﻿2 Samuel.
23.
Te e da te Devitgo po silagasu pusali po. “Ena Devit, te Jesigo ogwa, eno te tama po wai. Te Jekopgo Godigo ena te king nigilama, te ena bidibao, tama agai enabolo te we bidi gedude genuai nogi mawai. Tama eno te Israel dabego wabo wiegi yai balia hauwa asęani. Eno te tama po obao.” 
“Te Genuai Bidigo Mobo Bidigo eno pedauwalide te po pusali. Eno te dagebolo wabo po te agai enabolo pusa mani. 
Te da Israel dabego God te genuai masigi tiwai elama, tama da bobegelalubao. Agai enabolo te tama po wai, ‘Te king God dologode bidiyu, tama te we bidi doloba pai kolesagade tonalubaso da, 
teda te we bidi dabego agaba wiegi yai homu pemene eyu, augwa te kigamude giliga bugagia naniyu, tama te pǫgo te ula mesegelisiąbaso, te wiegi yai homu pemene ebo tiwai yaibao. Tama te tulubage nosali silibo side, te giligago te nosa ula ilali.’ Eno te po wai.” 
“Tama Godigo te eno hani sibi bomo ilama, bidimainu ilali, magi baso meni, agai te bomai po me deli te ena dali dąų wali, tama agai te dąų wali po te togolama, me ma bologobeo. Menio. Teda te dąų wali po te sesemane sogo elalueibao. Te eno godolo ebo nai tigidali, te Godigo ena mawaibao. Tama agai te ena te sesemane sogo ugwaba ela holomainu ilali. 
Tiali goli, te dwai bidi dabe augwali te sesani yai bono elalubo tiwai yali, te bidi dabego sela sąwaibao. Te bidi mego te tobage sesane yai bono te nogode tolalubaso, te usu me egobeo. 
Te bidi mego te bono sela sąwainu da, agai te ain dage me, te ene sigi me selama, tama te bono dabe elalubo pesagede te deliba sisinama, tama augwali te siaba ulao. Tama augwali tigidali te sia saibao.” Te da te Devitgo po silagasu pusali po dao. 
Te Devitgo bomai ami bidi dabego nogi te tama elaluali. Josep Basebet te Takemon hani bidi, aga te nogi elalubo hwįbo bidi selago polalubo ofisa bidi dao. Me sogo deli te Josep Basebetgo te sesemone tolalu, tama te 800 boi bidi dali hwįnama, tama agai tigidali ela muai. 
Eleasar, te Dodogo ogwa, aga te sela wali genuai nogi elaluali ami bidi dabede te si wali polalubo bidi me deli dao. Aga te Ahohi hani bidi dao. Me sogo deli Eleasar te Devit dali bidai, tama te Israel dabego te Filistia dabe te hwįabo madiba sisinibo suali. Tama te Israel dabego te Filistia dabeba te hwįainu diana sali, tiali goli te Filistia dabe asobaso, te Israel ibaba habu bulu kilasa pai. 
Eleasar aga deli naga te bomo elama dolalu, tama te Filistia dabe ela mubo sę yalio. Tama aga nogo tobalu elama, tama aga nogo te ge hwą poude holalu tolalubo tagalobeo. Te sogo Genuai Bidigo te Filistia dabe aiyaba mu elalualio. Tama nosali, te Israel dabe te Eleasarba ma begasa asali, tiali aga te Filistia dabe ela muani augwaligo suali. Tama sę me deli naga elaluali. Te isali Filistia bidi dabego hwįani doado bage sabo sę elaluali. 
Sama, te Agigo ogwa, te Harar bulu bidi, aga te genuai nogi elalubo bidi dabede te sela wali bidi aga da. Me sogo deli te Filistia dabe te Lehi buluba sisinagasai, te bidi dabego tągabi bulai gi me deli pąde elaluai. Tama te Israel dabego augwali bidalubo sulama tama wi pai. 
Tiali goli, Sama te wi elama, me kilasa pabeo. Menio. Aga te gi tomode dolalu, te Filistia dabe dali bomonama hwįani, augwaligo te tǫ sidali weyu te tama tialio. Tama agai te Filistia dabe ela muani, tama te tiali kolesagago te Genuai Bidigo te Filistia dabe aiyaba mu elaluai dao. 
Te Devitgo ami bidi dabego tobolu bidi meba elaluali, tama augwa te hani dabe nogi poyu, te 30 bomai ami bidi dabe da po wali. Tama me sogo deli Devit te genuai tǫ dedage te Adulam bulu dude bidibadi, tama te 30 wali bomai ami bidi dabede te ami bidi me selago te Devit aga sugi pali. Te nai inilama tau yai sabo sogo tama tiali. Tama te sogo me te Filistia ami bidi meba te Refaim bulu odogoba dulama, tama augwa bidibo pesage tede nigilama bidali. 
Te sogo Devit te bomai geme dualalubo pesagede bidali, tama te Filistia ami dabego te Betlehem hanu salio. 
Tama Devitgo te Betlehemde elalubo wiegi yai węba ma homu kone palama, te tama po wai, “Homu dene mu ebao,” wali, “te Betlehem hanu sunumi pąde elalubo ulu wę meba tugi sogo da, teda ena wiegi yai homu pemene mu igi dao,” wali. 
Te bomai ami bidi selago te tama po wabo odama, tama augwali hogodama, palio. Te Filistia dabego te Betlehem hanu tonalubo te wi homu me isiąma tagalali, te bidi selago augwali dega palama, tama augwali pelama, Devitgo te po wali ulu wę tugi pai. Tama augwa te wę selasa aselama, te Devitba magasali. Tiali goli, aga te wę tuabo homu me ebeo. Menio. Agai selama, tama Genuai Bidiba te ofa tiwai eyu, gelali. 
Tama agai te tama po wai, “Genuai Bidi, eno te wę me tugobeo. Te eno tubaso da, teda eno te bidi dabego kaneme tubo ąǫ yaibao, magi baso meni, te augwali te wę sigi painu pali sogo, te isibogo augwali mu gegali digi tama dao,” wali. Tama tiyu, Devitgo te wę me tubeo. 
Abisai, aga te 30 bomai ami bidi dabego polalubo ofisa bidi da wali. Aga te Joapgo ama, tama augwa si ida te Seruia dao, te we da te Devitgo abe dao. Me sogo deli sogode Abisaigo te aga sesemone tulama, tama te 300 boi bidi dali hwįnama, tama tigidali ela muai. Tama aga te sela ami bidi dabego sali genuai nogi tobage te agai me salio. 
Agai te genuai namba mu siyu, tama te genuai nogi elalu, te augwaligo polalubo bidi dabe bidali te agai augwali ela soali. Tiali goli, aga digi aga te ami bidi selade te aga deli me kisalubeo. 
Tama Benaia, te Jehoiada te Kapsel hanu bidigo ogwa, aga me te bomai ami bidi me deli dao. Tama hauwa sogo agai te boi bidi dabe dali bomonama, hwįani. Me sogo deli agai te Moap dabe bomai ami bidi si ela muani. Tama me sogo deli sogode te talua ge tulubage te tǫba tulubo side, Benaia te genuai tǫ dedage me deli aiyaba dulama, tama te bomai hasa laion me deli ela muani. 
Tama gasa sogo agai te Isip moni dobo dwai bidi me deli ela muani. Te bidigo te sesemone tolaluali, tiali goli Benaiago te ni dage selama, tama aga pąba pelama, tama aga dali hwįani. Tama Benaiago te bidigo sesemone nogode dobola selama, tama aga te sesemonego aga ma enema, ela muai. 
Benaiago te bomai sę dabe yali, tama tiyu, agai te ami bidi selago te genuai nogi elalubo te tobage genuai nogi agai me salio. 
Agai te sali genuai nogigo te gasa bidi sese olama, nogo si ami bidi dabego te sali genuai nogi te aiyaba elaluali, tiali goli aga te genuai nogi elalubo ami bidi selade te aga deli me kisalubeo. Devitgo te Benaiago te king tonalubo ami bidi dabe tonalumainu nigilali. 
Te e da te bidi sese olama, nogo si te bomai ami bidi dabe nogi te tama tiwai. Asahel, te Joapgo ama, Elhanan, te Dodogo ogwa, te Betlehem hanu bidi, 
Sama de Elika si, te Harot bulu bidi si da, 
Heles, te Pelet hanu bidi, Ira, te Ikesgo ogwa, te Tekoa hanu bidi, 
Abieser te Anatot hanu bidi, Mebunai te Husa bulu bidi da, 
Salmon te Ahohi hanu bidi, Maharai te Netofa hanu bidi, 
Helep, te Banago ogwa, te Netofa hanu bidi, Itai, te Ribaigo ogwa da, te Benjamingo hanigo tǫ te Gibea hanu bidi, 
Benaia te Piraton hanu bidi, Hidai te Gas bulu du te odogo bulu pąde bidi da, 
Abialbon te Araba hanu bidi, Asmavet te Bahurim bulu bidi, 
Eliaba te Salbon hanu bidi, Jasengo ogwa dabe, Jonatan, 
Sama te Harar bulu bidi, Ahiam, te Sarargo ogwa, te Harar bulu bidi, 
Elifelet, te Ahasbaigo ogwa, te Maka bulu tǫ pedai bidi, Eliam, te Ahitofelgo ogwa, te Gilo bulu bidi 
Hesro te Karmel hanu bidi, Parai te Arap bulu bidi, 
Igal, te Soba hanu bidi Natango ogwa, Bani te Gat hani bidi, 
Selek te Amon bulu tǫ pedai bidi, Naharai te Berot hanu bidi, aga te Joapgo hwįbo sesemone ene dabe tolasa bilali bidi dao, 
Ira me Garep si te Itra hani bidi da, 
Uria te Hit hani bidi da. Te ami bidi dabego namba te bidi sese deli olama, nogo si olama, a naga me badu si, te tigidali usu nama te 37 ami bidi dabe dao. 
