﻿Tuni Bidi Dabego Po Elalubo Buku Deli.
26.
Te Livai bidi mebago Genuai Bidigo tempel be tonaluali. Augwali nogi e tiwai elalubao. Meselemia, te Korego ogwa, te Asap hani sibidu asali, te Kora hani dao. 
Meselemiago ogwa dabe nogi e tiwai elalubao. Gomunai ogwa te Sekaraia, te tomo ogwa Jediael, te sela ogwa Sebadaia, te ene nanobo ogwa Jatniel dao. 
Te a naga wali ogwa Elam, te kibisa nogo badu deli wali ogwa te Jehohanan da, te nogo me badu si wagi soali ogwa te Elioenai dao. 
Godigo te wiegi yai sę Obetidomba ebaso, te agai ogwa hauwa elaluali. Augwali nogi e tama da. Gomunai ogwa Semaia, te tomo ogwa Jehosabat, te sela wali ogwa Joa, te ene nanobo wali ogwa Sakar, te a naga wali ogwa Netanel, te nogo kibisa wali ogwa Amiel, te nogo me badu si wali ogwa Isakar, te nogo me badu sela wali ogwa te Peuletai dao. 
Semaia, te Obetidomgo gomunai ogwago, te ogwa meba elaluali. Augwali te wiegi yai bidi dabe, tibaso augwali te augwa hani dabede te tobolu bidi pedelama bidali. 
Augwali nogi da e tama elalubao, Otni, me Refael, me Obet, me Elsabat, me Elihu, me Semakia da. Elihu me Semakia augwali sigo te haniani sę ebo kolesaga mu konea pai bidi si dao. 
Te Obetidomgo hani sibide te 62 bidi tigidali te tonalubo bidi bidali, tama tigidaligo augwa ebo sę mu koneai dao. 
Te Meselemiago deli hani dabede te bidi nogo si olama a naga me badu sela bidi, augwaligo te augwa yali sę page bugagia koneai dao. 
Hosa te Merarigo hani sibidu koliama asalio. Te Hosago ogwa dabego nogi e tama tiwai elalubao. Simri te polalubo bidi bidai, 
tama tomo ogwa Hilkia, te sela wali ogwa Tebalia, te ene nanobo ogwa wali Sekaraia da. Simri te Hosago gomunai ogwa wali te meni, tiali goli aga ayago aga te polalubo bidi nigilali. Te Hosago deli hani sibide te 13 bidi te Godigo tempel be tonalubo bidi bidai dao. 
Te tigidali tobolu bidi augwa te moni tempel be sunumi tonalubo bidi dabe te augwa hani dabe daligo, te Genuai Bidigo bede yabo sę elaluai, te meba Livai dabego ebo sę tiwai yalio. 
Te hani sibi tigidaligo te satu gagali elama te Genuai Bidigo tempel bede mena sunumi te augwaligo tonalumainu ola mabowe naga ola momainu yali. Te augwali hauwa hani dabe ma dwasianu hani dabe yaibaso me te tagalao, te augwa tigidali sę ebaso usu dao. 
Augwa te satu gagali elama, dego mu te giliga asobo badu sunumi tonaluabo te bidi hani ola momainu yali, tama satugo te Meselemia dąį ilai. Tama nosali augwa te satu gagali ma elama, te Sekaraiago te mena badu sunumi tonalugowe te ola momainu yali, tama satugo te not badu sunumi dąį ilali. Sekaraia te Meselemiago ogwa da, tama aga te wiegi yai homu kolesaga ola mabo bidi dao. 
Tialima nosali satugo te Obetidom dąį ilama, te saut badu sunumi tonalumainu yali, satugo te agai ogwa dabe dąį ilama, te nai dabe doado bage muabo be habu tonaluao walio. 
Tama satugo Supim me Hosa dąį ilama, te giliga dega sabo badu tonalumainogo yali, tama te sunumi nogi augwaligo Saleket te me tonaluao wali. Te sunumi Saleket te ugwaba holobo pabo tų pąde elaluali. Augwaligo te hani deli deligo te sę tonaluabo sogo dąį ilali, tama augwali te sunumi tonalubo sę me hasegelu me hani hasegelu iduai dao. 
Tigidali side te sia ge asobo badu te sunumi tonalubo Livai te 6 bidigo te badu tonaluali, te me si me sigo te not badu sunumi tonaluai, te me si me sigo te saut badu sunumi tonaluali. Te me si me sigo te doado bage mubo madi tonaluai, me si te gasa habu badu tonalu, me si te me be habu badu tonalu yai dao. 
Te 6 bidigo te be tonaluali te sia ge dega sabo badu tonaluai. Te bidi si te be sunumi tonalu, te bidi me si me sigo te pabo tų sunumi badu tonalu yalio. 
Tigidali te tonaluali bidi te Korago hanidu me Merarigo hanidu asai dao. Augwaligo augwali tama dodolama, augwa sęba muani. 
Te Ahiya, te Livai hani dabede te bidi me deli da, agai te Genuai Bidigo bede munalubo mone mubo be tonalubo tobolu bidi da, tama agai te wiegi yai nai dabe te elalubo be habu te bidi dabego Genuai Bidigo nai da olama dąį ilali nai te tonalubo bidi dabe tobolu bidi dao. 
Bidi me deli te Ladan hani sibide te Gerson hani bidi, te Jehiel dao. 
Tama te Jehielgo ogwa dabe nogi e tiwai elalubao, Setam dali aga ama Joel da. Augwaligo te Genuai Bidigo mone mubo be tonalubo sę elaluai dao. 
Tama te Amram hani dabe, me Ishar hani, me Hebron, me Usiel, te hani dabe augwa yabo sę elaluai. 
Sebuel te Amram hani da, aga te Genuai Bidigo monego be tonalubo polalubo ofisa bidi bidali. Te Gersomgo ogwa dabe hani bidi me deli da, te Mosesgo ogwa dao. 
Sebuelgo ama deli bidali, aga nogi da Selomit. Selomit aga te Eliesergo hanigo ogwa, te Gersomgo ogwa. Elieser aga te Rehabiago aya, te Rehabia Jesaiago aya, tama Jesaia te Joramgo aya, te Joram da Sikrigo aya, tama Sikri te Selomitgo aya dao. 
Selomit aga deli hani bage dali te wiegi wiegi yai nai dabe te bidi dabego Godiba dąį ilama te Genuai Bidigo beba muani nai dabe tonaluali. Te wiegi yai nai dabe da, te king Devit me augwa tobolu bidi dabe me te deli hani sibi te ami ofisa dabe, augwali tigidaligo te wiegi yai nai dabe te Godiba dąį ilai dao. 
Te augwaligo boi bidi dabe aiyaba elaluali sogo, augwaligo te boi bidi dabego wiegi yai nai hauwa salio. Tama nosali augwaligo te nai meba te Godigo nai da olama sa munama, tama te Genuai Bidigo beba sela asalio. Nosali me sogo augwaligo te moni tempel bede ma geselebo sę elalubaso da, teda teba muani naigo augwaligo te sę ebo abelaibao homu yali. 
Te Genuai Bidigo bede munaluali wiegi yai nai meba dabe, te profet Samuel me king Sol me Apner, te Nergo ogwa, te Joap, te Seruiago ogwa, te tama bidigo Godiba mawai. Te Selomit aga deli hani dabe daligo te nai dabe tigidali tonaluai dao. 
Te Ishar hanigo ogwa dabede, augwaligo te Kenaia dali aga ogwa dabe dali te gavman sę emainu dąį ilali. Augwa te kuskus sę eyu te Israel we bidi dabego po tų odalio. 
Te Hebrongo hani ogwa dabede, augwaligo te Hasabia dali te bidi aga deli hani bidi te 1,700 bidigo te gavman sę emainu dąį ilai. Augwaligo te gavman sę tigidali tonaluali te Israel tǫ kantri pedai te giliga dega sabo badu te wę Jordan pedai badu elaluai. Te bidi hani dabe augwaligo te gavman sę ebo mu koneai, tama te bidi dabego tigidali sę Genuai Bidiba ebo sę tonaluali, te kingo sę me tigidali tonaluai dao. 
Jeria te tobolu bidi augwa hani tigidalide bidali, te Hebrongo wai dabe da. Te kibu be bidi sese si 40 te Devit king bidali sogo, augwaligo te Hebrongo hani tigidali gegebo sę yai. Tama augwaligo te hani bidi hauwa te taun Jaser te Gileat tǫde bidibo sualio. Te Jaser bidi dabe te augwaligo haniani sę ebo mu koneai bidi dabe mu bidalio. 
Tama tialima, king Devitgo te Jeria hani bidi dabe te 2,700 bidi dąį ilama, te giliga asobo badu te wę Jordan pedai badu te bidibo Israel hani dabe tonalumainu yali, te Ruben hanigo tǫ, me Gat hanigo tǫ, me te Manase hani pedai, te hani selago tǫ da. Te 2,700 bidi dabe augwali te wiegi yai bidi tama augwali te augwali deli hanide tobolu bidi bidali. Te augwaligo tigidali sę te bidi dabego Godiba ebo sę tonalu, te kingo sę me tigidali tonaluai dao. 
