﻿Esra.
6.
King Dariusgo te pas sulama da, teda agai te kuskus dabebolo walama, te augwali Babilonba pelama, tama te king Sairusgo po te gavmango bukude asęani po gegegi pali. 
Augwaligo te buku te Babilonde munalubo susiąwani, tiali goli augwaligo te buku me deli te taun Ekbatana te Midia tǫ pedaide munalubo suali, tama te bukude te tiwai po elaluali, 
“Te hasia polasa kibu be mude te king Sairus te king bidali sogode, agai te po weyu, augwaligo te Jerusalemde te Godigo tempel be daga page masigi dabe muyu, tama te be ma sę yao po wai. Tama augwaligo te siaba tigidali domainu ulubo ofa dabe me, tama te gasa tobage ofa dabe me emainao po wai. Te be daga bobobage ugwanu holali usu nama, te 27 mita, tama aga genuai usu nama, te me te 27 mita dao. 
Augwaligo te be daga dabe te tiwai nigao wali. Augwaligo te masigi ugwaba pesage nani ilibo sela holoyu, tama te masigi muani daide te bǫ nami nani deli muao wali. Augwaligo te tama tede holodubadi gęnama, tama te dąį igulaboba usu nigulao po wai. Tama augwaligo mone te kingo mone sabo bede selama, tama te be sę yabo tigidali nai me abeliyu, tama te sę ebo bidi dabe mone mayu yao po wai dao. 
Tama tiyu, augwaligo te golgo me silvago nigali nai te Godigo bede lotu wabo nai sao wai, tama te Jerusalemba ma selasa pelama, tama te Godigo gesi beba mugi pao. Polobadu te king Nebukatnesargo te nai dabe te Jerusalemde selama, te Babilonba sela pali, tiali goli te megi te nai dabe tigidali ma selasa pomainao wai,” te bukude te tiwai po elaluali. 
King Dariusgo te bukude asęani po page odolama da, teda agai te pas me deli asęnama, tama aga ofisa dabego po wei ponoyu, te tama po wai, “Siade dao, Tatenai, te wę Yufretis u tǫ pedai badu bidibo gavman polalubo bidi dao, tama te Setar Bosenai, tama te duga si dali deli sę ebo bidi dabe dageba obao. Eno e tama po elalubao. Te Juda dabego te Godigo be sę emainogo sula tagalao. 
Dagego augwali genama me panigio. Te Juda polalubo gavman bidi dali, te aga tobolu bidi dabe dali, augwa te Godigo be te polobadu sę yaluali madi ma sę emainao. 
Tama tialima, eno megi po bomo elama, dagebolo obao. Dagego augwali te be sę ebo sę tau siąo. Dagego te sę ebo bidi dabe maiabo mone dodoliyu, tama augwali te sę yabo nai dabe abelainu ebaso da, teda dagego mone augwalibolo polo mayu yao. Dagego te mone te duga te wę Yufretis u badu provins dabede bidibo bulu bidi hanigo te mubo takis mone selama, tama te sę yao. Dagego te tama tiyu da, tama te sę me tulalugobeo. 
Te Juda pris dabego dagebolo te magi nai augwaligo dagebolo te dagalude bidibo Godiba ofa yabo nai mao po obaso da, teda dagego augwaliba te tigidali sogo maiąo. Te augwaligo te bulmakau ogwa bidi, me te sipsip, ma te sipsip wai ma wit, me te tamu dabe, me ma te wain, ma te oliv ni du wel me, te sabo homu wei ebaso da, teda dagego augwaligo te ofa emainu maiąo. 
Dagego te tama tibaso da, teda te augwaligo te augwa dagalude bidibo Godiba te wiegi yai ofa ebaso, tama te agai wei eyu godolo homu mu yaibao. Tama augwa te Godiba gedu haluasa po weyu, te enaba me, te eno ogwa dabeba me, te bugagia bidimainu te tama tiaibao.” 
“Tama odao, eno bomai po me deli elalubao. Te bidi me deligo eno te po wali me pisąbaso da, teda eno sę bidi dabego te agai be paliali ni nami me deli dagala samainu yaibao. Tama augwaligo te ni nami polama, tama te bidi enama, isimainu yaibao. Tama augwaligo agai be dolama, tama te pobele bage pesage holobo tiwai pedelaibao. 
Godigo te bulu Jerusalem naga sa muai dao, te aga bidibo pesage tiwai elaluai. Tama aga digi te mena king ma te we bidi hanigo eno te po sela sąyu, tama Godigo te Jerusalemde elalubo be dolobaso da, te God aga digi te bidi aiyaba elalueibao. Ena Darius, eno te po wali dao. Dage tigidaligo eno po wali piąo,” wai. 
Te gavman polalubo bidi Tatenai, me Setar Bosenai, tama augwali si dali deli sę ebo bage dali, augwaligo te kingo pas salio, tialima augwaligo agai po tigidali bugagia wali palio. 
Tama tibaso, te Juda dabe tobolu bidigo te Godigo be sę ebo sę te bugagia dolasa mu yalio, tama profet Hagai me profet Sekaraia augwali sigo te augwaliba wiegi yai po weyu, te augwali sę bomo emainu yai. Tama augwali te sę ela pidubadi genama, te be sę siligi paboba usu nanio, te augwa Godigo wali po tiwai gilama yali, tama Sairus, me Darius, me Artaserksis, te Persia tǫ pedai king bidi sela, augwaligo me te tiwai bomai po wai dao. 
Augwaligo te sę silali te polua Adar, dei sela wabo side, te kibu be 6 wabo kibu bede te Darius king bidali sogo dao. 
Tama tialima, te pris dabe me, te Livai dabe me, tama gasa Israel we bidi tigidali te Juda tǫba ma asalio, tigidali te wiegi yai homu pemene elama, tama te be te Godigo be da olama, te tedali gasagi yai be sa muai dao. 
Te augwaligo te tama tiali sogo, teda augwaligo te bidi sese a naga te 100 kibu bulmakau sali, te 200 sipsip kibu omai sobadi, te 400 sipsip kibu wai sobadi elama, tama tigidali te Godiba ofa yalio. Tama augwaligo te nogo si olama, sągągo si, te 12 meme kibu omai te dwai sę yali sęgę sela sąwainu salio. Tama augwa te tigidali Israel hani deli deligo sęgę sela sąyu, te deli deli dononama ofa ela palio. 
Tama me, te augwa Godigo be tomode te Jerusalemde sę yabo pris bidi dabe, me Livai bidi dabe augwa hani dabe dodolama te nigilalio, te Mosesgo polobadu asęani bukude wali po tiwai gilama te tama tialio. 
Te nosali da wabo kibu bede, te namba wan polua nanobo polua, dei 4 wabode, te Juda we bidi augwaligo te genuai nai daa tubo sogo, te Godigo augwali Israel dabe te Isipde dolisąwani, te sogo muani bodolu pedalubode te Pasova genuai nai daa tuyu yai dao. 
Tama tigidali te pris dabe me, Livai dabego me, augwali te God gedude te magi meda meni yai dwagi yai pedalabo yabo kolesaga wali palio. Augwali te magi meda meni yai wiegi yai pedelama da, teda te Livai dabego te sipsip wai elama, te genuai Pasova side ofa eyu yai. Te ofa dabe yali te we bidi tigidali ma asela silali olama, te ofa eyu, tama te pris dabe me Livai dabe augwade digi me te tama ofa eyu yai dao. 
Te Juda buluba ma asali Israel we bidi tigidali, augwaligo te ofa yali sipsip mi tualio. Tama te tǫde mu bidali gasa Israel hani we bidi, te Babilonba polobadu pesiąwai hani bage, tama augwa te polobadu dwai sę yali tagalama, tama te Israel dabego Genuai Bidi Godiba lotu wabo ma gagalobo we bidi, augwaligo me te ofa yali sipsip mi tualio. 
Augwa te wiegi yai homu pemene ebo te me sela, me sela, me deli, te 7 tama sogo elama, tama te bo disąwai nai bret tuali sogo, te genuai side yali kolesaga te wali palio. Augwaligo homu pemene yali te genuai mu yai, magi baso meni, Genuai Bidigo te Asiria king bidigo haliga wiegi yai ilibaso, tama agai augwali tau selama, te augwa Genuai Bidi Godigo tempel be ma sę yai dao. 
