﻿Jop.
9.
Tama Jopgo Bildatgo po wei ponoyu, te tama wali. 
“Mu tama, eno koneani, nago po dolo mu dao. Tiali goli, bidi Godigo po tų eboba sabolagi peyu da, teda mena tama aga Godigo gedude doloba pai bidi pedalaibawe? 
Bidigo God dali pogo hąę po wabo sogo da, teda tagala, Godigo agabolo 1,000 nai dabe hanalu waibao. Bidigo Godigo hanalubo po wei deli me ponogobeo. 
Godigo haniani dwagi yai kolesaga dabe, me dwagi yai homu kolesaga, tama bomo me elalubo, tama dęą sogobeo. Tialima, niwai bidigo Godigo bomo dali, kolesaga dali si usu selama, God edelaibawe? 
Ma, God agai sębę deli sogo eyu da, agai bulu du dabede deli sogo ibaba kidilibo dao. Tama augwali mu dolama, tagalobo dao. 
Agai te tǫ dąų walalubo nai mumunu baso, tama te tǫ mali genina mu emainu ebo dao. 
Agai po wabo goli, tama giliga agai po wali pode pedalugobeo. Tama aga hǫ dabego ula paliama, dago ula me sugobeo. 
Agaduba deligo naga dagalu ugwade dinigina palai dao. Te tamu ąį holobo sogo da, te ąįba hologobe aga ugwadu bilibo dao. 
Tama God agai te hǫ dabe nigai, tama te hǫ dabe augwa nogi deli deli elalubo. 
Agai haniani bomai sę mu ebo dao. Agai ebo kolesagago dago ebo kolesaga edelai elalubo. Tama dago agai nigali nai dabe nedebo usu egobeo,” wali. 
“Tagala, God ena pąba mu aselama, tama ena ela soabo si, eno konegobeo. Tama aga ena pąba asobosi, eno aga me sugobe. 
Ma, agai magi nai me wei yali da, teda agai siyu naga ebo dao. Bidi mego aga me togolobo, usu egobeo. Tama dego aga hanalu waiba, ‘Nago magi sę ebawe?’ 
God agai boi bidi dali sębę ebo kolesaga sesemane sogo idu gebo dao, simanogobeo. Mu tama, te moni tamu ąįde bidibo bulu hwabidi gulamane dali, aga wali asali genuai hani dali si, te Godigo aiyaba elaluama, tama aga dologode elalubo dao. 
Ena bomo mu meniama, tama eno Godigo po wei ponabo usu egobeo. Tama ena God aga po tų ebode doloyu da, eno magi po wagawe? 
Tagala eno magi sęgę meniama, magi po meniama, tama te po tų ebode ena dolo dali pai. God aga digi aga te po tų odobo bidi dao, tama agai ena po tų ebo dao. Tiali goli, eno agabolo ena hobede ya po hanalu waibao. 
Ma, tama eno aga i olama, tama te po tų odagasa obaso da, tama aga asigi sogo da, teda eno homugo agai eno po odogi menio. 
Agai moni tulubage dali, wali dali si tagala paligi dao. Tama ena aiyaba elaluama, tama eno dwai sę yai elalubao wainu, tiali goli agai ena mu doliyu igi dao.” Jopgo te po wali. 
“Agai ena doanu me tagaliyu me ebe. Tama tibaso, ena homu hę wabo usu ebe. Agai te sę dabe ena tigide ebo digi, ena homu sęgę genuai mu ebao. 
Ma, Godigo bomo eno usu sainogo eyu da, teda agai bomogo ena aiyaba elaluaibao. Tiali goli, eno po tų ebode po dodoliyu da, teda dego aga tobage dwagi yai te po tų ebode yaibawe? 
Eno dwai sę me ebe, tama eno aga gesabidide dwai dwai sę dabe me ebeo. Tiali goli, ena Godigo po tųde doloyu da, teda eno po geda munama, ena digi ena ma po tų ela mawaibao. 
Mu tama mu, eno magi sęgę sę deli mu me ebe. Tiali goli, eno homugo ena te olo nai dabe mu ąǫ te ebao. Tama ena bidibo ula mu da ena hagela mu ebao. 
Eno polo mu konea pali. Tagala, da tigidalide te tobage sę naga ebo dao. Tama agai koneani, dago sęgę elalubo wei ma meni. Godigo da mu sia sabo dao. 
Tama ma dwai sogo pedalobo si da, da doloba pai we bidi dolobo. Godigo dwagi yai homu ebo dao, te sęgę subode. 
Godigo dwai dwai kolesaga ebo bidigo e tǫ tonalumainu sula tagalai dao. Tama agai te po tų odobo bidigo kolesaga begelama, tama te po tų bugagia odobo meni. Ma, Godigo te sę dabe igi menigi sogo da, teda dego mu igi dawe?” Jopgo te po wali. 
“Eno bidibo bubuga polo sia siyu ebo dao. Augwali umagia mu polo pabo dao, te bidi po sela peyu pabo te edelebo dao. Tama tibaso, ena dwagi yai sogo ma sisinabo usu me egobeo. 
Te be posobo sogo da, te węde geba polo pabo tiwai ebo. Te me e tiwai dao, te ba kemodagego bolo ela tuainu polo toga dulubo, te tiwai ebo. 
Ma, eno yaide ena tigide sęgę elalubo homu gegeda palama, bugagia bidigi sogo da, teda usu mu igi dao. Tiali goli, eno homugo te wei ebo si da, 
teda eno te sęgę dali, te tigi dene dali si wi ma ebo. Magi baso meni. God nago ena polo suali, eno dwai sę nago gedude ebo suali. 
Tama tialima, eno magi baso eno magi sęgę me ebeo olama, usu me sidubo wagawe? Eno po olo madi toga pabo. 
Ma, eno dwagi yai sobu selama, dwagi yai meda meni yai węba wę paugi pelama, nago gedude dwai meda menia pai pedaluyu da, 
teda eno homugo ena olo wę pauwaibao.” 
“Ma, God aga olo bidi tama tigi sogo da, teda da si po tų ebo madi pelama, da sigo po dodoligi pigi da. 
Tiali goli, bidi me bidibe yabo, agai bomo usu mu elalubo, agai te da sigo wado po dabe, me po dabe tama dodolobo usu yaiba. 
Tama te tobage bidi bidibe yabo, agai Godibolo po weyu, tama Godigo ena eleyu, me ena dene iliyu elama, tama ena wi ilibo tagalao po wabo bidi mu menio. 
Ma, te tobage sę yabo bidi me deli elalubaso da, teda eno Godide wi me egobe, tama eno homu sęgę ebo po agabolo dolo wabo usu yaibao. Magi baso meni, eno koneani, eno dwai kolesaga mu menio,” wali. 
