﻿Te Israel me Juda Hani Sigo Tuni Bidigo Po Elalubo Buku Si.
18.
Hosia aga king nigilama bididubadi, te kibu be sela pai, te Hosia aga aya te Elago ogwa da, te bidi aga te Israel hanigo king bidi nigilama bidali, Hesekia, aga aya Ahasgo ogwa, aga te Juda hanigo king bidi nigilali. 
Hesekiago agai kibu be bidi sese deli olama, ugwadu nogo a nama kibu be pabo side, te aga king bidi nigai, tama aga te Jerusalem bulude king bidi nigila bidali kibu be te 29 kibu be bidali. Te aga ida nogi Abiya, Abiya aga aya te Sekaraiago wegi da. 
Hesekia agai te dwagi yai kolesaga te Genuai Bidigo gedude yali, te aga wąį nǫų king Devitgo yali kolesaga tiwai yali. 
Tama te king Hesekia agai te e tama kolesaga yali, te augwaligo te tibo godiba lotu po wabo pesage dolama, tama agai te masigide age ni posde te tibo god noma piksa nigilama daganani masigi pos dabe me hųginama sąyani. Tama me te nigo te tibo god we Asera noma nigilama daganai age ni pos gelama, sąyani. Tama me polobadu Mosesgo te brasgo nigali hasamani te agai selama, augwaligo te hasamani e tama nogi poai, Nehustan, tama te hasamani noma agai te denege minama, sąyani. Magi baso meni, te we bidi dabego te hasamaniba lotu po weyu, te dwagi yai denami emainu hano ebo pauda ulubaso, tiai dao. 
Hesekia agai te Genuai Bidiba konealubo homu dąų mu wali, te Israel hanigo God da. Te Juda hani king bidigo Godiba konealubo homu dąų wai king bidi me deli bidai meni, te Hesekiago yali tiwai gilama yai bidi me deli meni yai. Agai te Godiba konealubo homu dąų mu wai, te agai konealubo homugo te hasia king bidi dabe me, te nosali nigabo king bidi dabego konealubo homu me, te king Hesekiago konealubo homugo augwali aiyaba elaluai mu dao. 
Aga te Godiba kęa pelama, dąų mu wagi pali. Tama agai te tigidali sogo Genuai Bidi munu me tagalobe. Mu meni. Tama agai tigidali bomai po te Godigo te Mosesbolo mani po tigidali te agai bugagia wali mu pali. 
Tama teyu, te Genuai Bidi te king Hesekia dali bidiyu, tama aga tau sali, tama tigidali sę agai yali, te bugagia mu pedalali. Te king Hesekiago homugo te Asiria hani king bidigo te Juda hani augwali tonalubo hagela mu yali, tama tibaso augwali te hanigo dologode ma bidibe. 
Tama te king Hesekia aga ami soldia bidi dabe selama, te Filistia bidi dabe dali boi hwįgi pelama, tama te tigidali taunde me, me te bulude te bomai obo bogo badu elalubo bulu dabe me, augwaligo te boi hwįgi pali. Tama augwaligo te Filistia hani aiyaba elalu, ela peyu, tama te taun Gasaba usu nigi peyu, tama te bulu pąde elalubo bulu dabe dali aiyaba elaluama, sali. 
Te king Hesekia aga te Juda hanigo king bidi bidibadi, te agai kibu be te me si me si tama kibu be pai, tama te Israel hanigo king bidi Hosia aga te Israel hanigo king bidi bidibadi e tama kibu be yali, te 7 kibu be yali. Aga aya te Ela dao. Tama te kibu bede, te Asiria king bidi Salmanesergo aga ami soldia bidi selama, te Israel hani bidi dabe dali boi hwįagasali. Tama augwaligo te taun Samaria bobegelalu, tama te taun sainu boi hwįani. 
Tama augwaligo te taun bobegelalu te boi hwįdubadi yaide, kibu be selaba usu nigi pali, tama te nosali augwaligo te Samaria hani aiyaba elaluama, te Samaria bulu taun sali. Tama te kibu bede da, te king Hesekia agai king bidali kibu be te 6 kibu be ebadi te boi hwįani, tama te Israel hani bidi dabego king bidi Hosia aga king bidali kibu be te 9 tama kibu be wabode te boi hwįani. 
Tama te Asiria king bidigo te Israel hani augwali te Asiria buluba odasa pali, tama tede me badu bidi dabe te taun Hala bulude tagalama bidao wali, tama te me badu bidi dabe te Gosan bulu taun pąde te wę Habor te bulude bidao wali, tama me badu bidi dabe augwali te Midia hanigo taun dabe bulu tǫde bidao wali. 
Te sęgę te Israel hani augwalide pedalali, magi baso meni, augwaligo te Godigo po sela sąbaso, augwa Genuai Bidi, tama augwaligo te Genuai Bidigo augwali dali te bomai po bodolu selama dąų wali po togolama, tama augwaligo Genuai Bidigo aga sę bidi Mosesbolo mani bomai po me tigidali bolali. Augwaligo te Genuai Bidigo po odobe, tama augwaligo te agai bomai po me wali pabe. 
Te Hesekia aga king bidibadi, agai te 14 kibu be silama, tama te Asiria hanigo king bidi Senakerip aga ami soldia bidi dabe dali asama, tama augwaligo te Juda hani dabe dali boi hwįagaselama, tama augwaligo te Juda hani aiyaba elaluama, tama augwaligo te bomai obo yai taun naga sesa pelama, bidali. Tiali goli, te Jerusalem taun bulu digi sabeo. 
Te king Senakerip aga te taun Lakis bulude bidali, tama te Hesekiago te kingbolo e tama po ola tolali, “Eno nage dali hagoma eyu, tama eno dwasianu geda muanio. Tiali goli, eno homugo nago ena dali boi hwįbo tagalama, tama nago eno bulu tagalama, pao,” wali. “Tialima, nago tama teyu da, teda eno nagebolo magi nai mawaibawe te nago enabolo hanalubaso.” Tama tibaso, te king Senakeripgo te king Hesekiabolo e tama po wali, “Nago enabolo te 10,000 kilogram silva me sobadi, tama me te 1,000 kilogram gol sobadi elama, enabolo mao,” te po wai. 
Tama te po obaso, te king Hesekia agai te Genuai Bidigo tempel bede muani te tigidali silva dabe me, tama me te kingo bede te mone munalubo habu badu muani doado bage me, tigidali agai selama, tama te king Senakeripbolo sese tama mani. 
Tama me te agai te Genuai Bidigo tempel be tųde elaluali gol me, tama me te tų sesegede elalubo golgo age ni pos me tama agai tigidali sela sąnama. Polobadu te king Hesekia aga digi te aga sę ebo bidibolo olama, tama te tų sunumi daide te golgo haluali, tama me te pos ni daide golgo haluama dagayani. Tama megi agai te tama muani gol selama, tama te gol dabe te king Senakeripbolo mani. 
Tama te king Senakeripgo te gol dabe me, te silva dabe me agai sali, tiali goli agai te ami gavman tobolu ofisa bidi sela dali, te ami soldia bidi umabo dali, tagala palali, tama augwali te Lakis bulu taun tagalama, Jerusalem taun buluba pali. Tama augwali te Jerusalem taunba sabolali, tama augwali te Jerusalem taunba te sigi węgo te ugwadu da Jerusalemba aiyaba kegasa tulali wę pabo gamia, te wę gamia pąde augwali bidaluali. Te wę gamia tų te moni sunumi sesegede te name ugwa nigibo buluba pabo sunumi sesegede pąde elaluali. 
Tama te Asiria hanigo te king Hesekiabolo augwaligo po ola tolali, te aga asao olama po wali. Tama tiali goli, agai te aga sę ebo gavman tobolu bidi sela tagala palama, tama augwaligo te Asiria hani sugi pali. Tama agai te tagala palali bidi dabe nogi da, te bidi me te Eliakim, aga aya Hilkiago ogwa da, te bidi agai sę te kingo be tonalubo bidi da, tama me bidi nogi Sepna, te bidigo sę te king bidigo kuskus bidi da, te bidi me nogi Joa, aga aya te Asap, te bidigo ogwa da, te bidigo agai ebo sę te king bidigo agai te tigidali ebo sę po asębo sę ebo bidi dao. 
Tama te bidi sela te Asiria hani bidiboba sabalobo sogo, te Asiria ami gavman tobolu bidi me deligo augwali dali e tama bomo yai po wali, “Dage pelama, te king Hesekiabolo te e bomai king bidigo po agabolo pusigi pao, aga te Asiria hanigo king bidi, e tama po wali, ‘Hesekia, nago mena tama tiwai bomo elalubaso ebawe, nago eno bomo dologode bidibeo? 
Nago homugo olo po tama wabogo bomo eyu, te wabao, te boi hwįbo da nago aiyaba me elaluaibawe, a? Nago ena dali hagoma ebawe? Naga homugo dego asama, nage tau sagasabo weyu, tama nago ena dali hagoma ebawe? 
Eno koneani, nago homugo te Isip haniba tonono eyu, tama nago boi hwįbode augwaligo nage tau saiba. Tiali goli, eno nagebolo obao, te Isip hani augwali da, te da te sigi dili deli toga pai tiwai dao. Tiali tama, nago selama, tama te tolasa bilibo dono tiwai dao, tama tialima, te sigi dage mego naga nogode eneyu, dolaibao. Te Isip hanigo king bidigo agai kolesaga te bomo isąwai sigi dili mu tiwai dao,’ wali. ‘Tama teyu, nago boi hwįbode agai nage usu nama, nage me tau sagasogobeo. 
Tiali goli, nago te po weyu da, dage Israel hani dabe dagego konealubo homu Godiba dąų wali da, duga Genuai Bidi, tama te agai dage tau saibao, tiali goli dego me te usu me egobeo. Magi baso meni, Hesekia, nago te aga dolo lotu po wabo pesage me, tama me te ofa nai ulubo sai alta dabe elalua pali bulu dabe dolai dao. Tama nago te Juda hani dabe ebadi, te Jerusalem ebadi elama, tama nago augwali e Jerusalem buluba sisinama, tama deli ofa nai ulubo alta saiba naga sisinama, lotu po wao, wai.’” 
“Tama eno kingo gasa po me wali, Hesekia, eno kingo 2,000 hos kibu nage mabo usu yaibao, tialima nago te 2,000 ami soldia bidi kegelama, tama augwali te kibu hosde dugulama, tama augwaligo boi hwįabo. Tiali goli, eno koneani, naga digi naga te namba tiwai ami soldia bidi menio,” te po wali. 
“Tama nago homugo te Isip hanigo ami soldia bidi dabe augwaligo te hos kibu me, tama me te karis me, tama te nai dabe nago boi hwįbode tama augwaligo nage tau saibawe? Tiali goli, nage munu me tau sogobeo, tama augwali munu ma asogobeo. Tama teyu, naga bula bomogo eno dwasianu ami soldia hani da me aiyaba elalugobeo. 
Nago homugo ena te asali, te ena homugo digi asama, te boi hwįagaselama, nago bulu dolaliwe weyu, a? Mu menio. Genuai Bidi Godigo aga digi enabolo obaso, te ena aselama, te nago te bulu te dolaliąo wali,” te Senakeripgo tagala palali bidi dabego te po wali. 
Eliakim tama, me te Sepna ebadi, tama me te Joa, tama te bidi selago te po wabo odali, tama augwaligo te Asiriago ami soldia gavman tobolu bidi dali e tama po wali, “Nago da dali po wainu da, te Siria pogo naga wao,” wali, “magi baso meni, dago te hanigo po koneani dao. Nago te Hibru pogo naga wagio, te taun obo banis daide ugwa badu dolalubo Juda bagego me nago te wabo po odabuo,” wali. 
Tiali goli, te ami gavman ofisa bidigo e tama po wei ponani, “Eno kingo ena tagala palama, te eno e wabo po te duga king dali, dage dali sigo naga odomainu ena tagala palobeo. Menio. Te oga taun obo banisde dolalubo bagego me te po odomainao wali. Magi baso meni, tialima te boi hwįbaso da, teda te dago te Jerusalem taun bologobea saibao, tama te dage tigidalide dwai bodolu sogo mu dageba dolo pedalaibao,” wali. “Tama te taun obo banis daide ugwadu oga bidibo bage augwaligo tuabo nai mu menio. Tama augwali te di tuyu, tama te augwa poi ma tuyu, te yaibao,” wali, “te tibo tiwai te dage tama dao,” wali. 
Tama te Asiria gavman ofisa bidigo te taun obo ugwadu daide te bidibo bidi dabeba tonama, tama agai te Hibru pogo moni dagą olama weyu, e tama po wali, “Dagego olo bugagia munama, tama te bomai kingo po bugagia odao, aga te Asiria king bidi dao,” wali. 
“Agai te tama po wali, ‘Dagego te king Hesekiago agai dage dali ili po wabo po te mu po da homu igimio,’ wali. ‘Te Hesekiago dage tau selama, ena aiyaba me elaluama, dage bugagia me bidigobeo. 
Dagego te Hesekiago agai te ili po wabo munu me odogio, tama dagego homugo te Genuai Bidigo dage tau selama, tama te da Asiriago dage aiyaba elalusiąma, tama te taun Jerusalem sogobewe homu eyuwe? 
Dagego te king Hesekiago agai wabo po munu me odogio, tama agai po dagego odama, tama dagego ena dali dagego boi hwįagasabo homu egio. Tiali tama, dage bugagia bidabo homu eyu, tama naga te ulu ąį bugagia tuyu, tama duga te ni wain du me tuyu, tama me duga te gide ebo kaya du me bugagia bidiyu tuainu da, teda tea dagego te taun dago sagasobaso da, teda dagego gedugo sula tagalao,’ wali. 
‘Tama dage bugagia bidada pedubadi yaide, tama ena asama, tama dage selama, tama te gasa bulu meba tagalama, te bulu te duga bulu tiwaide bidaibao. Te bulu da, te du tubo ni wain gi me umabo mu ebo dao, tama me te sia gagawai nai wit, te bret nigibo nai gi me te bulude umabo mu elalubao. Tama te ni oliv me, tama me te ganama bunu me te bulude umabo elalubo bulu dao,’ wali. ‘Tialima, dagego eno po wali peyu da, tea dage bugagia bidiyu, tama dage me isigobeo. Tama Hesekiago agai dage ili po ola mayu, e tama po wabo da, Genuai Bidigo dage tau selama, tama da aiyaba elaluaibao wabo po. Tiali goli, dagego homugo agai po mu da olama, dago te boi hwįaibao olama, dagego genuai homugo konealugio,’ te po wali. 
‘Dagego homugo te gasa hani augwaligo godigo augwali tau selama, tama augwaligo da Asiria hani dali boi hwįnama, tama augwaligo da aiyaba elalualiwe, a? Mu menio. 
Tama dago te taun Hamat, tama me te taun Arpat, tama me te taun Sefarvaim, tama me te taun Hena, tama me te taun Iva, te hani dabe dali boi hwįgi pabo sogo, augwaligo god mena bidibowe tama augwali tau sabowe? Tama dago te Samaria buluba boi hwįagasali sogo, tama te Samaria hani augwa godigo augwali tau selama, tama augwaligo da Asiria aiyaba elalualiwe? Mu menio. 
Dago te umabo bulu bidi dabe dali hwįani, tama te hani augwaligo da te augwa umabo god bidibadi, tiali goli augwaligo te god me deligo augwa te bulu me tau selama, tama dago augwali dali boi hwįani me tagalai menio. Tama tialima, te Jerusalem hani bidi dabe, dagego homugo te duga Genuai Bidigo dage tau saibawe, tama dago dage aiyaba elalubo usu egobewe?’ Eno king bidigo te po dagebolo ola tolai dao,” te Asiria gavman ofisa bidigo te po wai. 
Te Asiria gavman ofisa bidigo agai te po wabo silama, tiali goli te taun obo ugwadu daide bidali bidi dabego tama augwaligo sagia siyu, po me deli wei ponobe, magi baso meni, te king Hesekiago augwalibolo te Asiria hani augwaligo te po wei ponogio olama, habu selai baso, tama augwaligo te po wei ponobeo. 
Tama tialima, te Asiria gavman ofisa bidigo wali pode te Eliakim, tama me te Sepna, tama me te Joa, te bidi sela augwaligo haliga sęgę mu yali. Tama tibaso, augwa bulubo ugwa pibisayali. Tama augwaligo te Asiria gavman ofisa bidigo wali po tigidali po te king Hesekiabolo pusigi pali. 
