﻿Tuni Bidi Dabego Po Elalubo Buku Deli.
21.
Te Satango te Israel dabe sęgę mawai hagede, tama agai Devitba homu kolesaga mobaso te Israel we bidi augwali nedao wai dao. 
Tialima Devitgo te Joapbolo te gasa ami ofisa dabeba te tiwai po walali, “Dage pelama, te Israel we bidi nedegi pao,” wali. “Dage te tǫ pedai tigidali badu bilao, te taun Berseba te saut badu usu nama pao, tama te taun Dan te not badu me pao. Tama dagego te sę yali po asęnama enaba sesao, tama tibaso eno te we bidi dabego namba koneaibao,” wali. 
Tialima Joapgo kingba te tiwai po wei ponani, “King, eno homugo Genuai Bidigo te we bidi dabe augwaligo namba ugwanu holomaina homu ebao, tama augwali te we bidi hauwa umabo pedalumainu homu ebao. Nago koneao, tigidali Israel nage dologode bidibao, te nage tama augwaligo king bidibao. Tialima magi baso nago te dwai kolesaga elama, te tigidali we bidide dwai sę elalueibawe?” te po wai. 
Tialima kingo Joapgo te po wali pao olama bomo yali. Tialima Joapgo te king tagalama, te tigidali tǫ pedaiba tedela pelama, te we bidi dabe nedegi painu yali. Te nosali aga Jerusalemba ma asalio. 
Tialima Joapgo te sę ela bilali po Devitba wagi pali, Israelde te hauwa umabo we bidi mu, te 1,100,000 bidigo te ami bidi sę yabo elaluali, te Juda bidi me te bidi sese umabo hauwa mu te 470,000 bidi dao. 
Tiali goli Joapgo te kingo aga te mani sęde agai homu wei ebeo, tama tiyu agai te Livai hani dabe dali te Benjamin hani dabe dali si te nedebeo. 
Augwaligo te Israel we bidi dabe nedali sęde Godigo wiegi yai homu pemene isąwai, tama teyu agai te Israel dabeba dwai dene mabo sę yalio. 
Tama Devitgo Godiba te tiwai gedu haluasa po wali, “Eno homu kone mu tųa palama, eno te bidi dabe nedalio. Te tama tiali kolesagade eno dwai sę genuai mu yalio. Tialima nago ena homu dene eba wida, te eno nagebolo hanalu obao, te nago eno yali sęgę sela sąyao,” wali. 
Tialima Genuai Bidigo Gatba te po walali, te Devitgo profet bidi, te agai te tiwai po Devitba waligi pomainu yali, “Ena, Genuai Bidi, eno po dolo tama obao, eno nagebolo te sunumi sela ola mobao, te naga digi te nago me deli te dąį ilao. Te nago mena sunumi dąį ilali, te naga te eno wali pelama, te sę nageba pedalumainu ilaibao,” te po walio. 
Tialima Gat pelama, Devit sugi pelama, agaba te tiwai po walio, “Genuai Bidigo nageba te po weyu, te sunumi sela elaluba wali nai dabede te nai me deli nago dąį ilao po wali dao. 
Nago homugo te kibu be selade usu nama te genuai nai nasi si pedelama te bidimai da homu yaibawe? Ma, nago homugo te boi bidi dabego dage dolagaselama, te dage augwalide wi pelama, te polua sela bidigi pabo homu yaibawe? Ma, nago homugo te Genuai Bidigo dage dolama te dwai gasi nago tǫ pedai we bidi augwaliba te gasi sela sogo elalumainao homu nago yaibawe? Megi tama nago homu kone palama, te nago mena homu ebo po enabolo walobaso, tama eno te po Genuai Bidiba ma sela pelama wagi paibao,” Gatgo te po wali. 
Tialima Devitgo Gatba te tama po wali, “Nago enabolo te wali po dabede homu sęgę mu ebao. Tama tibaso, te Genuai Bidi aga digi enabolo emainu sula tagalao, magi baso meni, aga te dade homu dene eyu tau sabo wiegi yai kolesaga sesemane sogo ebo God da. Tialima eno homugo te bidi dabego da dolobo te hagela homu ebao,” wali. 
Tama tialima, Genuai Bidigo dwai gasi te Israel dabe augwaliba tagala palama, tama bidi sese umabo hauwa te 70,000 we bidi isalio. 
Tama Godigo te mobo bidi enselgo te Jerusalem dolomainu tagala palali. Tialima Genuai Bidigo suali, te enselgo te Jerusalem elainu ebaso, tama te dwai nai te we bidi augwaliba pedalubo te agai homu dene yalio. Te agai homu hasegelama, tama te ensel bidiba te tama po wali, “Tagalao. Te usu dao,” wali. Te sogo te ensel te augwaligo te nai wit ge siyu, te bo wali sela sąbo pesage me deli pąde dolaluali. Te tǫ dage te Araunago tǫ da, te Jebus hani bidi me deli. Te Araunago me nogi Ornan dao. 
Tama Devit te Israel tobolu bidi dabe daligo te homu dene ebo ugwa gudalio. Tama Devitgo gedu ugwaba selama tonobadi, te Genuai Bidigo ensel bidi te dagalu de tǫ si tomode dolalu, te agai nogode bainat hwą tolalu, te Jerusalem dolai hagede sisilaluali. Tama Devit te tobolu bidi dabe dali degasa dulama te gesabidi tǫba pǫgulalio. 
Tama Devitgo Godiba te tiwai gedu haluasa po wali, “Ena digi eno te po obaso, augwaligo te we bidi dabe nedalio. Eno naga eno te sęgę sali, tama eno dwai sę genuai yalio. Tialima te we bidi augwali hobedagi yali, augwaligo mena sę ebaso nago augwaliba te dwai dene maniwe? Augwali da, augwali te olo bidibo sipsip dabe naga tiwai dao. God, eno Genuai Bidi, nago ena te ena we wai dabe daliba te dene mao, tama nago naga we bidi dabe augwali te dwai gasigo dolomainu sula tagaligio,” wali. 
Tialima te Genuai Bidigo enselgo te po Gatba walama, te Devitba wagi pomainogo yali, “Nage te bulu duba holao, te Jebus hani Araunago wit sabo pesageba holao, tama tede nago te Genuai Bidigo alta me deli nigao,” wali. 
Tialima Devitgo Genuai Bidigo po wali pali, te Gatgo agabolo wali po gilama, tama aga te nai wit sabo pesageba holalio. 
Te Arauna aga ogwa me si me si dabe dali te nai wit sabo sę iduai. Tama augwa te ensel subo sogo da, te ogwa dabe udulama geme duala sigi palio. 
Tialima Araunago tonobadi te Devit asobo suali. Tama aga peyu, Devit dali deliba gesabi unulama, te aga sągą pageba bogoli sugunanio. Te aga tobolu basi gulama, te Devitba genuai nogi manio. 
Tama Devitgo Araunabolo te tiwai po wali, “Te nago megi te nai wit sabo sę ebo pesage enabolo mao. Tama eno nageba te tǫ abelabo mone usugo dolo tama abelaibao. Eno te Genuai Bidigo alta te pesagede nigilama, tama te we bidi dabe augwaliba te pedalubo genuai gasi, te silimainu yaibao,” wali. 
Tialima Araunago Devitba te tiwai po wali, “King, tagalao, eno te tǫ nago abelibo eno hagela homu ebao. Nago olo sao,” wali. “Tama nago te ofa yabo gasa nai dabe dali me sao. Eno te bulmakau dabe nageba mobao, te nago isiba tigidali ulama ofa yabo nai da. Te eno nagebolo te wit yabe dabe sela sąyabo ni pedai dabe dali te wit ge meba me mawaibao, te nago wit ulubo ofa emainu yaibao. King o, te tigidali nai eno nageba olo mobao,” wali. 
Tialima king Devitgo Araunabolo e tiwai po wali, “Eno nago nai dabe te olo mu selama te Genuai Bidiba me magobeo. Eno ena digi sę dene elama pedalisąwai nai me delide te ofa ebo sę tiwai egobeo. Menio. Eno te nai dabe nagede abelibaso usu da, te aga mone dologo tama abelaibao,” wali. 
Tialima Devitgo Araunabolo te 7 kilogram gol mawai, te tǫ abelama mawai dao. 
Tama Devitgo te pesagede Genuai Bidigo alta me deli nigalio, tama agai te isiba tigidali ulama dabo ofa dabe ebadi, te God dali deli haliga pedalubo ofa me yalio. Tama Devitgo Genuai Bidiba gedu haluasa po obaso, tama Genuai Bidigo agai gedu haluasa po odama, tama te dagaludu isi tagala palama, tama te altade munaluali ofa yali nai dabe isigo dela silalio. 
Tama Genuai Bidigo po obaso, te ensel bidigo te bainat hwą te aga munaluali pesageba ma muai dao. 
Devit te Araunago tǫde bidu, tama agai gedu haluasa po te Genuai Bidigo odobo subo tiwai yali. Tama tibaso, Devit agai te bulude te Genuai Bidiba te ofa dabe ebo kolesaga gagalali. 
Te sogo, te Genuai Bidigo sel ugwa be me te agaba ofa ebo alta dabe, te lotu wabo pesage mu te Gibeon taunde elaluali. Polobadu Mosesgo te sel ugwa be sę yani te Israel dabe augwali te tǫ wa pai bulude bidali sogo te tobage be sę yai dao. 
Tialima te sogo Devit te taun Gibeonba pelama, te Genuai Bidigo homu konemainu yabo usu meni yai, magi baso meni, aga te Genuai Bidigo enselgo bainat hwą tolalubo sulama wi yai dao. 
