﻿Te Israel me Juda Hani Sigo Tuni Bidigo Po Elalubo Buku Deli.
6.
Te Israel dabego te Isip taga soyu aselama, te augwa bulali wąį dabego wąį dabe bidali sogoba usu nagasu, te tama kibu be 480 yia bidali. Tama te wabo kibu be me si me si te Solomon te Israelde te king te tama kibu be bidali. Tialima, te kibu bede, te si wali polua, te polua nogi augwa te Siv poali, Solomongo te Genuai Bidigo be sę ebo gagalali. 
Te habu selali be habu te be tomode dąį te tiwai nigai. Te bobage usu sali te 27 mita, me te genuai da te 9 mita, tama te be pedu dąį badu te 13 me hap mita nigali. 
Tama te be mabo me deli te be hobolu badu elaluali. Te aga dąį te tiwai. Te aga genuai te habu selali be habu tiwai tobage, te 9 mita usu elaluali. Tama te aga bobagego usu da, te 4 me hap mita naga tama dao. 
Te be paiali daga dabede te windo meba elaluali, tama te windo dabede te tomode genuai elalu, te bulu badu dwasianu elaluai. Tama augwa te windo dabe te dedage hauwa elalubo nai dabego te haluama, te be tomoba te ula asomainu yai dao. 
Tama te gasa be me badugo te habu selabo be habu sela bagulai elaluai. Te be habu badu te dwasianu be habu dabe hauwa elaluali, tama te be habu badude te sela be soiyame ni sawali elaluai. 
Augwa te be habu dabe nigabo homu yali, tiali goli, augwa te habu selabo be habu daga dabe badu te agebele me nigibeo, te soiyame saide te kau ni te pos daiba muai dao. Tama augwa te si wali soiyame sai plua te kau ni muabo obo nigilali pesagede, augwa daga dwasianu tomoba gana nigali, te tobolu ni pilabo madi te pesage elaluai. Tama augwa te deli tobage tiwai kolesaga te sela wabo plua te pesagede elaluai. Tama te pagede tama te hasia plua te dwasianu igi pali, te 2 mita me 20 sentimita teba usu nani. Tama te si wali plua te dwasianu genuai gana yai, te 2 mita me 70 sentimita teba usu nani. Tama te sela wali plua, te ugwaba muabo plua tama, te genuai mu nigali, te 3 mita me 10 sentimita usu nama nigalio. 
Te augwaligo te masigi dabe sali sogo, augwa halama, tama augwa te masigi dabe sabo madi bugagia dodolali. Tama nosali augwa te Genuai Bidigo be sę yainu sela asalio. Tama augwa te be sę ebo sogo, te hama me, hwą me, gasa nai dabe augwa te aingo nigali nai dabe me, te be sę ebo madi te kao me kidagalo me wabeo. 
Te be sai si nigali habuba holobo togobili si elaluali, tama te togobili te be pedai saut badu elaluai. 
Te Solomongo sę bidi dabego te be me badu pedai sęą silibaso, teda augwaligo te ni bǫ dabe selama, tama te dąų weyu, te walawali ni dabe me te ene sabali ni tiwai munama, te be pedu nigai. Tama augwa te bǫ nami selama, tama te be haluali. 
Te bego te habu selalubo be habu bagulali, tego te bedugu sela elaluali. Tama te pedu hani ugwadu daide te tobage deli tigi poai naga sela elaluali, te 2 mita me 20 sentimita usu tama. Tama augwa te ni bǫ me selama, te be pedu bagulali oboba podolama muani, te habu selali be habu dabe me te ni dabe te be plua nigali, te pos ni dabe ugwadu daiba muani, tama te be pedai badu te pedu tiwai pedelai dao. 
Tama nosali, Genuai Bidigo Solomonba te tiwai po wai, 
“Te megi nago eno be sę ebao, tede eno po nage dali wainu ebao. Te nago eno tigidali bomai po me eno po odoyu, te bugagia wali pobaso da, teda eno nageba te wiegi yai kolesaga dabe eyu, te eno polobadu nago aya Devitba dąų walali gilama tiwai yaibao. 
Tama ena dage Israel tomode bidiyu, te dage eno we bidi bidaibao. Tama eno dage munu me tagalogobeo. Mu menio,” wali. 
Te Solomon aga sę bidi dabe dali augwa te Genuai Bidigo be sęą silibo si da, 
teda augwa te bǫ ni nami selama, tama te habu selali be habu paiali masigi be daga dabe haluali, te be sai te pluade gagalasa, te be peduba usu nigi pai. Tama augwa te ni wuli ni nami dabe selama, tama augwa te be sai plua haluali. 
Augwaligo te Genuai Bidigo be habu tomoba baguliyu, te genuai daga nigali. Te be habu tomode mu augwa te tama nogi poali, te Tedali Gasagi Yai Mu Be Habu da wali, tama aga usu sali dąį te 9 mita. Tama gasa be habu me, te Tedali Gasagi Yai Be Habu, te aga bobage usu nama te 18 mita. Te habu si tomode togali daga, augwaligo te bǫ ni nami dabego nigali. Tama te daga te be peduba usu nama nigali. 
Augwaligo te bǫ ni nami dabe selama, tama te be tomode te daga tigidali haluama, tama te bidi dabego masigigo bagulali daga suabo usu meni yai. Tama augwaligo te ni nami daide te bobigo wiegi yai piksa noma me, te ni dabego te plaua dabe me asęyu, togoyu yali. 
Te Tedali Gasagi Yai Mu Be Habu augwaligo te be tomode mu nigali, te Genuai Bidigo Dąų Wali Bomai Po Munalubo Halobage muabo digi nigali. 
Te Tedali Gasagi Yai Mu Be Habu tigidali te deli tigi poai naga nigali. Te aga bobage usu, te 9 mita, tama aga genuai da, te 9 mita, tama te dąį ugwadu me, te 9 mita. Augwa te wiegi yai gol selama, tama te be haluali daga ni nami dabe haluali. Te be habu sunumi pąde augwaligo te ni bǫgo nigali alta me deli elaluali, tama augwaligo te alta me te golgo haluali. 
Tama augwaligo te wiegi yai gol selama, tama te tempel be tomo bagulali madi te tigidali daga haluali. Tama augwa te sen gol meba nigilama, tama te Tedali Gasagi Yai Mu Be Habu sunumi tede walali. Augwaligo te be habu togwali madi te golgo haluali, 
tama tialima, te Genuai Bidigo be pedai tigidali tomo badu me, te Tedali Gasagi Yai Mu Be Habude elalubo alta me, augwaligo te tigidali golgo mesegelali. 
Augwaligo te ni oliv selama, tama te ensel mobo bidi si noma nigali, te ensel si te Tedali Gasagi Yai Mu Be Habu tomoba muainu yai. Te ensel mobo bidi noma sigo bobage usu nama te 4 me hap mita, te tama usu nigali. Te ensel si te deli tigi poai si mu nigai. Augwa si bogo te dolo si diliga palama elaluali. Tama te deli deli bogo usu sali, te 2 mita me 25 sentimita teba usu nani. Tama te ensel me deligo bogo si bobage, te 4 me hap mita dao. 
Augwaligo te ensel si nigila silama da, teda augwaligo te ensel si te Tedali Gasagi Yai Mu Be Habu tomode dodolali. Te ensel me deli te dolo nogo badu dolaluyu, tama aga bogo me deligo te dolo nogo badu elalubo dagaba ponigi pelama elaluali. Tama gasa ensel te pobase nogo badu dolaluyu, tama aga bogo me deli te pobase nogo badu elalubo dagade ponigi pelama elaluali. Tama augwali sigo te gasa bogo si te be habu tomoba mu sisinagaselama elaluai. 
Tama augwaligo te ensel mobo bidi noma si me te golgo haluali. 
Augwaligo te ensel dabego piksa me, ni det me, tama te ni plaua me, te Tedali Gasagi Yai Be Habu me te Tedali Gasagi Yai Mu Be Habu daga daide te asęyu togolama, te dąį togwali be habu si au ilai tama tiali. 
Tama augwaligo te gol selama, tama te be habu si te plua sai te golgo haluali. 
Augwaligo te oliv ni nami selama, tama te Tedali Gasagi Yai Mu Be Habu sunumi nigali, tama augwaligo te sunumi muabo pesagede walama elaluai. Tama augwa te sunumi paliainu ebo sogo, te sunumi si te deliba madua sagasai. Te sunumi sigo walabo pesage te a naga pedai badu elaluali. 
Tama augwa te ensel mobo bidigo piksa me, te ni det me, te sunumi sigo plaua me asęyu togwalio. Tama augwa te gol selama, tama te be sunumi dali, te enselgo piksa me, te ni det, te tama nai te golgo mesegelali. 
Tama te Tedali Gasagi Yai Be Habu sunumi nigainu, augwa te oliv ni nami selama, tama te sunumi muabo pesage nigilali. Tama te sunumigo walabo pesage te me si me si pedai badu tama naga elaluali. 
Tama augwaligo te wuli ni nami selama, tama te be sunumi si nigali. Tama te sunumi si deli deligo te sę si elaluali. Tama augwaligo te be sunumi muabo madi te sunumi walama elaluai, augwaligo te Tedali Gasagi Yai Mu Be Habu nigali tiwai gilama yali. 
Tama augwaligo te enselgo piksa, me te ni det, me plaua te be sunumi dabe au ilabo nai dabe asęyu togolama, tama te golgo bugagia mesegelali. 
Te be bulu badu te be mesalo bagulali obo augwaligo nigai dao. Augwaligo te masigi dabe augwa te bugagia dodolama togwai te selama, tama te bugulama, nani sela wasilali, te gasa nani te me nani daide ugwadu muani. Tama augwa te bǫ ni hani me deli te masigi hani sela daide ugwadu manama, muani. Tama augwa te masigi hani sela ma wasilama, tama te ni nami hani deli muani, tama augwa tama tede holudubadi, te be mesalo obo sę usu nigi pabo madiba usu nigi pali. 
Augwaligo te Genuai Bidigo be sę ebo gagalali te si wabo polua, te kibu be me si me si elama, te Solomon king bidibo sogo te be sę yani. Te polua nogi augwaligo Siv poali. Te poluade digi augwa te genuai masigi wasilibo sę gagaliyu, te masigi dabe daide ugwadu te be sę yainu yalio. 
Te sę bidi dabego te be sę yani kibu be 7, te tama kibu bede te be sę yani, tama te polua 8 te Solomon te king bidibadi, te kibu be 11, teba usu nagasu, te be sęą silali, te polua nogi augwa te Bul nogi yali, augwa te be sę ebo sę tigidali silalio. Augwaligo te sę bugagia yaligo, tama te bede tigidali sę te dolo mu pedelali, te Solomongo augwalibolo te sę tama yao wali gilama te be sę tama yai dao. 
