﻿2 Samuel.
7.
King Devit aga bede bidiyu, tama bugagia dulaluali, magi baso meni, Genuai Bidigo te boi bidi dabego te Israel dabeba hwįagasomainu me ilibeo. 
Tama kingo profet Natanbolo te tiwai po wali, “Ena te augwaligo te ni bǫgo sęwai wiegi yai genuai be me delide bidibao, tiali goli te Godigo Dąų Wali Bomai Po Muani Halobage te ugwa bede naga munalubao. Te dolo meni da, homu ebao,” wali. 
Tialima, profet Natango te tiwai po Devitba wali, “Genuai Bidi nage dali bidibao, tama tiyu, nago magi sę me deli yainogo homu ebaso da, nago te sę naga yao,” wali. 
Tiali goli, te sogo hulide Genuai Bidigo Natanbolo te tiwai po wali, 
“Eno sę bidi Devitba nage pelama, tama eno te po agabolo pusa magi pao. Te po wao, ‘Devit, nage te bidi eno sa muyu, eno te be sę emainu yali bidi nage menio. 
Ena te genuai bede munu me bidibeo. Menio. Te Israel dabe eno te Isip dabede dobola selama, te augwali ma odasa asali sogo, ena te ugwa bede naga bidali. Tama te tigidali pedai badu ena peyu, asu yali, ena te ugwa bede naga bidiyu ebo dao. 
Ena te dage Israel dabe dali te bulu pedai hauwa badu bilali, tama eno te dage tonalumainu nigilali te tobolu bidi dabe me delibolo eno te tiwai po me hanalu, te tama tiwai po me wasiąwai, “Magi baso te nago eno be me deli te ni bǫgo me sę ebe dawe?” eno te po wabe,’ te po Devitbolo wao,” Genuai Bidigo Natanbolo te po wai. 
Tama God Genuai Bidigo te po Natanbolo ma weyu, tama po wali, “Te eno sę bidi, Devitbolo, te tiwai po wao,” wali. “‘Ena, Te Tigidali Bomo Elalubo Genuai Bidi, eno nage te sipsip tonalubo sę ebo bidi bidibadi selama, tama eno nage sa muyu, te eno hani bage bidi, te Israel dabego tobolu bidi pedalumainu yai dao. 
Ena te nage dali bidiyu, te nage pabo tigidali tǫ pedaide te ena bilai dao. Tama eno te nago boi bidi dabe aiyaba elalu yai dao. Tama eno nageba te genuai nogi mawainu yali, te gasa bulu tǫ pedai te bulu tonalubo bomai bidi tiwai pedalumainu yai. 
Eno dage Israel dabego tǫ me deli sa muani, te ena we bidi dabe, tama eno dage te duga bulu tǫ pedaide bugagia bidimainu ilali. Tama te dwai boi bidi dabego dage me doloyu me egobeo. Polobadu digi te boi bidi dabego dage dolali. Te wąį nǫų dabego te tǫ sagasobo gagalali sogo, tama te eno dagego tobolu bidi nigilama mani sogo, te boi bidi dabego dage dolobo sę iduali. Tiali goli, megi da, te eno augwali paniama, tama te augwaligo nage me, te nago bulu tǫ me, te me dologobeo. Tama eno nago hani bidi bidimainu elama, tama augwaligo te nago wąį nǫų wai dabe te ame nomainu yaibao.’” 
“‘Te nage isibode te augwaligo nage pubalubo sogo, teda te eno nago ogwa me deli te king pedalumainu ilama, tama aga te bomai king pedelama, tama eno te magi nai me deligo aga aiyaba elalumainu me egobeo. 
Te kingo naga te eno be sę emainu yaibao, te eno we bidi dabe augwali ena pąba asomainu emainao. Tama te eno aga hani bidi dabede naga te sesemane bidada pabo sogo king bidi pedalumainu ilaibao. 
Tama ena te aga aya bidiyu, tama aga te eno wai bidiyu yaibao. Te agai dwai kolesaga ebo sogo, te eno agaba dene mabo sę eyu, te ayago aga waibolo ebo sę tiwai yaibao. 
Tiali goli, eno aga godolo mu eyu, te olo tau sabo wiegi yai kolesaga agaba sesemane sogo yaibao. Te eno aga tudiba me musiąyu, te eno te Solba yali sę tiwai eyu, te eno aga sela sąwani sogo, tama te nago agai bidali pesage sali gilama te tiwai me egobeo. 
Te nago hani da, te me sia sogobeo. Tama eno te nago hani bidi dabede te king sesemane sogo pedalumainu ilaibao,’ nago te po Devitbolo pusigi pao,” God Genuai Bidigo te po Natanbolo wali. 
Tama Natango Genuai Bidigo te wali po dabe odama da, teda tama aga pelama, te Genuai Bidigo te agaba ola mani po dabe tigidali te Devitba wagi palio. 
King Devitgo Godigo te wali po dabe oda silama da, teda aga te Genuai Bidigo ugwa be tomoba pelama, tama te Genuai Bidigo geduba duagi pelama, tama te tiwai gedu haluasa po wali, “Tigidali Nai Tonalubo God, Genuai Bidi, nago wiegi yai kolesaga hauwa enaba yali. Tiali goli, ena dali, te ena hani sibi dabe, da de dawe? Da te nogi meni yai bage naga dao. Da wiegi yai baso tama nago te tiwai sę me ebeo. 
Tigidali Nai Tonalubo God, Genuai Bidi, nago te wiegi yai kolesaga dabe enabolo yali te usu meni da homu elama, tama megi nago gasa kolesaga yabo sę po enabolo ma walio. Nago te eno wąį nǫų hani dabeba yabo sę po te enabolo pusali. Genuai Bidi, ena olo bidi gagawai da. Tiali goli, nago enabolo te nago yabo sę dabe po ola manio. Nago te da we bidi dali te tiwai kolesaga ebo dawe?” 
“Tama tialima, Tigidali Nai Tonalubo Genuai Bidi, te eno mena po me nageba wagawe? Ena naga sę bidi, tama nago ena koneanio. 
Te nago te genuai sę dabe te naga homugo digi yali. Tama megi te nago enabolo te po pusa mani, te naga kolesaga digi ena ola mani.” 
“Tigidali Nai Tonalubo God, Genuai Bidi, nage te polalubo bidi mu bidibao! Te nage tiwai me elalubeo. Nage deli te God mu bidibo, te dago nǫų wąį dabego pedauwalide odali po tiwai odobo dao. 
Nago da Israel te Isip dabe nogode kalabus bidibadi ma dobola selama, tama nago da te naga we bidi hani pedalumainu ilali. Tama te gasa we bidi hani te naga we bidi hani bidi da Israel tiwai me bidibawe? Mu menio. Tama nago te tobage wiegi yai genuai sę te da tau siyu, te nago we bidi da te bulu tǫ pedaiba sabolali sogo, te tobage sę dabe yai. Nago te gasa we bidi dabe ela gudulu sela sąnama, tama nago augwaligo tibo god dabe doliyu elama, tama dago augwaligo bulu tǫ sagasali. Tama tialima, te tigidali bulu tǫ pedaide bidali we bidi dabego te nageba genuai nogi mawai dao. 
Genuai Bidi, nago da Israel hani we bidi dabe te naga hani we bidi mu pedelama, tama da te tiwai sesemane sogo bidaibao. Tama Genuai Bidi naga digi nage te dago God pedelai dao.” 
“God, Genuai Bidi, ena te naga sę bidi, megi eno homugo nago enabolo me te eno haniba dąų walali po te tiwai sę pedaliyu, tama nago te tiwai sę sesemane sogo iduao. 
Tama te we bidi dabego nago te tebo sę ebo dabe sulama, tama sesemane sogo augwaligo nage genuai nogi mayu yaibao. Tama augwa te po weyu, ‘Te Tigidali Bomo Elalubo Genuai Bidi te Israel dabego God da,’ po waibao. Tama nago te eno hani bidi dabede naga te sesemane sogo king bidi pedalumainu ilaibao.” 
“Genuai Bidi, nage te tigidali bomo elalubo, tama nage te da Israel dabego God. Tama nago enabolo te tama po pusali, nago te eno wąį nǫų hani bidi dabe te bomo sesemane sogo elaluaiba wali. Tama ena, te naga sę bidi, eno te nageba gedu haluasa po wabo wi me egobeo. 
Tigidali Nai Tonalubo God, Genuai Bidi, naga digi nage te God, tama nago te po dąų weyu, te yaibao po wali wiegi yai sę tigidali te sę ebo da. Tama nago te wiegi yai sę yabo po ena nago sę bidi dali dąų wali. 
Tama eno homugo te nago dąų wali po te homu kone palu, tama nago te eno hani dabe wiegi yai bugagia ilao. Tama te augwali sesemane sogo nage dologode bugagia bidimainu yao. Magi baso meni, Tigidali Nai Tonalubo God, ena naga sę bidi naga bidali goli, nago te tobage wiegi yai sę sesemane ilabo po te eno wąį nǫų dabe dali dąų wabo po wai dao,” Devitgo te po wali. 
