﻿Tuni Bidi Dabego Po Elalubo Buku Si.
13.
Te Jeroboam aga te Israel dabego king bidali kibu be 18 wabode, Abiya te Juda dabego king bidi pedelali. 
Tama Abiya aga Jeruselemde kibu be sela king bidali. Aga ida te Mikaia, te bidi Uriel te hanu Gibea bidigo wegi dao. Tama boi genuai mu te king Abiya me king Jeroboam si tomode yali. 
Abiyago 400,000 bomai ami bidi selama, tama augwali Israel dabe dali hwįgi pali. Tama Jeroboamgo 800,000 bomai ami bidi sali, te augwali boi hwįbo mu konea pai bidi dabe mu, tama augwali Juda dabe dali hwįainogo asali. 
Te king si augwa ami bidi dabe dali augwali te Efraim hanigo bulu duba sisinani, te boi hwįabo kegaluyu. Tama Abiya aga te bulu du te Semaraim bageba doligi pelama, hai olama, e tama po wali. “Jeroboam, nage dali dage Israel dabe, dagego eno po waboba olo bugagia munama odao. 
Genuai Bidi, da genuai hani Israel dabego God, agai bomai kontrak mu te Devit dali me aga hani dali yai dao. Te kontrakde e tama po elalubao, ‘Tigidali sogo Israel dabego king te Devitgo hanide naga pedaliyu emainao,’ po wai dao. Dagego te po konebe, agawe?” 
“Polobadu Jeroboam te Nebatgo ogwa aga king Solomongo sę bidi bidai. Tiali goli aga hagoma elama, tama aga dali boi bidi nigali, te aga king bidi dali. 
Tama haniani dwai dwai kolesaga ebo bidi dabego Jeroboam dali age nama kisa selama bilali. Tama augwaligo Solomongo ogwa Rehoboamgo augwaligo homu kolesaga wali pomainogo bomo yali. Te sogo te Rehoboam aga gesi bidi mu, tama agai te kantri tonalubo kolesaga bugagia konesiąma ebadi. Tama tialima, agai augwaligo po sela sąyabo usu isąwai. 
Tama megi dage ami bidi dabe hauwa dali asiyu, me dagego te Jeroboamgo nigali te kau kibu noma te golgo nigali te duga god dabe tiwai nigali, te piksa dali asiyu ebao. Tama dagego hwįnama, Genuai Bidigo kantri aiyaba elaluainu ebao. Genuai Bidi aga digi Devitgo hani sa munama king pedalomainu elama, e kantri tonalumainu yai dao. 
Tama me dagego Genuai Bidigo pris bidi dabe sela sąwai dao. Augwali te Arongo hani dao, tama me dagego Livaigo hani sela sąwai dao. Tama dagego duga haniani pris bidi duga digi sa muai dao, te gasa kantri we bidi dabego ebo kolesaga tiwai yali. Te bidi me deligo te kau kibu deli me sipsip kibu nogo a naga olama si sesebaso me tagalao, dagego aga dagego te tibo god dabego pris bidi bidimainu sa mubo dao.” 
“Tiali goli dago da, dena Genuai Bidi dena God wali pobao, tama dago agaba tudi me ola mabeo. Tama Arongo hani pris bidigo Genuai Bidigo sę ebo dao, tama Livai dabego augwali tau sabo dao. 
Te tigidali sogo kigamu me pio augwaligo isigo dela silibo ofa eyu, me augwaligo wiegi yai denami ebo pauda dabe ulama, Genuai Bidiba denami holiyu ebo dao. Tama augwaligo Godibolo te ofa tiwai mani te bret siyu ebo dao, tama augwaligo te bret te Godigo gedude doloba pai elalubo tebolba mugi peyu ebo dao. Tama tigidali sogo pio augwaligo lam sole udalobo dao, augwaligo te golgo nigali te lam ni dagede udaliyu ebo dao. Dago Genuai Bidi dena Godigo po wali pabo dao, tama te sę dabe tama ebo dao. Tiali goli dage da, menio, dagego aga tudiba mu ola manio. 
Tama megi da, dagego bugagia odao. God aga da te dago polalubo bidi dao. Tama agai pris bidi dabe da dali megi ede bidiyu, dage dali hwįainu biugel bu wabo e kegalubao. Dage Israel dabe, dago Genuai Bidi dago wąį dabego God dali hwįbo tagalao. Dagego munu me ugwa ela hologobeo. Mu menio,” te Juda dabego king Abiyago tama po wali. 
Te Abiyago po odubadi, Jeroboamgo aga ami bidi dabe me badu Abiyago ami dabe tudi badu geme no pomainu tagala palali, te augwali no bagua somainu. 
Tiali goli Abiyago ami bidi dabe begelama suali, te Israel dabe ami bidi, tama augwaligo koneani, te Israel dabego augwali bagua selama te boi gagalainu ebao homu yali. Tama tibaso, polo tama augwaligo Genuai Bidi augwa God i wali te augwali tau somainogo, tama te pris dabego biugel bu wali. 
Tama te Juda dabego i hai bomo elama geninama mu wali. Tama augwaligo te hai wabo si, Godigo Jeroboam aga hani dali wi ilama, augwa wi pomainu ilali. 
Te Juda dabego Israel dabe pobeasa pelama, tama Godigo Israel dabe Juda dabego dolomainu sula tagalali. 
Tama Abiya aga hani ami bidi dabe augwaligo Israel dabe dolama mu elama isilali, tama augwaligo te 500,000 Israel dabego wiegi yai hani ami bidi dabe elama isilali. 
Te Juda dabe augwaligo koneani, te Genuai Bidi augwa wąį dabego God agai augwali hwįbode tau saibao homugo koneani. Tama tibaso augwaligo homu dąų mu olama, bomo elama, augwaligo Israel dabe aiyaba elaluama, tama augwali mu dolali. 
Tama tialima, Abiya aga hani ami bidi dabe dali augwaligo te Jeroboam aga ami bidi dabe dali pobeasa pali, tama augwaligo Israel dabego hanu sela sali. Augwaligo nogi te e dao, te hanu Betel, me Jesana, me Efron dao. Tama me augwaligo te hanu sela pąde elaluali dwasianu bulu dabe me sese tama sali. 
Tama Abiya aga bomai king mu pedelali. Agai we 14 selama, tama augwaligo 22 ogwa ame nani, tama augwali wegi 16 ame nani. Tiali goli Jeroboam aga bomai king ma pedalobeo, te king Abiya isiboba usu nagasali. Tama nosali Genuai Bidigo Jeroboam dolama, tama aga isali. 
King Abiyago meba sę yali po te gasa buku me augwaligo te profet Idogo po buku wabo, te bukude elalubao. Te bukugo te Abiyago yali sę po dabe me agai tigidali kolesaga po me pusai te elalubao. 
