegi dao. 
Te me si me si wabo ogwa te Adoniya. Te Adoniyago ida te Hagit. Te a naga wali ogwa te Sefatia. Te Sefatiago ida te Abital. Te nogo kibisa ogwa te Itream dao. 
Te Itreamgo ida te Ekla. Te tigidali ogomani te Hebronde bidiyu, ame nai dao. 
Te Solgo hani, me te Devitgo hani si tomode hwįbo sę yali sogo, Apner te Solgo hanide genuai bidi pedalubo sę yalio. 
Tialima, me sogode Isbosetgo te Apnerbolo te tiwai po kisilama wali, “Nago te eno aya Solgo we me deli dali pagela pialio. Te we aga te Rispa, te Aiago wegi da. Te nago magi baso yaliwe?” 
Apnergo te po odama, tama haliga sębę dwai mu elama, tama te po wali, “Nago homugo ena te naga yowi da weyu, wali da, agawe? Tama nago homugo eno te Juda dabe tau sabo sę eba homu eyu wabo, agawe? Menio. Kone palao. Te nago aya, Sol, te king pedelali sogo dąį elama, te megi e sogoba usu niyu, te ena aga wali bilali, tama te aga ama dabe me, abagi dali me, te megi tama me wali bilibao. Tama me, te eno nage te Devitgo selama dolomainu ilibeo. Tiali goli, megi nago te we me deli po enaba kisilibao. Te olo nai naga tiwai dao. 
Genuai Bidigo te bomai po te Devitba dąų waliyu, agai te Solgo hani dabe sela sąnama tama augwali te Israel king bidilamu da po wai. Tama Genuai Bidigo te po weyu, te agai Devit te Israel me Juda daligo king pedelama, tama Devitgo te tǫ pedai bulu tigidali tonaluaibao, wai. Te Godigo bomai po dąų wali gilama, eno te Devit king pedalumainu tau sisąwani da, teda Godigo ena ela mumainao,” te po wali. 
Tialima, Isboset te Apnerde wi mu ebaso, tama agai po deli me wabeo. 
Tialima, Apnergo Devitba po ola toliyu, te tama po wai, “Dego mu te bulu tǫ pedai tonalueibawe? Eno homugo te nago bomai po me deli ena dali dąų walubaso da, teda eno nage tau siyu, tama te tigidali Israel hani we bidi te nago hani we bidi naga pedelaibao,” te po ola tolali. 
Tialima, Devitgo Apnerba te tiwai po ola tolali, “Te nago po wiegi yai dao. Tiali goli, eno homugo te nago sę me deli bolo hasia ebaso da, tama eno te tobage bomai po nage dali dąų waibao. Te sę te tama tiwai. Nago te Mikal, te Solgo wegi, selama, tama aga te enaba ma odasa asao. Te nago tama tisąbaso da, teda nage eno me sugobeo,” wali. 
Tama nosali Devitgo te Isbosetba po ola toliyu, tama po wai, “Eno homugo te nago eno we, Mikal, te enaba ma tagala palao. Eno aga te Filistia dabe te bidi sese a naga 100 bidigo gasa tigi waligo abelali. Tama aga te eno we mu tama dao,” wali. 
Isbosetgo te po odolama, tama agai te bidi meba te aga bidi Paltielba tagala palama, tama te Mikal sigi pali, te bidi Laisgo ogwa dao. 
Tiali goli, te Mikal augwaligo te Devitba ma odasa soabo sogo, Paltiel te Mikal wali peyu, gela wabo sę ela pali. Tialima, augwali te taun Bahunimba sabalubo si, tama Apnergo te Paltielbolo walali, “Nage te naga buluba ma geasa pao,” wai. Tialima, Paltielgo te po odama, tama aga ma geasa palio. 
Te augwali Devitba pisąbadi, Apner te Israel polalubo hetman dabeba pelama, tama augwaliba te tiwai po wai, “Odao,” wali. “Hauwa sogo weyu, dagego te Devit duga king pedalumainu homu godolo ebo homu yai dao. 
Tialima, megi da, te aga king pedalumainu ebo sogo dao. Dagego te Genuai Bidigo wali po homu kone palao. Agai te tama po wai, ‘Devit te eno sę bidi, tama te eno agabolo te eno we bidi, Israel dabe, te Filistia dabego nogode me, te gasa boi bidi dabe nogode dali, te ma dobola sabo sę mawaiba,’ po wai dao,” Apnergo augwalibolo te po wali. 
Tama Apnergo te Benjamingo hani dabe dali me po miani. Tama nosali aga te Hebronba pelama, te Devitba te Benjamingo hani dabego me te Israel dabego yainogo yali sę po te Devitbolo wagi pali. 
Tialima, Apnergo te we Mikal selama, tama aga bidi dabe te bidi sese deli bidi dali pelama, te Devit bidibo bulu Hebronba sabolali, tama Devitgo genuai naa te augwaliba ula mani. 
Tama nosali Apnergo Devitbolo te tama po wai, “Te ena pelama, tama te Israel tigidali odasa aselama, tama augwali te nage dologode bidabo bomai po dąų walumainu yaibao. Tama nage te tigidali bulu tǫ pedai king bidi pedalu, te nago godolo ebo sę tiwai yagameo,” wali. Tama Devitgo te aga hani dabeba hanilibo po wali, te augwaligo Apnerbolo te dwai sę me elamu da po wai. Tama nosali agai te Apner tagala palama, tama Apner bugagia ma soalio. 
Apner te Hebronde osogo bidali sogo, te Joap dali, te Devitgo ami bidi dabe dali, augwali te sogo tede bidisąwai. Augwali te boi bidi dabeba hwįgi pai. Tama dwasianu bidama gana, nosali Devitgo te Apner tagala palama pai madi, te Joapgo hanigo te hwįbode sali hauwa doado dali augwali te Hebronba sabolali. 
Tama Joapgo te tama po odali, te Apner, te bidi Nergo ogwa, aga te king Devit suagasali po wai. Tama Devitgo te bidi dabeba habu seliyu, augwaligo te Apner me elamu da po olama, tama Devitgo aga tagala palai. 
Tama tialima, Joap pelama, te king sugi pelama, tama agabolo te tiwai po wali, “Augwaligo te tama po walio, Apnergo nage suagasu aselama, tama nago aga olo mu pomainu tagala palali po walio. Magi baso nago tama tialiwe? Nago te kolesaga yali te dolo ebeo. 
Te nago Apnergo kolesaga konesiąyu, te tama tiali da, agawe? Aga asali, te agai tibo po naga nageba ola magasali, te nage tau sagasu me ebeo. Menio. Aga asali, te nage pabo bulu tigidali te menaba pabo me, te nago sę ebo tigidali me, te bugagia sula sainu naga yali, te nageba ma aselama, hwįagasainu yali dao,” wai. 
Joapgo te po ola silama da, teda aga te Devit tagalama, palio. Tama agai bidi meba tagala palama, te Apner pali wali pobeasa peyu, te agaba hanalu omainu elama, te ma geasa asomainu yai. Tama te bidi dabe te Apner pidubadi, te ulu wę nogi te Sira teba sabolama, tama augwaligo aga ma odasa asai. Tiali goli, Devitgo te Joapgo yali sę te agai me konebeo. 
Te Apner aselama, te Hebronba sabolali sogo, Joapgo aga sela pelama, te taun genuai sunumi elalubo pąba doligi pelama, tama aga dali te geme po miainu ebo tiwai gilama yai. Tiali goli, augwali si te sunumide dolaluali sogo, Joapgo te aga pęwadage hwą ge selama, tama Apner te haligade enani, tama Apner isalio. Joapgo Apner elali, te Asahel isali te wei ponani, te Joapgo ama dao. 
Nosali augwaligo te sę yali po te Devitba wabo si, tama agai te po wali, “Genuai Bidigo koneani, te eno yali sęde te Apner me isibeo. Tama eno we bidi tigidaligo me, te sęde augwali magi sę me egobeo. Menio. Te Joap agaduba deligo yali sę naga dao. 
Tama Genuai Bidigo agade me te we wai sibi tigidalide homu kone palama yaibao, tama aga wąį te nosali pedalubode me, tama Genuai Bidigo te augwaliba dene mawaibao. Eno homugo te Joapgo hani bidi sibi deli delide te tobage gasi nogi gonoria me, oiyabe gasi me, ma augwali te we dabego sę naga emainu me, ma te boi bidi dabego augwali te hwįbo side ela mumainu homu ebo me, ma augwali te sesemane sogo nai nasi eyu, te nai sǫą pomainu homu ebao,” Devitgo te po wai. 
Apnergo te Asahel elali, te Joap de Abisai sigo ama, te polobadu te Gibeonde hwįani digi da. Tama tibaso, augwali sigo te augwa si ama isali te wei ponoyu, tama augwali sigo te Apner ela muani. 
Devitgo te Joapbolo me te Joap aga hani dabebolo te tiwai po wali, “Dagego te duga ugwa dabe pisilama, tama homu dene ebo ugwa gudao,” wai. “Tama te pubulabo madiba peyu, dage aga tigi polasa biliyu, dagego Apnerde te homu dene ebo gela wao.” Te Apnergo hani bage augwaligo Apner te Hebronde pubulali. Tama augwaligo te Apnergo tigi tolama, te gų pageba pubaligi pabo sogo, king Devit te augwali pabo wali pai. Tama Devit dali, te we bidi tigidali te gų page pąde dolalu, tama tigidaligo gela bomo elama mu walio. 
Tama Devitgo Apnerde homu dene ebo balia te tama wali, “Apner te esela me pisąwai bidi. Magi baso aga te tiwai isali dawe? 
Augwaligo te aga nogo sągą me dubeo. Augwaligo aga tibo po weyu, usu selama, te aga elali, te nai wi sabo bidi raskol dabego ebo tiwai yalio.” Devitgo te balia po ola silama, tama tigidali we bidi dabego te Apnerde gela ma wai. 
Te silibo si nosali, te we bidi dabego Devitbolo weyu, te aga nai tuao wali. Tiali goli, aga hagela homu elama, tama aga bomai po dąų weyu, te tama po wai, “Ena te nai munu me tusiąbadi, te giliga dega sigulaibao. Tiali goli, eno homugo te giliga dega sigi pisąbadi, te eno nai tubaso da, teda Godigo ena ela mumainao,” Devitgo te po wali. 
Te we bidi dabego kingo te po wabo odobo si da, augwali haliga te wiegi yai pemene mu yali. Tiali goli, te sę deligo naga augwali wiegi yai homu pemene me ilibeo. Menio. Augwa te kingo ebo kolesaga tigidalide te wiegi yai homu pemene yai dao. 
Tama te Devitgo we bidigo me, te Israel we bidigo me, te sę dabe te king Devitgo te sogode ebo sulama, tama augwa te tama koneani, te kingo te Nergo ogwa Apner ela muani bidi dali te deli homu me ebe homu yali. 
Tama kingo te aga ofisa dabebolo te tiwai po wali, “Odiąo. Te e sogode da Israelgo bomai bidi mu me deli te isali dao. 
Te mu tama, Godigo ena sa munama, tama ena te king pedelali. Tiali goli, eno digi eno te Seruiago ogwa sigo yali dwai kolesaga wei ponabo bomo menio. Augwali si te bomo elalubao. God Genuai Bidigo digi te augwaliba dene mayu, te augwa yali dwai kolesaga usu niyu tiaibao,” king Devitgo te po wali. 
