﻿Esta.
8.
Te sogo naga te king Serksisgo te Juda dabe augwalibolo boi bidi yali bidi Hamango be, me tigidali doado bage, te tuni we kwin Estabolo mawai. Nosali Estago tuni bidibolo te po wai, “Mordekai aga ena dali kaneme deli elalubao,” wali. Tama king bidigo te Mordekaigo te we Esta aga sesemane sogo suagasomainu sula tagalai. 
Tuni bidigo te Hamango nogode munaluali nogode holobo ring aga ma selama, tama aga nogode munaluali te ma dilama, te Mordekaibolo mani. Te ringde te tuni bidigo dąį nigilali elaluai. Tama Estago Mordekai sa munama, te Hamango tonaluali doado bage tigidali te Mordekaigo tonalu te tonalumainu nigilalio. 
Nosali Esta te king bidi bidibo digi pelama tama aga sągą pąba degegulama, tama gela udalio. Tama agai king bidibolo te dwai kolesaga yainogo yali bidi dabego kolesaga palimainu hanalu wali, Hamango te tiwai sę emainu te po minama, dąų walai dao. 
King bidigo Esta te gol donogo nogo tų ilama, tama Esta dolugulama, te po wai dao, 
“King bidio, te nago usu da wida, tama nago homugo ena kone palu da, tama nago homugo te dwagi yai nai da homu ebaso da, teda nago po te bidi dabebolo tagala palao, teda augwaligo te Hamango po wali pomainogo me elamuo. Hamango te nago tǫ pedaide bidibo Juda we bidi tigidali mu silimainao te po wai dao. 
Te dolabo dwai kolesagago te eno hani we bidi dabe augwali silidali te homu hagela mu eno ebao. Tama augwaligo te deli kaneme dabe augwali ela mubaso da, teda ena magi elama bugagia bidigowe?” Estago te po wai. 
Tama king bidi Serksisgo Esta de Mordekai si dali te tiwai po wai, “Odiąo, eno homugo te Hamango te Juda dabe augwali dolabo homu ebaso, tama eno aga te nide walali. Tama agai tigidali doado bage, eno te Estabolo mawai dao. 
Tiali goli, te pas augwaligo eno nogide asęnama, tama eno dąį digi tede muani, te eno hasegelibo usu me egobeo. Tiali goli, nago magi po te Juda dabebolo asęainogo da, tagala, te asęyu naga yao. Nago te pas eno nogide asęnama, tama eno dąį ugwadu tede me muao,” king bidigo te po wai. 
Augwaligo te tiwai sę te polua Sivan te 23 dei, tede te kibu be te sela poluade te tiwai yali. Tama Mordekaigo te tuni bidigo sę ebo kuskus bidi dabe tigidali i olama, tama augwali asai. Agai po augwalibolo menama, tama te po augwaligo te pas dabede asęai. Agai te pas dabe te Juda dabebolo me, te polalubo kiap dabebolo badi, te polalubo gavman dabebolo badi, tama te tigidali 127 tǫ pedai provinsde bidibo ofisa dabebolo me, te tǫ pedai provins Indiade gagalasa, te Itiopia teba usu nagaselama, te tǫ pedai tigidaliba te asęani. Te asęani pas dabe augwaligo te augwali tigidali tǫ pedai pogo naga asęnama, tama Juda dabego pogo me asęai dao. 
Mordekaigo augwalibolo te tuni bidi king Serksisgo nogide te pas asęao po wali, tama tuni bidigo dąį te paside muai. Te pas dabe selasa pabo bidi dabe augwali dualasa pabo wiegi yai polo pabo hos dabe augwali te tuni bidigo obo tomode sali, tama augwaligo te pas dabe te tigidali buluba selasa pai. 
Te pasigo te po wai, “Tuni bidigo po olama, te tigidali hanude bidibo Juda dabe tigidaligo te augwali, me augwa we wai puluba dali elainu usu sali te wąbi wei ponoyu hwįmainao,” po wai. “Te Juda dabego wąbi wei augwalibolo ponoyu, te mena gasa tǫdu asai bidigo, me ma te tǫ pedai provinsde bidibo bage. Tama eyu, augwaligo te boi bidi dabego doado bage somainao. 
Te Juda dabe augwaligo te tama tiwai te genuai tǫ Persia tigidali badu elama, te Hamango te Juda dabe tigidali elainu bodolu muani side te tiwai yao. Augwaligo te sę yainu da, te polua Adar te nogo si olama, te sągągo sela wabo, te 13 dei, te 12 wabo poluade te sę yao,” po wai. 
“Augwaligo te po pusuyu, te tuni bidigo bomai po tiwai me deli da olama, tama tigidali tǫ pedaide bidibo tigidali bidibolo wao. Tama tibaso da, te Juda dabe augwaligo sisi elaluama, te side pedalubaso, augwaligo te boi bidi dabebolo te wąbi wei ponomainao,” po wai dao. 
Gavman tuni bidi kingo te po obaso, tama te po sela pabo bidi dabe augwali te hosde dualama, tama polo udada palio. Tama me augwa te polalubo moni genuai hanu Susade bidibo tigidali we bidibolo me augwaligo te po pusai dao. 
Tama augwaligo te tuni bidigo tedela ugwa me te sisi ugwa te Mordekaigo tigiba munama, tama aga te mama bobobage ugwa me deligo aga banulai. Tama nosali augwaligo te genuai gol madi te wiegi yai au elalubo te aga toboluba muai. Aga te au ela selama, tama te tuni bidigo be tagalama, buluba teda soalio. Tama Susa moni hanude bidalubo we bidi augwaligo sulama, tama augwali wiegi yai homu pemene eyu, tama genuai po dągą olama, i wai. 
Tama Juda dabe augwali homu bugagia mu tegaluama, tama nagame yai homu elama bidai. Augwali wiegi yai homu pemene mu elama, tama augwaligo kone palali, te usu si yali homu elama, tama augwali hagabo usu me egobeo homu yai. 
Te tigidali provins badu me hanude me te Juda dabe augwaligo te tuni bidigo po selama, tama augwaligo bodolu me deli munama, augwaligo genuai nai daa tuyu, tama dwagi yai homu pemene yali. Te gasa bidi dabe hauwa te Juda dabe augwalide wi elama, tama augwali te augwaligo hani bageba wadolai dao. 
