﻿Te Israel me Juda Hani Sigo Tuni Bidigo Po Elalubo Buku Si.
13.
Te Ahasiago ogwa Joas aga te Juda hanigo king bidi bidiyu, tama kibu be te bidi sese deli olama, te ugwadu nogogo sela kibu be silali. Tama te sogo te Jehugo ogwa Joahas, aga te Israel hanigo king bidi nigilama, bidali. Tama aga te Samaria bulude king bidi nigilama bidali kibu be te 17 kibu be usu nama bidali. 
Tama agai te king Jeroboamgo yali dwai kolesaga tiwai te agai me te Genuai Bidi gedude dwai kolesaga yali. Polobadu te king Jeroboamgo te Israel hani kegelama, tama teyu augwaligo te Genuai Bidigo gedude augwaligo dwai sęgę sabo kolesaga yali. Tama tialima, te Joahas agai me te king Jeroboamgo yali gilama deli kolesaga naga yali, tama agai te dwai kolesaga me tagalobe. Mu menio. 
Tama tialima, te Genuai Bidigo umabo sogo mu te Israel hani dali wado po weyu yali, tama teyu, agai king Hasaelgo augwali dali boi hwįmainu sula tagalali, te Siria king bidi, tama umabo sogo augwali asama, te Israel hani dali boi hwįagasali, tama te Israel hani augwali aiyaba elaluali. Tama nosali Benhadat, aga te Hasaelgo ogwa, tama te bidi aga Siria hanigo king bidi nigilama bidali, tama agai me te Israel hani dali naga boi hwįyu, tama aiyaba naga elaluali. 
Tama tialima, te king Joahas agai te Genuai Bidi dolo gedu haluasa po wali, tama Genuai Bidigo te Joahasgo gedu haluasa wali po odali, magi baso meni, Genuai Bidigo konea pali, te Siria bage augwaligo te Israel bage aiyaba elaluama, mu dolobo sę ebaso. 
Tama Genuai Bidigo te Israel bidi dabe tau sabo bidi me deli dąį ilali, tama te bage augwali te bidigo te Siria hanigo nogode ma dobola sali. Tama tialima, te Israel bage augwali augwa bulude bugagia ma bidali, te polobadu bidali gilama ma bugagia bidali. 
Tiali goli, augwa te sęgę sabo dwai kolesaga sela sąbe. Te polobadu te king Jeroboamgo hani bidiyu yali gilama, tama te Israel hani augwaligo me augwali wali pabo tagalobeo. Menio. Augwaligo te dwai kolesaga ebo sę me eduali. Tama augwaligo te tibo god te we Asera noma nigilama, te Samaria bulude muani piksa noma, augwaligo munu me sela sąbeo. 
Tama te sogo te king Joahas agai te ami soldia bidi umabo mu meni badi, magi basowe, te Siria hani augwaligo te Israel hanigo ami soldia bidi dabe umabo mu ela muai dao. Tigidali sogo te Siria hanigo augwali dolobo sę mu yali, tialima megi te Israel hani augwaligo ami soldia bidi dabe te bidi sese si olama, nogo si, 50 tama bidi dabe naga te hos kibude dugulama, tama boi hwįbo usu elalubo. Tama tialima, augwaligo te boi hwįbo karis nai nogo si naga bidali, me te gasa ami soldia bidi dabe te 10,000 tǫdu pabo ami soldia bidi naga bidali. 
Te king Joahasgo agai te gasa sę yali po tigidali dao, te gasa bukude elalubaso, augwaligo te buku nogi e tama wabo da, Te Israel Hanigo King Bidi Dabe Augwaligo Haniani Sę Yali Po Elalubo Buku dao. Te po elalubo buku te kingo te bomai sę yali po tigidali elalubao. 
Tama nosali te king Joahas isali, tama augwaligo te Samaria bulude aga pubulali. Tama te aga ogwa Jehoas, tama agai te aga ayago yali sę agai selama, tama king bidi nigilama sę yali. 
Tama te Joas aga Juda hanigo king bidi nigilama bidali, kibu be e tama pai, te 37 kibu be silai, Jehoas, aga te Joahasgo ogwa da, aga te Israel hanigo king bidi nigilama bidali. Tama aga te Samaria bulude king nigilama bidali kibu be e tama pai, te 16 kibu beba usu nigi pali. 
Tama agai dwai sęgę sabo dwai kolesaga Genuai Bidigo gedude te king Jeroboamgo yali kolesaga tiwai naga yali. Polobadu te Jeroboamgo te Israel hani kegelama, tama augwaligo te Genuai Bidigo gedude te dwai sęgę sabo kolesaga yali. Tama megi me, te Jehoasgo me agai te Jeroboamgo yali gilama tiwai te dwai sęgę sabo dwai kolesaga deli naga yali. Tama agai te dwai kolesaga me tagalobe. Mu menio. 
Te king Jehoasgo te tigidali te haniani sę yali po da, te gasa bukude elalubo dao, augwaligo te buku nogi ebo da, Israel Hanigo King Bidi Dabe Augwaligo Haniani Sę Po Elalubo Buku da wabo dao. Te e bukude te Israel hanigo te Juda hanigo king bidi Amasiago hani dali te boi hwįbode te king Jehoasgo te haniani bomai sę yali po elalubo buku dao. 
Tama nosali te king Jehoas isali, tama augwaligo aga te Samaria bulude te Israel hani dabego king bidi isibo side pubalobude gų pagede augwaligo aga pubulali. Tama te gasa Jeroboam te aga sabi bidigo tama aga king nigilama, te king Jehoasgo sę yali silide agai selama, sę yali. 
Te Jehoas aga king nigilama bidibo sogo, Elisa aga monu dabe bidiyu, tama aga gasi sali. Tama te pąde aga isabo ąǫ ebadi yaide, tama te king Jehoas aga pelama, sugi pali. Tama king Jehoasgo Elisa aga sulama, homu dene eyu, tama aga gela wali, tama agai agabolo e tama po wali, “Eno aya, eno aya, nage bomai bidi, nago da Israel tau sai bidi dao, nage da, te boma pai boi hwįbo hos kibu me, te karis nai me tiwai mu dao,” wali. 
Tama Elisago agabolo e tama po wali, “Nage pelama, naga enesigi selasa asao,” wali. Tialima, Jehoas aga pelama, tama te enesigi selama, tama magasali. 
Tama Elisago agabolo e tama po ola mani, “Te enesigi selama, tama enainu tama te ene enesigi balibiba tulama dolaluao.” Tama te kingo tama tiali, tama te Elisago nogo te kingo nogo ugwadu dai badu agai nogo muani. 
Tama Elisago kingbolo e tama po wali, “Megi nago te dwasianu windo tų nage pelama, dagi pelama, tama nago te giliga asoboba tonaluao.” Tama tialima, te king Jehoasgo te enesigi balibi petegelama, tama pelama, aga pelama, te dwasianu windo tų dagi pali. Tama Elisago te kingbolo te po wali, “Tama nago enesigi balibi dolama, tama te pelama ene enigi pao.” Tama te king Jehoasgo agai wali po selama, tama tiali, tama Elisago i wali, “Te ene, te Genuai Bidigo ene dao. Te enego te Siria hani aiyaba elaluaibao. Tama tialima, te sogo te nago Siria hani dali boi hwįbo sogo, te augwa te Afek taunde boi hwįaibao, tama nago augwali mu silaibao,” wali. 
Tama Elisago te kingbolo e tama po wai, “Te ene dabe sao,” tama kingo te ene dabe selama, tama te Elisago e tama po wali, “Te ene dabego te tǫba elao,” wali. Tama tibaso, te king Jehoasgo te ene selama, te tǫba sela sogo tǫba elali. 
Te profet bidi Elisago sulama, tama agai wado po weyu, tama kingbolo e tama po wali, “Nago homugo te enego a naga sogo, ma a olama, me badu nogo kibisa wagi solama sogo tǫba elai meniwe? Tialima, nago tama tigi sogo da, teda te nago te Siria hani te nago usu mu elama, aiyaba elalugi da. Tiali goli, nago megi da, nago augwali sela sogo naga aiyaba elaluaibao, “wali. 
Nosali Elisa aga isali. Tama augwaligo aga tigi selasa pelama, te augwaligo masigigo te isibo bidi muainogo dedage nigali gų pageba pubaligi pali. Tigidali kibu bede te Moap hani bidi dabe me badu aselama, te Israel hani dabe dolagasali. 
Me sogo deli te Israel hanigo te bidi me deli isai bidi te gų pageba pubulainu edubadi, tialima augwaligo suali, ma te Moap hani bidi dabe me badu asobaso, tama augwaligo te isali bidi tigi polo tama augwaligo te Elisa pubulali digi te Elisago dili munalubo madigi augwaligo te isali bidi tigi te gų page dedageba polo subigila munama, tama taga pali, tama augwali wi pela silali. Tama te isali bidigo tigi te Elisago dili munalubo madigi dagana sigi pali, tibaso te isali bidigo mobo bidi aga tigiba ma begasa asobo si, tama te isali bidi ma hoda holali. 
Joahasgo tigidali kibu bede, Jehoas aga aya, aga te Israel hanigo king bidi bidali sogo, te king Hasael, aga te Siria bidigo king bidi bidai, tama agai te Israel hani dali boi hwįagaselama, tama augwalibolo sęgę madu geani. 
Tiali goli, Genuai Bidigo te Israel hani augwali hobede mu yali, tama tibaso, aga bugai homu pemene augwaliba yali. Agai te polobadu te Abraham dali, te me te Aisak ebadi, me te Jekop ebadi, te bage dali te agai bomai po bodolu selama, dąų waliba gogone peyu tama tiali, tama teyu, agai te Israel bage augwali tau selama, tama agai augwali munu me dolobe. Tama agai homugo te Israel hani sela sąnama, tama augwali te aga gesabidide te augwali digibulu bidigi pabo agai hagela homu yali. 
Tama nosali te king Hasael isali, tama te Benhadat, aga ogwago, te aga ayago yali sę selama, tama aga aya bidali silide bidiyu, tama aga te Siria hanigo king bidi nigilama bidali. 
Awe, tama te Jehoas, aga te Israel hanigo king bidi dali, tama te aga ami soldia bidi dabe dali, augwaligo te Siria king bidi Benhadat dali, te aga ami soldia bidi dabe dali, augwaligo augwali dali boi hwįgi pali. Tama te king Jehoasgo te king Benhadatgo aga soldia dali aiyaba elalualima, tama augwaligo te Siria hanigo sali taun augwa ma sali, te taun polobadu te Israel hanigo taun te polobadu te king Jehoasgo aya Joahas bidali sogo te Siria hanigo sai taun megi te augwa ma sali. Jehoasgo te king Benhadat aga te sela sogo aga aiyaba elaluali. 
