﻿Tuni Bidi Dabego Po Elalubo Buku Si.
20.
Nosali te Moap hani ebadi, me Amon hani ebadi, me te gasa bidi hani me augwali Amon hani tomode bidai hani, augwali Juda dabe dali boi hwįagasali. 
Tama bidi meba augwali king Jehosafat bidibo digi aselama, te po wagasali, “Tegobao, te genuai hani ami bidi dabe augwali sigi ąį Detsi u badu aselama, tama nage dali hwįainogo ebao. Megi da, augwali taun Tamar Hasasonde bidibao,” wali. Tamar te taun Engedigo nogi me dao. 
King Jehosafat agai te po odama, aga wi mu yali. Tama agai homu boma pai mu elama, te Genuai Bidigo homu kolesaga hanalu wabo homu yali. Tama tialima, agai bomai po te kantri Juda tigidali badu we bidi dabe augwaligo nai gisilama Genuai Bidiba gedu haluasa po wao po wali. 
Tama tialima te Juda bulude tigidali taunde we bidi augwali sese tama augwali Jerusalemba pelama, gedu haluasa po weyu, Genuai Bidibolo augwali tau somainogo hanalu wali. 
Tama augwali sese tama Jerusalem we bidi dabe dali deliba sisinagasali, tama augwali te Genuai Bidigo tempel be gesabidi badu sisinibo pesage gesi elaluai, te pesageba sisinigi pali. Tama king Jehosafat te we bidi tomoba doligi pelama, 
tama agai gedu haluasa po weyu e tama po wali, “O Genuai Bidi, dago wąįgo God, nage dagalude bidiyu nago tǫde we bidi tigidali tonalubo dao. Nago genuai bomo mu elalubao, tama bidi mego nage dali hwįnama, nage aiyaba elaluabo usu me egobeo. 
Dago God, nago koneani, da Israel dabe naga abagi Abrahamgo hani wąįgo wai puluba dao. Tama da naga we bidi mu dao. Nago e tǫde polobadu bidali we bidi nago sela sąwai dao, tama nago e tǫ te dago wąį dabebolo mawai dao. Te dago tǫ tigidali sogo elalua pomainogo tiai dao. 
Tama da bobobage sogo mu e tǫde polo bidalio. Polobadu dago wąį dabego te genuai tempel be sę yai dao, te we bidi augwali te pąba pelama nageba lotu po omainogo. Tama augwaligo te tempel be sęą silibo si, augwaligo e tama gedu haluasa po wai dao, 
‘Genuai Bidi, te da dolabo sęgo da gegebaso, o te boi bidi dabego da dali hwįainogo asobaso, o nago da dene mobaso, o te dwai gasi genuai me pedalobaso, o genuai nasi ebo sogo pedalobaso da, teda da te be gesabidi badu te nago geduba dolagasaibao. Magi baso meni. Te be da, te da nage pąba asabo pesage mu dao. Tama dago te sęgę asoboba kone palama, tama dago gedu haluasa po weyu, nagebolo da tau sao po hanalu waibao. Te tama tialima, nago dago gedu haluasa po wabo odama, da ma oda saibao,’ dago wąį dabego te sogo te po wai dao.” 
Tama Jehosafat agai gedu haluasa po genina ma weyu, e tama po wali, “Genuai Bidi, nago polo sualio, te Amon dabe, me Moap dabe, me Idom dabe, augwali da dali hwįainogo polo asalio. Te hani augwali naga, nago dago wąį dabego augwali dali hwįmainogo nago me sula tagalai menio. Te dago wąį dabe augwali Isip tagalama augwaligo tǫba sabolali sogo, dago wąį dabego augwali dolai menio. 
Tiali goli, augwaligo dago wąį dabego augwaliba te yali wiegi yai kolesaga yaliba konebeo. Menio. Augwaligo dwai kolesaga elama, tama da dali ma hwįainu ebao. Augwali polo asalio, te naga digi dabolo e mani te tǫde sela sąwainu. 
O dago God, te genuai ami hanigo da dali hwįainu ebao. Tiali goli naga digi augwali dolama tagalao. Magi baso meni, dago augwali dali hwįabo bomo menio, tama me dago magi sę yagawe dago konebeo. Tama tibaso dago nage deliba tonalubao, da nago tau somainu,” Jehosafatgo te po Godibolo hanalu wali. 
Te Juda bulu bidi dabe me we wai dabe augwali Genuai Bidigo gedude doligiluali, te Genuai Bidigo tempel be pąde. 
Tama Livai bidi me aga nogi Jahasiel, aga te we bidi hani tomode bidali. Jahasiel aga te Sekaraiago ogwa dao, tama Sekaraia aga te Benaiago ogwa dao, tama Benaia te Jeielgo ogwa dao, tama Jeiel te Mataniago ogwa dao. Te hani bidi augwali te Asapgo wąį hani bidi dabe dao. Aga te Livai hani bidi me dao. Tama tialima, Genuai Bidigo Mobo Bidi bomonama mu Jahasiel tigiba pedelali. 
Tama agai e tama po wali, “King Jehosafat, me Jerusalem we bidi, dage me tigidali Juda bulu we bidi, dagego bugagia odiąo. God Genuai Bidigo te po wali, ‘Dage te genuai ami hanide wi elama homu sęgę kuna igimio. Menio. Te hwįabo te God agaduba sę dao, te dagego sę menio. 
Do da, te boi bidi dabe augwali te bulu du Sis sunumidu aselama, dage dali hwįagasaibao. Tama dage pelama, tama dagego augwali te odogo malu bulu, te wa pai bulu Jeruelde suaibao, te giliga asobo badu. 
Tiali goli, dagego duga digi me hwįgobeo. Mu menio. Te dage te boi hwįbo pesageba saboligi pabo sogo da, teda dage olo dolaluyu olo tonaluiąo. Tama dagego gedugo suaibao, te Genuai Bidigo dage tau selama hwįaibao, tama dage tau selama augwali aiyaba elaluaibao. Dage Jerusalem we bidi me Juda bulu we bidi, dage homu sęgę elama dage wi igimio. Do dage hwįainu piąo, Genuai Bidi dage dali bidaibao,’ Genuai Bidigo te po wai,” Jahasielgo te po wali. 
Te king Jehosafat me te tigidali we bidi augwaligo te po odobo si, teda te we bidi sese augwali sese bogoli sugunama, tǫba tobolu basi guluama, tama Genuai Bidiba lotu po wali. 
Tialima te Kohat hanigo Livai dabe me Kora hanigo Livai dabe augwali doligiluama bomonama hai olama, tama Genuai Bidi te Israel dabego God nogi ugwaba sali. 
Tama tialima augwali kigamu hulide mu hogodaloama, tama augwali te taun Tekoa, te nai meni yai wa pai bulu pąba pabo kegaluali. Te augwaligo Jerusalem taga pisąmadi, Jehosafatgo augwalibolo te po walali, “Dage Juda hani bidi, me dage Jerusalem bidi dabe, dagego odiąo. Dagego Genuai Bidi dena Godiba homu bomo elama dąų waiąo, tama dage bomo elama dolaluaibao. Tama me dagego Godigo profet bidi dabego po me mu po dao homu elama homu dąų wayu yao, tama dagego te wabi hwįbo ugwa ela holaibao,” wali. 
Tama kingo te we bidi augwaligo homu kolesaga po hanalu wali, tama nosali agai bidi meba te ami bidi dabe tudiba togolama polasa peyu tęąbi po dali pomainogo sa muani. Tama e tama tęąbi po dali pali, ‘Genuai Bidigo kolesaga wiegi yai mu elama doloba pai mu dao. Tama te kolesaga te aga wiegi yai aubo nai tiwai dao. Dago te kone palama, tama agai genuai nogi ugwaba sinao. Dago Genuai Bidibolo buba hwi po wainao. Magi baso meni, tigidali sogo agai da godolo mu idubo dao,’ tama wali. 
Te Jehosafat aga ami dabe dali augwa pabo gagalobadi yaide, te tęąbi po wabo bage augwaligo te Genuai Bidigo nogi ugwaba sabo tęąbi po ola pali. Tama tialima Genuai Bidigo te Amon ami bidi dabe, me Idom ami bidi dabe, me Moap ami bidi dabe augwa hasi wado elama, aga hasi tomode ma hwįmainu ilali. Hasia te Amon me Moap sigo te Idom dabe dali hwįnama, augwali sese mu ela silali, tama nosali te Amon dabe dali me Moap dabe dali aga hasi hwįnama, aga hasi mu dola siliboba usu nama tagalali. 
Te Juda dabego ami bidi dabe augwali te nai meni yai wa pai bulude te be meba sabolali, te ami bidi dabe augwali te bede bidiyu boi bidi no munalubo be dao. Tama augwaligo te boi bidi dabe asobo suainu ugwaba gedu tonono bilali, tiali goli augwali noma sali, te boi bidi dabe augwali polo isai tigi dabe te tǫde munalua pabo suali, umabo. Te bage augwali me bidibadi me sube. 
Tama tialima, Jehosafat me aga ami dabe augwali te tigi dabe munalubo tomodu pali, tama augwaligo nai nai dabe hauwa me elalubo suali. Tama augwaligo tubo nai dabe siyu, wiegi yai ugwa dabe siyu, me augwaligo meba wiegi wiegi yai nai dabe sali. Augwaligo te nai dabe sidubadi sela sogoba mu usu nani. Magi baso meni, te doado bage nai dabe hauwa bage me elalubaso. 
Tama te de namba 4 te sogode augwali te odogo malu bulu meba sisinagaselama, augwaligo Genuai Bidigo augwali tau siyu yali te sęba kone palali. Tama augwaligo agai nogi ugwaba sali. Te tama tiali po pagede augwaligo te bulu nogi e tama poali, ‘Te Godigo Nogi Ugwaba Sabo Pesage Dao,’ polali. 
Tialima Jehosafat aga polama, tama tigidali ami dabe augwali aga wali elama, tama augwali Jerusalemba wiegi yai homu pemene dali pali. Magi baso meni, Genuai Bidigo augwali tau selama, augwaligo boi bidi dabe aiyaba elaluai baso. 
Augwaligo gita eliyu, biugel bu weyu ela peyu, te taun tomoba pali. Tama augwali Genuai Bidigo tempel be dolo mu pelama, tama agabolo genuai nogi mani. 
Tama Genuai Bidigo te gasa kantri king dabe me tobolu bidi dabego te Genuai Bidigo Israel dabe tau selama, augwaligo boi bidi dabe ela silao wabo po odobode augwali wi dwai mu ilali. 
Tama te Jehosafat king bidibadi boi me hwįagasobeo. Magi baso meni, Godigo aga kantri bugagia tonaluali. 
Te Jehosafat aga 35 kibu be yai madi aga king pedelai, tama aga Jerusalemde 25 kibu be king bidali. Jehosafat aga ida Asuba dao, te Silhigo wegi dao. 
Jehosafat agai aga aya Asago yali wiegi yai kolesaga wali pali, tama wiegi yai doloba pai kolesaga Genuai Bidigo gedude wali pelama yali. 
Tiali goli agai sę me deli ebeo. Agai te tibo godiba lotu wabo pesage dolobeo. Tama me ma, te we bidi augwaligo augwa wąįgo God wali bomo elama me pabeo. 
Te king Jehosafatgo yali sę dabe meba, te aga king pedelalidu gagalama aga isali sogo sabolama tomode yali tigidali sę po dabe, te buku augwali Jehu te Hananiago ogwago po bukude elalubao. Tama te buku te augwaligo King Dabego Buku wabo, te buku tomode elalubao. 
Te me sogo king Jehosafatgo te Israel dabego king Ahasia dali sę yaibao po wali, te bidigo te haniani dwai sę hauwa mu ebo bidi dao. 
Tama tialima augwali sigo sipgo te walu te kantri Tarsisba tolasa peyu, te bisnis yabo sip nigali. Tama te sę bidi dabego te sip dabe te taun Esiongeberde nigali, te nabis bulu me deli dao. 
Tiali goli te Doavahugo ogwa Elieser te taun Maresa bidigo te Godigo bomai po te Jehosafat dali pusagasiyu, e tama po wali, “Nage te Ahasia dali abagi si igi palio. Tama tialima, Genuai Bidigo dage sigo te nigali sip dolaibao,” wali. Tama tialima, me sogo te sip dabe te ąįdu pobadi te dolali, tama augwali te Tarsisba pabo usu meni yani. 
