﻿Nehemia.
9.
Tama te poluago digi, te dei 24 wabode, te Israel dabe sisinagasai. Tama augwa te nai osogo tubo habu selali, te augwa sęgęde te homu dene ebo tiwai te augwa Godiba ola mayu tiali. Tama augwa te homu dene ebo ugwa dabe gudama, tama augwa toboluba te hogomu dabe muani, te augwa homu dene ola mabo tiwai ilali. 
Te we bidi augwaligo te Israel hani isąwai hani bidi dali kisasa bilali kolesaga te tagalali. Tama augwali dolalu, te augwa sęgę me, te augwa wąį nǫų dabego sęgę me pusali. 
Tama te sela auade te bidi mebago te augwa Genuai Bidi Godigo bomai po te augwaliba neda mobaso, tama te we bidi dabego olo bugagia muai. Tama nosali, augwaligo te augwa sęgę pusulama, tama Godiba lotu ma udubadi, te sela aua usu nama bidali. 
Te Livai meba te po pusubo pesageba dolugulama, tama augwa Genuai Bidi Godiba i bomo elama weyu, tama augwa agaba gedu haluasa po wai. Te Livai dabego nogi te tiwai, Jesua, me Bani, me Katmiel, me Sebania, me Buni, me Serebia, tama gasa Bani, me Kenani dao. 
Tama nosali te Livai mebago te we bidi dabeba po weyu, te augwaligo Godiba lotu ma waiąo po wai. Te Livai dabego nogi e tiwai, Jesua, Katmiel, me Bani, me Hasapnea, me Serebia, Hodia, Sebania, me Petahia. Augwaligo te tama po wali, “Dage dolugulama, te dena Genuai Bidi God nogi ugwaba siąo Sesemane bidada pabo sogo sesemane dago te aga nogi ugwaba sao,” wai dao. Tama augwa te gedu haluasa po wali, “Genuai Bidi, dago te nago genuai nogi ugwaba sainu ebao. Tiali goli, dago te wiegi yai pemene ebo homu te olo nai tiwai ebao. Nago nogi te genuai mu da, tama tiyu dago konebao, dago pemene ebo te nago gedude usu meni ebao. 
Nagaduba deli naga nage Genuai Bidi da. Nago te dagalu me, hǫ dabe me, tǫ me, tamu ąį, te tigidali elalubo nai augwali nigai. Tama nago te tigidali naiba te bidabo ula mabo dao. Tama te tigidali dagalude bidibo ensel mobo bidi dabego nageba kidu sugunama, lotu po wabo dao. 
God, Genuai Bidi, nago naga te Abram dąį ilama, tama aga te Babilon Provinsde, te taun Ur, tede selama, tama aga odasa asali. Tama nago agai nogi hasegelama, tama te nogi Abraham agaba mawai dao. 
Nago agai homu haliga tomode suali, te nage naga wali pabo homu bomo yai, tama tibaso nago aga dali te bomai po dąų walali. Tama nago agabolo te po dąų waliyu, te Kenan dabego tǫ, me Hit dabego tǫ, me Amor dabego tǫ, me te Peres dabego tǫ, me Jebus dabego tǫ, me te Girgas dabego tǫ, te maiabo po dąų wai. Tama nago te po wali, te tǫ te aga wąį nǫų dabego tǫ pedalaibao wali. Tama nago naga te dąų wali po me togobeo, magi baso meni, nago kolesaga te doloba pai mu elalubo dao.” 
“Tama nosali te dago wąį nǫų dabe te Isipde bidali sogo, te Isip dabego augwaliba genuai sęgę mabo nago suali. Tama nosali augwaligo te Isip tagalama, te tamu ąį Retsi teba sabalu, te augwali tau sao olama, te nageba gela wabo nago odalio. 
Nago te Isip king me, ofisa dabe me, te Isip we bidi dali, te augwali aiyaba elaluainu te nago gasagi yai tedali bomai sę me yai. Nago tama tiali, magi baso meni, te Isip dabego naga we bidi dabeba te dwai sę mu ebo nago suai. Te sogo nago naga bomo te tigidali we bidiba ola mawai. Tama augwaligo nageba genuai nogi mena mena asali, te megi e sogoba usu nagasobao. 
Nago po obaso, tama te tamu ąį si badu buga selama, tama tǫ wa pai nigilai, tama te we bidi dabe te tomodu peyu, te u badu pedaiba sabolali. Tama te Isip ami dabego nago we bidi pobeasa asali, tiali goli nago te tamu ąįgo te Isip dabe augwali mesega somainu elama, tama augwali te węba masigi tiwai dulama, te augwali ela silai dao. 
Te giligade te ula elalubo sogo nage te pǫ me deli tomode bidiyu, tama te Israel dabe augwali asobo badu te nage polasa pali, tama augwaligo nage wali asali. Tama te be hulia sabode, nage te sia tomode bidiyu, tama nago ulago te augwali pabo sunumi ola mawai dao. 
Tama augwali te Sainai bulu duba sabalubo sogo, nage te dagalude bidiyu, tama augwaliba po miai. Tama nage aiyaba dulama, nage te bulu dude bidai. Tama nago augwaliba te wiegi yai doloba pai bomai po mawai dao. 
Tama nago augwaliba te po waliyu, te Sabat genuai side te bodolu nageba mubo tiwai nigilao po wai. Tama nago te haniani bomai po tigidali te dago wąį nǫų dabeba mayu, te naga sę bidi Moses nogoba muai dao.” 
“Te augwali nasi ebo sogo, te nago te tubo nai dagaludu dulumainu ilama, te augwali tumainogo yali. Tama augwali te wę nogone ebo side, nago te masigide wę pedalumainu elama, te augwali tumainogo ilali. Tama nago augwaliba weyu te augwali mawaibao olama, te po dąų wali tǫ te sagameo wai.” 
“Tiali goli, dago wąį nǫų dabego te hagoma mu eyu, tama augwa tobolu te dila pelama, tama augwaligo te nago po sela sąwani. 
Tama augwaligo nago po wali pabo hagela yali. Te nago augwali tau selama, te bomai sę genuai tigidali yali te augwaligo homu konesiąyu gegeda palali. Tama augwali hagoma mu elama, tama augwa te tobolu bidi me deli nigilama, te augwa kalabus sę yali Isip tǫba ma odasa pomainu yali. Tiali goli, God, nago da tǫde we bidigo sęgę sela sąbo dao. Tama nago da godolo geninama eyu, tama daba wiegi yai sę mu ebo da. Tama nago haliga sębę polo me egobeo. Menio. Nago te olo mu tau sabo wiegi yai homu kolesaga te umabo me elalu, tama tiyu nago dago wąį nǫų dabe tudiba me mubeo.” 
“Te augwali Sainaide bidali sogo, augwaligo te gol selama, tama te bulmakau piksa nigilama, tama augwaligo te po weyu, te bulmakau augwa god da olama, tama agai augwali te Isipde selama odasa asai da, walio. Tama te kolesagade te augwaligo nago nogi posoyu dolai dao. 
Augwaligo te tama tiwai yali, tiali goli nago augwali te tǫ wa pai bulude me tagalobe, magi baso meni, nago te olo tau sabo wiegi yai homu kolesaga mu augwaliba yai. Nago te augwali giligaba sunumi ola mabo pǫ te dagala me sabeo, tama nago te augwali be hulia saidu pobadi, te sunumi ola mani sia ula, te me dagala sabeo. 
Nago te naga wiegi yai Mobo Noma Bidi te augwaliba mayu, te augwali ola momainogo yai. Tama nago te tubo nai mana me wę augwali menama, te augwali te nai me wę dali tumainu yai. 
Augwali te kibu be bidi sese si te tǫ wa pai bulude bilidubadi yali, tama te kibu be tigidalide te nago augwali nai madu bugagia tonaludali. Tama augwaligo gudali ugwa dabe me te me pisila pisąma, tama augwali sągą me dene elama me dabeo.” 
“Nago te dago wąį nǫų dabego te king Sihon te Hesbon bulu tǫ bidi dali, me tama te king Ok te Basan tǫ pedai bidi si dali hwįmainu ilali. Tama augwaligo te augwali si aiyaba elaluama, tama augwali sigo tǫ salio. Tama te tǫ te augwa genuai tǫ pedai mu pedelai dao. 
Tama nago augwaliba te wai dabe hauwa mawai, te dagalude elalubo hǫ dabe tiwai pedelali. Tama nago te augwaligo te boi bidi dabe aiyaba elalumainu ilama, tama nago te augwa bulali wąį nǫų dabeba mawainu te po dąų walali tǫ somainogo yai dao. 
Tama augwaligo te Kenan hani bidi dabe dali te boi hwįani sogo, nago digi te Kenan dabe aiyaba elalumainu ilama, tama te bulali wąį nǫų dabego te tǫ somainu yali. Tama augwaligo te hani aiyaba elalubo sogo, tama nago te augwa homu kolesaga wali pomainu elama, tama te we bidi dabeba dene mabo sę dwai ilali, tama te Kenan tǫ king dabeba me te dwai mu yai dao. 
Tama dago bulali wąį nǫų dabego te boi hwįnama, tama te bomai obo banis elalubo taun siyu, tama te ili hauwa elalubo tǫ sobadi, te doado bage hauwa pągąnalubo be dabe me sali. Tama augwali te bidigo nigai dwasianu sigi ąį dabe sali, tama te wain gi, me oliv ni gi sobadi, tama te wiegi yai nai hauwa elalubo tobage ni dabe me salio. Tama augwali te bulu tǫ pedaiba bidigi pali sogo, augwa te wiegi yai nai hauwa tuyu, te augwa tigi genuai nisali, tama nago wiegi yai nai tigidali augwaliba mawai baso, te augwali homu wiegi yai pemene mu yai dao.” 
“Tiali goli, te we bidi augwali te hagoma mu elama, tama augwaligo nago po sela sąwai. Tama nago bomo yai poba augwaligo tudi ola mawai. Tama nago te profet bidi dabe augwaliba tagala palali, te augwaligo te nago bomo yai po augwaliba magasu asali, te augwali homu begelama, nageba ma asomainu yai. Tiali goli, augwaligo te profet dabe ela muani. Tama hauwa sogo augwaligo te tiwai kolesaga yali, tama augwaligo nago nogi mu dolai dao. 
Tama tibaso, nago augwali gogolama sula tagaliyu, te boi bidi dabego augwaliba boi hwįagasomainu elama, tama augwali aiyaba elaluama, tama augwaliba dwai sę ilali. Tiali goli, nosali te bulali wąį nǫų dabego nageba hanalu, te augwali tau sao olama, i wali. Tama nage te dagalude bidiyu, tama augwaligo gela wabo nago odali, tama nago te olo tau sabo wiegi yai kolesaga augwaliba umabo mu elama, tama nago te bidi meba augwaliba tagala palama, te boi bidi dabe sela sąmainogo yai dao.” 
“Tiali goli, te augwali bugagia ma dugulalu bidibo sogo, polo tama augwaligo dwai sę ebo kolesaga ma ebaso, tama nago te boi bidi dabego augwali aiyaba elalumainu elama, te augwali tonalubo sę yai. Tama te sogo me augwali homu ma begelama, tama augwaligo nageba hanalu, te augwali tau sao wai. Tama nage te dagalude bidiyu, te augwaligo i wabo odali. Hauwa sogo augwaligo te tiwai kolesaga naga iduali, tiali goli nago wiegi yai homugo olo mu tau sabo kolesaga augwaliba iduali, tama tigidali sogo nago augwali te boi bidi dabego nogode ma dobola sidu geai dao.” 
“Nago po bomo elama augwaliba weyu, te nago bomai po wali pomainu yali. Tiali goli, augwaligo hagoma eyu, tama augwaligo nago bomo yai poba tudi ola mawai. Augwaligo koneani, augwaligo te bomo yai po wali pobaso da, te augwali bugagia bidimainu yai. Tiali goli, augwaligo tobolu te dila pelama, tama augwaligo tabi haliga te dagana sali, tama tiyu te augwaligo nago po wali me pisąwai dao. 
Te kibu be hauwa nago dua dua tau sabo sę augwaliba eyu, tama augwali homu begeliąo wai. Te nago Mobo Bidigo te po te profet dabeba mawai, tiali goli te wąį nǫų dabego te po odisąwai. Tama tibaso, nago augwali te gasa bulu tǫ pedai bidi dabego nogoba mawai dao. 
Tiali goli, nago olo tau sabo wiegi yai homu kolesaga te genuai mu elalubo, tama tiyu nago augwali tudiba me musąma, tama nago augwali mu dolomainu me ebeo. God, nage te olo mu tau sabo wiegi yai homu kolesaga me homu dene ebo page bidi mu da, tama nago da wei eyu, godolo mu ebo dao.” 
“Dago God, nago genuai nogi me genuai bomo elalubao. Da tigidali te nago bomo dologode bidibao. Tigidali sogo nago te naga dąų walali bomai po wali pelama, tama nago dabolo te olo mu tau sabo wiegi yai kolesaga ebao. Megi da te genuai sęgę tolai, tama tiyu dago homugo nago da homu koneama tau sao. Polobadu te Asiria king dabego te dago kingba, me tobolu bidi dabeba, me pris, me profet dabeba dwai sę eyu, te dago wąį nǫų dabeba me te tiwai yai. Tama te sęgę dade elalua asidubadi, te megi e sogoba usu nagasobao. 
Dago te dwai sę ebo kolesaga ebaso, tama nago te daba dene ilibo sę yali. Tama nago te kolesaga te dolo ebao. Sesemane sogo nago te naga dąų walali bomai po wali peyu, tama nago da tau sali, tiali goli dago hagoma eyu, tama dwai kolesaga haniani ebo dao.” 
“Mu tama, te dago wąį nǫų dabe, me king dabe, me tobolu bidi dabe, me pris dabe, augwaligo te nago bomo yai po wali me pisąwai. Te nago bomo yai po augwaliba weyu, te nago po tigidali augwaligo wali pomainu yali, tiali goli te augwaligo te po odobo hagela homu eyu yai dao. 
Te dago king bidali sogo, nago te wąį nǫų dabeba wiegi yai sę mu eyu, tama augwaliba wiegi yai nai mawai. Augwali te genuai tǫ pedaide bidalu, tama te tǫ ili umabo hauwa elalubo genuai tǫde bidai. Tiali goli, augwaligo te homu kone palobeo. Menio. Augwaligo te dwai sęgę sabo sę naga iduali, tama augwali homu begelama, te nageba ma asobeo. 
Megi da te wiegi yai tǫde ma bidibao, te wiegi yai tǫ nago te da bulali wąį nǫų dabeba mawai. Te wiegi yai ili elalu, tama dago tede nai hauwa siyu yali. Tiali goli, da te gasa hanigo olo sę ebo bidi tiwai bidibo dao. 
Dago te dwai sęgę sabo sę yalio, tama tibaso nago te gasa bulu tǫ pedai kingo da tonalumainu yai. Tama augwaligo te dago tǫde pedalubo nai tigidali siyu ebo dao. Te kingo te po obaso da, teda dago dali te dago tonalubo nai kibu dabego me te agai homu wali naga pabo dao. Tama tiyu, dago sęgę genuai mu elalubo dao,” augwaligo te po wali. 
Te gedu haluasa po ola silama, da tigidali Israel we bidi da tigidaligo te daba pedalubo sęgęde homugo kone palama, tama dago homu deli elama, tama tialima te Godigo bomo yai po dago wali mu pabo homu eyu, tama te da dąų wabo bomai po me deli asęani. Tama te dago pris dabe dali, te Livai dabe, me tobolu bidi dabe, augwali aselama, tama te kontrak asęani pode augwa dąį ilama, tama te po bomo elama dąų walai dao. 
