﻿Esta.
9.
Megi da te polua Adar, dei te nogo si olama, sągągo sela, te bodolu muani sogo te pedelalio. Hasia bolo king bidigo te po wali, te sogode digi te boi bidi dabego te Juda augwali dolama, tama augwali mu silaibao po wai. Tiali goli, megi da, te Juda dabe hogodaluyu, augwali geanama, tama augwali aiyaba elaluai dao. 
Te tuni bidigo genuai provins dabe te tigidali hanude bidalua pabo Juda dabe, augwaligo dolainu yali bidi dabebolo te wąbi wei sainu sisi ela palio. Tama tigidali tǫ habu badu we bidi tigidali augwali te Juda dabede wi ebaso, tama augwaligo magi sę me deli te augwaliba yainu ebo usu isąwai. 
Tama tigidali provinsde te tigidali kiap dabe me, te tigidali gavman bage me, te tuni bidigo polalubo bidi dabe, te augwaligo me te Juda dabe augwali tau sali, magi baso meni, augwali te Mordekaide wi yalio. 
Te tuni bidigo provins dabede bidibo tigidali bidigo koneani, te king bidigo te genuai nogi me te genuai bomo te Mordekaibolo mawai. Tama agai bomo genuai geninama, tigidali sogo pedaliyu yalio. 
Tama te Juda dabego te augwa boi bidi dabebolo umabo sę eyu, te augwali mu dolali. Augwaligo te bobobage hwą ge bainat tulama, tama te boi bidi dabe dali hwįnama, tama bidi hauwa ela muai dao. 
Te gavmango polalubo moni hanu Susade te Juda dabe augwaligo te bidi sese umabo 500 bidi tigidali ela muani. 
Tama te Juda dabego boi bidi, te Hamango ogwa dabe nogo si bidi, te augwaligo ela muani. Te augwaligo nogi dabe e dao, Parsandata, Dalfon, Aspata, Porata, Adalia badi, Aridata, me Parmasta, Arisai, me Aridai, me Vaisata, te tama bidi ela muai. Tiali goli, te Juda dabego augwaligo doado bage me sabeo. 
Te sogo naga te Juda dabe augwaligo te Susa moni hanude te nisu naga bidi elaliwe te po tuni bidibolo pusali. 
Nosali gana king bidigo te tuni kwin we Estabolo te po wai, “Te moni polalubo hanu Susade naga te Juda dabe augwaligo te bidi sese umabo 500 bidi ela muanio,” po wai. “Tama augwaligo te Hamango ogwa dabe nogo si me elai. Tama eno homugo te gasa provins dabede me augwaligo te umabo hauwa bidi elali homu yai. Megi nago mena gasa nai sabo homu ebawe? Te usu da, te eno nage mawaibao. Te nago mena nai sainu godolo homu ebo te nago pogo naga wao,” kingo te po wai. 
Estago po wei ponoyu, king bidibolo te tiwai po wai, “Tuni bidi, nago homugo usu da wida, teda te Susa moni hanude bidibo Juda we bidi augwaligo do me te megi e sogode yali sę tiwai augwaligo te boi bidi dabe dali emainu sula tagalao. Tama augwaligo te Hamango ogwa nogo si bidi augwaligo tigi te ni posde walaibao,” wali. 
Tialima, king bidigo augwalibolo tama tiao po wai. Tama agai te po te moni hanu Susade bidibo bidi dabebolo ola tolai. Tama augwaligo te Hamango ogwa nogo si bidi te ni posde walobo te tigidali bidigo suai dao. 
Te polua nogo si olama, sągągo si wabo polua, te 14 dei, tede te Susa moni hanude bidibo Juda dabe ma sisinama, tama te bidi sese hauwa umabo 300 bidi mu te hanude ela muanio. Tiali goli, augwaligo doado bage dabe te augwaligo me sabeo. 
Te gasa provins dabede bidalubo te Juda dabe, augwali me te bugagia bidainu te hwįbo sę bomo yai. Augwaligo te boi bidi dabe dali umabo sę mu elama, te bidi sese hauwa umabo 75,000 bidi mu ela muani, te augwali godolo isąwani bidi dabe dao. Tiali goli, augwaligo doado bage te augwaligo me sai menio. 
Augwaligo te tiwai sę te provins dabede te polua Adar, te 13 dei, tede te sę ela pai. Tama do tama, te polua dei 14, tede augwaligo te boi bidi dabe me elibeo. Menio. Te side augwaligo te genuai nai daa tuyu, tama genuai homu pemene wiegi yai dali yai. 
Tiali goli, te moni hanu Susade bidibo Juda dabe, augwaligo te 12 wabo polua nogi Adar dei 15, tede augwaligo te olo bidabo side te holide yabo po bodolu tiwai me deli muani. Magi baso meni. Augwaligo te polua Adar te 13 deide, me 14 deide, te boi bidi dabe elali, te 15 deide, tede augwaligo me hwįbeo. 
Te tama tialide, te obo menisiąwai dwasianu hanude bidali te Juda dabe, augwaligo te polua Adar dei 14 tede te olo bidiyu, te dwagi yai homu pemene ebo genuai side tiwai bodolu muai. Augwaligo te side bodolu muyu, te genuai nai daa tuyu, tama augwa hasi deli delibolo te wiegi yai homu ilibo kolesaga yabo bodolu muai dao. 
Mordekaigo te side te pedelali sę po tigidali asęnama, tama te pąde bidibo Juda dabebolo, me te digibulu bidibo Juda dabebolo, te pas tolali, te provins tigidali badu te gavman tuni bidi king Serksisgo tonaluai madi dao. 
Agai augwalibolo weyu, augwaligo te polua Adar, dei 14; 15 dei, te side te tigidali kibu bede te olo bidiyu, toma nabo si bodolu muao po wai dao. 
Te side si sogo te Juda dabe augwaligo te augwa boi bidi dabe sela sąwani side dao. Tama te poluade naga te augwali homu sęgę me homu dene yali hasegelama, tama dwagi yai homu pedelai. Tama Mordekaigo augwalibolo weyu, te side si sogo te genuai nai daa tuyu, tama abagi dedebolo, me te magi nai meni yai bidi dabebolo, te nai dobayu yao po wai. 
Tama te Juda dabe augwaligo te Mordekaigo po wali pelama, tama augwaligo te wiegi yai homu pemene ebo kolesaga te tigidali kibu bede yai dao. 
Polobadu Haman, te Hamedatago ogwa tama Agakgo wąį, tama Juda dabego boi bidi agai te Juda dabe tigidali ela muainu te satu gagali elama, te elabo side te bodolu gegelama muani bidi dao. Te Hibru pogo te satu nogi augwaligo purim wali. Hamango te po minama, po dąų weyu, te Juda dabe tigidali silaibao po wai dao. 
Tiali goli, Esta te king bidi bidibo madi pobaso, tama tuni bidigo te tiwai po asęani, “Polobadu Hamango te Juda dabe dolaibao po wali, tiali goli megi da, aga digi te dolobao,” te tiwai po asęani. Tama augwaligo aga te nide walama, tama nosali augwaligo te aga ogwa dabe me te ni posde walai. 
Te tama tialide augwaligo te toma nabo side te bodolu si nogi yali, te page Purim. Te nogi page e dao, te satu dao. Augwaligo tama kolesaga yali, magi baso meni, te tiwai sę augwaliba pedelali homu elama, tama Mordekaigo augwaliba te pas tolama, tama augwalibolo weyu, te side te toma neyu, olo bidao po wai dao. 
Te Juda dabego te tiwai kolesaga ilali, te augwa digi me, te augwa wąį dabe nosali pedelabo bage dali, augwa bomai po muani, tama mena bidi te Juda hani tomoba asobo bidigo me te bomai po wali pai. Te si sogode te tigidali kibu bede, augwaligo te sę pedelali te homugo kone palao, te tiwai po Mordekaigo wai dao. 
Augwaligo e tama tiwai po wai, te tigidali Juda hani sibi deli delide te nosali pedalubo tigidali wąį dabe badi, te tigidali tǫ pedaide bidibo Juda we bidi me, te genuai hanude bidalubo we bidi tigidali augwaligo te bodolu muani, te Purim te bodolu side te tigidali kibu bede te toma tuyu bidao po wai dao. 
Tama kwin we Esta, te Abihailgo wegi, aga de Mordekai dali, augwali sigo te Purim bodolu muani si elalubo te gasa pas asęnama, tama tuni we kwingo te Mordekaigo hasia agaduba asęani paside po bolo dąų walai. 
Augwali sigo te pas te genuai tǫ Persiade elalubo te provins bidi sese hauwa 127 tede bidibo te Juda dabebolo tolalio. Paside te tiwai po wai, “Te dagego homu nagame ela bidiyu, tama duga homu tegaluama, bugagia bidiyu, tama hwįabo sę meni yaibao. 
Tama dage me, te duga wąį nosali pedalubo me, dagego te Purim side te bodolu si te dąų ola sao, te dagego nai osogo gisiliyu, te homu sęgę me gela weyu ebo sogo te dąų wabo bomai po tiwai gilama yao,” po wali. “Ena Mordekai de te kwin Esta dali, da sigo te bomo yai po dage tigidalibolo mobao.” 
Te kwin Estago bomai pogo te Purimgo bomai po dabe dąų walama, tama augwaligo te pepa me delide asęnama, tama munaluai dao. 
