﻿Tuni Bidi Dabego Po Elalubo Buku Deli.
22.
Tama tialima Devit te Araunago tǫde bididu agai te tama po wali, “Dago te Genuai Bidi Godigo be ede sę yaibao. Tama te ofa yabo alta dabe, te me ede elalueibao, tama te Israel dabe eba aselama, te ofa dabe yagasomainao,” wali. 
Te Israel hani isąwai hani bidi dabe meba te Israel dabe dali bidali, tama king Devitgo augwali sisinagasomainu i olama, te agai sę augwaliba mawai. Agai meba dąį ilama, te masigi togobo sę emainu yali, tama agai augwaliba te po weyu, “Te masigi dabe bugagia togolama dodolao,” wali, “te Godigo be sę yabo nai dao,” wali. 
Tama Devitgo te nil dabe nigabo ain umabo hauwa sisinani, tama te be sunumi dabe dąų walabo ain delage dabe me nigabo ain sisinani. Tama me, agai te bras hauwa mu sisinani, te bidigo aga sęgę dabe dagalabo usu meni yai dao. 
Tama me, te taun Tair me Saidon bulu bidi dabego te wiegi yai ni bǫ hauwa mu te Devitba sesalio, tama te bidigo nedabo usu meni yai dao. 
Te Devit isisąbadi, agai te Genuai Bidigo be sę yabo nai hauwa sisinanio. Agai te tiwai po wali, “Eno ogwa, Solomon, aga te gesi ogwa bidi mu elalubaso, tama agai te be sę ebo kolesaga kuna konesąwai elalubao. Tiali goli eno homugo Solomongo te Genuai Bidigo be wiegi yai sawi yai mu sę emaina homu elama, tama te tigidali bulu tǫ kantri we bidi augwaligo sulama, te wiegi yai pemene genuai mu eyu, te Genuai Bidiba genuai nogi mawaibao. Tama tiyu, ena digi eno Solomongo te be sę yabo nai doado bage sisinaibao,” wali. 
Devit aga ogwa Solomonbolo agai te po walaiba homu yali, te Solomongo te Godigo be sę emai hagede yali, te Israelgo Genuai Bidi da. Tama tialima Devitgo Solomon asomainogo i olama, 
tama agabolo te tama po walali, “Ogwao, ena digi eno te we bidi augwali te dago Genuai Bidi God pageba aselama, te agaba lotu wabo be me deli sę yabo homu yali. 
Tiali goli Genuai Bidigo po enabolo mayu, te tiwai po wali, ‘Devit, nago eno be sę enamuo, magi baso meni, nago boi hauwa hwįnama, te bidi hauwa ela muai. Eno suali, nago bidi hauwa ela muani, tama tibaso eno homugo nago te be sę me egobeo. Menio. 
Tialima eno te wai ogwa me deli nageba mawaibao, tama aga te king pedalubo sogo, agai te we bidi augwali bugagia tegaluama bidabo sę mawaibao, tama te gasa bulu tǫ kantri dabe augwaligo agaba te boi bidi yabo sę me iligobeo. Eno nagebolo te mabo wai da, agabolo polabo nogi da te nogi Solomon, magi baso meni, te aga king bidibo sogo eno te Israel we bidi augwali homu wiegi yai bugagia nagame elama bidabo sę ilaibao,’ wali. 
‘Te king agai tama naga te we bidi augwali ena pageba aselama lotu wabo be sę yaibao. Aga eno wai bidiyu, te ena agai aya bidaibao. Te eno agai hani bidi dabede naga te Israel king pedalu sę sesemane ilaibao,’ Godigo enabolo te po wai dao,” Devitgo aga ogwa Solomonbolo wali. 
Tama Devitgo po te Solomonba ma weyu te tama wali, “Ogwao, eno homugo te Genuai Bidi nage dali bidu te nage tau sobaso, te Godigo be sę yaibao, dago Genuai Bidi, te tiwai po aga digi wai dao. 
Te eno homugo Genuai Bidigo te wiegi yai homu konebo homu kolesaga nagebolo menama, tama nago te dago Genuai Bidi te Godigo bomai po tigidali wali paibao, te agai nage te Israel king pedalumainu ilibo sogo te tama tiaibao. 
Solomon, te nago bugagia mu tonalubo sę eyu, nago te bomai po tigidali wali pao, te Genuai Bidigo da Israel dabebolo maiabo po Mosesba wali, te bomai po tigidali nago wali pobaso da, teda nago ebo sę tigidali te wiegi yai naga pedelaibao. Nage bomonama dolalu, te nage wi me elamuo. Te nage magi nai me delide kila sigio,” wali. 
“Ena te sę dene mu elama, te tama nai sisinani, te 3,500 ton golgo sęgę, me te 35,000 ton silva, te tama sęgę elalubo nai sisinani, te Genuai Bidigo be sę yabo nai da. Tama eno te ain me bras hauwa umabo sisinani, te nai dabego sęgę te bidi dabego te skel ebaso usu egobeo. Tama me, eno te ni dabe me masigi dabe sisinani, tiali goli te nago umabo mu ma sao.” Devitgo te po Solomon dali wai dao. 
“Nago sę yabo bidi hauwa elalubao. Te masigi togobo bidi dabe, me te masigigo be sę ebo koneai bidi dabe elalubao. Te be sę ebo kamda dabe me elalu, te tobage nai dabe te gol me silva me bras me ain, 
te tama nai dabego haniani nai nigibo koneai bidi hauwa elalubao. Nago sę hodolao, tama te Genuai Bidi nage dali bidaibao,” Devitgo te po wali. 
Tama nosali, Devitgo te Israelde polalubo bidi tigidaliba po walama, te Solomon tau sao walio. 
Tama agai te tiwai po augwaliba wali, “God, dago Genuai Bidi, te dage dali bidibao. Agai eno te e tǫde polobadu bidali we bidi hani dabe augwali aiyaba elalumainu ilama, tama megi da augwali te aga me dage dologode bidibao. Te tama tiali kolesagade agai te wiegi yai bodolu si dageba menama, te dage bugagia tegaluama bidu, te boi bidi augwaligo dageba munu ma boi hwįbe dao. 
Tama tialima, megi da, dagego homu deli naga elalu, tama dagego bomo mu elama, te dago Genuai Bidi Godigo homu wali pao. Tialima megi da, dagego te Genuai Bidi Godigo be sę ebo gagalao. Tama nosali dagego te Genuai Bidigo Dąų Wali Bomai Po Munalubo Halobage me te dis plet agai nai dabe selama, tama te beba muagameo, te be da te we bidi augwali te Genuai Bidi pageba aselama lotu wagasabo be dao,” Devitgo te po wai. 
