﻿Tuni Bidi Dabego Po Elalubo Buku Si.
15.
Te sogo Godigo Spirit Mobo Bidi te Odetgo ogwa Asaria tigide bomo elama mu pedelali. 
Tama king Asa te Jerusalemba ma asobadi, te Asaria aga tiąba pelama, tama agabolo e tama po wali, “King Asa, me tigidali Juda dabe, me tigidali Benjamin hani, dagego odiąo. Tialima dage Genuai Bidi dali pąde mu bidiyu da, teda aga dage dali pąde mu bidaibao. Ma, dagego aga gegebo sę iyu da, teda dage aga pąba mu asobo usu yaibao. Tiali goli, dagego aga tudi ola mayu da, teda agai dage tudi ola mawaibao. 
Bobobage sogo mu te God Mu Israel dabe dali munu me bidai menio. Magi baso meni, augwaligo agaba tudi ola mobaso. Tama augwaligo Godigo po augwaliba ola maiabo pris bidi meni yai dao. Tama me augwaligo agai bomai po dabe wali me pai menio. 
Tiali goli te genuai po sęgę dali me sęgę augwaliba pedalobo si, te Israel dabe augwali Genuai Bidi dago Godiba ma asai dao. Augwaligo aga gegebo sę ebaso, agai augwali aga pąba mu asomainu sula tagalai dao. 
Te polobadu Israel dabe augwali God dali digibulu mu bidali sogo da, teda haniani dwai dwai kolesaga dabe pedelama, tama te tigidali kantride we bidi dabe bidibo page dolai dao. Tialima te bidi dabe augwali augwa bulu tagalama, tama augwali gasa buluba me painu ebadi, te dwai bidi dabego augwali elama, augwali doliyu yai dao. 
Tama me te meba kantri dabego meba kantri aiyaba elaluainu boi hwįyu, me te meba taun dabego meba gasa taun dali boi hwįnama tama gasa taun dabe sainogo iyu yai dao. Te tama kolesaga dabe pedelai dao, magi baso meni, Godigo te tobage trabel te bulude pedelama tama augwalibolo sęgę momainu yai dao. 
Tiali goli dagego wiegi yai sę dabe ebo bomo elama iyąo. Dage dili elama dolaluiąo, tama Genuai Bidigo dagego sę sulama, tama dage dali wiegi yai sę yaibao,” Asariago te po wali. 
Te Asago te Odetgo ogwa Asariago te po wabo odali, tama te pogo agai homu kolesaga dąų walali. Tama tialima agai te Juda hanigo tǫde me Benjamin hanigo tǫde agai te tibo god dabego piksa dabe sese sela sąyani. Tama me aga te Efraim hanigo tǫde bulu du dabeba me agai te boide sali, te taun dabeba pelama, tama agai te tibo god dabego piksa sela sągi pali. Te god dabe te Genuai Bidigo gedude te dwai nai mu dao. Tama Asa agai te sę bidi dabebolo olama, tama te Genuai Bidigo tempel bede elalubo alta bugagia dodolao po walali, te Genuai Bidigo tempel be gesabidi badu elalubo pesagede. 
Te Efraim we bidi hauwa, me Manase we bidi hanigo, me Simeon hani dabe, augwali hauwago God Genuai Bidi Asa dali bidibo suali. Tama tibaso, te we bidi augwali kantri Israel tagalama, augwa Asa dali te kantri Judade saut badu bidagasali. Tama tialima, Asago te we bidi dabe ebadi te Juda we bidi me Benjamin we bidi augwali deliba sisinagasao po walali. 
Tama namba 3 poluade, te Asa aga 15 kibu be wabode aga king bidi bidibadi, te we bidi augwali te Jerusalemba sisinagasali. 
Tama augwali te sisinagasali sogo augwaligo te boi hwįbode sali te kau kibu 700 siyu me 7,000 sipsip kibu siyu elama, tama augwaligo kau kibu me te sipsip kibu augwaligo Genuai Bidiba ofa yali. 
Tama augwaligo bomai po deli dąų waliyu te po wali, augwali tigidali sogo augwa wąį dabego God, Genuai Bidi, aga dologode bidaibao po wali. Tama me augwaligo augwa homu kolesaga bomo elama aga wali peyu, me augwaligo homude me dąų olama wali peyu yaibao po wali. 
Tama augwaligo te po wali, te wego o bidigo te tama tisąma yali da, teda augwaligo aga elama isilaibao po wali. Te bidi aga gesi bidi bidibadi me aga monu dabe yai digi me tagalao, te ela muyu naga yaibao. 
Augwaligo te bomai po Genuai Bidigo nogide dąų walali. Tama augwaligo hai olama, tama augwa biugel bu genuai wali. 
Tama te kantri Juda we bidi augwaligo augwa te dąų walali te bomai pode augwali wiegi yai homu pemene yali. Magi baso meni. Augwaligo homu kolesaga bomo mu elama Genuai Bidi wali pabo homu ebaso. Augwaligo Genuai Bidi gegabo homu bomo yai mu yali, tama Genuai Bidigo augwali aga pąba asomainu sula tagalali. Tama agai augwaligo kantri bugagia tonaluyu, tama augwaliba sęgę me asomainu me sula tagalobeo. 
Asago aga aua mosi Maka aga kingo ida sęde namba elaluali sela sąyani. Magi baso meni. Makago te tibo god we Asera piksa noma me deli nigai dao. Asago pode augwaligo te damua pai dwai piksa noma togolama, tama miminama, tama augwaligo sela pelama augwaligo te wę Kidrongo odogo malu buluba isi ulugi pali. 
Te mu tama, Asago te tibo godiba lotu wabo pesage sese dolama silibeo. Tiali goli tigidali sogo agai Genuai Bidi wali pabo dao, tama agai dwai sę Genuai Bidigo gedude me ebeo. 
Tama Asago aga ayago Godigo nai dao olama sa muani te nai dabe sese me silva me gol me haniani dis dabe me, te aga digi Godigo dao olama sa muani te nai dabe sese selama, tama Godigo tempel be tomoba mugi pali. 
Tama te sogo tama gagalama Asa aga kingde bidibadi 35 kibu be yali tomode te boi bidi augwali dali me hwįagasobeo. 
