﻿Tuni Bidi Dabego Po Elalubo Buku Si.
6.
Solomongo te pǫgo te tempel be pągąna sabo sulama, tama agai e tama gedu haluasa po wali, “Genuai Bidi, eno nago be wiegi yai me deli sę yani dao. Tama eno megi koneani, nage te be tomode polo bidibao. Magi baso meni, nago te po wali nage te pǫ mu hulia sai madi bidibo dao po wali. Nage tigidali sogo te bede mu bidagameo,” Solomongo te gedu haluasa po wali. 
King Solomon aga gedu haluasa po ola silama, begelama subadi, tama agai te we bidi dolalubo suali. Tama agai Godibolo augwali dali wiegi yai sę yao po hanalu wali. 
Tialima agai augwalibolo e tama po walali, “Genuai Bidigo nogi ugwaba siąo, te Israel dabe dena God dao. Agai eno aya Devit dali dąų walali po wali palio. Devitgo homugo te Godigo be me deli sęnama, tama te we bidi te beba pąba aselama, tama Genuai Bidi dago Godiba asomainao homu yali, te agaba lotu po weyu yainogo homu yali. Tiali goli Genuai Bidigo Devitbolo e tiwai po walali, ‘Te ena we bidi Isip bulude odasa asalidu gagalasa aselama, megiba usu nagasali side, eno te Israel dabego eno nogi elalubo tempel be me sę emainogo te hanu me sa muai menio. Tama me ma, eno te bidi mego eno we bidi tonalumainogo sa me muai menio. Menio. Tiali goli megi da, eno hanu Jerusalem eno te we bidi augwali aselama, enaba lotu wagasiyu yabo pesage te sa mubao. Tama Devit nage eno we bidi tonalumainu sa mubao. Tama eno koneani, nago eno genuai tempel be me deli sę yabo homu ebo suali, tama nago te homu yali te wiegi yai dao. 
Tiali goli, naga digi eno be sę enamo dao. Menio. Te naga ogwa mu mego eno te be sę yaibao, te we bidi ena pąba sisinagasabo madi,’ Genuai Bidigo te eno aya Devitbolo te po wali,” Solomongo te po wai. 
Solomongo po me weyu, te po wali, “Genuai Bidigo te po dąų walai dao, tama megi da, te poba usu nagasali dao. Eno ena ayago pesage polo hasegelama sai dao, te ena aya Devitgo pesage sali, tama ena Israel dabego king bidibao, te Genuai Bidigo te po dąų walali gilama. Tama eno Genuai Bidi dago Godigo tempel be sę yani dao, te da Genuai Bidi aga pageba pelama lotu po weyu yabo gilama. 
Tama eno te Dąų Wali Bomai Po Munalubo Halobage te be tomoba muai dao. Te halobage tomode te bomai po te we bidi dabe dali dąų walama asęani te masigi si te halobage tomode munaluali, te Israel we bidi dabe dali dąų walali po asęani masigi sawale si,” Solomongo te po wali. 
Te Israel we bidi gesabidide Solomon aga te Genuai Bidigo alta pąba pali. Tama aga te augwaligo brasgo nigai saiba ugwaba doligi pali. Te sai te bidi sisinagasobo pesagede elaluali te alta sai pąde. Te sai genuai usu da te 2 mita me 20 sentimita usu nama tama dao, tama te sai aga ugwaba bobobage da, te 1 mita me 30 sentimita usu nama dao. Tama tialima, te Israel we bidi tigidali gedude agai bogoli si sugunama, tama aga nogo ugwaba dodolama, 
tama gedu haluasa po weyu e tiwai po wali. “Genuai Bidi, Israel dabego God, te dagalude me tǫde god nage tiwai me menio. Te dago deli homu kolesaga naga elama, nago gedude bugagia bilibaso da, teda nago naga dąų walali po bugagia wali pelama, tama tigidali sogo nago da naga we bidi dali dąų wali po wali peyu, tama tigidali sogo nago da godolo mu ebo dao. 
Nago eno aya Devit dali polobadu dąų wali po bugagia wali pai dao, te naga sę bidi dali, tama megi da nago te dąų wali po usu nagasali dao. 
Tama megi da, Genuai Bidi, da Israel dabego God, eno nago eno aya Devit dali po me dąų wali te po me kone palao homu ebao. Nago agabolo e tama po walai dao, ‘Devit, te nago wai pulubago ena wali tigidali sogo peyu elama, tama eno gedude bugagia dolasa biliyu ebaso da, te nago ebo tiwai ebaso da, teda eno tigidali sogo nago hani bidide te Israel dabego king bidi pedalomainogo iyu yaibao,’ wali. 
Tama tialima Genuai Bidi, Israel dabego God, eno homugo nago naga sę bidi Devit dali wali te po usuna homu ebao.” 
“Tiali goli God, nage te da tǫde we bidi dali bidagasainu ebo te mu da, agawe? Dagalu te genuai bulu mu dao. Tiali goli nage tede bidabo usu meni yali bogo. Tama tialima, eno te sę yani bego nage mena tama tilama usu egowe? 
Tiali goli, Genuai Bidi, eno God, eno homugo nago eno hanalubo po me eno gedu haluasa po wabo odao homu ebao, ena naga sę bidi, nago eno nagebolo hanalubo tiwai yao. 
Magi baso meni. Nago e be te naga be tiwai pedalomainu po dąų walai dao, tama te we bidi augwali teba sisinagasiyu emainao. Tama eno homugo nago tigidali sogo te beba tonalumai ebao, te hulide me ulade me. Tama tialima, eno me eno te beba tonaluyu gedu haluasa po wabo si da, teda nago eno gedu haluasa po wabo odaibao. 
Nage Genuai Bidi, nage naga bulu dagalude bidibao. Tiali goli eno homugo te ena me te Israel dabe te naga we bidi, dago nago te beba tonaluyu, gedu haluasa po wabo si da, teda nago dago gedu haluasa po wabo odama, tama nago dago sęgę sela sąyao.” 
“Tialima bidi me deligo gasa bidi dali dwai sę yaibaso, tama augwali nago te beba te alta pąba pelama, tama nagebolo ‘Te eno dwai sę eyu da, teda nago ena dolao,’ po hanalubaso da, 
teda Genuai Bidi nage ugwa dagalude bidiyu, tama nago augwaligo gedu haluasa po wabo odama tama augwaligo po tų ebo odao. Tama nago te dwai sę yali bidi dene mao. Tama nago te dwai sę isąwai bidi nago aga wiegi yai sę ilao. Teda te bidi dabebolo agai dwai sę ebeo olama ola mayu tama tiao.” 
“Tama tialima, da Israel dabe naga we bidi dabe dago te boi bidi dabe dali hwįgi pabode augwaligo da aiyaba elalumainu ebo da, te magi baso meni, dago nageba dago sęgę sabo sę yalio, tiali goli da nosali homu begelama, tama nage dologoba bidagaselama, tama nago te beba bidagaselama gedu haluasa po weyu nageba hanaluyu, dago sęgę sela sąyao po obaso da, 
teda Genuai Bidi, eno homugo nage dagalude bidiyu, tama nago da nago we bidigo gedu haluasa po wabo odama, dago sęgę sela sąyao. Tama me ma, te boi bidi dabego da gasa kantriba odasa paibaso da, teda nago da te e tǫba ma odasa asao, te nago polobadu dago wąį dabebolo mani tǫba.” 
“Tama tialima, da naga we bidi dabe dago nageba sęgę saibaso da, tama nago te sęgę wei ponoyu tulubage paliai baso, tama nosali dago homu begelama, tama nage dologode bidiyu, tama dago te beba tonaluyu, gedu haluasa po obaso da, 
teda, Genuai Bidi, nage dagalude bidiyu tama nago da Israel dabe naga we bidigo sęgę sela sąyao. Tama nago da te wiegi yai kolesaga wali pomainu ola mao. Tama nago tulubage te da naga we bidi dena tǫ tiwai dabolo mani tǫba tulubage ma mao.” 
“Tialima genuai nasi dago kantride pedalobaso, o genuai gasi me deli pedalobaso, o te genuai bomai wali me pedalama, tama gide nai dabe gasi selama dolobaso, o te kuli mano dabe hauwa mu elama tama te nai dabe dolobaso, ma te boi bidi dabe aselama, tama da dena taun dabe tomoba bagua sagasobaso, o te haniani gasi dabego da dolagasobaso, 
tama tialima te sogo da Israel dabe naga we bidi dabego te sęgę agade pedelali dao homu elama, tama agai nago te beba gedu tonama, tama agai nogo ugwaba selama, tama nageba gedu haluasa po obaso da, 
teda, Genuai Bidi, nage nago bulu dagalude bidiyu, tama nago agai gedu haluasa po wabo odama, tama nago aga tau sao. Nago deligo naga bidigo ebo homu kolesaga konebo dao, tama tiyu nago tigidali deli deli bidigo ebo kolesaga dagalama, tama nago augwaligo yali kolesagaba usu nama pe wei mawaibao. 
Tialima nago tama tiyu da, teda da nago we bidi nage dologode bidama, tama nago godolo ebo kolesaga wali paibao, te tigidali sogo da nago te dago wąį dabebolo mani te tǫde bidiyu tama tiaibao.” 
“Tialima, te gasa kantri bidi dabego nago genuai nogi koneama, tama me genuai sę dabe nago naga we bidi da tau siyu yali sę koneyu elama, tama augwali me deligo nageba lotu po wainogo aga bulu tagalama, te be pąba aselama, nageba gedu haluasa po wainu ebaso da, 
teda, Genuai Bidi, nage naga bulu dagalude bidiyu, tama agai gedu haluasa po wabo odama, tama nago agai nagebolo mena nai me hanalu obaso tau sao. Tama tiyu da, te tigidali gasa kantri we bidi nage koneama, tama nage dologode naga bidimainao, te da Israel dabe naga we bidi dago ebo tiwai emainao. Tama augwaligo koneaibao, eno te sę yani be te naga be mu dao homu yaibao. Tama te pesagede te we bidi augwali teba pąba aselama, tama nageba lotu po wagasiyu emainao.” 
“Tama tialima, nago naga we bidi da gasa bulu meba hwįgi pomainu tagala palobode, tama dago te sa muani te hanuba tonama, eno nago te be sę yani teba tonaluyu, dago gedu haluasa po obaso da, 
teda, Genuai Bidi, nage dagalude bidiyu, tama dago gedu haluasa po wabo odama, tama nago da hobede elama, tama nago da tau sao.” 
“Te tigidali we bidigo sęgę sabo sę ebo dao. Tama tialima, dago nage dali sęgę sabo sę eyu da, tama nago da dali wado elama, tama nago boi bidi dabego da dali hwįagaselama da aiyaba elaluama, tama da kalabus elama, da digibulu o pąde elalubo kantri dabeba pomainu sula tagaliyu, 
tama da te kantri dabede kalabuside bidiyu, dago dena yali dwai sę dabede homu sęgę hauwa kua pelama, tama dago homu begelebaso da, teda, Genuai Bidi, nago dago gedu haluasa po wabo odao. Mu tama, te da te boi bidi dabego kantride bidiyu, tama dago nageba homu bomo elama dąų olama tama nage deliba naga homu kone elama tama homu mu begelama, tama dago nago dago wąį nǫų dabebolo mani te tǫba tonama, me nago sa muani te hanude te nago sa muani madi te sę yani nago te beba, te we bidi nage pageba pąba asomainu yali teba tonama, tama tialima dago gedu haluasa po weyu te e tiwai po obaso da, ‘Hobede mu dao, da dwai sę eyu bilai dao, tama dago haniani dwai kolesaga hauwa mu yalio,’ obaso da, teda nage naga bulu dagalude bidiyu, tama dago gedu haluasa po wabo odama, tama nago da hobede elama tama nago da tau sao. Tama nago da naga we bidigo sęgę sela sąyao.” 
“O eno God, eno homugo tigidali sogo nage pąde tede bidiyu, tama nago dago gedu haluasa po wabo wei ponainogo nage pąde bididuao, te nago be elalubo madi. 
God, Genuai Bidi, nage naga Dąų Wali Bomai Po Munalubo Halobage dali aselama, tama naga toma tubo digi duyagasao. Te halobage te genuai bomai nago dąį me deli dao. God, Genuai Bidi, nago naga pris bidi dabe hobede elama, tigidali sogo nago augwali ma oda sao. Tama nago te kolesaga augwaligo au dodobage tiwai elalumainao. Tama naga we bidigo nago wiegi yai kolesagade wiegi yai homu pemene emainao. 
Genuai Bidi, nago naga sę bidi Devit kone palao. Tigidali sogo nago aga godolo mu yai dao. Tama tialima, nago naga digi sa muani te king tudiba togolama tagalamo dao,” Solomongo te tiwai gedu haluasa po wali. 
