﻿Te Israel me Juda Hani Sigo Tuni Bidigo Po Elalubo Buku Si.
22.
Te Josaia agai kibu be te nogo a olama, te me badu nogo sela, te 8 kibu be bidama, tama aga te Juda hanigo king bidi nigilali. Tama aga te Jerusalem taun bulude king nigilama, sę eyu bidali kibu be te 31 kibu be usu nama bidai. Aga idago nogi dao, Jedida, te taun Boskat bulu bidi Adaiago wegigo ame nani ogwa dao. 
Tama te king Josaia agai te Genuai Bidigo gedude te dwagi yai kolesaga yali. Tama agai te aga wąį nǫų Devitgo yali tiwai dwagi yai kolesaga mu yali, te king Devit, agai te polobadu yali sę. Tama te king Josaia agai te Genuai Bidigo tigidali po agai bomo mu elama, dolo naga wali pali. 
Tama te king Josaia aga te king bidi sę edubadi yaide, te kibu be te 18 wabo kibu be tomode, tama agai te aga kuskus bidi tagala palali, te bidi nogi Safan, agai te po Genuai Bidigo tempel beba selasa pali. Te bidi Safan, te aga aya Asaliago ogwa da, tama te aga wąį nǫų ogwa te Mesulam. Te king Josaiago te kuskus bidi Safanbolo e tama po ola mani, 
“Nago te tobolu pris bidi Hilkia sugi pelama, tama agabolo e tama po wao, te Genuai Bidigo tempel be tųde tonalubo bidi dabe augwaligo te tigidali we bidigo mabo te tigidali mone nedao wao,” wali. 
“Tama te Hilkiabolo e tama po walao, tama agai te mone selama, tama te sę tonalubo bidi dabebolo te mone mao,” wali, “tama augwaligo selama, tama te Genuai Bidigo tempel be ma geselao. Tama augwaligo te monego te sę bidi dabe abelama, tama augwaligo te Genuai Bidigo be ma geseleyu, dodolobo sę emainao. 
Tama augwaligo te monego naga te be sę ebo kapenda bidi dabe dali, tama me te masigigo te be sę ebo koneai bidi dabe me abelao. Tama me te ni name me, te masigi me, abelao,” wali, “tama te me badu bidi dabe augwaligo te togolama, tama bugagia dodola muna silali selama, tama te Genuai Bidigo tempel be ma geseleyu sę yao. 
Eno koneanio, te sę tonalubo bidi dabe augwaligo te ili po olama, te augwaligo te mone wi sabo bidi dabe menio. Tama teyu, te tobolu pris bidi nago homugo augwaligo te monego magi sę egowe weyu, nago augwalibolo hanalugio,” Josaiago te tama po ola tolali. 
Tama te kuskus bidi Safan aga pelama, te kingo wali po gilama wali. Tama te pris bidi Hilkiago te po oda silibo si, tama agai te kuskus bidi Safanbolo e tama po wali, “Eno te Genuai Bidigo tempel bede munalubo buku me deli suai dao. Te bukude te Genuai Bidigo Bomai Po elalubao,” wali. Tama te buku te pris bidi Hilkiago te kuskus bidi Safanbolo mani, tama te bidi Safango nedali. 
Agai te buku neda silama, tama agai te buku dali agai sela pelama, te king Josaia agabolo e tama po wagi pali, “Naga sę ebo bidi dabe augwaligo te Genuai Bidigo tempel bede muani mone tigidali selama, tama te sę tonalubo bidibolo menama, tama augwaligo te Genuai Bidigo be dodolobo sę emainogo yalio,” wali. 
Tama te kuskus bidi Safango agai e tama po ma wali, “King, te tobolu pris bidi Hilkiago te e buku enabolo manio.” Tama agai te buku dinigilama nedali, te kingbolo te po nedali. 
Tama te kingo te Godigo te Bomai Po te buku tomode elalubo po odobo si, tama agai haliga sęgę mu eyu, tama aga holobo ugwa pisayali. 
Tama agai te pris bidi Hilkia i wali, me te bidi Ahikam, aga te kuskus bidi Safango ogwa da, tama me te bidi te Akbor, aga aya te Mikaiago ogwa da, me te kingo kuskus bidi Safan, tama me te Asaia, te bidi Asaia aga te kingo sę ebo ofisa bidi da. Tama te bidi dabe augwali asela silibo si, augwalibolo e tama po wali, 
“Megi te Bomai Po elalubo buku eno salio, Genuai Bidi agai homugo agai da tigidali da e kolesagadu wali pomainu, e tama po hanilama wali. Tiali goli, dago wąį nǫų dabe augwali te e dwagi yai po wali pabeo. Tama tialigo da, teda te Genuai Bidi agai da dali te moni haliga sębę mu yalio. Tiali goli, te megi dago te Genuai Bidigo Bomai Po elalubo buku dago te ma suali dao,” wali, “tama tialima, eno homugo dage pelama, te Genuai Bidibolo hanalugi pelama, tama agai homugo te mena sę te ena dali me, te Juda hani we bidi dabe dali me, me te Jerusalem bulu we bidi dabe dali yabo sę po page gegegi piąo,” wali. 
Te bidi dabe augwaligo te kingo po oda silibo si, tama augwali te Jerusalemde te gesi noma taun pedai baduba pelama, tama augwaligo te profet we me deli te gesi noma taunde bidibadi yaide, augwaligo te profet we dali po miani, te wego nogi e dao, Hulda. Hulda aga te Salumgo we da, Salum agai te pris bidi dabego te au dodobage gudubo ugwa mubo habu pesage tonalubo sę ebo bidi da. Salum aga aya te Tikvago ogwa da, tama aga wąį nǫų ogwa te Harhas. Tama te Huldago agai te bidi dabe augwaligo wali po oda silali. 
Tama agai e tama po wei ponani, “God, da Israel hanigo Genuai Bidi, agai te po wai, ‘Dage tagala palali bidi pageba ma geasa pao,’ wali, ‘tama agabolo e tama po walao’, 
‘Ena God, Genuai Bidi, tama eno te e buku tomode elalubo Bomai Po wali peyu, tama te Bomai Po te kingo nedebadi yaide, tama te eno te Jerusalem taunde bidibo we bidi dabe dali te taun dali dolaibao. 
Te tigidali we bidigo ena tudiba ilama, tama augwaligo te tibo god dabeba ofa nai ula mabo sę ebo dao. Tama augwa te dwai kolesaga ebogo te eno augwali dali eno wado te ebao. Eno sębę genuai mu te Jerusalem dali eyu, tama eno te sębę ebo sę te eno polo sia sogobeo,’ wali. 
‘Tama tialima, te megi te ena God da, te Israel bage duga Genuai Bidi da, eno homugo duga king bidibolo e tama po ola mobao. Tama augwaligo te buku nagebolo neda mabo sogo, 
nago koneanio, te magi nai sę eno dagebolo olama, tama te Jerusalem dali, te Jerusalem taunde bidibo we bidi dabe augwali dali yabo sę po, eno e tama po obao, Jerusalem bulu dolaibao, tama te Jerusalem te olo bulu mu elaluaibao. Tama te gasa hani we bidi dabe augwaligo homugo te dwai po te augwa boi bidi dabe dali weyu, augwaligo e tama po waibao, “Dage te Jerusalem taun bulu dolali yali gilama dage me tama dolao,” waibao. Tialima, te king, nago te e tama po odobo sogo tama te nago hani we bidi dabe dali yabo sę po da, nage haliga begelama, tama te eno gedude naga digi aiyaba elaluali. Tama me te naga bulubo ugwa pisalama, tama gela weyu, tama ena i wai dao. Tama teyu, megi ena Genuai Bidi, eno po obao, eno nago i wabo odalio. 
Tama te Jerusalem taun bulu dolabo sogo nage dolidali weyu, teda eno sula tagalogobeo. Menio. Nage bugagia mu bidaibao. Tiali goli, nosali nage isibo si, tama augwaligo nage gų pageba pubalobo sogo, teda te eno te Jerusalem taun dolaibao.’ Genuai Bidigo te po wai.” Te profet we Huldago agai te Genuai Bidigo po te bidi dabe augwalibolo mena silali, tama tilama, augwaligo te po te kingbolo pusigi pali. 
