﻿Tuni Bidi Dabego Po Elalubo Buku Deli.
29.
Tialima king Devitgo tigidali we bidiba te tiwai po wai, “Godigo eno ogwa Solomon dąį ilali, tiali goli aga gesi ogwa bidi mu elalubaso, te sę yabo kolesaga hauwa kuna konebeo. Te Genuai Bidi Godigo be sę ebo sę, te bidi dabe dago be sę eyu dua ebo tiwai sę gilama me egobeo. Menio, te genuai sę mu dao. 
Tama tialima, eno te gol dabe me silva me bras me ni dabe sisinibo sę bomo yali, te Godigo tempel be sę yabo nai dabe nigibo sę yali. Tama eno te haniani gasa sawi yai masigi dabe hauwa sisinanio. 
Eno te sisinani nai dabe daide ugwadu, eno te ena gol dabe me silva digi mawai. Magi baso meni, eno te ena Godigo tempel bede dwagi yai homu godolo genuai ebaso eno te tama sę yalio. 
Eno te mani wiegi yai gol dabego sęgę da, te 100,000 kilogram igulama, te wiegi yai silvago sęgę da te 240,000 kilogram pedelali. Te Godigo be te daga dabe tomode au ilibo sę yaibao. 
Tama me te kolesaga page koneai bidi dabe augwa te gol me silva te Godigo be sę yabo nai te piksade elalubo sulama, gasa nai dabe nigabo sę yaibao. Megi da, dage dego mu agai nai te Genuai Bidiba ofa mabo tiwai yaibawe?” te po wali. 
Te deli sibi hani bage augwa tobolu bidi dabe dali, te Israel hani dabe augwa tobolu bidi dabego me, te 1,000 ami bidi tonalubo ofisa dabego dali, te 100 bidi tonalubo ofisa bidigo me, te kingo nai dabe doado bage tonalubo bidi dabego badi, augwaligo Devitgo te wali po oda selama da, te augwaligo haliga hogodama, te augwa wiegi yai nai dabe mawai dao. 
Te augwaligo mani nai dabego sęgę te tiwai pedelalio, golgo te sęgę 170,000 kilogram igulali, te silvago sęgę 340,000 kilogram igulali, te brasgo sęgę 620,000 kilogram igulali, tama aingo sęgę da te 340,000 kilogram igulai dao. 
Tama te haniani gasa sawi yai masigi elaluali bidi dabe, augwaligo te Godigo mone mubo be te Godigo be tomoba muanio. Jehiel, te Gerson hani bidi, aga te mone tonalubo bidi bidai dao. 
Te we bidi augwaligo te augwa polalubo tobolu bidi dabego augwa haliga hogodama, te augwa wiegi yai nai mabo sulama, te augwa wiegi yai pemene umabo mu yalio. Tama king Devit me wiegi yai pemene umabo mu yalio. 
Tialima te tigidali we bidigo gedude Devitgo te Genuai Bidigo nogi ugwaba siyu, tama agai gedu haluasa po te tiwai wali, “O Genuai Bidio, nage dago wąį nǫų Jekopgo God da, da naga we bidi dabego te sesemane sogo nago nogi ugwaba sidueibao,” walio. 
“Nago tigidali bomo kolesaga mu elalubao. Nago nogi genuai elalu, te nage ugwadu mu bidibao. Nage mu polalubao. Magi baso meni, tigidali dagalude me tǫde elalubo nai tigidali te nago nigai nai naga elalubao. Tama nage te tigidali naigo tuni bidi king bidibao. 
Nago te wiegi yai nai dabe hauwa dabolo mobao. Te nago naga te tigidali nai tonalubao. Naga digi nage te tigidali bomo me kolesaga page bidi da, tama nago naga te bidi dabe bomo pedalabo sę ilibaso te genuai nogi sabo dao.” 
“Dago God da, megi dago nageba buba hwi obao, te nago genuai nogi ugwaba sobao. 
Ena dali, te eno we bidi hani dabe dali, dago te tiwai po weyu dago nagebolo te mani nai dabego aya mu da dao po obaso usu egobeo. Menio. Da te olo bidi naga tama, te nai me deli te dena nai dabe dolo mu me elalubeo. Te tigidali nai nago nai naga da. Hasia bolo nago dabolo mani, te megi dago nageba ma mobao. 
Te nago gedude da te bulu wau bilibo bidi tiwai ebao. Te dago dena wąį nǫų hani dabego yali sę tiwai gilama yalio. Te dago e tǫde dena bidibo ula dago dąų obaso usu egobeo. Da te plaua dabe pedalubo tiwai elama, te pęwadage sogo bidama, te isibo dao. 
O God, dago Genuai Bidi, dago e sisinani nai tigidali te nago be sę elama, te nago genuai nogi ugwaba pedelabo sę ebao. Tialima te tigidali nai nagedu asali, te nago naga nigai nai dao,” wali. 
“Eno God, nago tigidali bidigo haliga usu sabo da, tama nago te bugai haliga te doloba pai kolesaga ebo bidigo ebo sueibao. Eno te homu kone palama, tama me eno nago genuai nogiba homu kone elama, tama eno haliga hogodalu, eno te nai dabe nagebolo mawai. Te tobage deli kolesagade naga, nago te we bidi dabego te augwa nai dabe manio. Te eno augwaligo tama tebo sę ebo sulama, eno wiegi yai homu pemene umagi mu ebao. 
Nage God, te dago wąį nǫų dabego Genuai Bidi, Abraham, me Aisak, me Jekop, te we bidi augwaligo te tobage wiegi yai homu kolesaga ebo te bomo elama, sesemane sogo elalumainu ilao. Tama me te augwaligo godolo ebo homu te nageba kęą pai sesemane elalubo sę ilao,” po wai dao. 
“Nago Solomonba wiegi yai homu kolesaga hodolao, eno ogwa da, te agai nago bomai po me nago po mobo mabo wali pelama, tama agai nago te wiegi yai be sę emainao, eno te be sę yabo doado bage sisi ilai dao,” Devitgo te gedu haluasa po tama wali. 
Tialima Devitgo te we bidi augwaliba te tiwai po walio, “Godigo nogi ugwaba sao, dago Genuai Bidi dao.” Te we bidi augwaligo odama, te augwa kidu sugunama, te gesabidi tǫba pǫgulali, te genuai nogi Devitba me Godiba mayu tialio, te augwaligo Genuai Bidi me augwa wąį nǫų dabego Genuai Bidi me dao. 
Te nosali side, te we bidi dabe augwaligo te kibu bulmakau bidi sese hauwa mu te 1,000 kibu omai elali, me te kibu sipsip omai 1,000 elali, tama te kibu sipsip waigo te 1,000 sobadi elama, te Genuai Bidiba te isiba tigidali ulubo ofa tiwai elama manio. Tama augwaligo te wain gelebo ofa dabe me yalio. Te tigidali Israel we bidide te gasa ofa dabe me hauwa yalio. 
Tama te side te we bidi dabe augwa te ąį dabe me kibu mi dabe tuali, te gasa ofa yali nai dabe tuyu, tama augwa wiegi yai pemene umabo mu te Genuai Bidiba yai. Tama me te side, te Genuai Bidigo nogide augwaligo wel te Solomon toboluba gealuama, te aga si sogo ma dąį ilama, te aga king pedalumainu ilalio. Tama me augwaligo Sadok te polalubo pris bidimainu dąį ilalio. 
Megi da Solomongo te aga aya king bidali pesage hasegelama, tama te Genuai Bidigo we bidi augwaligo king pedelalio. Agai sę wiegi yai mu pedalubaso, tama Israel we bidi tigidaligo agai po wali pai dao. 
Tama me te gavman ofisa bidi tigidaligo me, te bomai ami dabe dali me, te Devitgo ogwa tigidaligo me te king Solomon dologoba peyu, tede bidai dao. 
Genuai Bidigo Solomon te tigidali Israel gedude polalubo bidi mu pedalubo sę ilalio. Tama me agai Solomon te genuai mu pedalubo sę ilama, te agai sali genuai nogigo te polobadu bidali Israel king tigidali aiyaba elaluali. 
Te Devit, Jesigo ogwa, aga te tigidali Israel tǫ pedai kantri badu king bidai dao. 
Aga te kibu be bidi sese si, 40 yia, king bidalio. Aga hasia bolo te Hebronde king bidali kibu be te 7 yia bidali, te Jerusalemde king bidali kibu be te 33 kibu be bidai dao. 
Aga te we bidi augwaligo gedude genuai nogi elaluai, te agai mone me doado bage hauwa elalualio. Aga bidali sogo pęwadage meni, aga bidada pelama, monu dabe mu elama aga isalio. Nosali aga ogwa Solomongo agai sę yali pesage selama, te king pedelai dao. 
Te king Devitgo yali sę po dabe, te aga king pedelama bidali sogo ela pali sę te isali sogoba usu nugi palio, te sę yali po dabe asęani buku sela nogi augwaligo te tama nogi yali, Te Profet Samuelgo Pusali Po, me Te Profet Natango Pusali Po, me Te Profet Gatgo Pusali Po, te profet bidi selago te Devitgo yali sę po asęani dao. 
Te buku dabede te Devitgo bomai sę yali po asęani elaluali, te aga king bidali sogo te tǫ kantri tonalubo kolesaga yali po asęani buku elaluali. Te agaba gasa sę dabe pedelali po me augwaligo pusali, te Israel we bidi augwaliba me te Israel bagualuali tǫ kantri dabeba me te sę pedelali po elaluai dao. 
