﻿Te Israel me Juda Hani Sigo Tuni Bidigo Po Elalubo Buku Deli.
19.
King Ahap te Jesrilba sabolama da, teda agai aga we kwin Jesebelbolo, te Elaijago yali sę po tigidali pusali. Tama me agai te Elaijago te tibo god Balgo profet bidi tigidali ela muani po me walio. 
Tama Jesebelgo Elaijaba te tiwai po ola tolai, “Te eno nage ela mueibao, te nago Balgo profet bidi dabe ela muani tiwai nage ela mueibao. Do megi e tiwai sogo usu nagasobo side, te nage isaibao. Te eno te tiwai me isąbaso, eno homugo te god dabego ena digi ela mumainao,” wali. 
Elaijago te po odama, te aga wi elama, wi palio. Agai aga sę bidi selama, augwali si pelama, te Berseba te Juda tǫ kantri buluba saboligi pai. Elaijago aga sę bidi te bulude bididubadi taga pelama, 
te agaduba digi te tǫ wa pai bulude bilidubadi, te deli sogo bubugaba usu nai. Te aga ni me deli elalubo madi pedelama, te ni dologode dugulaluyu, gedu haluasa po te tiwai wali, “Genuai Bidi, enaba te pedelali sęgę dabede ena usu yalio. Te megi eno homugo nago ena isimainu sula tagalao, magi baso meni, ena wiegi yai bidi me elalubeo. Menio. Ena te ena wąį nǫų dabe tiwai gagawai dao,” wali. 
Agai te gedu haluasa po wali silibo si da, teda aga gedu sęgę ebaso, aga te ni dologode godege piali. Tama polo mu tama, te mobo bidi ensel me deli asu, aga tigiba dią yagaselama, te hodoliyu, te tama po wai, “Nage hodaluama, nai tugulao,” wali. 
Tialima, Elaijago gedu peda sanama, tonono bilibadi, te aga tobolu badu pąde agai te bret me deli augwaligo masigide ulai munalubo suali, te wę sospen me suali. Tialima, agai te nai me wę tulama, nosali te aga godege ma pialio. 
Nosali te Genuai Bidigo mobo bidi ensel aselama, te aga ma hodolagasu, agabolo te tiwai po wali, “Nage hodaluama, nai tugulao. Te meni baso, nage te bobobage sunumidu pobaso usu egobe dao,” wali. 
Tialima, Elaija hodaluama, te nai me wę ma tuali. Te naigo aga tigi dili ilama, te aga pidubadi, te giligade me hulide usu nama te bidi sese si, 40 dei wabo sogoba usu nai. Tama nosali aga te bulu du Horep ma Sainaiba sabolai, te Godigo bulu du dao. 
Te hulide Elaija te masigi ola be me deli tomoba pelama, piai. Elaija te masigi ola be tomode bidibadi, te Genuai Bidigo agabolo te tiwai po hanalu wai, “Elaija, nage magi baso ede bidibawe?” te po wai. 
Te Elaijago te tama po wai, “Genuai Bidi, Tigidali Bomo Elalubo God dao, eno te Israel we bidi tigidaligo nage deli naga wali pomainogo ebo sę bomo ebao. Tiali goli, augwaligo nage tudiba muyu, tama te nago augwali dali dąų wali bomai po kontrak bolali. Te augwaligo nago alta dabe aluama, te nago po pusubo profet bidi tigidali ela muani. Te enaduba deli naga bidibao, te megi augwaligo ena me ela mumainu ebo dao,” wali. 
Tialima, Genuai Bidigo agabolo te po wali, “Nage te buluba eda teda solama, te eno gesabidide bulu duba doligi soao. Magi baso meni, ena te bulu du pąba aselama paibao,” wali. Tialima, bomai wali me deli asama, te Genuai Bidigo bomode, te waligo te bulu du dabe masigi me pepeda sąwai. Tiali goli, Genuai Bidi aga digi te walide me bidisiąwai. Tialima, wali silama, te tǫ mali pedelali, tiali goli Genuai Bidi te mali ebo tomode me bidibeo. 
Te mali elama, nosali te sia pedelali. Tiali goli, Genuai Bidi te sia tomode bidibeo. Te isi pedelali tudi badu, Elaijago odali, te bidigo dua digi mu po mibo posolu wabo tiwai odalio. 
Elaijago te tebo odolama da, tialima aga bobobage gudali ugwago aga gesabi dali halua selama, te aga masigi ola bede bidali tagalama, te masigi dedage pąba dolagasali. Tama agai po me deli te tiwai odali, “Elaija, magi baso nage ede bidibawe?” te po wali. 
Tama Elaijago po e tiwai wei ponani, “God, Tigidali Bomo Elalubo Genuai Bidi, eno te Israel we bidi tigidali nage deliba naga wali pomainu ebo sę bomo ebao. Tiali goli, augwaligo nage tudiba munama, te nago augwali dali dąų wali bomai po bolalio. Te augwaligo nago alta dabe aluama doliyu, te nago po pusubo profet bidi dabe tigidali ela muani. Tama enaduba deli naga bidibao. Te megi augwaligo ena me ela mueinu ebo dao,” tama wali. 
Tialima, Genuai Bidigo agabolo te tama po wali, “Nago te naga sunumi wali pelama, tama pidubadi, te tǫ wa pai bulu te Damaskus hanu pąba sabolao. Te nosali nage te taun tomoba pelama, te Hasael sulama, te nago aga toboluba te wel ąį gelao, aga te Siria king bidi pedalumainogo dąį tama ilao. 
Tama nago te Jehu me dąį ilao, te Nimsigo hani, te Israel king pedalumainao. Tama nago te Elisa me dąį ilao, te Safatgo ogwa, te taun Abel Mehola bidi da, te nage bidali pesage selama, te eno po pusabo profet bidi pedalumainogo yao. 
Te Hasael king bididubadi, agai te we bidi hauwa ela mueibao. Te meba agade wi pobaso da, teda Jehugo augwali ela mueibao. Te Jehude meba wi sobaso da, teda Elisago augwali ela mueibao. 
Tiali goli, te eno bidi sese umabo, 7,000 we bidi, te Israelde bidimainu hageai dao. Te augwali enaba naga wali pabo we bidi da, te augwaligo te tibo god Balba kidu sugunisąma, te agai piksa noma dabeba nono nisąma, te agaba lotu po me wasiąyani we bidi dao,” Genuai Bidigo te po wai. 
Elaijago Genuai Bidigo po odola silibo si, teda agai te Sainai taga soyu, te Israelgo tǫba ma soalio. Tama agai Elisa suali, te Safatgo ogwa, aga te nogo si olama, sągągo deli gasa bidi dali te gide sę iduai. Augwaligo te bulmakaugo te tǫ elibo nai kegasa bilibo sę ebo tonalubo sę yai. Te nogo si olama, sągągo deli bidi dabe te augwa bulmakau dali polasa pobadi, te Elisa aga bulmakau si dali nosali asali. Tialima, Elaija te Elisa pageba pelama, te aga gudaluali tigidu aiyaba tagalaluali bobage ugwa saket dilama, te Elisaba gudulalio. 
Te tama tilama, Elaija aga pobaso, te Elisa aga sę iduali tagalama, te Elaija pabo wali udulama, te agabolo te tama po wali, “Te ena ma begasa ma pelama, te eno aya idabolo dage tao po wagi pelama, te ena ma asobaso usu dawe?” Te Elaijago agabolo te tiwai po wali, “Te usu da, nage pao. Eno nage me paligobeo,” wali. 
Tialima, Elisa ma begasa palio. Tama agai te aga bulmakau dabe elali. Agai te bulmakaude kęnani ni name dabe te bulmakau mi dabe ulabo isi dabe sali. Tama agai te we bidi augwaliba menama, te augwa tualio. Agai tama tila silama da, teda aga te Elaija wali pelama, te agai sę bidi pedelai dao. 
