﻿Tuni Bidi Dabego Po Elalubo Buku Si.
2.
Te Solomongo Genuai Bidigo lotu be me deli genuai sęnama tama te we bidi te beba aselama, Genuai Bidiba lotu po wagasiyu yabo be sę yabo homu kone palali. Tama agai aga be sę yabo homu kone me palali. 
Tama tialima agai 80,000 bidi dabe te bulu du dabede masigi du togobo sę emainu sa muani, tama me 70,000 bidi dabe te masigi dabe tolama usa yabo bidi dabe sa muani, tama agai te sę tonaluabo bos bidi dabe te 3,600 bidi dabe sa muani. 
Tama Solomongo te king Hiram te taun Tair bidibolo po ola toliyu, e tiwai po wali, “Polobadu nago eno aya king Devit agai aga be sę emainogo nago agabolo ni bǫ tolai dao. Tama tialima, eno homugo nago te tiwai deli kolesaga naga ena dali me yao. 
Eno megi God eno Genuai Bidigo lotu be me deli sę yainogo ebao. Te be da te God aga be mu elaluaibao, tama ena dali eno we bidi da te lotu be tomoba pelama, tama wiegi yai pauda te wiegi yai denami hano holomainu ulubo pauda uluyu yaibao. Tama tigidali sogo ofa tiwai mabo te bret tigidali sogo dago Godigo gedude muyu yaibao. Tama me dago isigo sese dela silibo ofa me iyu yaibao. Dago te ofa dabe tigidali sogo kigamu dabe iyu, me pio dabe iyu, me tigidali Sabat side iyu, me te gasa genuai sogo me ofa iyu, me gesi polua pedalobo side ofa iyu, me gasa genuai sogo te God dago Genuai Bidiba lotu wabo sogo ofa iyu yaibao. Agai da Israel dabebolo te tama sę tigidali sogo iyu ya po wai dao. 
Tama eno genuai be mu sę yaibao. Magi baso meni. Dago Godigo genuai nogi mu elaluyu, tama me genuai bomo mu elaluyu, tama agai gasa meba god dabe edelama aiyaba elalubao. 
Te mu tama, te bidi mego Godigo be sę yabo usu menio. Dago koneani. Dagalu da te genuai bulu mu dao, tiali goli aga te God bidabo usu genuai menio. Tama dego agai be sę ebo usu me egowe? Tama eno me eno agai be sę ebo usu me egobeo. Tiali goli, eno be te wiegi yai denami hano holobo pauda ulabo be sę yaibao, te God bidiboba wiegi yai denami hano holabo pauda ulubo be sę yainogo.” 
“Eno ena bidi meba te Judade me Jerusalemde bidibao. Te polobadu eno aya Devitgo augwali te Godigo bede sę emainogo sa muai bidi dabe meba bidibao. Augwaligo haniani nai dabe nigibo kolesaga koneai dao. Tama tiali goli, eno homugo nago bidi me deli te wiegi yai kolesaga te tobage sę dabe ebo mu koneai bidi dali me tagala palao, te bage augwali dali sę emainogo. Te bidigo te golgo me silva me bras me aingo wiegi yai nai dabe nigibo, me te mama yai me sisi yai name ugwago wiegi yai au yai nai nigibo koneai bidi mu suao. Tama agai te golgo me masigi dabego piksa nigibo koneai bidi sao. 
Tama eno me koneani, nago sę bidi dabe mebago te Lebanon bulude bulu du dabede ni gelebo kolesaga dabe koneai bidi dabe dao. Tama tialima, eno homugo te bage augwaligo te ni bǫ me pain ni dabe me ni junipa te Lebanonde elalubo ni gelama, ena bidiboba tolomainu yao. Tama eno ena sę bidi dabego nago sę bidi dabe tau somainogo tagala palaibao, 
te ni dabe hauwa mu sisinimainu. Magi baso meni. Eno genuai sawi yai be mu sę yainogo. 
Tama eno nago sę bidi dabe nai dabe meba mawaibao, tama eno augwali te 2,000 ton sęgę yai wit te augwaligo polo agawai yai mayu, me 2,000 ton sęgę yai rais bali mayu, me 400,000 lita wain mayu, me 400,000 lita oliv wel me mayu yaibao,” Solomongo te po olama asęna tolali. 
Te king Hiramgo te Solomongo po polo odali. Tialima agai pas asęnama, Solomongo po wei ponoyu, e tiwai po wali, “Genuai Bidigo aga we bidi godolo mu yali. Tama tiyu, agai nage augwaligo king pedalomainu ilali dao. 
Megi dago God, te Israel dabego Genuai Bidigo, nogi ugwaba sinao. Aga digi dagalu dali tǫ dali si nigai dao. Dago agai nogi ugwaba sinao. Magi baso meni, agai wiegi yai wai ogwa king Devitbolo manio, te aga hasegelama king pedalomainogo. Te Devitgo ogwago wiegi yai hobolu du me kolesaga hauwa elalubao, tama agai Genuai Bidigo be me aga be si sę yaibao. 
Tama tialima eno polalubo sę bidi Huram nage tau somainogo tagala palaibao. Agai te haniani nai dabe nigibo kolesaga elaluyu, me agai wiegi yai homu kolesaga elalubo dao. 
Aga ida te Dan hanigo we me deli dao, tama aga aya te hanu Tair bidi dao. Te Huramgo te golgo, me silva, me bras, me ain, me masigi, me nigo haniani nai dabe nigibo sę koneai dao, tama me te sisi yai name ugwago, me mama yai ugwa, me wiegi yai tedela ugwa dabego wiegi yai au yai nai dabe geselebo koneai bidi dao. Tama agai te wiegi yai piksa te golgo me masigigo nigibo koneai dao, tama agai te haniani piksa bidi dabego agabolo nigao olama hanalubo, te nai dabe agai nigibo dao. Tama nago aga te naga sę bidi dabe dali me naga aya king Devitgo polobadu sę bidi dabe dali sę emainu tagalagameo.” 
“Tialima king Solomon, megi da dago homugo nago te tolaibao wali te wit, me bali, me wain, me oliv wel tolaiba wali, te nai dabe tolao homu ebao, nago te wali gilama. 
Tama eno sę bidi dabe te Lebanonba pelama, tama nago te wei ebo ni dabe tigidali geligi paibao, tama augwaligo nabisba aiyaba selasa paibao. Tama augwaligo te ni dabe tamu węde sisinama, tama dąų olama, genuai ni seseba dabe nigiyu kęnaibao. Tama hanu Jopaba te tamu ąįdu tama selasa paibao. Tialima, nago sę bidi dabego te ni dabe te hanu Jopade selama, Jerusalemba ugwa sela holaibao,” te king Hiramgo Solomonbolo te po wei ponoyu asęna tolali. 
Te king Solomongo pode augwaligo te gasa kantri bidi dabe te Israel bulude bidibo bidi dabe nedali. Te polobadu king Devit te Solomon aga ayago nedali, te hani. Tama megi da, Solomongo me augwali ma nedali. Tama augwaligo namba te 153,000 usu nama elaluali. 
Tama agai te bage augwali te 80,000 bidi dabe augwali te bulu du dabede te masigi dabe togobo sę emainogo sa muani, tama me te 70,000 te masigi tolama usabo sę emainogo sali, tama me te 3,600 te sę tonalubo bos bidi nigilama, te sę tonalumainogo yali, te sę bage tonaluyu sę bugagia tonalumainogo ilali. 
