﻿Te Israel me Juda Hani Sigo Tuni Bidigo Po Elalubo Buku Si.
10.
Te wai dabe te ogomani naga ebadi elama, te king Ahapgo wąį nǫų ogomani Samaria taunde bidali. Te bidi dabe augwaligo namba te bidi sese sela selama, te ugwadu nogo si bidi selama, 70 bidi bidai. Tama te Jehugo te pas asęnama, tama te Jesril hanu tobolu bidibolo me, te genuai bidi dabe te taun tonalubo bidibolo me, tama me te Ahapgo wąį nǫų ogwa dabe tonalubo genuai bidi dabebolo me, te Jehugo pas asęnama, augwalibolo tolali. Agai te po e tama po asęani, 
“Te Ahapgo ogomani augwali hani dage dali bidibao, tama te dagego te hąuwa hwįbo karis me, te hos kibu me, me te ene me, tama me te hąuwa hwįbo gasa nai me munalubo. Tama dage te taunde bidibo te masigigo nigai bomai obo elalubo. Tama tialima, dagego eno e pas sabo sogo, 
dagego te Ahapgo hanigo te augwa tomode te dwagi yai bidi me deli sulama, te bidi aga king dąį ilao. Tama aga te king nigilama bidimainogo eyu, dagego aga tau siyu, tama da dali wąbi hwįnao,” te po asęna tolali. 
Te Samaria tobolu bidi badi, te me badu genuai bidi badi, augwaligo te Jehugo te tolali pas selama, tama augwali wi dwai mu eyu, tama augwa hasi te po wali, “Jehugo te king si tama aiyaba elaluali. Tama tialima, mena tama dago aga aiyaba elaluaibawe? Dago aga aiyaba elalubo usu munu ma egobeo,” wali. 
Tama tialima, te kingo be tonalubo bidi me, me te taunde polalubo tobolu bidi deli ebadi, te me badu tobolu bidi dabe ebadi, te me badu te Ahapgo hani ogomani tonalubo genuai bidi dabe ebadi elama, augwali tigidaligo te Jehubolo e tama po ola tolali, “Da tigidali te naga sę bidi dabe naga dao, tama dago homugo te nago homu kolesagadu naga wali painu, te da dola selama bidibao. Dago te gasa bidi me deli te king me nigiligobeo. Mu menio. Nago homugo mena tama sę yabo homu ebowe, teda teya naga sę yao,” te po ola tolali. 
Awe, tialima, Jehugo te gasa pas me asęnama, tama te bidi dabe augwalibolo e tama po wali, “Tialima, dagego homugo ena wali asainu, tama dage ena dologode bidagameo, tialima, eno homugo dagego te Ahapgo hani ogomani tigidali ela silao,” wali. “Tama te do kigamu e tama tibo sogo, dagego te augwali tobolu naga toga selama, tama te Jesril hanuba muagasao,” wali Tama te bidi sese sela selama, te ugwadu nogo si bidi te Ahapgo hani ogomani, te Samaria taun bulude bidibo genuai bidi dali augwali te bidalubao, tama te genuai bidi dabe augwaligo te augwali te ola mayu bidali. 
Tialima, te genuai bidi dabe augwaligo te Jehugo te pas sali, tama augwaligo te Ahapgo hani ogomani te bidi sese sela olama, te nogo si bidi, te 70, te augwaligo elama, isilali. Tama augwaligo te bage tobolu togolama, tama augwaligo te basket wa dabeba bulama, te Jehubolo tolali, te Jesril hanuba. 
Te sogo Jehugo te po odali, te bidi dabego te Ahapgo ogomani tobolu togolama, augwaligo teba muagasali po odali, tama agai te bidi dabebolo e tama po wali, “Augwaligo te bage tobolu pesage te taun tomoba pabo tų sesegede te pąde tobolu pesage si sisinao, tama augwaligo te tobolu dabe munalubadi, te doba tama usu nigi pomainao,” wali. 
Do kigamu te giliga asai badi, tama te Jehu hodasa pelama, te taun tomoba asobo tų sesegeba pelama, te tobolu dabe munalubo sugi pai. Umabo we bidi sisinama bidibo sulama, tama Jehu aga doligulama, tama agai augwalibolo e tama po wali, “Ena digi ena homugo te Joram aga eno aiyaba elaluai dao. Tama tialima, eno aga elama, isilai dao. Tama eno koneanio, dagego bidi me ela mubo menio. Tiali goli, te dego mu te hani ela muaniwe? Dago konebeo. 
Tiali goli, tego da e tama ola mawai, tigidali po te Genuai Bidigo te Ahapgo hani dali polobadu wai po naga dao, te mu te pedalobo sę naga ebao. Te Godigo sę ebo profet bidi Elaijago pedauwalidu wali te dąų wali poba te megi Genuai Bidi usu na silibao,” wali. 
Tama tialima, nosali Jehugo te Ahapgo hani te Jesril taunde bidali deli hani te Jehugo ela silali. Me te aga sę ebo gavman bidi me, me aga dwagi yai hai namu me, tama me te pris bidi dabe me, tama te bage augwali tigidali te Jehugo augwali me deli me bidibo sula tagalobe. Mu meni. 
Tialima, te Jehu dali, te aga ami soldia bidi dabe dali, augwaligo te Jesril hanu tagalama, te augwaligo homugo te Samaria hanuba painu homu yali. Tama augwali te tųdu wali pelama, tama augwali te bulu me deliba sabaligi pai, te bulu nogi da Te Kibu Sipsip Tonalubo Bidi Dabego Sisinibo Pesage da. 
Tama augwaligo te me badu bidi dabe sulama sisinibo si, tama augwaligo e tama po hanalu wali, “Dage mena pedai badu asaiwe?” Tama augwaligo te po wei ponoyu, e tama po wai, “Da da, te king Ahasiago hani dao,” wali. “Dago homugo te Jesril hanuba sobao, te king Joramgo hani ebadi, te kwin Jesebelgo hani dabe ebadi elama, te augwali dago suainu sobao,” wali. 
Jehugo te po odali, tama aga hanibolo e tama po augwalibolo wali, “Te bidi dabe augwali polo tuao.” Tama augwaligo te bidi dabe tigidali tulama, tama augwaligo te bidi dabe te moni maguludawe elalubo madigi te bidi dabe odasa pai. Tama augwaligo te king Ahasiago hani tigidali ela silali, me deli me munu me bidibe. Te augwaligo namba te bidi sese si olama, te ugwadu si tama usu, bidi 42 isali. 
Te Jehu dali, te aga ami soldia bidi dabe dali, augwaligo te bulu tagalama, tama augwali pobadi yaide, tama augwaligo te bidi me suali, te bidi nogi Jonadap, te bidi te Rekapgo ogwa da. Tama te Jehugo te bidibolo te giligade dao po wali, tama agai agabolo e tama po wali, “Eno homugo te nago ebo homu kolesaga te godolo mu ebo. Tama tialima, nage magi yaliwe, eno e ebo sęde nago bugai homu pemene ebawe, ma meniwe?” Tama te Jonadapgo te Jehubolo e tama po wai, “Awe, eno nage dali eno deli haliga ebao,” wali. Tialima, Jehugo te po wai, “Dwagi yai dao. Tama tibaso da, tea nago nogo enaba mao. Dadi si nogo mainao.” Tialima, te Jehugo te Jonadapgo nogo tulama, tama aga te karis daiba agai nogo kegali. 
Tama Jehugo agabolo e tama po ola mani, “Nage ena dali asu da, teda nago koneaibao, eno te Genuai Bidi naga wali painu, bomo mu ebao.” Jonadapgo te po usu da homu yali, tama augwali te karisdu augwali te Samariaba pali. 
Augwali te Samaria buluba sabolali, tama te Jehugo te bulude te Ahapgo hani gasa me badu te bulude bidali bidi dabe tigidali elama, isilali. Agai te bidi dabe elama, mu silali, tama te tialigo te Genuai Bidigo polobadu te profet Elaijabolo mani te poba usu na silali. 
Tama nosali te Jehugo te Samaria we bidi dabe tigidali i olama, tama “Eba sisinagasiąo,” wali, tama agai augwalibolo e tama po wali, “Polobadu te king Ahapgo te Balba lotu po weyu yai. Tiali goli, eno te Balba lotu po bomo mu yaibao. 
Tama tialima, eno homugo dagego te profet bage me, me pris bage me, tama te tigidali we bidi augwaligo te Balba lotu po wabo we bidi me, tama augwali asama, eba sisinagasao,” wali. “Te bede me deli me bidigio,” wali. “Magi baso meni, eno homugo Balba moni denami yai ofa nai ula mawaio. Tialima, bidi me deli asisąbaso da, teda te bidi isaibao,” wali. Jehugo te po wali, te tibo god Bal lotu po wabo we bidi mumua siyu, agai homugo agai te we bidi tigidali ela silainu te po wali. 
Tama Jehugo e tama po ma wali, “Dago te me sogo te genuai bodolu deli dąį ilama, tama te Bal lotu po waguo,” wali. Tialima, augwaligo te bodolu deli dąį ilali. 
Tama te Jehugo te Israel bidi dabe bidibo buluba te agai po ola todolo pali, tama te Balba lotu po wabo we bidi dabe, augwali asama, sisinagasao wali. “Bidi me deli me te naga bede bidigio,” wali. Tama tialima, te we bidi dabe te Bal lotu po wabo moni lotu beba te tigidali we bidi te be tomoba pelama, te mu pągąna sai. 
Augwali te lotu be tomoba bula sela silama bidaluali, tama tialima, te Jehu aga te pelama, te lotu weyu te bulubo ugwa tonalubo bidi pageba pai. Tama agai e tama po agabolo wali, “Tama te bulubo ugwa selama, te Balba lotu po wabo we bidi dabebolo mena mena pao,” wali. Tama te bidigo te Jehugo wali po selama, te ugwa selama, mena mena pali. 
Tama nosali te Jehu dali, te Jonadap dali si, Jonadap aga aya te Rekapgo ogwa da, augwali si te lotu be tomoba pali. Tama te Jehugo te we bidibolo e tama po wali, “Dagego te duga hasi bugagia tononu bilama, tama duga digi dagaliąo, magu menio, bidi me deli me, we me deli me, te Genuai Bidi God dolo mu lotu po wabo we bidi me deli da dali bidamuo,” wali. “Te eno homugo da te Bal dolo lotu po wabo we bidi naga da e be tomode bidinao,” wali. 
Agai te po tama olama sia sali, tama aga dali, te Jonadap dali si, augwali si te denami yai ofa nai ula mabo madigi te habuba pai. Tama augwaligo te habu badu denami yai ofa nai me, me te gasa ofa nai me, te augwaligo te tibo god Balba te tigidali ofa nai selama, te siaba ula palama, te siago sese tama dela pelama, silibo da. Tama te tigidali we bidi asisąbo sogo Jehu aga te bidi sese te me si me si nama, 80 ami soldia bidi dąį ilama, tama agai augwalibolo e tama po wai, “Dage te lotu be togobe badu bidiyu, te bulu badu tonalu bidao.” Tama agai augwalibolo e tama po wali, “Dagego te tama tiao, te tibo god Balba lotu po wabo we bidi dabe tigidali te hani elama, silao,” wali. “Tialima, te soldia bidi me deligo te hani augwali me deli wi pabo sula tagalobaso da, tea te soldia bidi aga me elama, isilaibao,” wali. 
Jehugo te siaba te ulama, te siago sese dela pabo denami yai ofa nai ulubo sę ela silali, tama tilama, te lotu be tomode taga solama, tama aga te ami soldia bidi dali, te aga sę ebo gavman ofisa bidi dabe dalibolo e tama po wali, “Dage te lotu be tomoba pelama, te we bidi dabe tigidali ela muna silao,” wali. “Dagego augwali me badu te wi pabo sula tagaligio,” wali. Te po obaso, te ami soldia bidi dabe augwali te be tomoba pelama, te we bidi dabe tigidali te bainat hwą gego te we bidi dabe elama, silali. Tama nosali tama te we bidi augwaligo tigi selasa pelama, te taun sesege bulu badu pubaligi pai. Tama tilama, augwali ma begasa peyu, te taun tomode te tibo god Bal lotu po wabo beba ma pai. 
Tama augwali te lotu po wabo be tomoba pelama, tama augwaligo te bidi dabego lotu po wabo te noma ni dabe sali, tama augwaligo te ni dabe selasa buluba pelama, tama augwaligo te bulude te noma ni dabe isiba ulali. 
Tama augwaligo te tibo god Bal noma nigali piksa me, te lotu po wabo be me, te augwaligo mu dolali, tama augwaligo te lotu be te di be mu nigilali, tama te be me tama elalu, bidada asama, megi e po asębo bidi dabe bidali sogoba usu nagasalio. 
Tama tilama, te Jehugo te kolesaga eyu, tama te tibo god Bal teba lotu po wabo kolesaga sia sąyani, tama te Israel bage augwaligo te tibo god Balba lotu po munu ma wabe. 
Tama te Genuai Bidi Godigo te Jehubolo e tama po ola mani, “Nago te ebo homu kolesaga te eno me te tiwai kolesaga tų wali te pobao,” wali, “tama nago te Ahapgo hani dali te tibo sę, tama nago te tibo kolesaga te dwagi yai mu dao. Tama tialima, te nosali te eno homugo te nago hani augwali tomode te bidi me deli te king bidi nigilibo eno sula tagalaibao,” wali. “Tama tidi peyu, te duga ame nabo wai dabe te wąį nǫų te me si me si tama namba haniba nama usu nigi paibao,” wali. Tama tiali goli, nosali te king Jehugo te king Jeroboamgo yali dwai kolesaga wali ma pai, te bidigo te polobadu te Israel hani agai kegelama, te augwaligo te sęgę sabo te dwai kolesaga yali bidi dao, Jeroboam agai te golgo te kibu bulmakau noma si nigilama, tama agai me deli te Betel hanude muani, tama me deli te Dan hanude muani. Tama te Israel hani augwaligo te kibu bulmakau nomaba lotu po obaso, te Jehugo sulama, tagalali. 
Tama me te Jehugo te Israel bidi dabego Genuai Bidi Godigo te tigidali bomai po te agai bugagia bomo elama, wali pabe. Menio. Agai te king Jeroboamgo yali kolesagadu wali pali, te kingo te polobadu agai te Israel hani augwali kegelama, te augwaligo te dwai sęgę ebo kolesaga yai. 
Te Jehu aga king bidi nigila bidibo bodolude te Genuai Bidigo te gagalama, te gasa hanigo te Israel hani aiyaba elaluama, te augwaligo tǫ dabe te me badu pedai te boi bidi dabego somainogo sula tagalai. Te Siria hanigo king bidi te aga nogi Hasaelgo te Israel hani dabe dali te boi hwįbo sę yali, magu meni, augwaligo homugo te Israel bagego moni te tigidali te tǫ dabe te augwaligo sainogo te moni boi mu hwįai. 
Te tǫ pedai te giliga asobo pedai badu elaluali, te wę Jordan u badu elaluali, tama te king Hasaelgo te Israel hani aiyaba elaluama, tama te tigidali tǫ dabe sali, te taun Aroer tedu gagalama sai. Te wę Arnon pąde te giliga pabo badu gagalama, tama te moni te genuai tobolu hanu si, te hanu si nogi te Gileat me te Basan, te bulu siba usu nigi pali, te giliga asobo badu, te pedai badu, te not, te tǫ dabe te bidi dabego tǫ da, me te Gat agai hanigo tǫ me, te Rubengo hanigo tǫ me da, tama me te Manasego hanigo tǫ me dao. Te hani sela augwaligo tǫ dabe dao. 
Te king Jehugo te gasa sę yali po dabe, te gasa bukude elalubo da, augwaligo te buku e tama tiwai nogi wabo da, Te Israel Hanigo King Bidi Dabe Augwalide Po Elalubo Buku dao, wabo da. Te bukude te tigidali king bidi dabego te tigidali bomai sę yali po elalubo buku dao. 
Tama te nosali te king Jehu isali, tama augwaligo aga te Samaria bulude pubulali. Tama te aga ogwa Jehoahasgo te aga ayago yali sę eyu, te king nigilama bidali. 
Te Jehu te king nigilama bidali kibu be te 28 olama kibu be usu nama kibu be silai. 
