﻿2 Samuel.
24.
Me sogo deli sogo ma Genuai Bidigo te Israel dabeba wado elama, tama agai te Devitba homu kolesaga menama, te Devitgo augwaliba te sęgę sesemainu yai. Genuai Bidigo Devitba te tama po wai, “Nage pelama, te Israel me Juda we bidi augwali nedegi pao,” wai. 
Tialima, Devitgo Joapba te tama po wai, te aga ami bidi dabego polalubo ofisa bidi dabeba me te tama po wali, “Nago naga ofisa bidi dabe selama, tama pelama, te dago hani Israel we bidi tigidali nedegi pao,” wai. “Dage te bulu tǫ pedai tigidaliba pelama, te Dan hanu te not tǫ pedai badu, me te saut tǫ pedai, te Berseba hanu pedai badu usu nigi pelama, tama augwali nedao,” wai. “Eno te we bidi dabego namba koneainu obao,” wali. 
Tiali goli, Joapgo te tama po kingba wei ponani, “King, eno homu te God, te nago Genuai Bidigo, te we bidigo namba te ugwaba mu holomainu ilama, tama augwali te umabo hauwa we bidi mu pedalumainu yao. Tama eno homugo te nage bidibadi, te pedalubo nago sumainu homu ebao. Tiali goli, te we bidi nedebo sę te dago sę meni, tama tiyu magi baso nago te dwai kolesaga yabo homu ebawe?” wali. 
Tiali goli, kingo bomo eyu, te Joap aga ofisa dabe daligo te po wali pao wai. Tama tibaso, augwa te king taga peyu, tama augwa pelama, te Israel hani bage nedegi palio. 
Tialima, augwa te wę Jordan nogelama, tama augwa te Aroerba sabolali, te hanu te Gatgo hanigo tǫ te odogo malu tomode elaluali. Tama augwa bidigi pali pesage te hanu tǫ te saut pedai badu nigilama bidali. Tama nosali augwa te Aroer tagalama peyu, tama te not tǫ pedai badu pelama, tama te hanu Jaserba sabolai dao. 
Nosali ma augwa te Jaser taga peyu pelama, te Gileat bulu tǫba pali, te Tatimhotsi te tǫ pedai badu palio. Tialima, augwa te badu bidali tagalama, tama augwali te bulu Danjanba sabolali, tama augwa baguasa pelama, tama te Saidon bulu, te giliga dega sigulubo pedai badu, teba sabolali. 
Tama augwali te saut tǫ pedai badu ma begasa aselama, tama te Tair hanuba pedelagasali, te hanu te bobegelali masigi obo te bomai mu elaluali. Tama nosali augwa te Tair hanu tagalama, tama augwa hogodama, te Hivi dabego me Kenan dabego hanu tigidaliba pali. Tama nosali mu augwali te Juda tǫ pedai saut badu te Berseba buluba sabolali. 
Augwa te tigidali bulu tǫ pedai bila usu nama, tama augwa te moni hanu Jerusalemba ma asai. Augwali te bulu tigidali usu nama bilali, te polua a naga olama, me si me si, te 9 polua me te Sadede sela tama usu nama bilali. 
Te augwali sabolali sogode, tama Joap pelama, te bilali po tigidali te kingba waligi pali, “Israelde te ami sę yabo bidi te bidi sese umabo mu, te 800,000 bidi elaluali, tama te Judade te umabo bidi sese mu te 500,000 bidi elaluali,” Joapgo Devitbolo te po wali. 
Nosali Devit aga te yali sęde homu sęgę ebaso, tama aga Genuai Bidiba gedu haluasa po weyu, te tama po wai, “Ena te homu mu puna peyu, tama eno te bidi dabe nedalio. Tama eno te tiali kolesagade te eno dwai sę mu yali. Tiali goli, Genuai Bidi, eno nageba hanalu obao, eno te yali sęgę te nago sela sąyao,” wali. 
Tiali goli, te side digi tama, Genuai Bidigo Gatba te po walali, te Devitgo profet bidi, te agai te tama po Devitba wagi pomainu yai. “Ena Genuai Bidi, eno po dolo obao, eno te sunumi sela nageba mobao, tama naga digi te augwali selade te me deli sa muao. Tama mena sunumi nago nigilali, te naga eno wali peyu, tama nageba te sę pedalumainu ilaibao,” wali. Te nosali badu kigamude Devit hodalubo si da, tama te 
Gatgo aga sugi pali, tama te Genuai Bidigo po agaba pusali. Tama agai Devitba te tama po hanalu wali, “Genuai Bidigo homugo te nago te sela pode te po me deli nago te dąį ilao. Nago homugo te genuai nasi elalubadi, te kibu be a naga olama, me si, te tama bidabo homu usu yaibawe? Ma, nago homugo te boi bidi dabego dageba hwįagasomainu homu elama, tama dage augwalide wi pelama, te polua sela bidibaso te usu egowe? Ma, nago homugo te nago bulu tǫ pedai we bidiba te dwai gasi te sela sogo pedalumainu ebaso, te nago homugo usu yaibawe? Nago homu kone bugagia palama da, te nago homugo wei ebo po te enabolo obaso da, tama eno nago te po selama, te Genuai Bidiba ma begasa paibao,” te profet bidi Gatgo te po wali. 
Tialima, Devitgo Gatba te tama po wali, “Nago enabolo te wali pode te ena homu sęgę mu ebao. Tama tibaso, Genuai Bidigo digi te agai mena sę te dabolo yabo homu ebo te sę emainu yao, magi baso meni, aga te olo tau sabo wiegi yai kolesaga sesemane sogo ebo God dao. Tiali goli, te eno homugo te boi bidi dabego da dolomainu ebo te eno homugo usu meni yai,” wali. 
Tama tialima, Genuai Bidigo te dwai gasi te Israel dabeba tagala palali, te sogo kigamu digi gagalama, tama agai te dąį ilali bodoluba usu nigi pali. Tama te bidi sese umabo bidi mu, te 70,000 we bidi isali, te tigidali bulu tǫ pedai te Dan hanu te not tǫ pedaiba dąį igi pelama, tama te hanu te saut te Berseba, te tama bulu tǫ pedaiba te gasi usu nigi palio. 
Tama te we bidi dolobo sę ebo mobo bidi ensel, aga te Jerusalemba sabolama, tama te Jerusalem dolainu sisi elaluali. Tiali goli, Genuai Bidigo te dwai sę te we bidiba pedalubo sęde te homu dene yali. Tama aga homu hasegelama, tama te mobo bidi enselba te tama po wai, “Tagalao, te usu dao,” wai. Te sogo te mobo bidi ensel te augwa te wit nai ge siyu, tama te bo wali dabe sela sąbo pesage me deli pąde te dolaluali. Te tǫ pedai te Arauna, te Jebus hani bidi me deligo tǫ elaluali. 
Devitgo te mobo bidi ensel sulama, tama agai Genuai Bidiba te tama po wai, “Eno naga tama eno te dwai sę yali, tama eno dwai sę genuai yalio. Tiali goli, te we bidi dabe augwali, augwa te mena dwai sę ebaso, tama nago augwaliba te dene maniwe? Nago te ena me, ena we wai, dabolo naga te dene magi sogo da, usu igi tama dao,” wali. 
Tama te sogode naga te profet Gatgo te Devit sugi pelama, tama agaba te tama po wai, “Tama nage te Jebus hani bidi Araunago te nai wit sabo madi, te pesage te bulu duba ugwa holama, tama nago te Genuai Bidigo alta me deli nigao,” te po wai. 
Tialima, Devitgo te Genuai Bidigo po wali pali, te Gatgo agabolo po wali gilama, tama aga te nai wit sabo pesageba palio. 
Tama Arauna te sę ebo pesagede bidiyu, tama aiyaba tonono ebadi, tama te king me aga ofisa dabe dali augwali te agaba asobo suali. Tama aga te augwali dali deliba gesabidi unulama, tama aga te king pąba kidu sugunigi pelama, tama te tobolu basi gulama, te kingba genuai nogi mayu tama tialio. 
Tama aga te tama po wai, “King, magi baso nago ena suagasu asaliwe?” Tama Devitgo po wei ponoyu, te tama po wai, “Te eno homugo megi te nago te wit nai sabo pesage tǫ abelabo homu ebao,” wali. “Eno te Genuai Bidigo alta te pesagede nigabo homu yali, tama te we bidiba pedelali te genuai gasi silimainu yaibao,” wali. 
Tialima, Araunago Devitba te tama po wai, “King, nago eno te tǫ abelainu wabo, te eno homugo tagala homu ebao. Te nago tama sao. Tama nago te ofa yabo te gasa nai me sainu da, te sao. Nago te ofa eyu, te tigidali siago domainu ulabo te bulmakau dabe me sao,” po wai. “Tama nago te wit bo paulubo ni name me, te bulmakau sigo sę emainogo magede poliali ni nami me selama, tama nago te sia nogonama, tama te ofa ebo nai te siaba ulao,” te po wali. 
“King, te tigidali doado bage te eno nageba mobao.” Tama Araunago te po ma weyu, te tama po wai, “Eno homugo te God, nago Genuai Bidigo, te nago agaba ofa ebode te wiegi yai homu pemene emainogo yao.” 
Tiali goli, kingo agaba te tama po wai, “Te eno ena digi te sę dene isiąwai nai te eno olo selama, te Genuai Bidiba te ofa tiwai eyu magobeo. Tama tibaso, eno nago te doado bage abelaibao,” wali. Tialima, Devitgo te tǫ pedai me, te bulmakau dabe dali, te silva mone bidi sese te 500 kinago abelali. 
Tama Devitgo te Genuai Bidigo alta me deli te pesagede nigilama, tama te siago tigidali dabo ofa me, te God dali deli homu pedalubo ofa me, yalio. Tama nosali, Genuai Bidigo te bidi dabego augwa bulu tǫ pedai te bugagia wiegi yai emainu, te gedu haluasa po wabo odali. Tama agai te Israelde elaluali te gasi silalio. 
