﻿Te Israel me Juda Hani Sigo Tuni Bidigo Po Elalubo Buku Deli.
16.
Me sogo deli te Genuai Bidi Godigo te profet Jehubolo te po walali, Hananigo ogwa dao, agabolo te king Basabolo pusabo po wali. Genuai Bidi Godigo po e tama dao, 
“Basa, bugagia odao. Hasia te nage olo bidi mu gagawai, tialima eno nage te king bidi nigilama, tama nago te Israel hani augwali tonaluai, te we bidi dabe augwali te eno hani we bidi dabe da. Tiali goli, nago te king Jeroboamgo yali gilama, te nago kolesaga dwai mu ebuo,” wali. “Tama nago te we bidi dabe augwali kegelama, sęgę sabuo,” wali. “Tama augwaligo te sęgę sabo kolesagago te eno haliga sębę augwali dali ebao,” wali. 
“Tama tibaso, eno nage dali, te naga hani we wai me silaibao, te eno te king Jeroboam aga hani dali yali gilama yaibao,” te tama po wai. 
“Tama tialima, te nago hani bidi dabe me badu te taun tomode isibaso da, teda te augwaligo tigi te yowigo tuaibao,” wali. “Tama tialima, me badu bidi dabe te taun bulu badu isibaso da, teda augwaligo tigi te ba kemodagego tuaibao,” Godigo te Basabolo te po wali. 
Te king Basa agai te tigidali haniani sę yali po da, te po gasa bukude elalubo, tama augwaligo e tama nogi ebo da, Israel Hani Dabego King Bidi Dabego Po Elalubo Buku Da wabo dao. Te bukugo te agai te tigidali dila pai sę yali po ola mabo buku dao. 
Tama nosali te king Basa isali, tama augwaligo te aga tigi te Tirsa taunde pubaligi pali. Tama aga ogwa nogi Ela, agai te aga ayago king bidi nigilama bidali silide aga ogwago selama, tama aga te king bidi nigilama bidali. 
Te king bidi Basa agai te Genuai Bidigo gedude sęgę sai, te king Jeroboam aga hani dali bidiyu, te augwaligo yali kolesaga tiwai mu yali, tama te king bidi Basa agai te dwai kolesaga ebaso, te Genuai Bidigo haliga sębę dwai mu yai. Tama me, te king Basa agai te king Jeroboamgo hani we bidi dabe tigidali ela muna silali. Tama tibaso, te Genuai Bidigo te profet bidi Jehu tagala palama, tama aga te king Basa pageba pelama, tama agai agabolo e tama tiwai po ola mani, “Genuai Bidigo nage dali, te naga hani dali si tigidali agai dolaibao po walio,” po wali. 
Te bidi Asa aga te Juda hani bidi dabego king bidi bidibadi, agai kibu be te 26 yia wagi solama kibu be yai, te side Ela, aga te king Basago ogwa da, aga te Israel hanigo king bidi pedelali. Tama te king bidi Ela aga te taun Tirsa bulude king bidi nigilama bidali kibu be si digi mu usu nama bidai. 
Tama te king Ela aga sę ebo ofisa bidi, agai nogi Simri, tama te bidi agai te king Ela ela muabo sunumi kegali. Te bidi Simrigo agai te king bidigo boi hwįbo nai karis me badu bugulama, te Simrigo tonalubo sę yai. Me sogo deli te king Ela aga te bidi Arsago beba pai, tama te bidi aga te kingo be tonalubo sę ebo bidi da. Tama agai suali, ma te king Ela aga te bomai wę tuyu bidibo suai, tama aga te wabo pabo gagalobo suali. 
Tama tibaso, te bidi Simri aga te be tomoba pelama, tama agai te king bidi Ela mu ela muani. Tama te Simri aga te king bidi pedelama bidali. Te tama sęgę pedelali, te Juda hanigo king bidi Asa aga kibu be te 27 wagi solama kibu be bidibadi te tama sęgę pedelali. 
Te bidi Simri king bidi pedelai madigi, tialima, polo tama agai te king Basago hani bidi dabe tigidali ela muna silai. Tama me te aga deli kaneme me, te aga abagi dabe me, ela muna silai. Tama agai te bidigo hani bidi me deli me, me bidibo sula tagalobe. 
Tama te bidi Simri agai te king Basago hani bidi dabe ela silai. Tama tiali kolesaga, te Genuai Bidi Godigo sę ebo profet bidi Jehugo pedauwalidu ola mani poba usu nigi peyu tama tiali. 
Te king Basago hani tigide pedelali sęgę page e tama dao. Te king bidi Basa dali, te aga wai te king bidi Ela dali si, augwali sigo te Genuai Bidi Godigo gedude augwali sigo sęgę sai, Israel hanigo Genuai Bidi, tama augwali sigo te tibo godiba lotu po wali. Tama augwali sigo te Israel hani dabe augwali kegelama, sęgę sabo sę yali. Augwali sigo tama tiali sęgęde te Genuai Bidigo augwali dali agai haliga sębę mu yai, tama teyu, te Genuai Bidi agai te king Basago hani tigidali dolali. 
Te king Elago agai te tigidali haniani gasa sę yali po dabe da, te po dabe gasa bukude elalubaso, augwaligo e tama nogi wabo da, Israel Hanigo King Bidi Dabego Po Elalubo Buku Da wabo dao. 
Te Juda hanigo king bidi Asa aga te Juda dabe dali king bidi bidibadi, agai kibu be te 27 yia bidali, tama te bidi Simri aga te Israel hanigo king bidi pedelama bidai. Tama aga te Tirsa hanu taunde king bidi bidali, te 7 pela dei bidai, te Sadede deli tama usu nama bidali. Tama te sogo te Israel ami soldia bidi dabego te Filistia hanigo te Gibeton hanu bologobe yagaselama, tama augwaligo boi hwįbo sę eyu, tama augwaligo te hanu sabo homu eyu yai. 
Tama augwali te boi hwįbo sę eyu bidibadi, tama augwaligo e tama po odali, te bidi Simrigo agai te dwai kolesaga eyu, tama agai te king Ela ela muani. Tialima, te sogo tama te tigidali ami soldia bagego augwaligo te augwa tobolu ofisa bidi me deli augwaligo dąį ilali, te nogi te Omri, aga te Israel bagego king bidi pedelali. 
Tama tialima, te bidi Omri dali, te aga ami soldia bidi dabe tigidali, augwaligo te Gibeton hanu tagalama, tama augwaligo te Tirsa hanu bologobe egi pelama, tama augwaligo boi hwįnama, tama augwaligo te Tirsa taun sai. 
Tama te king bidi Simri aga te Tirsa taunde bidibo sogo tama agai suali, ma te Omrigo ami bidi dabego bomo mu eyu, tama augwaligo agai ami soldia dabe aiyaba elaluama, tama te Tirsa hanu te taun sali, tama tibaso, aga te kingo kompaunde te dila pai be me deliba aga bula sigi pali. Tama agai te beba isi nogonama, tama te kingo be dabe tigidali siago dela peyu, tama aga me aga digi aga te siago delama, aga isali. 
Te bidi Simri aga tigide te pedelali sęgę, magi baso meni, agai te king Jeroboamgo yali tiwai dwai kolesaga agai me tibaso, te tiwai sęgę aga tigide pedelai. Agai te Genuai Bidigo gedude agai me sęgę sai, tama me te agai te Israel hani we bidi dabe agai kegelama, te we bidi dabe augwaligo me sęgę sali. 
Te king Simri agai te tigidali haniani gasa sę yali po da, te po gasa bukude elalubo, tama augwaligo e tama nogi ebo da, te Israel Hanigo King Bidi Dabego Po Elalubo Buku Da wabo da. Tama te bukugo agai te king Ela aiyaba elaluali po wabo buku da. 
Te bidi Simri isama, tama nosali te Israel hani we bidi dabe augwali bugulama, tama augwali nani si nigilama bidali. Me hani augwaligo homugo te bidi Tipni aga augwaligo king bidi nigilama bidaibao. Tipni aga aya nogi te Ginatgo ogwa da. Tama te me hani augwaligo king bidi te Omri king bidi nigilama, augwali tonalumainogo homu yali. 
Tama nosali te king Omrigo hani augwaligo bomo mu elama, te king Tipnigo hani dabe augwali aiyaba elaluali. Tama te Tipni isilama, tama te bidi Omri aga king bidi pedelali. 
Tama te bidi Asa aga te Juda hanigo king bidi nigilama bididubadi, tama agai kibu be 31 tama kibu be usu nama king bidi bidali, Omri aga te Israel hanigo king bidi pedelama bidali. Tama aga tede 12 yia bidali. Hasia aga te Tirsa hanude agai kibu be te nogo a olama, me badu nogo deli wagi solama kibu be bidali, 
tama nosali te king Omri agai te dwasianu bulu du me deli elalubo tǫ dobu elama sai, tama te bulu dude te agai homugo te hanu taun nigilama, tama te dila pai obo mu masigigo nigai. Agai te dobu yali tǫ te bidi me deligo tǫ da, te bidi nogi Semer, tama agai te tǫ dobu yali silva mone te 60,000 kina agai te bidi Semerbolo mawai. Omri agai homugo te bidi Semer nogi koneama, tama te agai te hanu taun nogi te Samaria taun nogi poai da. 
Te king bidi Omri agai te Genuai Bidigo gedude agai te sęgę genuai mu yai. Te bidi Omri agai ebo sęgęgo te hasia bidali king bidi dabego yali sęgę aiyaba mu elaluali. 
Agai te king Jeroboamgo yali dwai kolesaga tiwaidu agai me eyu, wali pai. Tama agai me te Godigo gedude agai sęgę sai, Israel hanigo Genuai Bidi. Tama me te agai te Israel hani we bidi agai augwali kegelama, te sęgę sabo sę eyu, tama augwaligo te tibo godiba lotu po wabo sę yai. Tama augwa te sęgę sabo kolesagago te Genuai Bidigo augwali dali haliga sębę emainu dianani. 
Te king Omrigo haniani sę yali po da, te po gasa bukude elalubo, augwaligo e tama nogi ebo da, Israel Hani Dabego King Bidi Dabego Po Elalubo Buku Da wabo da. Te bukugo te king bidi Omri agai te haniani tigidali dila pai sę yali po ola mabo buku dao. 
Tama nosali te king bidi Omri isibaso, tama augwaligo aga tigi te bulu Samaria taunde pubulali. Tama aga ogwa, Ahap, agai te aga ayago king bidi nigilama bidali silide agai selama, king bidi nigilama bidali. 
Asa aga te Juda hani dali king bidi bidibadi, aga e tama kibu be usu nama bidai, 38 yia bidali, Ahap aga te Omrigo ogwa da, aga te Israel hanigo king bidi nigilama bidali. Tama aga te Samaria bulude king bidi nigilama bidali kibu be, te 22 yia usu bidali. 
Tama te king Ahap agai te Genuai Bidigo gedude umabo sęgę mu sai. Te king bidi Ahapgo agai yali sęgę te hasia pedali king bidi dabe augwaligo sęgę aiyaba mu elaluai, tama agai mu umabo sęgę mu sai. 
Agai te sęgę sali te king Jeroboamgo sali sęgę tiwai agai me sai, tiali goli agai homugo te da olo bage da homu yali. Tama teyu, agai te we Jesebel sai, te Saidon hanude bidali king bidi Etbalgo wegi sali. Tama agai te tibo god Balba lotu po wabo gagalali, te Saidon hanigo tibo god. 
Tama te king Ahapgo agai Samaria bulude be me deli sę yani, te bede te tibo god Balbolo lotu po wabo be, tama agai te tibo god Balgo alta me deli nigibo sę yai, te lotu be tomode. 
Tama me te agai te tibo god we Asera piksa noma nigibo sę yai. Tama agai te tama tiali sęgęgo God, Israel hanigo Genuai Bidi, agai aga dali sębę mu yai. Te bidi Ahapgo sęgę umabo mu siyu, tama agai te sęgęgo te hasia pedali king dabego yali sęgę aiyaba elaluai. 
Te king Ahap aga te king bidibo sogo, te bidi Hiel aga te Betel taun bidi, agai te Jeriko taun ma hodolobo sę yai. Te bidi Hielgo sę ma hodolobo sogo, te bidi Abiram, Hielgo hasia gomunai ogwa, aga mu isali. Tama agai te taunde moni tų nigibo sę ebadi, tialima Segup, agai te sabi ogwa, aga isali. Tama sęgę te Hiel tigide pedelali, aga tigide te yali sę te polobadu te Genuai Bidigo te profet Josuabolo ola mani poba usu nagasu, tama sęgę aga tigide pedelai dao, Josua te polobadu bidali bidi nogi Nungo ogwa da. 
