﻿Jop.
2.
Me sogo ma, Godigo ensel mobo bidi dabe ma Godigo geduba ma sisinagasali. Te sogo me te Satan me Godigo geduba asali. 
Tama tibaso, Godigo agabolo hanalu wali, “Nage menade bidama, asobawe?” po wali. Te po obaso, Satango te po wali, “Ena te tǫ deli badu naga bidama, asobeo. Ena te tigidali tǫde usu elama, bilama, asobao,” wali. 
Te po obaso, Godigo agabolo te po hanalu wali, “Nago eno sę ebo bidi Jop sualiwe, ma meniwe? Jop aga te dwagi yai doloba pai bidi mu eno gedude bidibo dao, dwai sę me ebo menio. Aga lotu po weyu, ena dologode naga bilibo dao. Tama eno po bugagia wali peyu, tama ebo dao. Agai dwai sę ebo hagela homu ebo dao. Te tigidali tǫde bidi aga tiwai me bidibeo. Nago ena homu bega sabo po obaso, tama eno nage taga palali digi, nago aga dali dwai sę genuai mu yai dao. Tiali goli, agai ena tagalobeo. Menio. Agai ena polobadu wali asali tiwai me asai dao,” Godigo te po wali. 
Te po obaso, Satango te po wei ponoyu, te po wali, “Mu tamawe? Tiali goli, eno homugo bidi me aga bugagia bidaibao homu eyu da, teda te bidi aga tigidali nai menama, aga bidibo ula abelaibao. 
Tama eno homugo nago agai tigi dolomai homu ebao. Tama tibode nago suaibao, agai nagebolo dwai po mu waibao,” wali. 
Te po obaso, Godigo agabolo te po wali, “Eno aga nago nogode e tagalobao. Nago agai tigide magi sę me yabo homu ebaso da, yao. Tiali goli, nago aga mu isilamo dao,” Godigo te po wai. 
Tama tibaso, te dwai Satango Genuai Bidigo te po odasa, Genuai Bidi taga peyu, te Jopgo tigide dili keni tiwai hauwa mu ela bibideli pali. 
Tama tibaso, Jop aga moni hanude dwai dwai nai sąbo madi pali, tama aga te isi nogani sisi dulude dulaluali. Tama agai te tǫgo nigali sene me toga pai, te dage me deli selama, tama agai aga te dene ebo keni naga hadu bidali. 
Tama aga we aselama, te bidi sulama, te po wali, “Magi baso nago God wali me pidubawe? Nago God tagalama, tama agabolo dwai po wao, agai nage isilimainogo tiao,” wali. 
Tiali goli, Jopgo wei ponoyu, te po wali, “Nago po te dwai kolesaga yai wego wabo ąǫ te ebao. Ma, dago dwagi yai te Godigo da dwagi yai nai dabe mabode dwagi yai homu ebo dao. Te magi baso dago Godigo dabolo te dwai sęgę mabode dwagi yai homu egobewe?” te po aga webolo hanalu wali. Mu tama, te dwai sęgęgo Jop pedelali goli, agai Godibolo dwai po me deli wabeo. 
Te Jop aga abagi sela augwaligo te Jop agai tigi te dwai sęgę yali po odama, tama augwaligo po bodolu sali, te deliba sisinama, te bidi sugi paibao. Tama augwa bulu taga solama, Jop sugi soali, te agade augwaligo hobede ola mayu, tama agai homu dąų waliyu emainu. Te bage augwaligo nogi e tama dao, Elifas, te Idom bagego hanu nogi Tema bidi dao, te Bildat te tǫ nogi Suha, te Sofar te bulu nogi Nama. 
Augwali Jop pąba sabolisąma ebadi, augwaligo aga suali. Agai tigi mu dolai mu sulama, tama agai tigi gasagi yai mu elaluali. Hasia bolo te bidi Jop da te kuna konegobeo. Augwa ugwa pipisąyali, augwali hobede ebo ola momainogo, tama gela wabo gagalali. Tama augwaligo tǫ hogomu augwa tigiba ugwaba sąyani. 
Tama tilama, augwali aga dali tǫba duagulali. Augwali aga dali bidibadi, nogo a naga olama, me badu nogo badu si sogo aga dali bidali. Tama augwaligo agade po me wabe, magi baso meni, aga augwaligo suali, agai tigide moni dene mu saibaso. 
