﻿Tuni Bidi Dabego Po Elalubo Buku Si.
18.
Te Jehosafat te Juda dabego king agai mone me haniani nai dabe hauwa mu elalubaso, te bidi dabego agabolo genuai nogi mu mani. Tama tiali goli, agai te Israel dabego king Ahap dali po dodolali, te Jehosafatgo ogwago Ahapgo wegi somainu yaibao po wali, teda te kantri si augwali bugagia bidimainogo. 
Tama kibu be meba pela silai madi, te Jehosafat aga taun Samariaba pali, te king Ahap suainogo. Tama tialima king Ahapgo aga hani sę bidi dabebolo walama, augwaligo sipsip kibu hauwa eliyu, me kau kibu eliyu elama, augwali genuai nai ulali, te king Jehosafat me aga dali asali hanigo tuabo nai. Magi baso meni. Ahapgo Jehosafatbolo agai taun Ramot te distrik Gileatba boi hwįgi pabo tau somainogo hanalu wainogo. 
Tama Ahapgo Jehosafatbolo e tama po walali, “Eno taun Ramot sainogo boi hwįgi painogo ebao. Nage ena dali asaibawe, ma meniwe?” Tama Jehosafatgo te po wei ponoyu, e tama po wali, “Eno nago homu kolesaga wali pabo homu usu elalubao. Tama eno ami dabego nage tau sabo homu no munalubao. 
Tiali goli dago Genuai Bidigo homu kolesaga hasia bolo osola suinao, te dago te yainogo ebo te sę po bolo,” te po wali. 
Tama tialima Ahapgo profet sibi i olama asao po wali. Te 400 profet sibi augwali sabolagasali, tama Ahapgo augwalibolo e tama po hanalu wali, “Dago te hanu Ramot ma sainogo boi hwįgi pabo usu yaibawe, ma meniwe?” Tama augwaligo te po wei ponoyu, e tama po wali, “Te usu dao, nage pagameo. Godigo nage tau selama, nago ugwaba ela holaibao,” wali. 
Tiali goli Jehosafatgo Ahapbolo e tama po hanalu wali, “Te Genuai Bidigo gasa profet bidi me deli bidibawe?” po hanalu wali. “Tialima me bidibaso da, teda dago agabolo Genuai Bidigo homu kolesaga po bolo hanalu wainao,” wali. 
Tama Ahapgo agabolo e tama po walali, “Te profet me deli bidibao, agai nogi Mikaia dao, te Imlago ogwa dao. Tiali goli eno te bidi me godolo ebo menio, magi baso meni, agai enabolo wiegi yai profet po enabolo me wabo menio. Tigidali sogo agai enabolo dwai sę pedelabo po naga wabo dao,” Ahapgo te po wali. Tiali goli Jehosafatgo aga te po wali, “Nago te tama tiwai po wagio.” 
Tama tialima king Ahapgo aga ami ofisa bidi me asao olama, tama agabolo e tama po walali, “Nage polo pelama, tama te Mikaia te Imlago ogwa eba polo odasa asao, ena pageba.” Agai te po wali. 
King Ahap me king Jehosafat augwali si kingo ugwa aulama tama augwali si augwa sia kingde dulaluali. Augwaligo augwali sigo sia king te Samaria taun sunumi bulu badu muai. Te bidi dabego wit dabe dili dabe sela sąnama, tubo nai dabe sabo malu tǫ dolaba pai bulu me delide. Tama tigidali profet sibigo profet po te king siba pusuduali, te king si pagede. 
Sedekaia te Kenanago ogwa me deli dao, aga te 400 profet bidi me deli dao. Agai ain dage me deli selama, tama kau kibugo gąų tiwai geselai dao. Tama megi da agai aga tobolude te gąų munama, Ahapbolo e tama po wagasali, “Genuai Bidigo te po wali, nago boi hwįnama, tama augwali aiyaba elaluaibao. Te nago augwali te e gąųgo augwali enene pelama, augwali mu siligi paboba usu nigi paibao,” wali. 
Tama meba profet bidi dabego me deli tiwai po naga wali. Augwaligo te po wali, “Nage Ramotba hwįgi pelama, tama nago te taun saibao. Genuai Bidigo nage tau selama, tama nago ugwaba mu holaibao,” augwaligo te po wali. 
Te Ahapgo Mikaia oda sigi pomainogo tagala palali te ofisa bidigo Mikaia odasa asali. Tama augwali si sunumidu pedu, ofisago Mikaiabolo e tama po walali, “Tigidali profet dabego te po wali, kingo te boi hwįbode ugwaba ela holaibao po wali. Tama tialima, nago me deli kolesaga naga elama, tama wiegi yai po kingbolo mao,” wali. 
Tiali goli Mikaiago te ofisabolo e tama po wali, “Te Genuai Bidi tigidali sogo bidibo bidigo nogide, eno nagebolo mu po e obao, mena po eno Godigo enabolo mani, te po naga eno pusaibao,” wali. 
Tama Mikaia aga te king Ahap pageba saboligi pabo si, kingo agabolo e tama po hanalu wali, “Mikaia, dago te taun Ramotba boi hwįgi pelama tama dago te taun ma saibawe, me meniwe?” po hanalu wali. Tama Mikaiago king dolobo po wainogo e tama po wali, “Te usu dao, nage pelama hwįgi pao, tama nago te taun saibao. Godigo nage tau selama tama nago te bage aiyaba elaluaibao,” wali. 
Tiali goli Ahapgo agabolo te po wali, “Ili po wabo tagalao. Tigidali sogo eno nagebolo Genuai Bidigo nogide mu po naga pusao po wabo dao. Nisu nago po odaibawe?” Ahapgo te po wali. 
Tama tialima Mikaiago Ahapbolo e tama po walali, “Te Israel dabego ami bidi dabe te sipsip kibu augwa tonalubo bidi meni yai te bulu du dabede bidibo tiwai elalubo eno sualio. Tama eno Genuai Bidigo po wabo odali, ‘Te bidi dabe augwali augwa tobolu bidi dabe menio. Augwali te boi hwįbo tagalama, augwa buluba pelama, tama augwali bugagia bidimainao,’ wali,” Mikaiago te po wai. 
King Ahapgo te po odama, tama agai king Jehosafatbolo e tama po walali, “Te dao, eno nagebolo polo wai dao. Te profetgo ena dali wiegi yai po me wabo menio. Tigidali sogo agai enade te dwai sę dabe enabolo pedelabo po naga wabo dao,” wali. 
Tiali goli Mikaiago po wadolama weyu e tama po wali, “Tialima megi da, nago eno wabo poba bugagia olo munama odao, tama eno nagebolo Genuai Bidigo enabolo ola mani po pusaibao. Eno Genuai Bidi aga aga sia kingde dagalude dualalubo suai dao, tama tigidali ensel sibi augwali aga pąde mu dolalubo suali. 
Tama Genuai Bidigo augwalibolo e tama po hanalu wali, ‘De pelama Ramotba boi hwįgi pelama, tama boide Ahap geana siyu isigi paibawe?’ Genuai Bidigo te po hanalu wali. Tama deli deli ensel sibigo Genuai Bidibolo augwa homu kolesagade po pusali. 
Augwaligo te tama tidubadi, mobo bidi me deli Genuai Bidi pageba pelama, te po wali, ‘Ena pelama, aga mumuasa pelama geanigi paibao,’ wali. Tama Genuai Bidigo agabolo te po hanalu wali, ‘Te nage pelama, aga mena tama mumuasa bilama geanigi paibawe?’ 
Tama mobo bidigo Genuai Bidibolo e tama po walali, ‘Ena pelama Ahap aga profet dabe aga ili po ola momainogo igi paibao,’ wali. Tama Genuai Bidigo te mobo bidibolo e tama po wali, ‘Nage pelama, aga ili po ola magi pao, tama agai nago po mu dao homu elama homu dąų waibao,’ Genuai Bidigo te po wabo eno odalio.” Mikaiago te po wai. 
Tama Mikaiago Ahapbolo po dolo tama weyu te po wali, “Genuai Bidigo nage dolomainu homu yalio. Tama tialima, agai te spirit o mobo bidi tagala palama, nago te profet dabego nage ili po ola momainogo te elama, te profet dabego nage polo ili po ola mani dao,” wali. 
Te profet Sedekaia te Kenanago ogwago Mikaiago te po Ahapbolo pusubo odama, tama aga Mikaia pąba pelama, tama agai nabogede kala powali, tama te po wali, “Genuai Bidigo Mobo Bidigo ena mena tama tagalama, nageba pelama, tama nagebolo te po maniwe?” 
Tama Mikaiago Sedekaiago po wei ponoyu, e tama po walali, “Nosali te boi bidi dabego da Israel dabe elaluagaselama, tama nage nagaduba wi pelama, nage be me tomode habu me delide geme duala sigi paibao. Tama te sogo naga nago koneaibao, Genuai Bidi aga digi enabolo te po menama, eno te po pusai yabo waibao,” wali. 
Tama tialima king Ahap aga ami ofisa bidi me delibolo te po walali, “Te Mikaia tola selama, tama Emon bidibo digi odasa pao,” wali, “te taunde namba wan kiap pageba me eno ogwa Joas pageba odasa pao. 
Tama nago eno e po augwali sibolo pusa mao, ‘Eno homugo te bidi te kalabus elama be habuba tagalao,’ po wao. ‘Tama aga dwasianu bret dali wę dali madubadi, te wabi hwįbo silama, ena ma asoboba usu nao,’ te po wao,” wali. 
Tama Mikaiago Ahapbolo e tama po ma walali, “Te nage tigide dene me sisąma ma asobaso da, teda Genuai Bidigo te po enabolo mawai meni yabo wao.” Tama Mikaiago po genina ma weyu te po wali, “Dage tigidaligo eno po bugagia mu odiąo,” wali. 
Tialima nosali Ahap te Israel dabego king me Jehosafat te Juda dabego king augwali sigo augwa ami bidi dabe selama, augwali distrik Gileatde taun Romatba boi Siria dabe dali hwįgi pali. 
Te boi dala sisąbadi, Ahapgo Jehosafatbolo e tama po walali, “Da te boi hwįgi pabo sogo, eno te kingo ugwa sela sąnama, tama eno gasa ugwa me gudaibao, te boi bidi dabego ena gesabidi kone idali weyu. Tiali goli nago da, te kingo ugwa me gudao,” wali. Tama tilama, augwali si boi hwįgi peyu pali. 
Tama te boi polo dala sisąbadi te Siria king bidigo te karisde dolaluyu hwįbo ami polalubo bidi dabebolo e tama po wali, “Dagego Israel dabego king dali naga hwįao, tama dagego gasa bidi dabe dali me hwįnamo dao,” wali. 
Tama augwali te boi hwįbo sogo te ami kepten dabe augwaligo te king Jehosafat sulama, tama augwaligo homugo te da te Israel dabego king dao homu yali. Tama augwali aga dali boi hwįainogo pali. Tiali goli Jehosafatgo i bomo elama mu wali. Tama God Genuai Bidigo aga tau selama, tama augwaligo aga dali hwįmainu sula tagalobeo. 
Tama te polasa pabo kepten dabe augwaligo koneani, aga te Israel dabego king menio homu yali, tama tibaso augwaligo aga pobeasa pabo tagalali. 
Tiali goli te ami bidi dabe augwali hwįbo sę idubadi, te Siria ami bidi me deligo enesigi kegelama, tama Israel ami bidi dabe bidiboba uba ene subigila enani. Tama te enego Ahapgo tigi boi hwįbo ugwago aga tigi bugagia me dualisąma yali tede mu dolali. Tama aga karis guni tubo bidibolo e tama po walali, “Ena polo dolalio. Te karis polo begelama, tama hwįbo pesage taga pao,” wali. 
Tiali goli te Siria ami bidi me Israel ami bidi augwali boi hwįbo bomo mu iduali. Tama Ahapgo te hwįbo pesage taga pabo usu meni yai. Aga aga te karisde bididubadi, Siria dabeba tonalubadi giliga dega saboba usu nigi pali. Tama giliga iba dega sabode aga isali. 
