﻿Esta.
4.
Mordekaigo te pasde elalubo po odali sogo, te aga dwai wi mu yali. Te aga homu sęgę mu ebaso, tama aga ugwa pisąwali. Tama agai te pipisila pai badi ugwa munama, tama te sia keli te aga tobolude muani. Agai muna silama, tama aga te hanu tomoba pali, tama gela genuai weyu, tama homu dene ebo balia wabo sę yai. 
Aga pelama, te tuni bidi kingo be sunumiba sabolali, tiali goli aga tomoba pabe, magi baso meni, te bidi be tomoba painu da, te aga dwagi yai ugwa bolo hasia munama pabo dao. 
Tama augwaligo te tuni bidigo po te tigidali tǫ pedai provinsba pusali sogo, te Juda dabe tigidali homu sęgę mu eyu, tama i dwai mu wali. Augwali nai me tube, tama augwali dwai gela udu, tama homu dene ebo balia po wedu bidali. Tama Juda we bidi hauwago te ugwa pipisila pai gudama, tama augwali te sia nogobo kelide pilala palio. 
Te Estago sę ebo we dabe, me te aga tonalubo bidi dabe, augwaligo te Mordekaigo yali kolesaga po agabolo obaso, tama Esta homu sęgę mu yai. Agai te gudubo ugwa meba te Mordekaibolo tolali, te agai dwai hasegelama, te dwagi yai ugwa gudumainu yali. Tiali goli, Mordekaigo te ugwa sabo hagela yai. 
Tama Estago Hatak i olama, asali. Hatak te we dabe tonalubo bidi me deli, king tuni bidigo te Estago sę emainu nigilali. Tama Estago Hatak te Mordekai bidibo madi tagala palama, tama mena sę mu agaba pedelali te konemainu, tama magi elama te tiwai pedelali te konemainu, te Hatak tagala palai. 
Tialima, Hatak te Mordekai bidibo madi pali, te bidi sisinibo pesageba, te tuni bidigo genuai be sunumi pądeo. 
Tama Mordekaigo te Hatakbolo te agaba pedelali sę po tigidali wali. Tama Hamango te nisu naga mone te tuni bidigo mone mubo beba mubaso, te bidi dabego te Juda dabe tigidali elimainu te moni mone te king bidigo mone mubo beba muabo po wali, te po me agai wai. 
Tama Mordekaigo te Hamango tolali pas me deli selama, te Hatakbolo mani. Te paside te Juda we bidi tigidali augwali ela muaibao po wai. Mordekaigo Hatakbolo te pas sela pelama, tama te tigidali sę pedelabo po pusao po wai. Hatakgo Estabolo olama, te Esta te tuni bidi bidibo madi pelama, tama te tuni bidibolo hanaluama, tama agai te Juda dabe homu dene ebaso, olo mu tau somainao wabo po hanalugi pomainao, te po wai. 
Tibaso, Hatak pelama, Estabolo te po wagi palio. 
Tama Estago te Mordekaibolo wagi pabo po me deli mawai. 
Agai e tiwai po wali, “Ena pelama, te tuni bidi king eno sugi pogobeo. Te tuni bidigo bidi me deli i obaso da, teda aga te agai te be dąį togwali habu tomoba paibao. Te meniama, tama aga olo pali da, teda augwaligo te bidi ela mubo dao. Te bomai po gedelabo sunumi te deli naga elalubao. Te bidi me aga te tuni bidi bidibo madi olo pobadi, tama tuni bidigo aga te gol donogo nogo tų ilibaso da, teda te bidi aga me isigobeo. Te tuni bidigo sę ebo ofisa bidi tigidaligo me, te haniani provinsde bidibo tigidali olo we bidigo me, augwaligo te bomai po koneani. Tiali goli, te tuni bidigo ena i me wasiąbadi, te polua me deli megi pąde silainu ebao,” Estago te po ola tolali. 
Mordekaigo Estago po odama, tama agai te tiwai po wei ponani, “Mu tama, nage te tuni bidigo bede bidibo, tiali goli, nago homugo nage bugagia bidaibao te homu igio. Magi baso meni. Te nage da Juda we bidi meba dolobo tiwai gilama dolaibao,” Mordekaigo Estabolo te po ola tolali. 
“Te megi e sogo nago pedauwali pania sobaso da, teda gasa nai mego da tau saibao. Tiali goli, nage da isaiba, tama nago we wai hani dabe augwali te mu silaibao. Tiali goli, nage te gavman tuni we kwin pedelaligo te da megi sogo tau sogowe, te dago konebeo,” Mordekaigo te po ola tolali. 
Tialima, Estago te po Mordekaibolo ola tolai dao. 
Agai te tiwai po wai, “Nage pelama, te Susa moni hanude bidibo Juda dabe tigidali sisinama, tama dagego nai osogo gisilama, tama dagego ena homu kone palama, gedu haluasa po wao. Te megi gagalasa, dagego nai me wę me giligade badi, hulide me, te osogo gisilao, te sela wabo sogoba usu nao. Te eno ena sę ebo we dabe dali me, te dago tama tiwaibao. Tialima, te sę elama, nosali ena te king bidigo beba paibao. Tagala, te eno bomai po tama bolaibao. Te eno tama tilama, te ena isibaso da, te po meni, te ena isaibao,” Estago te po wai dao. 
Tama Mordekaigo Estago wali po odama, aga te king bidigo be sunumi pąde bidali tagalama soali, tama pelama, Estago agabolo wali po gilama te sę igi palio. 
