﻿Nehemiago Po Asęai Buku.
1.
Te wali po Nehemia, te Hakaliago ogwago, asęani. Te bidi sese deli kibu bede, te 20 yia wabo side, te Artaserksis te king bidali side, tama te polua Kislev, tede ena Nehemia, ena te gavmango polalubo moni taun, te Susade bidali sogo tama tiai dao. 
Tama te sogo Hanani, te eno ama me deli, te hani bage me deli dali, augwa te Juda tǫ taga soyu, tama digibulu aselama, te Susa taunba sabolali. Eno augwali sisinama, tama eno augwaliba te tama po hanalu wali, “Eno te Juda hani dabe meba te kalabus yagasali pesage, e Babilon bulu tagalama, te Jerusalemba ma pali bagede, te po eno koneainogo hanalu obao,” wali. “Te augwali bugagia bidibawe, ma meniwe? Tama te taun Jerusalem me, te bugagia elalubawe, ma meniwe?” Eno te po te bidi si hanalu wali. 
Tialima, augwaligo po wei ponoyu, te po wai, “Menio,” wali. “Te hani we bidide genuai sęgę elalubao,” wali. “Tama te Godigo bomai po wali pisąbo hani dabe, te Israel hani isąwai bage, te augwali pąde bidiyu, te augwali dolobo sę ebao. Tama te Jerusalem bagulali moni masigi obo dolali me tama elalubao. Tama te sunumi obo te siago polobadu ulali, te dabe augwali me te tiwai naga elalubao, tama te Jerusalemde bidibo bagego te nigabo homu me ebeo,” wali. 
Eno te po odama da, teda ena duagulama, tama ena gela hauwa mu wali. Tama ena haliga sęgę me elaludu, tama si sela sogode eno te nai osogo habu selama, tama eno Godiba gedu haluasa po weyu iduali. 
Eno e tiwai gedu haluasa po wali, “God, Genuai Bidi, nage te dagalu tonalubo bomai bidi da, tama da Israel dabe nage dologoba pelama bidibao. Nago te dąų wali bomai po te kontrak me deli da dali yali elalubao, tama dago nage godolo mu elama, tama nago po bugagia mu wali pobaso da, teda nago te dąų walali bomai po kontrak te me tagalisiąma, tama nago da godolo mu ebo dao. 
Genuai Bidi, te giligade me hulide eno nageba hanalu, te Israel dabe tau sao obao, te augwali nago sę bidi me sę ebo we dabe dao. Tama tialima, eno homugo nago eno te gedu haluasa po wabo te bugagia odao. Eno te tiwai hania hanilama mu obao, ena dali, te eno wąį dabe dali, dago te dwai sęgę salio. Tama dago naga te sęgę me ebeo. Menio. Te Israel we bidi tigidaligo te sęgę sela silai dao. 
Dago dwai kolesaga te nago gedude eyu, tama dago te nago po wali me pabeo. Polobadu nago bomai po te naga sę bidi Mosesgo nogoba mawai, tiali goli dago te bomai po dabe wali me pisąwai dao.” 
“Tiali, goli nago te Mosesba mani e tiwai pode te nago homu kone ebo me gegeda paligio, ‘Te dagego ena tudiba mubaso da, teda eno dage e tǫdu sela sąnama, tama dage te gasa tǫ pedaiba tedela palama, bidigi paibao,’ wali. 
‘Tiali goli, dage te bulu tǫ pedaide bidiyu, te enaba homu begelama, tama dage enaba ma aselama, tama eno po wali pobaso da, teda eno dage te bulu me deli te dagego enaba lotu po omainu te sa muani buluba ma odasa asaibao. Te dage digibulu tǫ pedaide tigidalide bidibadi goli, te tagalao, te eno dage te bulu tǫ pedaide selama, ma odasa asaibao,’ nago te po Mosesbolo wali. Genuai Bidi, da te nage pageba ma asali dao, tama tialima, eno nageba hanalu, te nago dąų wali bomai po wali pelama, te da megi tama tau sao po hanalu obao,” walio. 
“Genuai Bidi, da Israel te nago sę bidi, me sę we tiwai dao. Tama da te nago we bidi dabe mu da. Te nago genuai bomogo nago da te boi bidi dabego nogode polobadu ma salio, tama da mu hagabeo. 
Tama da tigidali Israelgo te nageba wiegi yai homu pemene elama, tama nago nogi ugwaba sobao. Tama eno homugo megi nago te tigidali Israelgo gedu haluasa po wabo odomainu homu ebao. Tama me te nago megi eno e gedu haluasa po wabo me odao homu ebao. Tama eno te king sugi pabo si da, teda nago digi te kingo ena homu dene emainu ilama, tama agai ena tau somainu yao.” Eno te gedu haluasa po te ena kingo sę bidi bidali sogo wali. Eno sę te kingo wain ąį tonalubo sę yali, tama te wain wę sela pelama, te kingo tumainu magi pabo sę yai dao. 
