﻿Tuni Bidi Dabego Po Elalubo Buku Si.
35.
Te king Josaiago pode augwaligo genuai nai mu ulali, te Israel dabe augwali te Isipde wiegila bidimainu sula tagalali sogo, te Pasova sogo wabo, te kone palebo nai ulali. Augwali Jerusalemba sisinagasali, tama te namba 14 deide, te namba wan poluade, augwaligo sipsip kibu gǫų hauwa elali, te genuai sogo kone paliyu. 
Tama Josaiago te pris dabe dodolama, tama augwali deli deli augwa sę te Genuai Bidigo tempel be tomode ma yao po wali, tama me agai augwaligo homu dąų walali augwaligo te sę bugagia emainu. 
Tama me agai Livai dabebolo po me deli mani. Augwali te Genuai Bidigo hani mu dao, tama augwaligo Genuai Bidigo po Israel we bidibolo ola maiabo sę elaluali. Agai po da e tama dao, “Dage pelama, tama Genuai Bidigo te Dąų Wali Bomai Po Munalubo Halobage te Genuai Bidigo tempel be tomoba mugi piąo. Polobadu king Solomon king Devitgo ogwago te tempel be nigai dao. Megi da, dagego polobadu yali gilama te halobage tolasa ugwa eda yabo menio. Tama tialima dagego Genuai Bidigo tempel be tomode sę bugagia iyąo, te dago God dao. Tama me dagego Israel we bidi, te Godigo we bidi, tau sao. 
Dage deli deli bidi wąį tomode deli deli bidi dabe dage tomode Genuai Bidigo be tomode deli tobage sę ebo bidi dabe dage gasa bidi wąį hani tomode doligi peyu yao, te king Solomon me king Devitgo te bukude asęani po yali gilama. 
Dage deli deli hani bidi dagego te deli deli wąį dabe tau sabo sę kegaluao, te Israel hani tomode meba gasa bage tau sabo gilama. 
Dagego duga digi Godigo gedude wiegi yai pedaliąo. Tama dagego sipsip kibu gǫų dabe eliąo, te Godigo Israel Dabe Augwali Isipde Bugagia Bidimainu Ilali Sogo, te Pasova Sogo kone paliyu ofa yabo. Tama dagego te ofa yabo nai dabe dola muao. Te meba Israel dabe augwaligo te ofa ebo bomai po bugagia wali pomainao, te Genuai Bidigo Mosesbolo walali gilama,” king Josaiago te po wali. 
Te Josaia agai aga obo tomode sipsip gǫų hauwa, me meme kibu gǫų, me kau kibu omai hauwa selama, te we bidibolo mani, te augwaligo ofa emainogo. Te sipsip kibu gǫų me meme kibu gǫų te 30,000 usu nama, tama sese tama te kau kibu omai dabe te 3,000 usu nama tama. 
Tama te king aga ofisa dabego me te hasa dabe hauwa mu te we bidibolo mayu, me pris dabebolo me Livai dabebolo mayu yali, te augwaligo ofa emainogo. Tama pris tobolu bidi Hilkia me gasa bidi me si augwaligo Genuai Bidigo be tonaluali, te Sekaraia me Jehiel, augwaligo sipsip kibu gǫų hauwa me meme kibu gǫų hauwa, te 2,600 usu nama sese tama sali, me 300 kau kibu omai sali, tama te pris dabebolo mani, te genuai sogo ofa emainu. 
Tama te Livai dabego genuai bidi dabe augwali te Konania dali aga ama si ebadi, te Semaia me Netanel, me Hasabia, me Jeiel, me Josabat, augwaligo sipsip kibu gǫų hauwa me meme kibu gǫų hauwa te 5,000 usu nama sali, tama 500 omai kau kibu selama, tama augwaligo te Livai dabebolo mani, te augwaligo te genuai sogo ofa emainu. 
Te augwaligo ofa yabo nai dabe tigidali dodola silama, teda te pris hani me Livai hani augwali augwa bidibo pesage te alta pąba doligi pali, te kingo wali gilama. 
Te Livai dabe augwaligo te sipsip me meme kibu ela silama, tama augwaligo te hasa dabego kaneme dabe te pris dabebolo mani. Tialima pris dabe augwaligo te kaneme dabe te altaba sądubadi te Livai dabego te hasa dabego wali dagabo sę iduali. 
Tama te Livai dabego te kibu mi dage dabe meba selama, tama augwaligo te deli deli hani we bidi dabebolo mena mena pali, te augwaligo Genuai Bidiba ofa emainu, te genuai sogo te Godigo Israel Dabe Bugagia Bidimainu Sula Tagalali Sogo te kone palabo, te bomai po te Mosesgo bukude elalubo po yali gilama. Tama Livai dabe augwaligo deli tiwai kolesaga naga te kau kibu augwaligo elali kibude yali. 
Tama te Livai dabego te sipsip kibu mi me meme kibu mi augwaligo te isi daide ulali, te ofa ebo bomai pode wali gilama. Tama me augwaligo te kau kibu mi selama, augwaligo te senede uluyu, me prainpende uluyu yali. Te kibu mi polo dabo si, augwali polo tama te we bidibolo dobagi pali. 
Tama nosali te Livai dabego augwa kibu mi dodola muyu, me Arongo hani pris bidi dabego kibu mi dodola muyu yali. Te pris dabe augwa digi augwa kibu mi dola muabo usu meni yai. Magi baso meni, augwaligo te ofa ebo kibu mi me ili te uludubadi te giliga dega saboba mu usu nigi pali. 
Tama te Asap hanigo Livai dabe, augwali te tęąbi po weyu me musik eliyu ebo bidi dabe dao. Augwali te Genuai Bidigo be tomode augwa dolobo pesagede dolaluali. Te polobadu te king Devit, me Asap, me Heman, me Jedutun te kingo profet te Asap hanibolo ya wali gilama tama tiali. Tama te Livai dabego te Genuai Bidigo tempel be sunumi tonalubo sę elaluali, augwali te deli deli sunumide dolalua pali, te Genuai Bidigo bede. Te hani augwaligo te sę ebo pesage taga pabeo. Magi baso meni, te meba Livai dabego augwaligo nai dabe dola mubaso. 
Te sogo Israel dabego nai ulali, te Pasova Sogo, te genuai sogo nai ulali, tama augwaligo isigo mu dela silibo ofa te Genuai Bidigo altade sese tama ulali. Te king Josaiago augwalibolo wali gilama tama yali. 
Te Israel we bidi augwali sese tama te Jerusalemde te sogo bidali. Augwaligo te tulama, tama me augwali nogo a naga olama me badu nogo si, te 7 tama sogo augwaligo te Yis Meni Yai Bret Tubo Genuai Sogo bidali. 
Augwaligo te Pasova nai ulali te wiegi yai mu pedelali. Te nai ulaligo te polobadu Israel dabego te sogo kone paliyu ulali nai dabe mu edelali, te profet Samuelgo side gagalama aselama, te megi te king Josaiago siba usu nagasali. Te meba king dabego te be posobo sogo augwaligo wiegi yai te king Josaiago me te yali tiwai me yai menio, te king Josaia, me te pris dabe, me Livai dabe, me Juda dabe, me Israel dabe, me Jerusalem dabe augwaligo megi yali tiwai me yai menio. 
Augwaligo te nai te Josaia aga king bidibadi te kibu be 18 wabode ulali. 
Te king Josaiago te Genuai Bidigo tempel be dodolobo sę silibo si, teda te Neko, te Isip king bidi, aga Isip ami bidi dabe selama, tama augwali te Karkemis te ąį Yufretis sesege taunba pali, te boi bidi dabe dali hwįainu. Josaia agai te tama tiali po odali, tialima Josaia aga ami bidi dabe selama, tama te Isip dabe dali hwįainogo pali. 
Tiali goli king Nekogo Josaiabolo po ola toliyu, te po wali, “Juda dabego king, odao, eno nage dali sębę menio, tama ena nage dali hwįainu me asobeo. Tama tialima, nago magi baso nago ena dali hwįainogo ebawe? Eno da ena boi bidi dabe dali naga boi hwįainogo ebao. Tama God ena dali bidiyu, tama enabolo polo hwįgi pao po wali. Tama tialima, nago aga paligio. Tiyu, agai nage dolabuo,” te po wali. 
Josaia agai te po Godigo king Nekogo pedauwalidu pusali po odali. Tiali goli agai tobolu gagea pelama, tama agai hwįabo homu naga yali. Tama tibaso, agai kingo gudubo ugwa hųgia sąnama, tama agai gasa ugwa me gudali, te Isip dabe augwaligo aga konea pidali weyu. Tama agai aga ami dabe selama, tama augwali te Megido dabego odogo malu buluba pali, tama augwaligo Isip dabe dali hwįani. 
Augwali boi hwįdubadi, te Isip dabe augwaligo enesigi kegelama u badu Juda dabe bidaloboba ene enani. Tama ene me deligo Josaia enani. Tama tialima agai aga sę bidi dabebolo te po walali, “Ena nai genuai mu polo dolalio. Dagego ena sela peyu, tama hwįbo pesage taga piąo,” wali. 
Tialima augwaligo aga te bididuali te karisde selama, tama augwaligo aga gasa karis meba odasa pelama, tama aga Jerusalemba odasa pali. Tama aga isibaso, augwaligo aga te king dabego gų pagede pubulali. Tama te Juda me Jerusalem we bidi augwaligo te Josaia polo isai baso, augwaligo aga hobede ebaso gela wali. 
Tama profet Jeremaiago Josaiade hobede tęąbi po me deli asęani. Tialima megi me te tęąbi po wabo we bidigo te hobede tęąbi po me wabo dao, te king Josaia kone paliyu yabo. Tama te hobede ebo sogo tigidali sogo te Israel dabe augwaligo te hobedai tęąbi po wabo dao. Te hobedai tęąbi po te hobedai tęąbi dabe elalubo bukude te elalubao. 
Te king Josaiago yali sę dabe po me agai kolesaga po me, te aga king pedelali sogo gagalama tama isaliba usu nagasali po dabe, te buku augwaligo Israel Me Juda Dabego King Dabego Po Buku wabo, te bukude te elalubao. Te bukude te Josaiago Genuai Bidi bugagia mu wali peyu, me agai bomai po wali pali po me te pusai te elalubao, me agai te wiegi yai kolesaga yali po me tede elalubao. 
