﻿Tuni Bidi Dabego Po Elalubo Buku Si.
32.
Te king Hesekiago Genuai Bidigo po wali pelama, tigidali sę yai nosali badu da, king Senakerip, te Asiria bidi, aga ami dali augwali Juda buluba boi hwįagasali. Te Asiria dabego bomai obo yai taun dabe bagua sagasali. Tama Senakeripgo aga ami dabebolo olama, te boi hwįnama, te taun sainu yao po wali, te agai augwali tonaluainogo. 
Tama Hesekia agai koneani, me tiali te Senakeripgo Jerusalem dali hwįagasabo homu yali. 
Tama tialima Hesekia ebadi, ofisa bidi dabe ebadi, bomai ami bidi dabe augwaligo te taun bulu badu elalubo ulu wę dabe hagalu bilaibao po pesela sali. 
Tialima augwali bidi hani hauwa mu sisinama, tama augwaligo augwalibolo te po walali, “Dago te taun bulu badu elalubo ulu wę dabe hagalu biligi pinao. Tama me dago te taun pąde soabo ąį me paligi pinao. Tiyu te Asiria dabe asiyu augwaligo tuabo wę hauwa elalu idali weyu,” te po wali. Tialima augwaligo te wę paligi peyu pali. 
Te Hesekiago aga sę bidi dabego Jerusalem bulu obo polo dąų walao po bomo elama wali. Tama tibaso te sę bidi dabego te obo me badu toga pali polo ma dodolali, tama augwaligo te obo daide augwaligo bobobage sigi be taua dabe geselali, te ami bidi dabe tede bidiyu te boi bidi dabe no munalumainu. Tama te taun genuai masigi obo tudi badu augwaligo gasa masigi obo me ma bagulali, te taun bagulama mu yali. Tama te obo dąų wali te pesagede augwaligo te odogo malu bulu tǫ selama pamagąno pali, te augwaligo Devitgo Taun wabo te Jerusalem bulude. Tama augwaligo ene hauwa buyu, me ni name sabele hauwa geseliyu yali, te hwįabo nai dabe. 
Nosali Hesekiago ami ofisa dabe magi ilali te Jerusalemde bidi dabe tonalumainu. Tama agai bidi dabe sese te taunba pabo sunumi pąde bidi sisinibo pesagede sisinani. Tama agai augwaligo homu dąų olama bomo ilabo po pusa mani. Agai e tama po wali, 
“Dage bomo elama dolaluyu, tama dagego te Asiria king bidi aga te geninama ami bidi dabede dage wi igimio. Te mu dao, augwaligo genuai bomo elalubao. Tiali goli dago genuai bomo mu augwaligo bomo aiyaba elaluai mu te elalubao. 
Te Asiria king bidigo bomo te bidi dabede sali dao. Tiali goli dago bomo te Genuai Bidi dago Godidu te asali dao. Aga da dali bidiyu, tama agai da tau saibao, tama dago boi bidi dabe aiyaba elaluaibao,” wali. Te we bidigo kingo te po odama, tama te pogo augwaligo homu dąų walali. 
Tama te sogo te Senakerip aga ami dali augwali taun Lakisde boi hwįduali. Tialima agai ofisa bidi meba Jerusalemba taga palama, Hesekia me Juda dabe dalibolo po magi pomainu tagala palali. Agai te po e tama tiwai wali, 
“Ena king Senakerip dao, eno koneaio. Dagego mena tama bomo elaluyu, tama dagego homugo dago dagego taun sogobe homu ebawe? 
Eno koneani, Hesekiago dagebolo te po wali, Genuai Bidi duga God agai dage tau selama, tama da Asiria dabego dage dologobeo, te homu yali. Tiali goli Hesekiago dage ili po te ola mani dao. Tama dagego agai po mu dao homu dąų weyu, tama dagego dago te taun sao olama tagalisąma iyu da, teda dage dua dao. Dago dage bagua selama, tama dage nai me wę me menia selama tama dage isaibao. 
Dagego koneani, te Hesekia deligo tama te Genuai Bidigo lotu wabo pesage me agai alta dabe dolai dao. Tama agai dage Juda dabe me Jerusalem dabe bolo deliba lotu wagi peyu, deli altaba wiegi yai denami hano holobo ofa yao po wai dao,” te bidigo te po wali. 
“Te dagego polobadu eno wąį dabego yali sę dabe me megi ena digi meba gasa kantri dabede ebo konebe, agawe? Dagego homugo te meba hani augwa godigo augwali tau selama, eno augwaligo kantri dolobe homu eba, agawe? Mu menio. 
Dago kantri hauwa dali hwįai dao, te augwali god hauwa elaluali. Tiali goli te god me deligo aga kantri tau selama tama dago hwįbode da te tula pai menio. Tialima dagego magi baso dagego homugo duga Godigo dage tau saiba homu ebawe? Tama dago dage aiyaba elalugobe homu ebawe? 
Dagego te Hesekiago dage ili po ola momainu sula tagaligio, tama dagego agai po odigimio. Magi baso meni, te gasa meba kantri dabe augwa godigo augwali me tau sai meni, te eno wąį dabe hwįgi pabode me megi eno hwįbode te augwali me tau sabeo. Tama mu tama, dagego Godigo me dage tau sabo usu me egobeo,” te Senakeripgo te po ola tolali. 
Tama te Asiria kingo ami ofisa bidi dabego me Genuai Bidi God dali me dwai po hauwa mu me wali, me te Hesekia te Genuai Bidigo sę bidibolo me tiwai po wali. 
Tama te king Senakeripgo pas dabe asęnama, Genuai Bidi God posobo po wali, te Israel dabego God Genuai Bidibolo. Te pas dabede e tama tiwai po dabe elaluali, “Te eno meba kantri dabe dali hwįani sogo, augwa god dabego augwali tau selama, tama augwaligo ena aiyaba me elaluai menio. Tama Hesekiago Godigo me dage aga we bidi me tau sogobeo. Mu menio,” tama po asęna tolali. 
Te Asiria ami bidi dabe augwaligo te Hibru pogo po bomona mu olama, te Jerusalem we bidi augwali te obo daide ugwadu bidiyu, augwaligo te po odama tama augwali wi dwai mu emainogo. Tama te Asiria dabe augwaligo te taun sainogo bomai sę idali weyu. 
Te Asiria dabe augwaligo te posobo po wali. Magi baso meni, augwaligo homugo Jerusalem dabego God te gasa tibo god augwa nogogo nigai god dabe tiwai yaliwe weyu. 
Te king Hesekia agai Asiria dabego te po odama, tama aga dali profet Aisaia, te Amosgo ogwa, augwali sigo Godiba gedu haluasa po wali, augwali tau sao po olama. 
Tama Genuai Bidigo augwali sigo gedu haluasa po wabo odama, tama agai ensel bidi me deli tagala palama, Asiria dabego bidibo pesagede agai ofisa bidi dabe me kepten bidi dabe me bomai ami bidi dabe tama ela wialali. Tama tialima, king Senakerip aga hale dwai mu elama, tama aga te aga kantriba ma pali. Tama nosali aga tibo godigo lotu be tomoba pali, te aga godiba lotu po wainogo, tama aga ogwa mebago augwa bainat hwągo aga ela muagasali, tama aga isali. 
Tama te tiali kolesagago Genuai Bidigo king Hesekia te Jerusalem dabe dali augwali tau sali. Tama te Senakerip te Asiria dabego kingo augwali dolobeo. Tama me ma Genuai Bidigo gasa boi bidi dabego Juda dabe dolagasomainu sula tagalobeo. Genuai Bidigo augwaligo ebo sęde tigidali tau sali, tama augwali bugagia bidali. 
Tama we bidi hauwa gasa kantridu Jerusalemba aselama, Genuai Bidiba ofa sesiyu, me Hesekiabolo wiegi yai nai dabe magasiyu yali. Te sogo tama gagalama, te gasa kantri we bidigo king Hesekia Juda dabego kingbolo genuai nogi mani. 
Te Asiria dabego Juda dabe dali dwai sę idubadi da, king Hesekia aga gasi genuai mu selama, tama aga pąde isabo ąǫ yali. Tialima agai Genuai Bidibolo gedu haluasa po wali, tama Genuai Bidigo aga gedu haluasa po wabo wei ponoyu, agabolo magi me deli mani, te agai gasi silaibao olama ola mayu. 
Tama nosali Hesekiago gasi silali, tama agai Genuai Bidigo aga tau siyu yali te sę kone ebeo. Menio. Aga tobolu gagea pelama, tama Genuai Bidibolo buba hwi po wabeo. Tama tibaso, Genuai Bidigo aga dali sębę elama, tama aga dali Juda dabe me Jerusalem we bidi me dolabo homu yali. 
Tiali goli Hesekia me Jerusalem dabe augwaligo dwai kolesaga tagalama, tama augwa digi augwa aiyaba elaluali. Tama tibaso, te king Hesekia bidibadi Genuai Bidigo augwali dene me mabeo. 
Te Hesekia agai nai dabe hauwa mu selama, tama aga bomai king mu pedelali, tama agai genuai nogi elaluali. Agai te sę bidi dabebolo olama, tama augwaligo bakstua dabe sęnama tama augwaligo e tama tiwai nai dabe muani, silva, me gol, me genuai monego abelai wiegi yai masigi dabe, me wiegi yai denami ebo pauda dabe, me hwįbo ni name sabele dabe me, me gasa wiegi yai homua pabo nai dabe me te bede muani. 
Tama me te sę bidi dabego te wit dabe, me wain dabe, me ni oliv wel muabo bakstua dabe me sę yani. Tama me augwaligo kau kibu tagalabo moni be sę eyu, me sipsip kibu tagalabo obo iyu yali. 
Godigo Hesekiabolo wiegi wiegi yai nai dabe hauwa mu mani. Tama Hesekiago sipsip kibu me kau kibu hauwa mu sali. Tama aga sę bidi dabego agai taun hauwa mu geselali. 
Polobadu king Hesekia aga digi te pabo wę Gihon ogwa badu paliai, tama agai gesi wę gamia nigasa dulama, giliga dega sabo badu te Devitgo Taunba tagaligi pali. Tigidali sę dabe king Hesekiago yali sę dabe sese tama wiegi yai mu pedelali. 
Te kantri Babilon genuai bidi dabego Godigo te kantri Juda bulude te wiegi yai sę yali po odama, augwaligo te bidi dabego esiąbo bomai sę yali po page odainogo bidi me deli tagala palali, te Hesekiabolo hanalu wainu. Te sogo Godigo Hesekia tagalai madi, magi baso meni, agai Hesekia usu selama, tama agai kolesaga me homu kolesaga osola suainogo. 
Te king Hesekiago yali meba sę po dabe te buku augwaligo te profet Aisaiago Suali Po Dabe wabo, te bukude te elalubao, tama gasa buku augwaligo te Juda Dabe Me Israel Dabego King Dabego Po Buku wabo, te bukude te elalubao. 
King Hesekia isibaso, augwaligo aga te Devitgo hani king dabego gų pagede pubulali. Agai gų page te obanu ganama elaluali, te meba king dabego gų page i badu elaluali. Tama te Juda me Jerusalem we bidi augwali tigidali agai genuai nogi kone palama, augwali hobede genuai mu yali. Tama aga ogwa Manasego agai pesage selama, tama aga king pedelali. 
