﻿Esra.
10.
Esra te Godigo be sunumi pąba pelama, tama aga digi te tǫba degasa dulama, tama aga gela weyu, tama te dwai sę yali sęgę sela sąbo po pusalio. Agai te tama tidubadi, tialima te genuai hani Israel we bidi wai puluba te aga pąba sisinagaselama, tama augwali me te dwai homu dene ebo gela mu walio. 
Tialima Sekania, te Jehielgo ogwa te Elam hani, aselama, te tama po Esrabolo wagasali, “Mu tama, dago te Godigo po sela sąyu, dago te bulu badu Godigo po odisąbo hani we dabe sali sogo tama tiali, tiali goli dago te dwai sę kolesaga tagalabo sunumi te elalubao, te tama tibaso, te Godigo da me dologobeo. 
Tialima, megi da, dago dena Godiba te dąų wabo bomai po weyu, te bulu badu sali we hani dabe te wai dabe dali sela sąnama, tama augwa page buluba ma tagala palaibao,” po wali. “Nage dali, te gasa bidi dabe daligo te Godigo bomai po wali pabo bage, te dagego te dago yabo tigidali sę po te dabolo walao,” po wai. “Tama dago te dagego po wali peyu, tama te kolesaga te Godigo bomai pode wali gilama te dago tama tiaibao. 
Tama te sęgę te dodolabo te nago digi elalubao. Tialima, tagalao, wi igio. Polo hogodama, dodolao. Tama dago te deli haliga nage dali elama bidiyu, tama nago po tigidali wali peyu bidaibao,” po wai. 
Tama te Esra hodalu, te po bomonama te polalubo pris bidi dabeba, me te Livai bidi dabeba weyu, tama te tigidali Israel dabe augwaligo me augwa digi dąų wabo bomai po me deli te Godiba weyu, te Sekaniago wali po tiwai waiyąo wai. Tialima, te augwaligo tama tiwai yai dao. 
Tama Esrago te Godigo be sunumide bidali tagalama, tama te Jehohanango be habu tomoba pali, te Eliasipgo ogwa da. Tama aga te be habude bidiyu, tama aga te Israel dabego yali dwai kolesagade homu dene ebaso, tama gela hauwa mu wali. Tama te sogo aga nai me wę me tubeo. 
Tama te Juda polalubo bidi dabe, me te tobolu bidi dabego te bidi meba tagala palama, te Jerusalemba ma asali bidi dabe, me te Juda meba bidi dabe te sugi pomainu yai. Augwaligo te bidi dabeba te tiwai po wali, “Te sela sogo silisąma, te elalubadi tama dage te Jerusalemba sisinagasao,” wai. “Tama te bidi me deli sabalisiąbaso da, teda augwaligo te agai doado bage tigidali te augwa selama, tama te tempel be sę eboba munama, tama agaduba digi naga te da Israel hani we bidi tomode sela sąwaibao,” te po wali. 
Augwaligo te tama po pusulama, te sela sogo nosali, te 9 polua dei 20 wabode, te tigidali Juda hani we bidi, me te Benjamingo hani me, te Jerusalemba sabolama, tama te Godigo tempel be pąba sisinibo pesage teba sisinai. Tama te sogode te genuai tulubage tulama, tama te tigidali bidi te tulubage dolama, tama augwali gogo elama, didibili ilalio. Tama me te augwaligo te wainu yali pode te moni homu elama, tama augwali te midigi dwai siyu iduali. 
Tialima, pris Esra hodaluama, tama augwaliba te tiwai po wali, “Dagego te Godigo bomai po wali pisąbo hani bidi dabego wegi sali, te Israel hani isąwai bage, tama te tiali kolesagago te Godigo po sela sąnama, tama da Israel dago sęgę te genuai pedelali. 
Tialima, odao. Dagego duga te dwai kolesaga yali sęgę te Godiba pusuiąo, te dago wąį nǫų dabego Genuai Bidi dao. Tama dagego te agai wei elama godolo yabo kolesaga tigidali wali piąo. Tama dagego te dago tǫde bidibo te bidi hani dali kisiligi me pigimio, tama dagego te bulu badu te Godigo po wali pisąbo hani we dabe sali te sela sąiąo,” po wai. 
Tialima, te bidi dabego te bomonama i weyu, te tiwai wali, “Nago po te dolo da, tama dago wali paibao,” po walio. 
“Tiali goli, da te genuai hani mu elalubao, tama me te genuai tulubage me tulubao,” wali. “Tama da te bulu badu sesegede dolalu, te sę dodolainu ebaso, te usu egobeo. Da bidi hauwago te dwai kolesaga yalio, tama tiyu te dago polo tama me dodolainu ebaso te usu egobeo,” wali. 
“Tama dago te homu ebao, te dago polalubo bidi dabego te sę tonalumai da homu ebao. Tama augwaligo te bulu badu hani dabego wegi te we sali bidi dabe augwaliba te po olama, te nisu sogo te deli deli bidi te Jerusalemba aselama, te sęgę dodolagasomainao homu ebao. Tama te bidi me deli asobo side, te tobolu bidi me te aga taunde po tų odobo jas bidi te aga dali asomainao. Dago te tibaso da, teda te Godigo haliga sębę yali te sia saibao,” te po wali. 
Augwaligo te miani pode tigidali bidi dabego usu da wali, tiali goli Jonatan, te Asahelgo ogwa, dali Jasea, te Tikvago ogwa, augwali sigo homu usu meni yai. Tama Sabetai, te Livai bidi me deli, te Mesulam, augwali sigo me usu isąwai, tama augwali sigo me te Jonatan de Jasea sigo wali poba homu munama, te po dąų walai. 
Te bidi me si me sigo naga te usu egobeo, tiali goli tigidali gasa bidigo te usu da olama, te sęgę dodolabo polalubo bidi meba nigilao wali. Tama tialima, Esrago te tobolu bidi nigilama, te augwali nogi buku me delide asęani. Tama te nogo si polua dei delide, augwali te bulu badu hani we dabe sali bidi dabe te asomainu gagalama i wali, te augwali aselama, te sęgę dodolagasomainogo yalio. 
Augwaligo te sę ela pali, te nosali kibu bede polua selaba usu nama, tama te sę silalio. 
Te bulu badu we dabe sali pris dabego nogi e tiwai dao, Masea, me Elieser, me Jarip, me Gedalia. Augwali te Josuago hani da, te Jehosadakgo ogwa, te bidalio. 
Augwaligo te bomai po dąų waliyu, te augwa te sali we sela sąwaibao wali, tama augwa te kibu sipsip omai me deli selama, tama te Godiba ofa elama, te augwade digi elaluali dwai sęgę sela sąmainogo tiali. 
Tama Hanani me Sebadaia, te Imer hani dao. 
Tama Masea, me Elaija, me Semaia, me Jehiel, me Usia, te augwali Harimgo hani dao. 
Tama Elioenai, me Masea, me Ismael, me Netanel, me Josabat, me Elasa, te augwali Pasur hani dao. 
Te Israel hani isąwai bulu badu we dabe sali te Livai dabego nogi e tama dao, Josabat, me Simei, me Kelaia, te aga gasa nogi me Kelita, me Petahia, me Juda, me Elieser dao. 
Te musik ebo konea pai bidigo te bulu badu hani we dabe sali bidi nogi e tama, Eliasip dedeli digi naga dao. Te Godigo tempel be sunumi tonalubo sę bidi dabego te Israel hani isąwai we dabe sali bidigo nogi e tiwai, Salum, me Telem, me Uri dao. 
Te Israel gasa bidi dabego te Israel hani isąwai we dabe sali bidi dabego nogi e dao, Ramia, me Isia, me Malkia, me Mijamin, me Eleasar, me gasa Malkia, me Benaia, te Paros hani dabe dao. 
Tama te Matania, me Sekaraia, me Jehiel, me Apdi, Jeremot, me Elaija, te Elam hani dabe dao. 
Tama Elioenai, me Eliasip, me Matania, Jeremot, me Sabat, me Asisa, te Satu hani dabe dao. 
Te Jehohanan, me Hanania, Sabai, me Atlai, te Bebai hani dao. 
Mesulam, Maluk, me Adaia, me Jasup, me Seal, me Jeremot, te Bani hani da. 
Te Atna, me Kelal, me Benaia, me Masea, me Matania, me Besalel, me Binui, me Manase, te Pahatmoap hani dabe da. 
Te Elieser, me Isiya, me Malkia, me Semaia, me Simeon, me Benjamin, me Maluk, me Semaria, te Harim hani dabe da. 
Te Matenai, me Matata, me Sabat, me Elifelet, me Jeremai, me Manase, me Simei, te Hasum hani dabe dao. 
Te Madai, me Amram, me Uel, me Benaia, me Bedea, me Keluhi, me Vania, me Meremot, me Eliasip, me Matania, me Matenai, me Jasu, me Bani, me Binui, me Simei, me Selemia, me Natan, me Adaia, me Maknadebai, me Sasai, me Sarai, me Asarel, me gasa Selemia, me Semaria, me Salum, me Amaria, me Josep, te gasa Banigo hani dabe dao. 
Te Jeiel, me Matitia, me Sabat, me Sebina, me Jadai, me Joel, me Benaia, te Nebo hani dabe da. 
Te tigidali bidi hani dabego te bulu badu Godigo ebo kolesaga wali pisąbo hani dabego wegi dabe sali hani bidi dabe nogi te dao, tama tialima, te hani dabe augwaligo te sali we dabe te sela sąnama, tama te we dali, me te wai dabe dali, te augwa page buluba ma tagala palai dao. 
