﻿2 Samuel.
8.
Me sogo deli sogo nosali, Devit dali aga ami dabe daligo te Filistia dabe dali wąbi hodolama, hwįani. Augwaligo te Filistia dabe aiyaba elaluali, tama tibaso te Filistia dabego te Israel dabe munu ma tonalubeo. 
Tama nosali Devit dali, te aga ami bidi dabe dali pelama, te Moap dabe dali boi hwįgi pelama, tama augwali aiyaba elaluali. Tama agai te Moap dabe te wasilama, te tǫde pimainu ilali. Tama agai te bono baklain me deli selama, tama augwali usu sali. Te bidi dabe te polaluali dąį elalubode bidali me, te si wali dąį ilalide bidali bidi dabebolo, agai te augwali isimaina po wai. Tiali goli te sela wali dąį ilalide bidali bidi dabe, agai te augwali sula tagalalu bidimainu yali. Tama agai te tiwai sę ela pidubadi, te wasilali hani siligi paboba usu nigi pali. Tama te ela musiąwai Moap dabe aga dologode bidiyu, tama agaba te takis mawai. 
Tama nosali, Devit dali, te aga ami bidi dali, augwa te Soba tǫ kingba boi hwįgi pali, aga te Hadateser, te Rehopgo ogwa dao. Soba bulu tǫ te Siria hani bage me deligo tǫ pedai elaluai. Te sogo Hadatesergo aga ami bidi dabe selama, tama te wę Yufretis pedai badu pidubo sę elama, te boi bidi dali hwįainu yali, te aga tǫ pedai ma sainu yali. Tama Devitgo hanigo augwali sisinama, 
tama te hwįnama, te augwali aiyaba elaluali. Tama Devitgo te Hadatesergo ami bidi dabe hauwa sai. Agai te ami bidi te bidi sese hauwa, 20,000 sali, tama te hosde dualama hwįbo ami dabe te 1,700 bidi sobadi yai. Tama me, Devitgo te hwįbo side te karis dabe kegabo hos dabe te bidi sese a naga, 100 sali. Tiali goli, Devitgo te gasa hos dabego sągą gabulu kigibili dabe dolama, tama augwali te bomo elama bilabo usu meni yai. 
Te sogo te Damaskus bulude bidali Siria dabe, augwali hogodama, te king Hadateser dali hwįbo tau sigi pali. Tiali goli, Devit dali, aga ami bidi dabego dali, te Siria ami bidi dabe te bidi sese umabo, te 22,000 bidi ela muani. 
Tama Devit aga ami bidi meba te Siria dabego bulu tǫ pedaide muna muna pelama, te augwaligo wąbi ma hwįdali weyu, te tonalumainu muani. Tama te Siria dabe te Devitgo dologode bidiyu, tama augwaligo agaba takis mone mani. Te tigidali bulu tǫ pedaiba Devitgo boi hwįgi pabo side, te Genuai Bidigo aga tau siyu, tama aga ugwaba dįą holali. 
Tama Devitgo te Hadatesergo ofisa dabego te golgo nigai hwįbo sabele tolasa asobo suali. Tama agai te wiegi yai sabele dabe selama, tama te sabele dabe te Jerusalemba selasa palio. 
Tama me, agai te Beta taunde, me Berotai taun side te bras umabo hauwa sali, te Hadatesergo taun si dao. 
Te Hamat bulu tǫ king Toigo te tama tiwai po odali, Devitgo te Hadatesergo ami bidi dabe aiyaba elaluali po odalio. 
Tama tialima, Toigo aga ogwa tagala palali, Joram, te king Devitba pelama, te wiegi yai homu iliyu, siade da po wagi peyu, tama Devitgo te Hadateser aiyaba elaluali te wiegi yai homu pemene ilibo po wagi pomainogo tagala palai. Te Devitgo te Hadateser aiyaba elalualide te king Toi aga wiegi yai homu pemene yai, magi baso meni, te hauwa sogo Hadatesergo te Toi dali boi bidi iduali. Tialima, Joram te Devitba aselama, tama agaba te wiegi yai homu ilibo nai dabe magasali, te augwa te silvago, me golgo, me brasgo nigai dao. 
Devitgo te wiegi yai homu eyu magasobo nai dabe selama, tama God Genuai Bidiba sa munani. Te agai gasa boi bidi dabe aiyaba elaluama, te sali gol me silvade te tobage kolesaga yali tiwai gilama yalio. 
Agai te silva me gol dabe te Idom dabede, me Moapde, me Amon dabede, me Filistia dabede, me Amalek dabede te nai dabe sali, tama te Soba hanu tǫ te king Hadateserde te me sai dao. Agai te tobage sali nai dabe tigidalide te Godigo nai dao po olama, Godiba maduali. 
Tama nosali, Devit dali, te aga ami bidi dabe dali pelama, te Tamu Hauwa Elalubo Odogo Bulude bidibo Idom bage dali hwįgi pali. Tama augwaligo te Idom bidi dabe te bidi sese umabo, te 18,000 bidi ela muani. Te bidi dabego te hwįani po odama, tama augwa te Devitba genuai nogi mu mawai dao. 
Tama Devitgo te aga ami hani bidi meba te Idom bulu tǫ pedaide munama, te Idom dabe tonalumainu yali. Tama te Idom dabe aga dologode bidai. Te Devit pelama, hwįgi pabo bulu tǫ pedai tigidalide, te Genuai Bidigo aga tau siyu, tama aga ugwaba dįą holali. 
Devitgo te Israel tǫ pedai tigidali badu tonalu, tama agai wiegi yai doloba pai kolesaga te tigidali we bidi dali yalio. 
Joap, te Devit aga abe Seruiago ogwa, te ami dabego polalubo ofisa bidi bidali. Tama Jehosafat, te Ahilutgo ogwa, te polalubo kuskus sę bidi bidiyu, tama te gavman dabego sę ebo buku dabe tonalubo sę bidi bidali. 
Tama Sadok dali Ahimelek, augwali si te pris bidi bidali. Sadok te Ahitupgo ogwa. Tama Ahimelek te Abiatargo ogwa dao. Tama Seraia aga te kingo kuskus sę ebo bidi bidai. 
Tama Benaia, te Jehoiadago ogwa, tego te king Devit tonalubo ami bidi dabe te augwa tonalubo sę yali, te augwali Keret me Pelet hani dabe da. Tama te Devitgo ogwa dabe te pris bidi bidai dao. 
